Devidi Nee Sɔɔlo

Mɔɔ Devidi hunle Golayate la, Belemgbunli Sɔɔlo vale ye yɛle ye sogyama kpanyinli. DevidI lile konim dɔɔnwo yemɔti ɔliele duma. Saa ɔkɔ konle na ɔlɛba a, mraalɛ ne mɔ fa edwɛne nee agolezilɛ kɔyia ye adenle na bɛto edwɛne kɛ: “Sɔɔlo ɛhu apenle apenle, na Devidi ɛhu apenle apenle bulu bulu.” Mɔɔ Sɔɔlo dele ɛhye la, ɔ nye bolole Devidi yemɔti ɔyɛle kɛ ɔku ye.

Ɛnee Devidi ze haape bɔ kpalɛ. Kenle ko mɔɔ Devidi ɛlɛbɔ haape amaa Belemgbunli Sɔɔlo la, ɔdole ye atwɛ ne kɛ ɔfa yeawɔ Devidi. Noko Devidi hanle ɔ nwo aze na atwɛ ne hɔwɔle bane ne anu. Ɔvi mekɛ zɔhane, Sɔɔlo bɔle mɔdenle fane dɔɔnwo kɛ ɔku Devidi. Yemɔti Devidi nriandile hɔveale ɛsɛlɛ ne azo lɔ.

Sɔɔlo vale sogyama 3,000 hɔle kɛ bɛkakpondɛ Devidi. Ɔrale ye kɛ ɔhɔveale bolɛ bɔne bie mɔɔ Devidi nee ye menli ne vea nu la anu. Devidi menli ne zele ye kɛ: ‘Ɛ sa ɛha Sɔɔlo na ku ye.’ Yemɔti Devidi yɛle nyaa nyaa hɔpɛle Sɔɔlo tɛladeɛ aguzo ne mɔɔ ɔwula la sinli mɔɔ Sɔɔlo annwu ye a. Akee Devidi adwenle buale ye fɔlɛ kɛ yeambu ahenle mɔɔ Gyihova ɛkpokpa ye la. Yeammaa ye menli ne angu Sɔɔlo. Akee ɔvɛlɛle Sɔɔlo bɔbɔ na ɔzele ye kɛ anrɛɛ ɔbahola yeahu ye, noko yeangu ye. Asoo ɛhye maanle Sɔɔlo hakyile ye adwenle ɔ?

Kyɛkyɛ, Sɔɔlo hɔle zo kpondɛle Devidi kɛ ɔku ye. Kenle ko nɔɔzo bie, Devidi nee ye awozoa Abehyae yɛle nyaa nyaa hɔle Sɔɔlo azokoɛleɛ ne. Ɛnee Abenɛɛ mɔɔ sinza Sɔɔlo bɔbɔ la ɛla. Abehyae hanle kɛ: ‘Ɛnɛ yɛ sa ɛha ye! Maa mengu ye.’ Devidi buale kɛ: ‘Gyihova ɔdaye ɔ nee Sɔɔlo bali. Maa yɛva ye atwɛ ne nee ye nzule buakɛ ne na yɛhɔ.’

Devidi hɔvole boka bie, ɛleka mɔɔ ɔgyi a ɔnwu Sɔɔlo azokoɛleɛ ne la. Ɔdeanle nu kɛ: ‘Abenɛɛ, duzu ati a wɔangola wɔanzinza wɔ belemgbunli ne a? Sɔɔlo buakɛ ne nee ye atwɛ ne wɔ ni?’ Sɔɔlo dele Devidi ane yemɔti ɔhanle kɛ: ‘Anrɛɛ ɛkola ɛku me noko wɔangu me. Meze kɛ ɛdawɔ a ɛbayɛ Yizilayɛ belemgbunli a.’ Akee Sɔɔlo ziale hɔle sua nu. Noko tɛ Sɔɔlo abusua ne anu amra amuala a kpɔle Devidi a.