FOA NNU

“Bɛzia Bɛrali Mboaneneavolɛ Ne Nee Bɛ Ɛkɛla Sinzavolɛ Ne Anzi”

Asoo wɔ ngyegyelɛ ne nee mɔɔ bɛha nwolɛ edwɛkɛ wɔ brohyua ne anu la le ko ɔ? Saa ɔle zɔ a, ɛnee ɔtɛkale ɛ ngome. Nyamenle nɔhalɛ azonvolɛ dɔɔnwo mɔɔ ɛnee wɔ tete ne nee yɛ mekɛ ye anu la ɛyia ngyegyelɛ ko ne ala bie. Gyihova boale bɛ ɔmaanle bɛgyinlanle ngyegyelɛ ne anloa, ɔbaboa ɛdawɔ noko.

Saa ɛsia ɛba a Gyihova baboa wɔ

NYIA ANWODOZO kɛ saa ɛsia ɛba a Gyihova baboa wɔ. Ɔbaboa wɔ yeamaa wɔagyinla adwenleadwenle nee nyanelilɛ nloa, wɔanyia adwenle mɔɔ anu te na ɛ nzo nu adwo wɔ. Ɔbamaa wɔanyia anwosesebɛ ɛ nee Gyihova azonvolɛ abɔ nu azonle ye bieko. Wɔ tɛnlabelɛ ne bayɛ kɛ ɛvoya mɔɔ limoa Kilisienema bie mɔ ɛdeɛ ne la. Ɛzoanvolɛ Pita hɛlɛle bɛ nwo edwɛkɛ kɛ: “Ɛnee bɛle kɛ mboane mɔɔ ɛminli la, na kɛkala bɛva bɛ bɛzia bɛra kɛ bɛrali Mboaneneavolɛ ne nee bɛ ɛkɛla sinzavolɛ ne anzi.”—1 Pita 2:25.

Gyihova mɔɔ ɛbazia wɔara ye ɛkɛ la anwo hyia tɛla debie biala. Kɛmɔti ɛ? Ɔluakɛ ɛbamaa Gyihova anye alie. (Mrɛlɛbulɛ 27:11) Gyihova lɛ nganeɛdelɛ, yemɔti yɛ nyɛleɛ ka ye kpalɛ. Nɔhalɛ nu, Gyihova ɛnyɛ ye kyengye kɛ yɛhulo ye na yɛzonle ye. (Mɛla ne 30:19, 20) Baebolo nwo abɔlɔba ko hanle kɛ: “Awie ɛnrɛhola ɛnrɛbuke wɔ ahonle nu ɛnrɛmaa wɔ. Kyesɛ ɛdawɔ mumua ne na wɔabuke.” Saa yɛfi ɛhulolɛ nu yɛfa yɛ ahonle muala yɛsonle Gyihova a, ɛnee yɛlɛbuke yɛ ahonle nu. Saa yɛyɛ zɔ a, yɛfa ahyɛlɛdeɛ mɔɔ sonle bolɛ—yɛ munli nu ɛgyinlanlɛ—yɛmaa Gyihova na yɛmaa ɔ nye die kpalɛ. Nɔhalɛ nu, saa yɛfa ɛzonlenlɛ mɔɔ fɛta la yɛmaa Gyihova a, yɛbanyia anyelielɛ mɔɔ debie biala nee ye ɛnzɛ la.—Gyima ne 20:35; Yekile 4:11.

Bɛlɛyɛ adiema raalɛ ko mɔɔ gyakyile debiezukoalɛ nee daselɛlilɛ ɛhɔlɛ la akoaba kɛ yezia yera asafo ne anu la

Bieko, saa ɛsia ɛsonle a, ɛ sa baha wɔ sunsum nu ngyianlɛ. (Mateyu 5:3) Adenle boni azo? Menli mɔɔ wɔ ewiade amuala la biza kɛ, ‘Duzu ati a yɛwɔ ɛke a?’ Bɛnnwu deɛmɔti bɛbɔle bɛ a. Alesama hyia sunsum nu ngyianlɛ ɛhye, ɔluakɛ Gyihova vale bɔle yɛ. Ɔbɔle yɛ kɛ yɛzonle ye na yɛ nye alie. Saa yɛfi yɛ ahonle kɔsɔɔti anu yɛsonle Gyihova a, yɛ nye balie kpalɛ.—Edwɛndolɛ 63:1-5.

Yɛsɛlɛ wɔ, nwu ye kɛ Gyihova kulo kɛ ɛsia ɛba ye ɛkɛ. Kɛzi ɛbahola wɔanwu ye zɔ ɛ? Suzu ɛhye anwo: Bɛvale nzɛlɛlɛ bɛzuzule brohyua ɛhye anwo yɛɛ bɛyɛle a. Bie a asafo nu kpanyinli bie anzɛɛ ɛ gɔnwo diedinli a vale maanle wɔ a. Akee debie hanle wɔ kɛ ɛgenga na ɛzuzu nuhua edwɛkɛ ne anwo. Ɛhye mɔ kɔsɔɔti le daselɛ mɔɔ kile kɛ Gyihova arɛle ɛtɛfile wɔ. Emomu, ɔlɛtwe wɔ yeara ɔ nwo.—Dwɔn 6:44.

