Akɛlɛ Bie Mɔɔ Diele Nyamenle La

Gyekɔbo amra ngakula ne mɔ ko a le Dwosefi. Dwosefi amediema ne mɔ nwunle kɛ bɛ papa kulo Dwosefi edwɛkɛ kpalɛ. Ɛnea a adwenle boni a bɛnyianle wɔ nwo a? Bɛ nye bolole Dwosefi yɛɛ bɛangulo ye edwɛkɛ. Mɔɔ Dwosefi hanle ɛlalɛ bie la, ɔhanle nwolɛ edwɛkɛ ɔhilele ɔ mediema ne mɔ. Bɛdele ɔ bo kɛ kenle ko dedee bɛbabɔ bɛ ti aze bɛamaa ye. Akee bɛkpɔle Dwosefi kpole kpalɛ!

Kenle ko bie, ɛnee Dwosefi amediema ne mɔ ɛlɛnea mboane wɔ ɛleka bie mɔɔ bikye Hyikɛm la. Yemɔti Gyekɔbo zoanle Dwosefi kɛ ɔhɔnlea kɛzi ɔ mediema ne mɔ anwo de la. Mɔɔ bɛnwunle kɛ ɔvi moamoa ɔlɛba la, bɛhanle bɛhilele bɛ nwo kɛ: ‘Ahenle mɔɔ ka ɛlalɛ mgbole ne la a ɛlɛba la. Bɛmaa yɛhu ye!’ Bɛhyele ye bɛdole kuma kuloonwu bie anu. Noko ɔ mediema ne mɔ anu ko mɔɔ bɛfɛlɛ ye Dwuda la hanle kɛ: ‘Bɛmmaku ye! Bɛmaa yɛdɔne ye kɛ akɛlɛ.’ Yemɔti bɛdɔnenle Dwosefi bɛliele dwɛtɛ fufule 20 bɛmaanle Medeanema bie mɔɔ bɛlɛkɔ Yigyibiti la.

Akee Dwosefi amediema ne mɔ vale ye tɛladeɛ ne bɔle abɔnkye mogya nu, bɛvale bɛhɔhilele bɛ papa na bɛbizale ye kɛ: ‘Asoo tɛ ɛ ra ne tɛladeɛ ne ɛne?’ Yemɔti Gyekɔbo dwenlenle kɛ nane anwo ɛzulolɛ bie a ɛhu Dwosefi a. Ɔlile nyane kpole. Ɛnee awie biala ɛngola ɛnkyekye ɔ rɛle.

Bɛdɔnenle Dwosefi kɛ akɛlɛ la bɛmaanle Yigyibiti kpanyinli bie mɔɔ bɛfɛlɛ ye Pɔtefaa la. Noko ɛnee Gyihova nee Dwosefi lua. Pɔtefaa nwunle kɛ Dwosefi anye bolo ye gyima nwo yɛɛ ɔdi nɔhalɛ. Yeangyɛ, ɔvale sua nu ɛkɛ ne debie biala ɔwulale Dwosefi asa anu.

Pɔtefaa aye ne nwunle kɛ Dwosefi le nrenyia kɛnlɛma yɛɛ ɔ nwo yɛ se. Yemɔti ɛnee ɔka ɔkile ye alehyenlɛ biala kɛ ɔ nee ye ɛla. Duzu a Dwosefi yɛle a? Yeanyɛ na ɔhanle kɛ: ‘Kyɛkyɛ! Ɛhye le ɛtane kpole. Me menle die me di yɛɛ ɔye a le wɔ. Saa me nee wɔ da a, mebayɛ ɛtane kpole meatia Nyamenle!’

Kenle ko bie Pɔtefaa aye ne bɔle mɔdenle kɛ ɔmaa Dwosefi nee ye ala. Ɔzɔle Dwosefi tɛladeɛ ne anu, noko Dwosefi nriandile. Mɔɔ Pɔtefaa rale sua nu la, raalɛ ne hanle kɛ anrɛɛ Dwosefi nee ye da. Ɛnee ɔlɛbɔ adalɛ. Pɔtefaa vale ɛya kpole na ɔmaanle bɛdole Dwosefi efiade. Noko Gyihova arɛle anvi Dwosefi.