Dwobu A Le Nwane?

Ɛnee nrenyia bie de Ɛɛze azɛlɛ zo mɔɔ sonle Gyihova. Bɛfɛlɛ ye Dwobu. Ɔle sukoavolɛ yɛɛ ɔlɛ abusua kpole. Ɔyɛ nyele, ɔboa ehyiavolɛma, ahunlanvolɛ yɛɛ nrisa. Noko, asoo kɛmɔ ɛnee Dwobu le sonlakpalɛ la ati, ɔnrɛyia ngyegyelɛ biala ɔ?

Ɛnee Dwobu ɛnze kɛ Seetan Abɔnsam ɛlɛnea ye. Gyihova bizale Seetan kɛ: ‘Wɔnwu me sonvolɛ Dwobu ɔ? Awie biala ɛnle kɛ ɔdaye wɔ azɛlɛ ne azo. Ɔtie me ne yɛɛ ɔyɛ ninyɛne mgbalɛ.’ Seetan buale kɛ: ‘Ɔle zɔ kɛ Dwobu tie wɔ. Wɔbɔ ɔ nwo bane yɛɛ wɔyila ye. Wɔmaa ye azɛlɛ nee nyɛmoa. Saa ɔ muala fi ɔ sa a, ɔnrɛzonle wɔ bieko.’ Gyihova hanle hilele Seetan kɛ: ‘Ɛbahola wɔazɔ ye wɔanlea. Noko mmaku ye.’ Duzu ati a Gyihova maanle Seetan adenle ɔmaanle ɔzɔle Dwobu ɔnleanle a? Ɛnee ɔze ye wienyi kɛ Dwobu bali nɔhalɛ.

Seetan bɔle ɔ bo kɛ ɔfa amaneɛnwunlɛ ngakyile yeazɔ Dwobu yeanlea. Mɔɔ limoa, ɔmaanle Sibama hɔwuale Dwobu nlankɛ nee ye asoaso ne mɔ. Akee ɔmaanle senle yelale ye mboane ne mɔ amuala. Eza Kaledeama hɔwuale Dwobu afunlumu ne mɔ kɔsɔɔti na bɛhunle ye azonvolɛ mɔɔ bɛnea ye nyɛmoa ne mɔ la. Akee ɔdele amaneɛbɔlɛ bie mɔɔ ɛnle kpalɛ fee la. Ɛnee Dwobu amra ne mɔ ɛlɛto ɛkponle wɔ sua bie anu na sua ne bule hunle bɛ muala. Dwobu lile nyane kpole noko yeangyakyi Gyihova ɛzonlenlɛ.

Ɛnee Seetan kpondɛ kɛ Dwobu nwu amaneɛ dɔɔnwo tɛla ɛhye bɔbɔ. Yemɔti ɔmaanle Dwobu anwo amuala dudule nganlɛ na ɔ nwo fofole ye kpalɛ. Ɛnee ɔnze deɛmɔti edwɛkɛ ɛhye mɔ amuala ɛlɛto ye la, noko yeangyakyi Gyihova ɛzonlenlɛ. Nyamenle nwunle mɔɔ ɛlɛkɔ zo la amuala na ɔ nye liele Dwobu anwo kpole.

Akee Seetan zoanle mrenyia nsa bie ɔmaanle bɛhɔzɔle Dwobu bɛnleanle. Bɛhanle bɛhilele ye kɛ: ‘Ɔbayɛ kɛ wɔyɛ ɛtane bie wɔvea. Nyamenle a ɛlɛtua wɔ kakɛ a.’ Dwobu buale kɛ: ‘Metɛyɛle ɛtane biala.’ Akee ɔdele nganeɛ kɛ Gyihova a ɛlɛmaa yeanwu amaneɛ a, na ɔhanle kɛ Nyamenle nee ye anli ye boɛ.

Ɛnee kpavolɛ bie mɔɔ bɛfɛlɛ ye Ɛlaehu la ɛyɛ koonwu ɛlɛtie bɛ. Akee ɔhanle kɛ: ‘Mɔɔ bɛlɛka la amuala ɛnle nɔhalɛ. Gyihova kpoleyɛlɛ ne bo yɛ ndelebɛbo zo. Ɔnrɛyɛ amumuyɛ ɛlɛ. Ɔnwu debie biala yɛɛ ɔboa menli mɔɔ bɛwɔ ngyegyelɛ nu la.’

Akee Gyihova nee Dwobu dendɛle na ɔbizale ye kɛ: ‘Mekɛ mɔɔ mebɔ anwuma nee aze la ɛnee ɛwɔ ni? Duzu ati a ɛse me nee wɔ anli ye boɛ a? Wɔdendɛ, noko ɛnde mɔɔ wɔha la abo.’ Dwobu liele ye nvonleɛ dole nu na ɔhanle kɛ: ‘Meyɛ ɛtane. Mede ɛ nwo edwɛkɛ noko kɛkala, menwu wɔ kpalɛ. Ɛkola ɛyɛ debie biala. Fa mɔɔ meha la kyɛ me.’

Mɔɔ sɔnea ne pɛle nu la, Gyihova maanle Dwobu dele kpɔkɛ na ɔvale mɔɔ vile ɔ sa la amuala mɔnwo ɔmaanle ye. Dwobu dɛnlanle aze wɔ anyelielɛ nu mekɛ tendenle. Gyihova yilale Dwobu kɛ ɔdiele ye wɔ mekɛ bɔbɔ mɔɔ ɔ nwo hyelele ye la anu la. Saa edwɛkɛ bie to wɔ a, asoo ɛbahɔ zo wɔazonle Gyihova kɛ mɔɔ Dwobu yɛle la ɔ?