Adwulaleɛ

1, 2. Duzu ati a ɔwɔ kɛ yɛnyia diedi kɛkala ɛ? Maa neazo.

DIEDI. Ɔle edwɛkɛkpɔkɛ mɔɔ kile subane kɛnlɛma bie. Noko akee, saa yɛte zɔhane edwɛkɛkpɔkɛ ne a, ɔmaa edwɛkɛkpɔkɛ fofolɛ ba yɛ adwenle nu: “Ndɛndɛ!” Ɔluakɛ, saa yɛnlɛ diedi a, ɔwɔ kɛ yɛnyia bie ndɛndɛ. Yɛɛ saa yɛlɛ diedi a, ɔwɔ kɛ yɛbɔ nwolɛ bane ndɛndɛ na yɛnea ye boɛ. Duzu ati ɔ?

² Fa ye kɛ ɛlua ɛsɛlɛ wanaanwo bie azo. Ɛhyia nzule nwo ɛsesebɛ. Saa ɛnyia bie a, ɔwɔ kɛ ɛbɔ nwolɛ bane ɛfi ewia ne anwo. Akee ɔwɔ kɛ ɛnea kɛzi ɛno ye la boɛ amaa yeahola yeava wɔ yeahɔdwu ɛleka mɔɔ ɛkɔ la. Ɛnɛ, yɛ muala yɛde sunsum nu ɛsɛlɛ zo, ewiade mɔɔ nɔhalɛ diedi—mɔɔ le kɛ zɔhane nzule ne la—anwo yɛ se yɛɛ wɔannea ye boɛ a ɔwie ndɛndɛ. Kɛmɔ yɛhyia nzule nwo ɛsesebɛ la, zɔhane ala a saa yɛnlɛ diedi a yɛnrɛhola yɛnrɛdɛnla aze wɔ sunsum nu a.—Wulo. 1:17.

3. Duzu a Gyihova ɛyɛ ɛmaa yɛ amaa yɛanyia diedi a, na ninyɛne nwiɔ boni a ɔhyia kɛ yɛkakye kɛ yɛbayɛ a?

³ Gyihova ze kɛzi yɛhyia diedi ndɛndɛ, nee kɛzi ɔyɛ se kɛ yɛbanyia diedi na yɛazɔ nu boɛ ɛnɛ la. Ɛhye ati a yemaa yɛ neazo kɛ yɛzukoa la. Gyihova manle ɛzoanvolɛ Pɔɔlo hɛlɛle kɛ: ‘Bɛzukoa menli mɔɔ bɛlua bɛ diedi nee abotane zo bɛnyia mɔɔ Nyamenle ɛva ɛbɔ ɛwɔkɛ la.’ (Hib. 6:12) Na ɛhye ati a Gyihova ahyehyɛdeɛ ne ɛmaa yɛ anwosesebɛ kɛ yɛbɔ mɔdenle yɛzukoa mrenya nee mraalɛ nɔhavoma mɔɔ le kɛ menli mɔɔ yɛzuzu bɛ nwo wɔ edwɛkɛ ɛhye mɔ anu neazo ne la. Noko akee, kɛkala, duzu a ɔwɔ kɛ yɛyɛ a? Bɛmaa yɛhakye ninyɛne nwiɔ: (1) Ɔhyia kɛ yɛmia yɛ diedi ne anu dahuu; (2) ɔwɔ kɛ yɛmaa yɛ anyelazo ne tɛnla yɛ adwenle nu kpalɛ.

