Nyamenle Bɔle Nrenyia Nee Raalɛ Mɔɔ Limoa La

Gyihova yɛle tola kɛnlɛma bie wɔ ɛleka bie mɔɔ bɛfɛlɛ ye Yidɛn la. Ɛnee felawɔse, mbaka nee nane ngakyile dɔɔnwo wɔ tola ne anu. Akee Nyamenle vale ndɛtɛlɛ bɔle Adam, sonla mɔɔ limoa la, na ɔliele ngoane ɛnwomenle ɔguale ɔ bonyi nu. Ɛze mɔɔ zile a? Nrenyia ne yɛle sonla mɔɔ ɔde aze! Gyihova hanle kɛ Adam ɛnlea tola ne azo na ɔtoto nane ne mɔ aluma.

Gyihova maanle Adam mɛla mɔɔ anwo hyia kpalɛ la. Ɔzele Adam kɛ: ‘Ɛkola ɛdi baka biala ma ne bie kyesɛ baka titili ko ala, ɔluakɛ ɛdi ye ma ne bie a, ɛbawu.’

Nzinlii Gyihova hanle kɛ: ‘Mebayɛ boavolɛ meamaa Adam.’ Nyamenle maanle Adam lafele kpole bie, na ɔyele ɔ nvenle foa bowule ko ɔyɛle raalɛ ɔmaanle Adam. Bɛfɛlɛ raalɛ ne Yive. Adam nee Yive a le abusua mɔɔ limoa a. Mɔɔ Adam nwunle ɔ ye ne la, kɛzi ɔdele nganeɛ ɛ? Ɔ nye liele kpole yemɔti ɔhanle kɛ: ‘Nea mɔɔ Gyihova ɛva me bowule ɛbɔ ɛmaa me la! Kɛkala menyia awie mɔɔ le kɛ medame la.’

Gyihova hanle kɛ Adam nee Yive ɛwo mralɛ bɛmaa azɛlɛ ne ɛyi. Ɛnee ɔkpondɛ kɛ bɛbɔ nu bɛsiezie azɛlɛ ne bɛmaa ɔyɛ paladaese, anzɛɛ ɛleka kɛnlɛma kɛ Yidɛn tola ne la. Noko yeamba ye zɔ. Kɛmɔti ɛ? Yɛbazukoa nwolɛ debie wɔ tile bieko anu.