Kpuyia 1: Asoo Me Ɛbɛlabɔlɛ Gyi Bodane Zo?

ROSALIND mɔɔ bɛtetele ye wɔ England la hulole kɛ ɔsukoa nwoma kpole. Ɛnee eza ɔkulo kɛ ɔboa menli. Ɔwiele sukulu la, ɔnyianle gyima kpalɛ na ɛnee bɛboa menli mɔɔ ɛnlɛ ɛleka ɛnla yɛɛ bɛdabɛ mɔɔ bɛlɛ ngyegyelɛ la. Ɔnva nwo kɛ ɛnee ɔyɛ gyima mɔɔ maa ɔ nwo tɔ ye na ɔlɛ ezukoa la, ɔhanle kɛ, “Meva ɛvolɛ dɔɔnwo mebiza kɛ, ‘Duzu ati a yɛwɔ ɛke ɛ?’ yɛɛ ‘Bodane boni a ɛbɛlabɔlɛ gyi zo a?’”

Duzu ati a kpuyia ɛhye anwo hyia ɛ?

Menli ɛnle kɛ nane mɔɔ bɛndwenle la. Yɛkola yɛsukoa debie yɛfi mɔɔ ɛzi dɛba la anu, yɛsuzu yɛ kenlebie nwo, na yɛkpondɛ bodane wɔ yɛ ɛbɛlabɔlɛ nu.

Mualɛ boni a bie mɔ fa maa a?

Menli dɔɔnwo suzu kɛ mɔɔ hyia kpalɛ wɔ bɛ ɛbɛlabɔlɛ nu la a le kɛ bɛbanyia anwonyia anzɛɛ bɛbalie duma amaa bɛ nye alie.

Duzu a mualɛ ɛhye maa yɛnwu ye a?

Yɛfa ninyɛne mɔɔ yɛ nye die nwo la yɛdumua yɛ ɛbɛlabɔlɛ nu. Mɔɔ yɛkulo la hyia yɛ tɛla Nyamenle ɛhulolɛdeɛ.

Duzu a Baebolo ne kilehile a?

Belemgbunli Sɔlɔmɔn boɔboale anwonyia dɔɔnwo anloa yɛɛ ɔlile anyelielɛ nzi, noko ɔnwunle kɛ ninyɛne zɔhane mɔ ɛmmaa bɛnnwu bodane kpalɛ mɔɔ wɔ ɛbɛlabɔlɛ nu la. Ɔhɛlɛle edwɛkɛ ɛhye ɔvale ɔlale bodane mɔɔ wɔ ɛbɛlabɔlɛ nu la ali: “Bɛzulo Nyamenle, na bɛli ye mɛla ne mɔ azo, ɔboalekɛ sonla gyima mɔɔ la ɔ nwo zo la ala ɛne.” (Nolobɔvo ne 12:13) Nyamenle mɛla ne mɔɔ yɛdi zo la kile duzu?

Nyamenle bodane mɔɔ ɔlɛ ɔmaa yɛ la bie a le kɛ yɛ nye balie ɛbɛlabɔlɛ nu. Sɔlɔmɔn hɛlɛle kɛ: “Debie kpalɛ biala ɛnle ɛkɛ ɛmmaa sonla ɛndɛla kɛ ɔkɛli na ɔkɛnlo, na ɔkɛlielie ɔ nye wɔ ye ɛvɛlɛ nwo. Menwunle kɛ ɛhye noko vi Nyamenle ɛkɛ.”—Nolobɔvo ne 2:24.

Nyamenle noko kulo kɛ yɛkulo yɛ nwo na yɛnea yɛ abusua. Yɛ adehilelɛ sikalɛ mɔɔ anu la ɛkɛ mɔɔ ɔvale ɔmanle abusua ne anu amra la nzonlɛ.

“Ɔwɔ kɛ kunlima kulo bɛ ye mɔ kɛ bɛ nwo.”—Ɛfɛsɛsema 5:28.
“Na yelɛ biala noko di ɔ hu eni.”—Ɛfɛsɛsema 5:33.
“Ngakula, bɛdie bɛ awovolɛma.”—Ɛfɛsɛsema 6:1.