4. Kɛzi Seetan ɛla ye ali kɛ ɔle diedi nwo kpɔvolɛ ɛ, noko duzu ati a ɔnle kɛ yɛmaa yɛ sa nu to ɛ?

⁴ Mia wɔ diedi ne anu dahuu. Diedi lɛ ye kpɔvolɛ kpole ko—Seetan. Ewiade nyamenle ne ɛhakyi ngyehyɛleɛ ɛhye ɛyɛ ye kɛ ɛsɛlɛ mɔɔ ɔmaa ɔyɛ se kɛ yɛbanyia diedi. Ɔ nwo yɛ se tɛla yɛ kolaa. Asoo ɔwɔ kɛ yɛsulo kɛ yɛnrɛhola yɛnrɛnyia diedi na yɛnrɛmia nu? Kyɛkyɛ! Gyihova le menli mɔɔ kpondɛ nɔhalɛ diedi la amuala Agɔnwo. Ɔmaa yɛnyia anwodozo kɛ ɔgyi yɛ afoa, yɛbahola yɛazi Abɔnsam adenle na yɛamaa yeavi yɛ nwo yeanriandi! (Gye. 4:7) Saa yɛnyia mekɛ alehyenlɛ biala yɛmia yɛ diedi ne anu na yɛsɔ nu a, yɛbazi ye adenle. Kɛ ɔkɛyɛ na yɛayɛ ɛhye ɛ?

5. Kɛ ɔyɛle mɔɔ Baebolo nu mrenya nee mraalɛ nyianle bɛ diedi ne ɛ? Kilehile nu.

⁵ Kɛmɔ yɛnwu ye la, bɛanva diedi bɛanwo Baebolo ne anu mrenya nee mraalɛ mɔɔ bɛlɛ diedi la. Mɔɔ bɛyɛle la maa ɔda ali kɛ diedi le Gyihova sunsum ne ma. (Gal. 5:22, 23) Bɛyɛle nzɛlɛlɛ bɛkpondɛle moalɛ, na Gyihova noko manle bɛ diedi ne anu mianle. Bɛmaa yɛyɛ ye kɛmɔ bɛyɛle la, bɛmmamaa yɛ rɛle fi ye ɛlɛ kɛ Gyihova fa ye sunsum ne maa menli mɔɔ biza na bɛyɛ mɔɔ nee bɛ nzɛlɛlɛ ne yia la. (Luku 11:13) Ninyɛne bieko wɔ ɛkɛ mɔɔ yɛbahola yɛayɛ ɔ?

6. Kɛ ɔkɛyɛ na yɛanyia nvasoɛ yɛavi Baebolo ne anu edwɛkɛ mɔɔ yɛsukoa la azo ɛ?

⁶ Menli mɔɔ lɛ diedi la anu ekyi bie a yɛzuzu bɛ nwo wɔ buluku ɛhye anu a. Dɔɔnwo wɔ ɛkɛ! (Bɛgenga Hibuluma 11:32.) Mɔɔ bɛ nuhua ko biala yɛle la maa yɛnyia mɔɔ yɛbavi ahonle nu yɛayɛ nwolɛ nzɛlɛlɛ wɔ mekɛ mɔɔ yɛlɛsukoa bɛ nwo debie la. Saa yɛbukebuke Baebolo ne anu yɛkenga menli mɔɔ lɛ diedi la anwo edwɛkɛ zɔhane ala a, yɛ diedi nu ɛnrɛmia. Amaa yɛ ɛgengalɛ ne aboa yɛ kpalɛ la, ɔwɔ kɛ yɛnyia mekɛ yɛneɛnlea menli ne anwo edwɛkɛ mɔɔ wɔ Baebolo ne anu la anu kpalɛ. Saa yɛkakye ye dahuu kɛ ɛnee zɔhane mrenya nee mraalɛ ne mɔ ‘le kɛ yɛdayɛ ala la’ a, yɛbade bɛ neazo ne abo kpalɛ. (Gye. 5:17) Yɛba- hola yɛade nyane yɛamaa bɛ na yɛanwu kɛzi ɔbayɛ kɛ bɛdele nganeɛ wɔ mekɛ mɔɔ bɛyiale ngyegyelɛ mɔɔ le kɛ yɛ ɛdeɛ ne la.

7-9. (a) Saa Baebolo nu mrenya nee mraalɛ mɔɔ bɛlɛ diedi la nyianle adenle zonlenle Gyihova kɛmɔ yɛyɛ ye ɛnɛ la a, anrɛɛ kɛzi bɛbade nganeɛ ɛ? (b) Duzu ati a ɔwɔ kɛ yɛdua mɔɔ yɛyɛ la azo yɛmia yɛ diedi ne anu ɛ?

