Ngapezo 4. Bɛnlɛ Ɛlɔlɛ

“Bɛ ti bayɛ se, bɛnrɛze anwunvɔne.”—2 TEMƆTE 3:1-3.

● Chris nee ekpunli bie mɔɔ nea menli mɔɔ bɛyɛ bɛ basabasa la a yɛ gyima wɔ North Wales a. Chris ka kɛ: “Mekakye raalɛ bie mɔɔ ɛnee ɔlɛba yɛ gyima nu ɛkɛ ne mɔɔ ɛnee bɛbo ye dedee yemɔti ɛnee mennwu ye sonla holɛ la. Mraalɛ bie mɔ di nyane kpole yemɔti bɛngola bɛ ti zo ma bɔbɔ.”

DASELƐ BONI A WƆ ƐKƐ A? Wɔ Afrika maanle ko anu, saa ɛye mraalɛ 3 biala ɛsie ɛkɛ a asɛɛ bɛdole nuhua 1 bɔna wɔ ye ngakula nu. Neɛnleanu bie mɔɔ bɛyɛle ye wɔ maanle zɔhane ala anu la kile kɛ saa ɛye mrenya nsa ɛsie ɛkɛ a bɛ nuhua mɔɔ bo ko la te nganeɛ kɛ saa awie bo ɔ ye a ɔnle ɛtane. Noko tɛ mraalɛ angomekye a bɛbo bɛ bɛboda bɛ wɔ sua nu a. Kɛ neazo la, wɔ Canada, saa ɛye mrenya 10 a bɛ nuhua asɛɛ 3 aye mɔ bo bɛ bodɛboda bɛ.

DUZU A MENLI TA KA A? Tɛ ɛnɛ a basabasayɛlɛ ɛhye ɛbɔ ɔ bo a. Nwolɛ edwɛkɛ yɛɛ menli ɛlɛka ye dɔɔnwo adɛla dɛba ne a.

ASOO ƆLE NƆHALƐ? Menli ɛlɛka basabasayɛlɛ ɛhye anwo edwɛkɛ dɔɔnwo kenlensa ye. Noko asoo ye dɔɔnwo mɔɔ bɛlɛka la ɛde basabasayɛlɛ ne azo? Kyɛkyɛ. Ɛnɛ menli ati yɛ se anzɛɛ bɛnlɛ ɛlɔlɛ.

KƐ WƆ ADWENLE SE WƆ Ɛ? Asoo edwɛkɛ mɔɔ wɔ 2 Temɔte 3:1-3 la ɛlɛba nu? Asoo menli dɔɔnwo ɛnlɛ ɛlɔlɛ kpalɛ ɛmmaa bɛ mbusua ɔ?

Ngapezo mɔɔ tɔ zo nnu mɔɔ ɛlɛba nu la fane yɛ azɛlɛ ye anwo. Nea mɔɔ Baebolo ne ka ye wɔ ɛhye anwo la.

[Edwɛkɛ mɔɔ bɛkpa wɔ mukelɛ 7]

“Amaneɛbɔlɛ kile kɛ menli mɔɔ bɛyɛ bɛ basabasa wɔ sua nu la le ɛtaneyɛlɛ mɔɔ bɛnda bɛmbɔ nwolɛ nolo la anu ko. Saa bɛkyehyɛ nu a, raalɛ bamaa nwolɛ adenle yeamaa ɔ hu abo ye fane 35 kolaa na yeabɔ kpolisima amaneɛ.”—RAALƐ BIE MƆƆ BOKA EKPUNLI BIE MƆƆ WƆ WALES MƆƆ NEA MENLI MƆƆ BƐYƐ BƐ BASABASA ANWO LA.