Saa yɛnwu kɛ Gyihova arɛle ɛnvi ye azonvolɛ mɔɔ ɛminli la a, ɔkyekye yɛ rɛle. Kɛ adiema raalɛ bie mɔɔ bɛfɛlɛ ye Donna la dele nganeɛ la ɛne. Ɔhanle kɛ: “Menvile nɔhalɛ ne anu ngyikyi ngyikyi, na ɛnee meta medwenle edwɛkɛ mɔɔ wɔ Edwɛndolɛ 139:23, 24 la anwo. Ɔse: ‘Neɛnlea me nu, O Nyamenle, na nwu me ahonle nu! Sɔ me nea, na nwu me adwenle! Nea saa amumuyɛ bie wɔ me nu a, na fa me dua ngoane adenle ne anu dahuu.’ Ɛnee meze kɛ menle ewiade ne ɛdeɛ—meanzo ɛkɛ ne ɛlɛ—na ɛnee meze kɛ Gyihova ahyehyɛdeɛ ne anu ala a ɔwɔ kɛ metɛnla a. Menwunle kɛ Gyihova arɛle ɛtɛfile me; na ɛnee ɔwɔ kɛ mesia meba ye ɛkɛ. Ɔyɛ me fɛ kɛ menyɛle zɔ la!”

“Menwunle kɛ Gyihova arɛle ɛtɛfile me; na ɛnee ɔwɔ kɛ mesia meba ye ɛkɛ”

Yɛ nzɛlɛlɛ a le kɛ ɛdawɔ noko ɛbanyia “fɛlɛkolilɛ ne mɔɔ [Gyihova] fa maa” la bieko. (Nihɛmaya 8:10) Ɛnrɛnlu ɛ nwo ɛlɛ kɛ ɛziale ɛrale Gyihova ɛkɛ la.

Kpuya Mɔɔ Fane Gyihova Ɛkɛ Mɔɔ Ɛsia Wɔara La Anwo Mualɛ

KƐZI MEMBƆ Ɔ BO Ɛ?

Ɔwɔ kɛ awie mɔɔ ɛnde kpɔkɛ la bɔ ɔ bo yɛ ninyɛne mɔɔ ɔyɛ ye dɛba la ngyikyi ngyikyi. Zɔhane ala a ɔwɔ kɛ dahuu ɛdi sunsum nu aleɛ ngyikyi ngyikyi amaa wɔanyia anwosesebɛ a. Mmasuzu kɛ ɔwɔ kɛ ɛyɛ debie biala kenle ko. Bie a ɛbahola wɔava mekɛ ekyi wɔagenga anzɛɛ wɔadie Baebolo nu edwɛkɛ mɔɔ bɛhye, wɔazukoa yɛ mbuluku ne mɔ ko, wɔahɔ jw.org wɛbsaete ne azo anzɛɛ wɔanlea gyimalilɛ mɔɔ wɔ jw.org la. Eza bɔ mɔdenle kɛ ɛbahɔ asafo nyianu. Mɔɔ hyia kpalɛ la, sɛlɛ Gyihova moalɛ. “Bɛva bɛ adwenleadwenle muala bɛgua ɔ nwo zo, ɔboalekɛ ɔdwenle bɛ nwo.”—1 Pita 5:7.

“Mengyakyile daselɛlilɛ ɛhɔlɛ la, ɛnee ɔyɛ me nyiane bɔbɔ kɛ mebayɛ asɔne. Noko menyianle akɛnrasesebɛ menyɛle asɔne la, asafo nu kpanyinli bie rakpɔlale me. Ɔboale me ɔmaanle menwunle kɛ Gyihova ɛtɛkpole me. Kpanyinli ne hanle kɛ mengenga Baebolo ne dahuu. Menyɛle zɔ la, menyianle anwosesebɛ na mengɔle debiezukoalɛ. Yeangyɛ yɛɛ membɔle daselɛlilɛ bo bieko a. Me nye ɛlie kpole kɛ Gyihova amkpo me la.”—Eeva.

KƐZI ASAFO NE BALIE ME Ɛ?

Ɛbahola wɔanyia anwodozo kɛ asafo ne anu amra balie wɔ kɛnlɛma. Bɛnrɛdendɛ bɛnrɛtia wɔ anzɛɛ bɛnrɛbua wɔ ndɛne, emomu bɛbahile kɛ bɛkulo wɔ na bɛamaa wɔ anwosesebɛ.—Hibuluma 10:24, 25.

