Gyisɛse Nɔsolɛ Aleɛ Mɔɔ Li Awieleɛ

Ɛnee Dwuuma di Akpabɛnwo Ɛvoyia ɛvolɛ biala wɔ Naesan siane ne kenle mɔɔ tɔ zo 14 la azo. Ɛnee ɛhye maa bɛkakye kɛzi Gyihova liele bɛ vile Yigyibiti akɛlɛzonlenlɛ nu na ɔvale bɛ ɔrale Ɛwɔkɛ Azɛlɛ ne azo la. Wɔ ɛvolɛ 33 Y.M., Gyisɛse nee ye ɛzoanvolɛma ne lile Akpabɛnwo Ɛvoyia ne wɔ Gyɛlusalɛm ɛbolɔnsam bie azo. Mɔɔ bɛlile aleɛ ne bɛwiele la, Gyisɛse hanle kɛ: “Bɛ nuhua ko baye me amaa.” Ɔzinle ɛzoanvolɛma ne anwo na bɛbizale Gyisɛse kɛ: ‘Ɛnee nwane ɔ?’ Gyisɛse hanle kɛ: ‘Ahenle mɔɔ mebava paano ɛhye meamaa ye la ɔ.’ Akee ɔbule paano ne bie ɔmaanle Dwudase Yesekaleɔto. Ɛkɛ ne ala, Dwudase dwazole na ɔvindele.

Akee Gyisɛse yɛle asɔne, ɔbubule paano ne bie anu na ɔvale ɔmaanle ye ɛzoanvolɛma ne mɔɔ ɛha la. Ɔhanle kɛ: ‘Bɛlie bɛli. Ɛhye gyi ɛkɛ ne maa me sonlabaka ne mɔɔ mebava meamaa bɛ la.’ Eza ɔyɛle asɔne ɔguale nwanye zo na ɔvale ɔmaanle ye ɛzoanvolɛma ne. Ɔhanle kɛ: ‘Bɛnlo nwanye ɛhye. Ɔgyi ɛkɛ ne ɔmaa me mogya ne mɔɔ bɛbalua zo bɛava bɛ ɛtane bɛahyɛ bɛ la. Mebɔ bɛ ɛwɔkɛ kɛ bɛ nee me bali belemgbunli wɔ anwuma. Bɛyɛ ɛhye ɛvolɛ biala bɛva bɛhakye me.’ Ɛvolɛ biala, Gyisɛse ɛdoavolɛma yia nu wɔ zɔhane nɔsolɛ ne. Bɛfɛlɛ ayia ɛhye Awulae Nɔsolɛ Aleɛ ne.

Mɔɔ bɛlile aleɛ ne bɛwiele la, ɛzoanvolɛma ne zule awie mɔɔ le kpole wɔ bɛ nu la anwo kpolera. Noko Gyisɛse zele bɛ kɛ: ‘Mɔɔ le kpole wɔ bɛ nu la a le bɛ nuhua ne mɔɔ ɔbu ɔ nwo kakula la.

‘Bɛle me gɔnwo mɔ. Meha debie biala mɔɔ me Papa kulo kɛ meka mekile bɛ la mehile bɛ. Ɔnrɛhyɛ, mebahɔ me Papa anwo lɔ wɔ anwuma. Bɛbaha ɛke na kɛmɔ bɛkulo bɛ nwo ngoko la ati, menli banwu kɛ bɛle me ɛdoavolɛma. Bɛhulo bɛ nwo ngoko kɛ mɔɔ mehulo bɛ la.’

Akee Gyisɛse yɛle asɔne kɛ Gyihova ɛbɔ ye ɛdoavolɛma ne amuala anwo bane. Ɔzɛlɛle Gyihova kɛ ɔboa bɛ ɔmaa bɛva anzodwolɛ bɛyɛ gyima. Ɔyɛle asɔne kɛ Gyihova duma nwo ɛde. Akee Gyisɛse nee ye ɛzoanvolɛma ne dole edwɛne yele Gyihova ayɛlɛ na bɛhɔle. Ɛnee ɔka ekyii bɛkye Gyisɛse.