Kakula Gyisɛse

Ɛnee Dwosefi, Mɛle nee Gyisɛse yɛɛ bɛ mra mrenyia nee mraalɛ mɔɔ ɛha la de Nazalɛte. Dwosefi yɛle kapenta gyima nleanle abusua ne yɛɛ ɔhilehilele bɛ Gyihova nee ye Mɛla ne mɔ anwo debie. Ɛnee abusua ne kɔ nyianusua ne anu dahuu kɔsonle yɛɛ ɛvolɛ biala bɛkɔ Gyɛlusalɛm bɛkɔdi Akpabɛnwo Ɛvoyia ne.

Mɔɔ Gyisɛse lile ɛvolɛ 12 la, ye abusua ne pɛle adenle tendenle ne hɔle Gyɛlusalɛm kɛ mɔɔ bɛyɛ ye dɛba la. Ɛnee menli mɔɔ ɛra kɛ bɛbali Akpabɛnwo Ɛvoyia ne la ɛyi sua ne azo. Mɔɔ bɛwiele la, Dwosefi nee Mɛle dɔle adenle zo kɛ bɛsia bɛahɔ Nazalɛte, na ɛnee bɛdwenle kɛ Gyisɛse boka menli mɔɔ ɛlɛkɔ la anwo. Noko mɔɔ bɛkpondɛle ye wɔ bɛ mbusuafoɔ ne mɔ avinli la bɛannwu ye.

Bɛziale bɛhɔle Gyɛlusalɛm na bɛkpondɛle bɛ ra ne too kenle nsa. Akee bɛhɔle ɛzonlenlɛsua ne anu. Bɛnwunle Gyisɛse wɔ ɛkɛ ne kɛ ɔde kilehilevolɛma ne avinli, ɔlɛtie bɛ edwɛkɛ ne kpalɛ na ɔlɛbizebiza bɛ kpuya kpalɛ. Kilehilevolɛma ne anye liele ɔ nwo kpole na bɛdabɛ noko bɛbizebizale ye kpuya. Ye mualɛ ne zinle bɛ nwo. Bɛnwunle kɛ ɔze Gyihova Mɛla ne kpalɛ.

Ɛnee Dwosefi nee Mɛle arɛle ɛbɔ kpole, yemɔti Mɛle hanle kɛ: ‘Me ra, me nee wɔ papa yɛvɛ kpalɛ wɔ wɔ ɛkpondɛlɛ nu! Ɛhɔle ni?’ Gyisɛse hanle kɛ: “Bɛnze kɛ ɔwɔ kɛ metɛnla Egya sua nu ɔ?”

Gyisɛse nee ye awovolɛ ziale hɔle Nazalɛte. Dwosefi hilele Gyisɛse kapenta gyima. Mɔɔ Gyisɛse le kakula la, subane boni a ɔnyianle a? Mɔɔ Gyisɛse ɛlɛnyi la, ɔnwunle nrɛlɛbɛ kpole na ɔnyianle Nyamenle nee menli nyunlu ɛlolɛ.