“Ɛnee ɔyɛ me nyiane kɛ mebahɔ Belemgbunlililɛ Asalo. Ɛnee mennwu mɔɔ me gɔnwo mɔ bayɛ a. Adiema raalɛ ko mɔɔ ɛnee wɔ asafo ne anu ɛvolɛ 30 mɔɔ ɛze ɛhɔ la hanle hilele me kɛ, ‘Me ra, ɔyɛ me fɛ kɛ wɔzia wɔra sua nu a!’ Ɛhye hanle me ahonle kpole. Ɛnee amgba noko mera sua nu.”—Javier.

“Mengɔle Belemgbunlililɛ Asalo na medɛnlanle ebia ne mɔɔ wɔ ɔ nzi la azo amaa awie biala annwu me. Noko, menli mɔɔ ze me wɔ me ngakula nu la nwunle me. Bɛliele me kɛnlɛma, bɛyɛle me atuu na ɛhye maanle me nye liele. Ɛnee ɔle kɛ asɛɛ mera sua nu la.”—Marco.

KƐZI MGBANYIMA NE MƆ BABOA ME Ɛ?

Mgbanyima ne mɔ nee wɔ bali wɔ atiakunlukɛnlɛma nu. Bɛbahanvo wɔ kɛ wɔhakye “ɛhulolɛ” mɔɔ ɛnee ɛlɛ la. (Yekile 2:4) Saa ɛyɛle nvonleɛ bie a, bɛbaboa wɔ bɛamaa wɔayɛ nzenzaleɛ. Bɛbavi anwunvɔnezelɛ nu bɛayɛ wɔ “bɛtɛɛ.” (Galeehyeama 6:1; Mrɛlɛbulɛ 28:13) Mgbanyima ne mɔ bayɛ ngyehyɛleɛ amaa awie nee wɔ azukoa mbuluku le kɛ Nyia Anyelielɛ Dahuu! anzɛɛ “Draw Close to Jehovah.” Nyia anwodozo kɛ mgbanyima ne mɔ bakyekye ɛ rɛle na baboa wɔ wɔ adenle biala azo.—Ayezaya 32:1, 2.

“Wɔ ɛvolɛ mɔtwɛ ne mɔɔ mengyakyile debiezukoalɛ nee daselɛlilɛ ɛhɔlɛ la, mgbanyima ne mɔ bɔle mɔdenle kɛ bɛbabikye me. Kenle ko, kpanyinli bie vale nvoninli bie mɔɔ ɔpɛle yɛ la ɔhilele me. Ɔmaanle mengakyele ninyɛne ngakyile mɔɔ yɛ anyelielɛ la na menyianle ɛhulolɛ kɛ mebazonle Gyihova bieko. Mgbanyima ne mɔ boale me maanle membɔle sunsum nu ninyɛne mɔɔ ɛnee meyɛ la abo bieko.”—Victor.

“Ɔbamaa Wɔayɛ Se”

Edwɛne mɔɔ bakyekye ɛ rɛle na yeamaa wɔ anwosesebɛ amaa wɔazia wɔazonle Gyihova bieko la wɔ ‘Fa Anyelielɛ To Edwɛne’ Maa Gyihova, buluku ne anu. Kɛ neazo la, suzu edwɛkɛ mɔɔ bɛvale bɛhyehyɛle edwɛne 38 ne la anwo. Ɔgyi edwɛkɛ mɔɔ wɔ 1 Pita 5:10 ne azo, ye edwɛkɛtile ne se “Ɔbamaa Wɔayɛ Se.”

Yɛ Nyamenle ɛmaa wɔnwu nɔhalɛ ne.

Yeye wɔ yevi awozinli nu.

Ɔnleɛnleanle wɔ ahonle ne anu la,

Ɔnwunle kɛ ɛkulo tenlene.

Ɛhanle kɛ ɛbayɛ mɔɔ ‘kulo;

Ɔboale wɔ na ɔnrɛgyakyi wɔ.
Ɔmaanle ɔ Ra ne rawule maanle wɔ;

Ɔ ti ɔkulo kɛ ɛdi konim.

Saa yeva ɔ Ra ne yebɔ afɔle a,

Ɔbamaa wɔanyia anwosesebɛ.

Ɔrɛle ɛnrɛvi mɔɔ wɔyɛ la;

Ɔbanlea mɔɔ le ye ɛdeɛ la.

(NLIEZO)

Nyamenle ɛva Gyisɛse mogya ɛdɔ wɔ.

Ɔbamaa wɔayɛ se, ɔbamaa wɔagyinla.

Ɔbabɔ ɛ nwo bane na yeali ɛ nyunlu.

Ɔbamaa wɔayɛ se, ɔbamaa wɔagyinla.

Saa ɛkpondɛ kɛ ɛtie Belemgbunlililɛ edwɛne ne bie a, kɔ jw.org.