Duzu A Wɔ Yɛ Wɛbsaete Ne Azo A?

Gyisɛse Kelaese hanle hilele ye ɛdoavolɛma kɛ: “Bɛmaa bɛ kɛnlaneɛ ɛda wɔ menli nyunlu . . . amaa bɛanwu bɛ gyima kpalