Maa Baebolo Ne Ɛhilehile Wɔ
Nwane A Le Gyisɛse Kelaese?
Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.
1. Nwane a le Gyisɛse Kelaese?
Gyisɛse ɛnle kɛ dasanli biala la, ɛnee ɔwɔ anwuma kɛ sunsum nu sonla kolaa na bɛawo ye azɛlɛ ye azo. (Dwɔn 8:23) Ɔdaye a Nyamenle lumuale bɔle ye a, yɛɛ ɔboale wɔ ninyɛne mɔɔ ɛha la kɔsɔɔti ɛbɔlɛ nu. Ɔ ngomekye ala a Gyihova angome bɔle ye a, ɛhye ati a bɛfɛlɛ ye Nyamenle Ara “kokye la.” Ɛnee Gyisɛse le Nyamenle Kpɔmavolɛ, yemɔti eza bɛfɛlɛ ye “Edwɛkɛ ne.”—Dwɔn 1:1-3, 14; kenga Mrɛlɛbulɛ 8:22, 23, 30; Kɔlɔsaema 1:15, 16.
2. Duzu ati a Gyisɛse rale azɛlɛ ye azo a?
Nyamenle zoanle ɔ Ra ne wɔ azɛlɛ ye azo. Ɔyele ye ngoane ne ɔwulale Dwuunli belamunli raalɛ bie mɔɔ bɛfɛlɛ ye Mɛle la awodeɛ nu. Yemɔti ɛnee Gyisɛse ɛnlɛ dasanli selɛ. (Luku 1:30-35) Gyisɛse rale azɛlɛ ye azo (1) kɛ ɔbahilehile Nyamenle anwo nɔhalɛ ne, (2) kɛ ɔbayɛ neazo yeayɛ Nyamenle ɛhulolɛdeɛ, na (3) yeava ye ngoane ne mɔɔ di munli la yeayɛ “ɛkpɔnedeɛ.”—Kenga Mateyu 20:28; Dwɔn 18:37.
3. Duzu ati a yɛhyia ɛkpɔnedeɛ ɛ?
Ɛkpɔnedeɛ a le ezukoa mɔɔ bɛtua bɛdie awie bɛfi akɛlɛzonlenlɛ nu la. Ɛnee ewule nee ɛrelerayɛlɛ ɛmboka Nyamenle bodane mɔɔ ɔlɛ ɔmaa alesama la anwo. Kɛ ɔyɛle mɔɔ yɛnwunle ɛhye ɛ? Nyamenle hanle hilele Adam, sonla mɔɔ lumua la kɛ saa ɔyɛ mɔɔ Baebolo ne fɛlɛ ye ɛtane la a ɔbawu. Saa Adam anyɛ ɛtane a anrɛɛ ɔnrɛwu ɛlɛ. Ɔnva nwo kɛ Adam wule wɔ ɛvoya dɔɔnwo anzi la, kenle mɔɔ ɔyɛle anzosesebɛ ne la yɛɛ ɔbɔle ɔ bo kɛ ɔwu a. (Mɔlebɛbo 2:16, 17; 5:5) Adam vale ɛtane nee ye ahatualɛ, ewule gyakyile ɔ bo zo amra kɔsɔɔti. Yemɔti, ewule luale Adam anwo zo “rale” aleɛabo amra anwo zo. Ɛhye ati a, yɛhyia ɛkpɔnedeɛ la.—Kenga Wulomuma 5:12; 6:23.
4. Duzu ati a Gyisɛse wule ɛ?
Nwane a bahola adua ɛkpɔnedeɛ ne na yealie yɛ yeavi ewule nu a? Saa yɛwu a, yɛtua yɛdayɛ mumua ne yɛ ɛtane ne mɔ ala anwo kakɛ. Sonla mɔɔ ɛnli munli la ɛnrɛhola ɛnrɛdua awie mɔ ɛtane nwo kakɛ.—Kenga Edwɛndolɛ 49:7-9.
Gyisɛse annyia sinlidɔlɛ anvi dasanli selɛ biala ɛkɛ yemɔti tɛ ɔdaye ye ɛtane ti a ɔwule a, emomu awie mɔ ɛtane ti ɔ. Nyamenle zoanle ɔ Ra ne ɔmanle ɔrawule ɔlua Ye ɛlɔlɛ kpole ne mɔɔ ɔlɛ ɔmaa aleɛabo amra la ati. Gyisɛse noko hilele kɛ ɔkulo yɛ ɔlua ɔ Ze mɔɔ ɔdiele ye na ɔvale ye ngoane ɔkpɔdale yɛ ɛtane la azo.—Kenga Dwɔn 3:16; Wulomuma 5:18, 19.
5. Duzu a Gyisɛse ɛlɛyɛ ye kɛkala a?
Gyisɛse yɛle wuleravolɛma ayile, ɔdwazole mɔwuamra, na ɔliele amaneɛnwunlɛma. Ɛhye maa yɛnwu mɔɔ ɔbayɛ ye kenlebie yeamaa aleɛabo amra kɔsɔɔti mɔɔ bɛyɛ tieyɛ la. (Luku 18:35-42; Dwɔn 5:28, 29) Gyisɛse wule la, Nyamenle dwazole ye rale ngoane nu kɛ sunsum nu sonla. (1 Pita 3:18) Gyisɛse hendɛle wɔ Nyamenle asa fema zo hɔkpulale kɛ Gyihova manle ye tumi kɛ ɔli Belemgbunli wɔ azɛlɛ ye kɔsɔɔti azo la. (Hibuluma 10:12, 13) Kɛkala, Gyisɛse ɛlɛdi Belemgbunli wɔ anwuma, na ye ɛdoavolɛma mɔɔ wɔ azɛlɛ ye azo la ɛlɛka edwɛkpa ne wɔ ewiade amuala.—Kenga Daneɛle 7:13, 14; Mateyu 24:14.
Kɛ Belemgbunli la, ɔnrɛhyɛ Gyisɛse bava ye tumi ne aye amaneɛnwunlɛ kɔsɔɔti nee menli mɔɔ fa ba la ɛkɛ. Menli mgbe dɔɔnwo mɔɔ die Gyisɛse di na bɛtie ye la banyia ngoane wɔ paladaese azɛlɛ ne azo.—Kenga Edwɛndolɛ 37:9-11.