Nwanwane Debie Zile Nyevile Kɔkɔlɛ Ne Anloa

Mɔɔ Falo dele kɛ Yizilayɛma ɛvi Yigyibiti ala la ɔhakyile ye adwenle. Ɔhanle ɔhilele ye sogyama ne kɛ: ‘Bɛziezie me konle ehwili ne mɔ na bɛmaa yɛdoa bɛ! Anrɛɛ ɔnle kɛ yɛmaa bɛkɔ.’ Yemɔti ɔ nee ye menli ne bɔle ɔ bo kɛ bɛtoa Yizilayɛma.

Ɛnee Gyihova ɛlɛkile ye menli ne adenle, ɔmaanle amungu mpila lile bɛ nyunlu wɔ alehyenlɛ nu yɛɛ senle mpila lile bɛ nyunlu nɔɔzo. Ɔvale bɛ ɔhɔle Nyevile Kɔkɔlɛ ne anloa, na ɔhanle kɛ bɛyɛ azokoɛleɛ.

Akee Yizilayɛma nwunle kɛ Falo nee ye sogyama ne ɛlɛba. Ɛnee akee bɛha nyevile ne nee Yigyibiti sogyama ne avinli. Bɛzunle bɛhilele Mosisi kɛ: ‘Bɛlɛba bɛahu yɛ! Anrɛɛ ɔwɔ kɛ ɛmaa yɛtɛnla Yigyibiti.’ Noko Mosisi hanle kɛ: ‘Bɛmmasulo. Bɛmɛ bɛnlea kɛzi Gyihova balie yɛ la.’ Mosisi nyianle Gyihova anu anwodozo kpalɛ, ɔnle zɔ ɔ?

Gyihova hanle hilele Yizilayɛma kɛ bɛdoa bɛ adendulɛ ne azo. Zɔhane nɔe ne, Gyihova maanle amungu mpila ne ragyinlanle Yigyibitima nee Yizilayɛma avinli. Awozinli kabikabi vale Yigyibitima, noko ɛnee Yizilayɛma ɛkɛ ne le wienyi.

Gyihova hanle hilele Mosisi kɛ ɔdende ɔ sa wɔ nyevile ne azo. Akee Gyihova maanle anwoma anloa ɛsesebɛ bie bɔle nɔe ne amuala. Nyevile ne anu hyɛle nwiɔ na adenle ralale avinli. Yizilayɛma mgbe dɔɔnwo ne luale azɛlɛ resee zo pɛle hɔle nyevile ne anzi na nyevile ne yɛle bane wɔ bɛ bɛne zo nee bɛ fema zo.

Falo nee ye sogyama ne doale Yizilayɛma mɔɔ bɛlua nyevile ne anu azɛlɛ resee ne azo la. Akee Gyihova maanle sogyama ne anye zo danle bɛ. Bɛ konle ehwili ne mɔ agyakɛ bɔle ɔ bo kɛ ɔtudu. Sogyama ne deɛdeanle nuhua kɛ: ‘Bɛmaa yɛnriandi yɛvi ɛke, ɔluakɛ Gyihova ɛlɛko amaa bɛ.’

Gyihova hanle hilele Mosisi kɛ: ‘Tende ɛ sa wɔ nyevile ne azo.’ Ɛkɛ ne ala, nyevile ne hedale Yigyibiti sogyama ne anwo zo. Falo nee ye menli ne amuala wule. Ko bɔbɔ anga.

Mɔɔ bɛpɛle nyevile ne la, menli dɔɔnwo ne dole edwɛne yele Nyamenle ayɛlɛ kɛ: “Bɛdo edwɛne bɛmaa Gyihova, ɔluakɛ ye anyunlunyia ɛyɛ kpole. Yevuandi ɛkpɔnwɔ ne nee ye kavolɛ ne yegua nyevile ne anu.” Mɔɔ ɛnee menli ne ɛlɛto edwɛne ne la, mraalɛ ne mɔ zile agole na bɛbɔle akɛya. Awie biala anye liele kɛ akee bɛ nwo ɛdɔ bɛ la.