Ɛ Nwo Yɛ Wɔ Koonwu Na Ɛzulolɛ Ka Wɔ Ɔ?

Nea kakula nrenya ekyi ne mɔɔ wɔ nvoninli ne anu la. Ɔ nwo ɛyɛ ye koonwu yɛɛ ɛzulolɛ ɛha ye, ɔnle zɔ ɔ? Wɔde nganeɛ zɔhane ɛlɛ ɔ?— Ɔyɛ a awie biala te nganeɛ zɔ. Baebolo ne ka Gyihova agɔnwo mɔ bie mɔɔ anwo yɛle bɛ koonwu na ɛzulolɛ hanle bɛ la anwo edwɛkɛ. Bɛ nuhua ko a le Yilaegya. Maa yɛzukoa ɔ nwo debie.

Yilaegya dɛnlanle aze mekɛ tendenle mɔɔ ɛze ɛhɔ la anu wɔ Yizilayɛ kolaa na bɛawo Gyisɛse. Ɛnee Ehabe, mɔɔ le belemgbunli wɔ Yizilayɛ la ɛnzonle nɔhalɛ Nyamenle, Gyihova. Ɛnee Ehabe nee ɔ ye, Gyɛzɛbɛle, sonle adalɛ nyamenle Beeyale. Yemɔti menli dɔɔnwo mɔɔ wɔ Yizilayɛ la bɔle ɔ bo zonlenle Beeyale. Ɔbahyema Gyɛzɛbɛle ati yɛ se kpalɛ na ɛnee ɔkulo kɛ ɔku menli mɔɔ sonle Gyihova la amuala, ɔboka Yilaegya anwo! Ɛze mɔɔ Yilaegya yɛle a?—

Yilaegya nriandile! Ɔnriandile ɔhɔle ɛsɛlɛ ne azo na ɔhɔveale bolɛ bɔne nu. Ɛnea a duzu ati a ɔyɛle zɔ a?— Ɛzulolɛ ti ɔ. Noko ɛnee ɔngyia kɛ ɛzulolɛ ka Yilaegya. Kɛmɔti ɛ? Ɔboalekɛ ɛnee ɔze kɛ Gyihova bahola aboa ye. Ɛnee Gyihova ɛmaa Yilaegya ɛnwu ye tumi ne ɛlɛ. Mekɛ bie, Gyihova buale Yilaegya asɔneyɛlɛ na ɔmanle senle vi anwuma rale. Yemɔti ɛnee Gyihova bahola aboa Yilaegya mekɛ ɛhye noko!

Yilaegya vea bolɛ bɔne ne anu la, Gyihova dendɛle hilele ye na ɔbizale ye kɛ: ‘Duzu a ɛyɛ ye wɔ ɛke a?’ Yilaegya buale kɛ: ‘Me ngomekye ala a meha mɔɔ mesonle wɔ a. Eza bɛkpondɛ medame noko bɛahu me.’ Ɛnee Yilaegya dwenle kɛ bɛhu menli kɔsɔɔti mɔɔ sonle Gyihova la. Noko Gyihova hanle hilele Yilaegya kɛ: ‘Kyɛkyɛ, ɔnle nɔhalɛ. Menli 7,000 tɛbɔ ɛkɛ mɔɔ bɛsonle me a. Nyia akɛnrasesebɛ. Melɛ gyima dɔɔnwo memaa wɔ!’ Ɛnea a Yilaegya anye liele kɛ ɔdele edwɛkɛ ɛhye ɔ?—

Duzu a ɛsukoa ɛfi mɔɔ dole Yilaegya la anu a?— Ɔnle kɛ ɛmaa ɛ nwo yɛ wɔ koonwu na ɛzulolɛ ka wɔ ɛlɛ. Ɛlɛ ɛ gɔnwo mɔ mɔɔ bɛkulo Gyihova na bɛkulo wɔ a. Bieko, Gyihova lɛ tumi kpole, na ɔbaboa wɔ dahuu! Ɔyɛ wɔ fɛ kɛ wɔnwu kɛ ɔtɛkale ɛ ngomekye ɔ?—