Wulutu Nee Nawome

Mekɛ bie mɔɔ ɛhɔne zile Yizilayɛ la, raalɛ bie mɔɔ bɛfɛlɛ ye Nawome la nee ɔ hu yɛɛ ɔ mra mrenyia nwiɔ dule hɔle Mowabe azɛlɛ zo. Yeangyɛ ɔ hu wule. Ɔ mra ne mɔ gyale Mowabe mraalɛ, Wulutu nee Ɔpa. Mɔɔ yɛ alɔbɔlɛ la a le kɛ yeangyɛ yɛɛ Nawome amra mrenyia ne mɔ wule a.

Mɔɔ Nawome dele kɛ aleɛ wɔ Yizilayɛ la, ɔyɛle kɛ ɔsia yeahɔ sua nu. Wulutu nee Ɔpa yɛle kɛ bɛ nee Nawome kɔ, noko mɔɔ bɛlɛkɔ la, ɔzele bɛ kɛ: ‘Ɛnee bɛle mraalɛ mgbalɛ bɛmaa bɛ hu mɔ yɛɛ medame noko. Mekpondɛ kɛ bɛgya bieko. Bɛzia bɛhɔ bɛ sua nu wɔ Mowabe.’ Bɛzele ye kɛ: ‘Yɛkulo wɔ edwɛkɛ kpalɛ! Yɛkulo kɛ yɛ nee wɔ kɔ.’ Noko Nawome hɔle zo hanle kɛ bɛzia. Nzinlii Ɔpa ziale hɔle sua nu noko Wulutu angɔ. Nawome zele ye kɛ: ‘Nea kɛ Ɔpa ɛlɛsia ahɔ ye menli ne ɛkɛ na yeahɔzonle ye nyamenle ne mɔ ɛ. Ɛ nee ye ɛhɔ na sia kɔ wɔ mame awuke nu.’ Noko Wulutu zele ye kɛ: ‘Menrɛgyakyi wɔ menrɛhɔ. Wɔ menli ne bayɛ me menli, na wɔ Nyamenle ne ayɛ me Nyamenle.’ Mɔɔ Wulutu hanle ɛhye la, ɛnea a kɛzi Nawome dele nganeɛ ɛ?

Mɔɔ Wulutu nee Nawome dwule Yizilayɛ la, ɛnee bɛlɛte baale. Kenle ko, Wulutu hɔle kɛ ɔkasesa baale mɔɔ bɛde la abo zo wɔ nrenyia bie mɔɔ bɛfɛlɛ ye Bowaze mɔɔ le Releehabe ara la ɛya nu. Ɛnee Bowaze ɛde kɛ Wulutu le Mowabenli mɔɔ nee Nawome de a. Yemɔti ɔhanle ɔhilele ye gyimayɛvoma ne kɛ bɛgyakyi ma ne bie bɛmaa Wulutu ɛsesa.

Ye nɔsolɛ nu, Nawome bizale Wulutu kɛ: ‘Nwane ɛya nu a ɛhɔyɛle gyima ɛnɛ a?’ Wulutu buale kɛ: ‘Bɛfɛlɛ nrenyia ne Bowaze.’ Yemɔti Nawome zele ye kɛ: ‘Bowaze le me hu busuanli. Kɔ zo ɛ nee mbɛlɛra ne mɔ ɛyɛ gyima wɔ ye ɛya ne anu. Ɛhwee ɛnrɛyɛ wɔ.’

Wulutu hɔle zo yɛle gyima wɔ Bowaze ɛya nu hɔkpulale kɛ ma ɛdelɛ ne pɛle nu. Bowaze nwunle kɛ Wulutu le raalɛ kpalɛ yɛɛ ɔkulo gyima. Mekɛ zɔhane, saa nrenyia wu na yeanwo ralɛ nrenyia a, ye busuanli gya kunlavolɛ raalɛ ne. Yemɔti Bowaze gyale Wulutu. Bɛwole ralɛ nrenyia na bɛdonle ye Obɛde, nzinlii ɔrayɛle Belemgbunli Devidi ɛ nenyia. Nawome agɔnwo mɔ anye liele kpole. Bɛhanle kɛ: ‘Gyihova ɛlimoa ɛmaa wɔ Wulutu mɔɔ ɛboa wɔ kpalɛ la, na kɛkala wɔnyia wɔ anlɔnra. Bɛye Gyihova ayɛlɛ.’