⁷ Eza yɛdua mɔɔ yɛyɛ la azo yɛmia yɛ diedi ne anu. Ɔluakɛ, “diedi mɔɔ gyimayɛlɛ ɛmboka nwolɛ la le wulera.” (Gye. 2:26) Saa bɛvale gyima mɔɔ Gyihova ɛva ɛmaa yɛ ɛnɛ la bɛmanle mrenya nee mraalɛ mɔɔ yɛha bɛ nwo edwɛkɛ la kɛ bɛyɛ a, anrɛɛ nea kɛzi bɛ nye balie a!

⁸ Kɛ neazo la, saa bɛhanle bɛhilele Ebileham kɛ tɛ afɔlemokyea ɛtane ne mɔɔ bɛzi ye wɔ fienemgbole ne anu la azo a ɔbahola yeazonle Gyihova a, na emomu, ɔbahola ɔ nee menli ekpunli mɔɔ bɛsonle ye wɔ Belemgbunlililɛ Asalo ngɛnlɛma nu nee nyianu mgbole bo, ɛleka mɔɔ bɛsuzu na bɛkilehile ɛwɔkɛ ne mɔ mɔɔ ɔnwunle bɛ “wɔ moa moa” anu kpalɛ la abɔ nu azonle a, anrɛɛ kɛzi ɔbade nganeɛ ɛ? (Bɛgenga Hibuluma 11:13.) Na saa bɛhanle bɛhilele Yilaegya kɛ tɛ Beeyale ngape- zoma atisesebɛ ne mɔ a ɔwɔ kɛ ɔku bɛ wɔ mekɛ mɔɔ ɛnee ɔlɛbɔ mɔdenle kɛ ɔsonle Gyihova wɔ belemgbunli atisesebɛ mɔɔ ɛkpɔkye la tumi bo, na emomu, ɔkpɔlɔkpala menli na yeaha arɛlekyekyelɛ nee anyelazo nrɛlaleɛ yeahile bɛ a, anrɛɛ duzu nganeɛ a ɔbade a? Nɔhalɛ nu, asoo anrɛɛ Baebolo nu mrenya nee mraalɛ ɛhye mɔɔ bɛlɛ diedi la anwo ɛnrɛpele bɛ kɛ bɛbazonle Gyihova kɛmɔ yɛyɛ ye ɛnɛ la ɔ?

⁹ Ɛhye ati, bɛmaa yɛlua mɔɔ yɛyɛ la azo yɛmia yɛ diedi ne anu dahuu. Saa yɛyɛ ye zɔ a, yɛbala diedi nwo neazo mɔɔ mrenya nee mraalɛ mɔɔ wɔ Nyamenle Edwɛkɛ ne anu lale ye ali la bie ali. Kɛmɔ yɛnwunle ye wɔ Mukenye ne anu la, yɛbade nganeɛ kɛ yɛbikye bɛ kpalɛ kɛ yɛ gɔnwo mɔ. Noko akee, ɔnrɛhyɛ yɛbanwu agɔnwolɛvalɛ ɛhye kpalɛ.

10. Anyelielɛ boni a yɛbanyia wɔ Paladaese a?

¹⁰ Maa wɔ anyelazo ne ɛdɛnla wɔ adwenle nu kpalɛ. Mrenya nee mraalɛ mɔɔ bɛdi nɔhalɛ la dahuu nyia anwosesebɛ fi anyelazo mɔɔ Nyamenle fa maa la anu. Asoo ɛyɛ ye zɔ? Kɛ neazo la, nea kɛzi ɛyia Nyamenle azonvolɛ nɔhavoma mɔɔ bɛbazia bɛara wɔ mekɛ mɔɔ “kpalɛyɛlɛma badwazo ara ngoane nu” la a, ɛ nye balie a. (Bɛgenga Gyima ne 24:15.) Kpuyia boni mɔ a ɛbahulo kɛ ɛbabiza bɛ a?

