Gyihova Kpale Dwɔhyua

Mosisi vale ɛvolɛ dɔɔnwo lile Yizilayɛma anyunlu, noko ɛnee ɔlɛbikye ye ewule mekɛ. Gyihova hanle hilele ye kɛ: ‘Tɛ ɛdawɔ a ɛbali Yizilayɛma anyunlu ɛ nee bɛ ahɔ Ɛwɔkɛ Azɛlɛ ne azo a. Noko mebamaa wɔanwu azɛlɛ ne.’ Akee Mosisi hanle hilele Gyihova kɛ ɔkpa sonla fofolɛ ɔmaa ɔli ye menli ne anyunlu na ɔnlea bɛ. Gyihova hanle hilele ye kɛ: ‘Ye Dwɔhyua.’

Mosisi hanle hilele Yizilayɛma kɛ ɔnrɛhyɛ na yeawu na Gyihova ɛye Dwɔhyua kɛ ɔli bɛ nyunlu ɔ nee bɛ ɛhɔ Ɛwɔkɛ Azɛlɛ ne azo. Akee Mosisi hanle hilele Dwɔhyua kɛ: ‘Mmasulo. Gyihova baboa wɔ.’ Akee Mosisi hɔle Nibo Boka ne azo, ɛleka mɔɔ Gyihova hilele ye azɛlɛ ne mɔɔ ɔvale ɔbɔle Ebileham, Ayezeke yɛɛ Gyekɔbo ɛwɔkɛ la. Mosisi lile ɛvolɛ 120 na yeawu.

Gyihova hanle hilele Dwɔhyua kɛ: ‘Bɛpɛ Azule Dwɔdan ne bɛhɔ Keena. Mebaboa wɔ kɛ mɔɔ memboale Mosisi la. Nea kɛ ɛbagenga me Mɛla ne dahuu. Mmasulo. Gyinla kpundii. Kɔyɛ mɔɔ meha mehile wɔ la.’

Dwɔhyua zoanle busiama nwiɔ wɔ Gyɛleko. Yɛbanwu mɔɔ zile ɛkɛ la anwo ninyɛne dɔɔnwo wɔ edwɛkɛ bieko anu. Mɔɔ bɛziale bɛrale la, bɛhanle kɛ ɔwɔ kɛ bɛkɔ Keena. Aleɛ hyenle la, Dwɔhyua hanle hilele Yizilayɛma kɛ bɛdudu azokoɛleɛ ne. Akee ɔmaanle ɛsɔfo ne mɔ mɔɔ bɛzo ngyekyeleɛ ɛlɛka ne la limoale bɛ nyunlu hɔle Azule Dwɔdan ne anloa. Ɛnee azule ne ɛyi kpalɛ. Noko mɔɔ ɛsɔfo ne mɔ agyakɛ hanle nzule ne ala la, azule ne anze bieko na ɔsesanle! Mɔɔ ɛsɔfo ne mɔ dwule azule ne avinli la, bɛgyinlanle ɛkɛ ne too bɛmaanle Yizilayɛma amuala pɛle hɔle ɔ nzi lɔ. Ɛnea a nwanwane deɛ ɛhye maanle bɛhakyele mɔɔ Gyihova yɛle ye wɔ Nyevile Kɔkɔlɛ ne anu la ɔ?

Akee Yizilayɛma hɔdwule Ɛwɔkɛ Azɛlɛ ne azo. Yemɔti ɛnee akee bɛbahola bɛasisi bɛ azua, bɛayɛ egyinli, bɛalua vanye na bɛayɛ tola. Ɛnee ɔle azɛlɛ mɔɔ meleke nee wolɛ se zolɛ a.