Saa yɛfa Baebolo ngyinlazo ɛhye mɔ yɛdi gyima a, ɔbamaa yɛanyia anyelielɛ nee ahunlundwolɛ. Noko akee, mɔɔ hyia kpalɛ mɔɔ ɔwɔ kɛ yɛyɛ la a le kɛ yɛbazukoa yɛ Bɔvolɛ ne anwo debie na yɛahwe yɛabikye ye kɛ yɛ Gɔnwo. Nɔhalɛ nu, Baebolo ne to ɛsalɛ fɛlɛ yɛ kɛ: “Bɛhwe bɛbikye Nyamenle.” Akee ɔbɔ ɛwɔkɛ kɛnlɛma ɛhye: “Na ɔdaye noko ɔkɛbikye bɛ.” (Gyemise 4:8) Saa ɛdie ɛsalɛdolɛ ɛhye ɛto nu a, wɔ ɛbɛlabɔlɛ bagyinla bodane kpalɛ zo.

Saa ɛkulo kɛ ɛnwu dɔɔnwo wɔ kɛzi ɛbabɔ ɛbɛla mɔɔ sɔ Nyamenle anye la anwo a, nea Duzu A Baebolo ne Kilehile Amgba A? buluku ne tile 12. Ɛbahola wɔahwe bie wɔ www.jw.org

Duzu A Gyisɛse Hanle Ye Wɔ Bodane Mɔɔ Ɛbɛlabɔlɛ Gyi Zo La Anwo A?

Ɛnee Gyisɛse ze bodane mɔɔ ye ɛbɛlabɔlɛ gyi zo la. Ɔhanle kɛ: “Na ɛhye ala ati yɛɛ bɛwole me bɛmanle membale ewiade ye anu a, kɛ membanli nɔhalɛ ne anwo daselɛ.” (Dwɔn 18:37) Gyisɛse vale ye ngoane mekɛ hilehilele menli Nyamenle anwo nɔhalɛ nee Ye bodane ne mɔ.

Saa yɛanli Gyisɛse neazo ne anzi a yɛ ɛbɛlabɔlɛ bayɛ mgbane. Nɔhalɛ nu, Gyisɛse hanle kɛ yɛzukoa ye. (Mateyu 11:29) Maa yɛzuzu ndenle nwiɔ mɔɔ yɛbahola yɛalua zo yɛayɛ zɔ la anwo.

Gyisɛse hanle kɛ saa yɛ nye balie a, ɔwɔ kɛ yɛnwu yɛ ‘sunsum nu ngyianlɛ.’ (Mateyu 5:3) Yɛbahola yɛali yɛ sunsum nu ngyianlɛ nwo gyima, saa yɛsukoa ‘nɔhalɛ Nyamenle kokye ne, nee Gyisɛse Kelaese mɔɔ ɔzoanle ye la’ anwo debie a.—Dwɔn 17:3.

Gyisɛse zele ye ɛdoavolɛma ne kɛ bɛhilehile menli ninyɛne mɔɔ bɛzukoa la. Ɔhanle kɛ: “Bɛhɔ maanle ti nee maanle bo, bɛmaa menli ɛrayɛ me ɛdoavolɛma; bɛzɔne bɛ wɔ Selɛ ne, Ralɛ ne nee Sunsum Nwuanzanwuanza ne duma nu, na bɛhilehile bɛ bɛmaa bɛli debie biala mɔɔ meha mehile bɛ la azo.”—Mateyu 28:19, 20.

Bɛdabɛ mɔɔ bɛdua Baebolo ɛzukoalɛ zo bɛdi bɛ sunsum nu ngyianlɛ nwo gyima na bɛfa mɔɔ bɛsukoa la bɛyɛ gyima la yɛ nzenzaleɛ kpalɛ wɔ bɛ ɛbɛlabɔlɛ nu. Mekɛ mɔɔ bɛlɛboa awie mɔ bɛamaa bɛazukoa Nyamenle anwo debie la ɛnee anwodozo mɔɔ bɛlɛ kɛ bɛ ɛbɛlabɔlɛ gyi bodane zo la noko anu ɛlɛmia.