Duzu Ati A Nzisi Tɛkɔ Zo Ɛ?

EDWƐKƐ zɔhane kilehile tumi mɔɔ alesama ɛli ɔvi tete la anu ɔmaa ɔfɛta. Alesama tumililɛ ɛmaa menli ɛnwu amaneɛ dɔɔnwo. Wɔ mekɛ kɔsɔɔti anu, anyebolo nee nzizi ɛmmaa menli mɔɔ lɛ adwenle kpalɛ na bɛkulo kɛ nɔhalɛlilɛ ba la ɛndwu bɛ bodane ne anwo. Duzu ati a ɔle zɔ a? Duzu ati a nzisi tɛkɔ zo ɛ? Ye titile ne, ninyɛne nsa ɛhye mɔ a ɛmaa yera ye zɔ a.

1. Ɛtane mɔɔ bɛvale bɛwole yɛ.

Baebolo ne ka ye wienyi kɛ yɛ ‘kɔsɔɔti yɛzo ɛtane.’ (Wulomuma 3:9) Ɔle kɛ ewule mɔɔ ɔnlɛ ye ayile mɔɔ bɛva bɛwo yɛ, yɛ nee ye a “de” a. Wɔ ɛvolɛ dɔɔnwo anu, ɛtane “lile” alesama anwo zo kɛ belemgbunli. Ye “mɛla” ne kɔ zo yɛ gyima wɔ yɛ nu. Bɛ nzuzulɛ ɛtane ne maa bɛfa mɔɔ bɛ nye die nwo la bɛdumua anzɛɛ bɛ ɛbɛlabɔlɛ kɔsɔɔti gyi anwonyia ɛkpondɛlɛ zo yɛɛ bɛ tumi ne ati, bɛdua awie mɔ anwo zo bɛnyia bɛ nwo.—Wulomuma 5: 21; 7: 17, 20, 23, 25.

2. Ɛtane ewiade ne mɔɔ yɛde nu la tumi ne.

Anyebolo nee angomedi ɛbu ewiade. Ɛhye ati, ɔnla aze kɛ awie bakpo nyɛleɛ ɛhye mɔ. Angomedi ti, bɛ kunlu anu a anrɛɛ bɛlɛ tumi. Eza bɛpele bɛkpondɛ ezukoa nee anwonyia dɔɔnwo bɛtɛla mɔɔ bɛhyia nwo bɔbɔ la. Ɔyɛ alɔbɔlɛ kɛ, bɛkpondɛ kɛ bɛfa mɛlɛbɛla adenle biala azo bɛdwu bɛ bodane nwo la. Kɛ anrɛɛ bɛkɛkpo nyɛleɛ ɛtane ɛhye la, menli ɛhye mɔ “toa menli dɔɔnwo ne yɛ ɛtane.”—Adendulɛ 23:2.

3. Seetan Abɔnsam tumi ne.

Seetan, sunsum nu abɔdeɛ ɛhye mɔɔ ɛde atua la ɛlɛbɛlɛbɛla “ewiade amra amuala.” (Yekile 12:9) Ɔ nye die kɛ ɔbava menli yeali gyima kɛmɔ ɔkulo la. Bie a ɔbabɛlɛbɛla awie mɔɔ kulo anwonyia anzɛɛ ezukoa dɔɔnwo la yeamaa yeasisi awie mɔ.

Asoo ɛhye kile kɛ yɛle kɛ aboduaba wɔ Seetan asa nu mɔɔ ɔwɔ kɛ yɛtie ye wɔ debie biala mɔɔ ɔbaha kɛ yɛyɛ la anu ɔ? Yɛbanwu mualɛ ne wɔ edwɛkɛ mɔɔ doa zo la anu.