Gyisɛse Wule Wɔ Gɔlogota

Ɛsɔfo mgbanyinli ne mɔ vale Gyisɛse hɔle amɛnlado ne sua nu. Paelɛte bizale bɛ kɛ: ‘Duzu a nrenyia ɛhye ɛyɛ a?’ Bɛhanle kɛ: ‘Ɔse ɔle belemgbunli!’ Paelɛte bizale Gyisɛse kɛ: “Wɔmɔ a ɛle Dwuuma Belemgbunli ne la ɔ?” Gyisɛse buale kɛ: “Me Belemgbunlililɛ ɛnvi ewiade ɛhye anu.”

Akee Paelɛte vale Gyisɛse hɔmaanle Hɛlɔdo mɔɔ nea Galeli azo la kɛ ɔnlea saa ɔbanyia edwɛkɛ bie yeatia ye a. Hɛlɔdo annyia bie ɔti ɔvale ye ɔhɔmaanle Paelɛte. Akee Paelɛte zele menli ne kɛ: ‘Me nee Hɛlɔdo annyia edwɛkɛ biala antia nrenyia ɛhye. Mebagyakyi ye.’ Bɛdeɛdeanle nu kɛ: ‘Ku ye! Ku ye!’ Sogyama bilale Gyisɛse empele, bɛtotole nyɛlɛ ɔ nwo na bɛbole ye. Bɛvale mbowule abotile bɛkpolole ɔ ti na bɛgolole ɔ nwo kɛ: ‘Anzodwolɛ ɛha wɔ, Dwuuma Belemgbunli.’ Eza Paelɛte zele menli ne kɛ: ‘Mennwu ɛtane biala wɔ nrenyia ɛhye anwo.’ Noko bɛdeɛdeanle nu kɛ: “Bɔ ye baka nu!” Ɔti Paelɛte vale ye maanle bɛ kɛ bɛhɔhu ye.

Bɛvale Gyisɛse bɛhɔle ɛleka bie mɔɔ bɛfɛlɛ ye Gɔlogota la, bɛbɔle ye baka nu na bɛmaanle baka ne zo. Gyisɛse yɛle asɔne kɛ: ‘Egya, fakyɛ bɛ, ɔluakɛ bɛnze mɔɔ bɛlɛyɛ la.’ Menli golole ɔ nwo kɛ: ‘Saa ɛle Nyamenle ara a, ɛvi baka ne azo dwu aze! Die ɛ nwo.’

Ɛtanevolɛma ne mɔɔ bɛhenda ɔ nwo ɛkɛ ne la ko hanle kɛ: “Ɛba wɔ Belemgbunlililɛ ne anu a kakye me.” Gyisɛse bɔle ye ɛwɔkɛ kɛ: “Ɛbaboka me nwo wɔ Paladaese.” Ɔdwule ewiazo la, awozinli hedale azɛlɛ ne kɔsɔɔti azo too dɔnehwele nsa. Ɛdoavolɛma ne bie mɔ gyinlanle baka ne anwo, Gyisɛse mame Mɛle boka nwo. Gyisɛse zele Dwɔn kɛ ɔnlea Mɛle kɛ ɔdaye ye mame la.

Akee Gyisɛse hanle kɛ: “Yewie!” Ɔzile ɔ ti aze na ɔliele ye ɛnwomenle mɔɔ li awieleɛ. Ɛkɛ ne ala azɛlɛ kpusule kpole bie. Ɛzonlenlɛsua ne anu mgbɛnudanlɛ ne mɔɔ kyɛ Nwuanzanwuanza Ɛleka nee Nwuanzanwuanza Nu Nwuanzaanwu Ɛleka ne anu la anu dele sinli nwiɔ. Sogya kpanyinli bie hanle kɛ: ‘Amgba nrenyia ɛhye le Nyamenle Ara.’