Belemgbunlililɛ Ngyinlazo​—Kpondɛ Nyamenle Tenleneyɛlɛ Ne

ƐTO ɛ gɔnwo bie ɛsalɛ wɔ mekɛ mɔɔ ɛlɛpɛ nu la. Kenlensa ye, wɔwu kɛ yegua ɔ nye aze ɔlɛnea wɔ nee wɔ abusua ne. Ɔdaye noko ɔto wɔ ɛsalɛ na ɔka kɛ ɛrɛla. Ɔka kɛ: “Maa membiza wɔ kpuyia bie. Duzu a maa bɛyɛ ngakyile kolaa a?” Ɛdawɔ noko ɛbiza ye kɛ, “Boni a ɛkile a?” Ɔka kɛ, “Se bɛle Gyihova Alasevolɛ, anaa? Bɛnle kɛ menli mɔɔ bɛha la. Bɛ nee ɛzonlenlɛ mɔɔ ɛha la ɛmbɔ nu​—bɛnli ɛnwomenlelielɛ kenle ne mɔ, yɛɛ bɛnva bɛ nwo bɛnwula maanyɛlɛ nee konle konle nu. Bɛ nuhua biala ɛnlo sigalɛte. Yɛɛ bɛ mbusua ne mɔ noko fa ngyinlazo kpalɛ bɔ bɛ ɛbɛla. Duzu a maa bɛyɛ ngakyile kolaa wɔ ndenle ngakyile dɔɔnwo azo a?”

Mualɛ ne a le sikalɛ ɛhye: Yɛvea Nyamenle Belemgbunlililɛ ne tumililɛ bo. Kɛ Belemgbunli la, Gyisɛse kɔ zo tu yɛ nu evinli. Ɔlɛboa yɛ yeamaa yɛava ɔ gyakɛ na yɛayɛ ngakyile wɔ ewiade ɛtane ɛhye anu. Wɔ foa ɛhye anu, yɛbanwu kɛzi Mɛzaya Belemgbunlililɛ ne ɛlɛtu Nyamenle menli nu wɔ sunsum nu, ɛbɛlabɔlɛ nu nee ahyehyɛdeɛ ne anu yeava yeawula Gyihova anyunlunyia la.