Nvasoɛ Wɔ Zo

“Wɔ edwɛkɛ ne le kɛnlaneɛ maa me, ɔle wienyi wɔ me adenle nu.”​—EDWƐNDOLƐ 119:105.

KƐZI BAEBOLO NE LE NGAKYILE Ɛ? Bɛbu mbuluku bie mɔ kɛ bɛle kpalɛ, noko bɛngola bɛnva ɛbɛlabɔlɛ nwo adehilelɛ kpalɛ bɛmmaa. Bɛyɛ nzenzaleɛ wɔ adwuleso mbuluku mɔɔ fa adehilelɛ maa la anu dahuu. Noko Baebolo ne ka kɛ, “Debie biala mɔɔ bɛhɛlɛ ye wɔ Nyamenle Edwɛkɛ ne anu la wɔ ɛkɛ ne kilehile yɛ.”​—Wulomuma 15:4.

NEAZO: Ɔwɔ nuhua kɛ Baebolo ne ɛnle ayileyɛlɛ nwo buluku ɛdeɛ, noko nzuzulɛ kpalɛ mɔɔ fane nganeɛdelɛ nee kpɔkɛdelɛ nwo la wɔ nu. Kɛ neazo la, ɔka kɛ “anzonudwolɛ maa nwonane ba bɛ nwo.” (Mrɛlɛbulɛ 14:30) Baebolo ne eza bɔ kɔkɔ kɛ: “Sonla mɔɔ ɛnzo menli avinli la bua ɔ nwo benle ɔfa ɔsɛkye ndɛnebualɛ kpalɛ biala.” (Mrɛlɛbulɛ 18:1) Noko, eza ɔka kɛ “nyilalɛ dɔɔnwo wɔ ɛmanlɛ nu tɛla ɛlielɛ.”​—Gyima ne 20:35.

MƆƆ NEƐNLEANUMA ƐNWU YE LA: Anzondwolɛ, agɔnwolɛvalɛ kpalɛ, nee nyeleyɛlɛ kola maa yɛnyia kpɔkɛdelɛ kpalɛ. The Journal of the American Medical Association bɔ amaneɛ kɛ: “Mrenya mɔɔ ta fa ɛya ɛsesebɛ la ta nyia ewule mɔɔ maa bɛdwidwe la bɛtɛla mrenya mɔɔ komo bɛ nwo zo la mɔnwo nwiɔ.” Neɛnleanu bie mɔɔ bɛvale ɛvolɛ bulu bɛyɛle ye wɔ Australia la manle ɔlale ali kɛ “mgbanyima mɔɔ bɛlɛ agɔnwolɛ dɔɔnwo na bɛ nee bɛ di adwelie la” kyɛ na bɛawu. Na wɔ 2008 anu, neɛnleanuma mɔɔ bɛvi Canada nee United States la nwunle kɛ “ezukoa mɔɔ sonla sɛkye ye wɔ awie mɔ anwo la maa ɔ nye die tɛla mɔɔ ɔsɛkye ye wɔ ɔdaye mumua ne ɔ nwo la.”

KƐ WƆ ADWENLE SE WƆ Ɛ? Ɛbalie buluku gyɛne bie mɔɔ bɛhɛlɛle bɛwiele la ye ɛvolɛ kɛyɛ 2,000 ɛne mɔɔ ɔka kpɔkɛdelɛ nwo edwɛkɛ la wɔali ɔ? Anzɛɛ Baebolo ne ala?

[Edwɛkɛ mɔɔ bɛkpa wɔ mukelɛ 8]

“Me nye die Baebolo ne anwo kpole kpalɛ . . . ɔluakɛ kpɔkɛdelɛ nwo edwɛkɛ kpalɛ wɔ nu.”​—HOWARD KELLY, M.D., ƆBOKA JOHNS HOPKINS YUNIVƐSITI MGBANYIMA MƆƆ BƐKILE AYILEYƐLƐ NWO DEBIE LA