Debie Biala Angola Anzi Bɛ Adenle

Ɛnee nrenyia bie mɔɔ ɛngola tia la tɛnla ɛzonlenlɛsua ne anlenkɛ ne anloa sɛlɛzɛlɛ ezukoa alehyenlɛ biala. Kenle ko ewiazo, ɔnwunle kɛ Pita nee Dwɔn ɛlɛkɔ ɛzonlenlɛsua ne anu. Ɔzele bɛ kɛ: ‘Mesɛlɛ bɛ bɛhyɛ me debie.’ Pita hanle kɛ: ‘Memaa wɔ debie kpalɛ mɔɔ tɛla ezukoa la. Wɔ Gyisɛse duma nu, dwazo na tia!’ Akee Pita zɔle ye, na nrenyia ne bɔle ɔ bo kɛ ɔtia! Menli ne anye liele nwanwane gyima ɛhye anwo kpole yemɔti menli dɔɔnwo rayɛle diedima.

Noko ɛsɔfo ne mɔ nee Sadusiima ne vale ɛya. Bɛhyele ɛzoanvolɛma ne bɛhɔmaanle Sanhedelin ne na bɛbizale bɛ kɛ: ‘Nwane a maanle bɛ tumi kɛ bɛyɛ nrenyia ɛhye ayile a?’ Pita hanle kɛ: ‘Yɛnyianle tumi ne yɛvile Gyisɛse Kelaese mɔɔ bɛhunle ye la ɛkɛ.’ Ɛzonlenlɛ nu mgbanyima ne mɔ hanle kɛ: ‘Bɛmmaka Gyisɛse anwo edwɛkɛ bieko!’ Noko ɛzoanvolɛma ne hanle kɛ: ‘Yɛbaha ɔ nwo edwɛkɛ. Yɛnrɛgyakyi.’

Mɔɔ bɛgyakyile Pita nee Dwɔn ala la, bɛhanle mɔɔ ɛzi la bɛhilele ɛdoavolɛma mɔɔ ɛha la. Bɛzɛlɛle Gyihova kɛ: ‘Yɛsɛlɛ wɔ boa yɛ maa yɛnyia akɛnrasesebɛ amaa yɛahola yɛayɛ wɔ gyima ne.’ Gyihova maanle bɛnyianle ye sunsum nwuanzanwuanza ne na bɛhɔle zo bɛhanle edwɛkɛ ne na bɛyɛle ayile. Menli dɔɔnwo rayɛle diedima. Sadusiima ne vale ɛya na bɛhyele ɛzoanvolɛma ne bɛguale efiade. Noko nɔe ne, Gyihova zoanle anwumabɔvolɛ maanle ɔhɔbukele efiade ne nlenkɛ ne mɔ na ɔzele bɛ kɛ: ‘Bɛhɔhilehile wɔ ɛzonlenlɛsua ne anu.’

Aleɛ hyenle la, bɛhanle bɛhilele mgbanyima ne mɔ kɛ: ‘Bɛtoto efiade ne nlenkɛ ne mɔ anu, noko menli mɔɔ bɛhyele bɛ la ɛnle ɛkɛ! Bɛwɔ ɛzonlenlɛsua ne anu bɛlɛkilehile menli!’ Bɛhyele ɛzoanvolɛma ne bieko bɛrɛlɛle mgbanyima ne mɔ. Ɛsɔfo kpanyinli ne hanle kɛ: ‘Yɛduale bɛ kɛ bɛmmaka Gyisɛse anwo edwɛkɛ!’ Noko Pita buale kɛ: “Ɔwɔ kɛ yɛtie Nyamenle kɛ tumivolɛ na tɛ menli ɔ.”

Mgbanyima ne mɔ vale ɛya yemɔti ɛnee bɛkulo kɛ bɛku ɛzoanvolɛma ne. Noko Falasiinli bie mɔɔ bɛfɛlɛ ye Gameeleɛle la dwazole gyinlanle na ɔhanle kɛ: ‘Bɛnlea boɛ! Bie a Nyamenle nee bɛ lua. Bɛkulo kɛ bɛko bɛtia Nyamenle ɔ?’ Bɛdiele ye folɛdulɛ ne. Mɔɔ bɛbilale ɛzoanvolɛma ne mbaka bɛwiele la, bɛduale bɛ bieko kɛ bɛgyakyi edwɛkɛhanlɛ ne na bɛmaanle bɛhɔle. Noko ɛhye ammaa ɛzoanvolɛma ne angyakyi. Bɛvale akɛnrasesebɛ bɛhɔle zo bɛhanle edwɛkpa ne wɔ ɛzonlenlɛsua ne anu nee azua nu.