Asoo Awie A Vea Ɛtanelilɛ Kɔsɔɔti Anzi A?

“ME NEE abɔnsam yɛzomanle yɛ sa nu.” Edwɛkɛ ɛhye a Maamgbole Koyɛlɛ Eku ne sogya kpanyinli mɔɔ ɛnee wɔ Rwanda wɔ 1994 ne la hanle a. Ɛnee ɔlɛdwenledwenle menli ɛhunlɛ ne mɔɔ bɛangola bɛanzɔ ɔ nloa la anwo. Awie fofolɛ ka kɛzi basabasayɛlɛ ne yɛle kpole anwo edwɛkɛ la, ɔhanle kɛ: “Saa awie ɛnlie ɛnli kɛ Seetan wɔ ɛkɛ a, ɔyia me wɔ ɛleka mɔɔ bɛziele menli dɔɔnwo ne wɔ Rwanda la.” Asoo atisesebɛ nyɛleɛ ɛhye mɔ le Abɔnsam gyima amgba?

Menli dɔɔnwo ɛmbu basabasa nee atisesebɛ nyɛleɛ kɛ sunsum nu abɔdeɛ atisesebɛ bie mɔɔ ɛnyelɛ ɛnnwu ye la gyima. Bɛdwenle kɛ ninyɛndane ɛhye mɔ vi ɛtane mɔɔ bɛvale bɛwole sonla la na ye titile ne a le yɛ angomedi subane ne. Bie mɔ noko ka kɛ menli ekpunli bie mɔɔ bɛnyia bɛ nwo na bɛlɛ tumi la a ɛmaa menli ɛyɛ ninyɛne ɛhye mɔ ɛvolɛ dɔɔnwo a, amaa bɛali ewiade ne azo tumi. Yɛɛ bie mɔ noko fa mgbɔvodɛne nee amaneɛnwunlɛ mɔɔ wɔ ɛkɛ la kɔsɔɔti anwo ɛzonle soa bɛ maanle mgbanyima.

Boni a ɛdie ɛdi a? Kɛmɔti a ɛtane, atisesebɛ, menli ɛhunlɛ nee amaneɛnwunlɛ ɛbu ewiade ɛnɛ ɔnva nwo kɛ menli ɛbɔ mɔdenle kɛ bɛsi ye adenle la ɛ? Duzu ati a ɔle kɛ asɛɛ alesama ɛlɛsɛkye bɛ nwo noko bɛbɔ bɛ kɔkɔ a bɛndie ɛ? Asoo awie a ɛlɛmaa bɛayɛ zɔ a? Nwane a sie ewiade ne a? Mualɛ ne bahola azi ɛ nwo.