Belemgbunlililɛ Moalɛ​—Bɛsisi Ɛzonlenlɛ Azua Na Bɛboa Wɔ Esiane Mekɛ Nu

ƐWOLO wɔ Belemgbunlililɛ Asalo ne anu, akee ɛkɛ ne ɛhakyi ɛ nye zo. Dahuu ɛfa anyelielɛ ɛka sua ɛhye anwo edwɛkɛ. Bie a ɛkakye kɛ ɛvolɛ bie mɔɔ ɛze ɛhɔ la ɛboale wɔ ye ɛzilɛ nu a, ɔmaa ɛ nye die. Noko kɛkala, wɔ adenle bie azo ɛ nye die kpalɛ ɔluakɛ bɛyɛ Belemgbunlililɛ Asalo ɛkɛ ne ɛleka mɔɔ bɛbava moalɛ bɛamaa wɔ esiane mekɛ nu wɔ mekɛ ekyii bie anu. Mɔɔ ahumu bie dule, azule yile na ɔzɛkyele maanzinli ne mɔɔ ɛde nu la, Ɔfese Kɔmatii ne yɛle ngyehyɛleɛ ndɛndɛ amaa bɛdabɛ mɔɔ esiane ne hanle bɛ la anyia aleɛ, adɛladeɛ, nzule kpalɛ, nee moalɛ ngakyile. Bɛhyehyɛ ninyɛne mɔɔ bɛfa bɛaboa la kɛnlɛma. Mediema badie mɔɔ bɛhyia la na bɛ nuhua dɔɔnwo ɛlɛkyikyi bɛ nye anwo monle mɔɔ anyelielɛ ɛmaa yegua bɛ la.

Gyisɛse hanle kɛ nzonlɛyɛlɛ titile mɔɔ bamaa bɛanwu ye menli ne la a le ɛlɔlɛ mɔɔ bɛlɛ bɛmaa bɛ nwo la. (Dwɔn 13:34, 35) Wɔ foa ɛhye anu, yɛbazuzu kɛzi Gyihova Alasevolɛ da Keleseɛnema ɛlɔlɛ ali wɔ suazilɛ gyima nee moalɛ mɔɔ bɛfa bɛmaa wɔ esiane mekɛ nu la anwo. Ɛlɔlɛ ɛhye mɔɔ bɛda ye ali la di daselɛ kpole kɛ yɛwɔ Gyisɛse Belemgbunlililɛ ne abo.