Dwɔhyua Nee Gebɛyɔnoma

Maanle ngakyile mɔɔ bɛwɔ Keena la dele kɛzi bɛzɛkyele Gyɛleko la. Bɛ arelemgbunli ne mɔ yɛle kɛ bɛyɛ ko na bɛ nee Yizilayɛma aho. Noko Gebɛyɔnoma nyianle adwenle ngakyile. Bɛwulale adɛladeɛ mɔɔ ɛtete la bɛhɔle Dwɔhyua ɛkɛ na bɛhanle bɛhilele ye kɛ: ‘Yɛvi moa kpalɛ a yɛra a. Yɛde Gyihova anwo edwɛkɛ nee mɔɔ ɔyɛle ɔmaanle bɛ wɔ Yigyibiti nee Mowabe la. Bɛbɔ yɛ ɛwɔkɛ kɛ bɛ nee yɛ ɛnrɛho na yɛbayɛ bɛ ngɛkɛlɛ.’

Dwɔhyua liele bɛ lile na ɔhanle kɛ bɛ nee bɛ ɛnrɛho. Ye kenle nsa ne azo, ɔnwunle kɛ amuanrɛɛ bɛnvi moa biala. Bɛvi Keena azɛlɛ azo. Dwɔhyua bizale Gebɛyɔnoma kɛ: ‘Duzu ati a bɛbɔle adalɛ bɛhilele yɛ a?’ Bɛbuale kɛ: ‘Ɛnee yɛsulo! Yɛze kɛ Gyihova bɛ Nyamenle ne ɛlɛko amaa bɛ. Yɛsɛlɛ bɛ bɛmmaku yɛ.’ Dwɔhyua lile ye ɛwɔkɛ zo na ɔgyakyile bɛ.

Yeangyɛ, Keena arelemgbunli nnu nee bɛ sogyama yɛle kɛ bɛ nee Gebɛyɔnoma kaho. Dwɔhyua nee ye sogyama zile nu nɔe ne kɛ bɛkaboa bɛ. Ye alehyenlɛ nu yɛɛ bɛbɔle konle ne abo a. Keenama bɔle ɔ bo kɛ bɛnriandi. Ɛleka biala mɔɔ bɛnriandile bɛhɔle la Gyihova dɔle ezuawolɛ guale bɛ nwo zo. Akee Dwɔhyua zɛlɛle Gyihova kɛ ɔmaa sɛnzɛne ne ɛgyinla zo. Duzu ati a ɔhanle kɛ Gyihova ɛmaa sɛnzɛne ne ɛgyinla zo wɔ mekɛ mɔɔ debie zɛhae bie ɛtɛsile ɛlɛ la ɛ? Ɔluakɛ ɛnee Dwɔhyua lɛ Gyihova anu anwodozo. Sɛnzɛne ne andu ɔ bo wɔ alehyenlɛ ne anu amuala too Yizilayɛma lile Keena arelemgbunli nee bɛ sogyama ne mɔ anwo zo konim.