11, 12. Wɔ ewiade fofolɛ ne anu, kpuyia boni mɔ a ɛbahulo kɛ ɛbabiza (a) Ebɛle a? (b) Nowa a? (d) Ebileham a? (ɛ) Wulutu a? (e) Abegeli a? (f) Ɛseta a?

¹¹ Saa ɛyia Ebɛle a, ɛbahulo kɛ ɛbabiza ye kɛzi ɛnee ye awovolɛ de la ɔ? Anzɛɛ bie a ɛbabiza kɛ: “Ɛ nee kyɛlɔbem ne mɔ mɔɔ ɛnee sinza Yidɛn adenle ne anloa la dendɛle ɔ? Bɛbuale wɔ ɔ?” Na Nowa noko ɛ? Wɔannea a ɛbabiza ye kɛ: “Ɛnee ɛsulo Nɛfelem ne mɔ ɔ? Kɛzi ɛnleanle nane ne mɔ wɔ ɛvolɛ ko ne mɔɔ bɛlile ye wɔ ɛlɛka ne anu la ɛ?” Saa ɛyia Ebileham a, bie a ɛbabiza ye kɛ: “Ɛ nee Hyɛm yiale ɛlɛ ɔ? Nwane a hilehilele wɔ Gyihova anwo debie a? Bɛfi Yule la ɛnee ɔyɛ se ɔ?”

¹² Eza suzu kpuyia bie mɔ mɔɔ ɛbahulo kɛ ɛbabiza mraalɛ nɔhavoma mɔɔ bɛbadwazo bɛ la anwo. “Wulutu, duzu a manle ɛrayɛle Gyihova sonvolɛ a?” “Abegeli, asoo ɛnee ɛsulo kɛ ɛbaha kɛzi ɛboale Devidi la anwo edwɛkɛ wɔahile Neebale?” “Ɛseta, duzu a zile ɛ nee Mɔdekae anwo zo wɔ mekɛ mɔɔ bɛ nwo edwɛkɛ mɔɔ wɔ Baebolo ne anu la rale awieleɛ la ɛ?”

13. (a) Kpuyia boni mɔ a wɔannea a menli mɔɔ bɛbadwazo bɛ la babiza wɔ a? (b) Kɛzi ɛte nganeɛ wɔ anyelazo mɔɔ ɛlɛ kɛ ɛbayia mrenya nee mraalɛ nɔhavoma mɔɔ dɛnlanle aze wɔ tete ne la anwo ɛ?

¹³ Nɔhalɛ nu, wɔannea a zɔhane mrenya nee mraalɛ ne mɔ noko babiza wɔ kpuyia dɔɔnwo. Nea kɛzi yɛ nye balie kɛ yɛbaha ninyɛne mɔɔ sisile awieleɛ mekɛ ne anu nee kɛzi Gyihova yilale ye menli wɔ mekɛ ɛsesebɛ nu la anwo edwɛkɛ yɛahile bɛ a! Nɔhalɛ nu, bɛ nye balie kɛ bɛbanwu kɛzi Gyihova manle ye ɛwɔkɛ ne mɔ amuala rale nu la. Wɔ ewiade fofolɛ ne anu, ɔnrɛhyia kɛ yɛbayɛ Nyamenle nɔhalɛ azonvolɛ mɔɔ bɛha bɛ nwo edwɛkɛ wɔ Baebolo ne anu la anwo nvoninli wɔ yɛ adwenle nu. Bɛ nee yɛ a badɛnla Paladaese a! Ɛhye ati, kɔ zo yɛ mɔɔ ɛbahola biala la kɛkala na nwu menli zɔhane mɔ kpalɛ. Sukoa bɛ diedi ne dahuu. Ɔrɛla ye kɛ ɛ nee bɛ babɔ nu azonle Gyihova kɛ ɛ gɔnwo mɔ dahuu!