KPUYA 7
Kɛzi Mebagyinla Nla Nwo Ngyegyelɛ Nloa Ɛ?
BONI A ƐBAYƐ A?
Suzu tɛnlabelɛ ɛhye anwo: Heather bɔle ɔ bo kɛ ɔ nee Mike tu la ye siane nwiɔ ɛne, noko ɛbaha kɛ ɔze ye dɛba. Bɛfa message bɛnwa bɛ nwo dahuu, bɛtendɛ dɔɔnwo wɔ fonu zo, yɛɛ bɛ nuhua biala ze edwɛkɛ mɔɔ ɔ gɔnwo baha a! Noko kɛkala, Mike kpondɛ kɛ bɛyɛ ninyɛne gyɛne.
Wɔ siane nwiɔ ne anu, mɔɔ Mike nee Heather yɛle la a le kɛ bɛsɔ bɛ sa yɛɛ bɛfo bɛ nloa ala. Heather ɛngulo kɛ bɛbahɔ moa. Yɛɛ ɔngulo kɛ Mike bavi ɔ sa. Ɔdaye ala a ɔmaa ɔ nye die na ɔte nganeɛ kɛ ɔ nwo hyia a. Ɔka ɔkile ɔ nwo kɛ, ‘Me nee Mike yɛkulo yɛ nwo kpalɛ . . . ’
Saa wɔdwu agyalɛ ɛhɔlɛ yɛɛ ɛdawɔ a ɛle Heather a, anrɛɛ boni a ɛbayɛ ɛ?
GYINLA NA SUZU NWO!
Nla le ahyɛlɛdeɛ mɔɔ Nyamenle ɛva ɛmaa agyalɛma angome. Nla mɔɔ li agyalɛ nyunlu la sɛkye ahyɛlɛdeɛ ɛhye. Ɔle kɛ asɛɛ ɛlɛfa tɛladeɛ kɛnlɛma bie mɔɔ awie ɛva ɛhyɛ wɔ la wɔayɛ fuazinli
Saa ɛwulu ɛfi baka bie azo na ɛbɔ mɔdenle kɛ ɛtu kɛ anloma a, ɛbayia nwolɛ ngyegyelɛ. Zɔhane ala a ɔde a, saa ɛbulu ɛbɛlakpalɛ ɛbɔlɛ nwo mɛla mɔɔ se: ‘Bɛhwe bɛ nwo bɛvi adwɔmane ɛbɔlɛ nwo’ la azo a.—1 Tɛsalonaekama 4:3.
Ɛbu ɛ nye ɛgua mɛla ɛhye azo a boni a vi nu bara a? Baebolo ne ka kɛ: “Awie biala mɔɔ kɛbɔ adwɔmane ɛbɛla la yɛ ɛtane tia ɔdaye ye sonlabaka ne.” (1 Kɔlentema 6:18) Kɛzi ɛhye le nɔhalɛ ɛ?
Menli mɔɔ yɛ neɛnleanu la ɛnwu ye kɛ mgbavolɛ nee mbɛlɛra dɔɔnwo mɔɔ fa bɛ nwo wula nla mɔɔ li agyalɛ nyunlu anu la yia ngyegyelɛ mɔɔ doa zo la bie.
NYANELILƐ. Mgbavolɛ nee mbɛlɛra dɔɔnwo mɔɔ vale bɛ nwo wulale nla mɔɔ li agyalɛ nyunlu anu la ɛnlu bɛ nwo kɛ bɛyɛle zɔ.
BƐNLIE WƆ BƐNLI. Bɛda bɛwie a, bɛ nuhua ko biala biza ɔ nwo kɛ, ‘Nwane bieko a ɔ nee ye ɛla a?’
BƐSANUDOLƐ. Ngakula mbɛlɛra dɔɔnwo kulo kpavolɛ mɔɔ babɔ bɛ nwo bane la, tɛ mɔɔ ɔbayɛ bɛ basabasa la. Yɛɛ ngakula mgbavolɛ dɔɔnwo anye ɛnlie kakula raalɛ mɔɔ ɛbuke ɛ nloa ala a ɛnee ɔdoa wɔ la anwo.
Nɔhalɛ edwɛkɛ: Saa ɛfa ɛ nwo ɛwula nla mɔɔ li agyalɛ nyunlu la anu a, ɛsɛkye ɛ nwo ɔluakɛ ɛminli debie mɔɔ sonle bolɛ la. (Wulomuma 1:24) Wɔ sonlabaka ne sonle bolɛ, mmasɛkye ye!
Maa ɔla ali kɛ ɛbahola ‘wɔahwe ɛ nwo wɔavi adwɔmane ɛbɔlɛ nwo.’ (1 Tɛsalonaekama 4:3) Akee saa kenle bie ɛgya a, ɛbahola wɔava ɛ nwo wɔawula nla nu. Ɛ nye balie, adwenleadwenle ɛnrɛdɔ ɛ nwo yɛɛ ɛnrɛnlu ɛ nwo kɛ mɔɔ ɔto menli mɔɔ fa bɛ nwo wula nla mɔɔ li agyalɛ nyunlu la.—Mrɛlɛbulɛ 7:22, 23; 1 Kɔlentema 7:3.
KƐZI ƐDWENLE NWO Ɛ?
Awie mɔɔ kulo wɔ nɔhalɛ nu la bava wɔ nwonane nee wɔ nganeɛdelɛ ado esiane nu ɔ?
Awie mɔɔ dwenle ɛ nwo kpalɛ la bazɔ wɔ anlea yeamaa wɔazɛkye agɔnwolɛvalɛ mɔɔ ɛ nee Nyamenle lɛ la ɔ?—Hibuluma 13:4.