Ɔnrɛhyɛ Yɛbanyia Asetɛnla Kpalɛ!

“Ɔnrɛhyɛ biala ɛnee amumuyɛnli ne abo zo ɛminli . . . Na bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo.”—EDWƐNDOLƐ 37:10, 11.

SAA ngapezo ɛhye mɔɔ wɔ anwuma ɛkɛ ne la ba nu a ɔnrɛyɛ wɔ fɛ ɔ? Ɔda ali kɛ ɔbayɛ wɔ fɛ. Ndelebɛbo kpalɛ wɔ ɛkɛ mɔɔ ɔti ɔwɔ kɛ ɛdie ɛdi kɛ ɔnrɛhyɛ na yeara nu a.

Yɛlumua yɛzuzu Baebolo nu ngapezo bie mɔ mɔɔ kile kɛ yɛde “awieleɛ mekɛ ne” anu la anwo. (2 Temɔte 3:1-5) Nyamenle manle menli mɔɔ hɛlɛle Baebolo ne la hanle edwɛkɛ ɛhye mɔ dole ɛkɛ amaa yɛanyia anyelazo. (Wulomuma 15:4) Ngapezo ɛhye mɔ mɔɔ ɛlɛba nu la kile kɛ ɔnrɛhyɛ yɛ ngyegyelɛ kɔsɔɔti abo bapɛ.

Wɔ awieleɛ mekɛ ne anzi duzu a bara a? Nyamenle Belemgbunlililɛ ne bali alesama anwo zo. (Mateyu 6:9) Nea nzenzaleɛ mɔɔ Baebolo ne ka kɛ ɔbara azɛlɛ ne azo la:

● Ɛhɔne ɛnrɛhu awie. “Maa aleɛ ɛbu azɛlɛ ne azo; maa abɛlɛ ɛzi agole wɔ awoka ne mɔ azo.”—Edwɛndolɛ 72:16.

● Bɛbadu ewule ngakyile bo. “Awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’”—Ayezaya 33:24.

● Bɛbaziezie azɛlɛ ne. “Ɛsɛlɛ nee azɛlɛ resee bali fɛlɛko, fienemgbole anye balie, zolɛ abɔ ndotolo.”—Ayezaya 35:1.

Baebolo nu ngapezo mɔɔ yɛ anyelielɛ mɔɔ ɔnrɛhyɛ ɔbara nu la anu ekyi bie ɛne. Yɛsɛlɛ wɔ biza Gyihova Alasevolɛ maa bɛhile wɔ deɛmɔti bɛlɛ anwodozo kɛ ɔnrɛhyɛ yɛbanyia asetɛnla kpalɛ la.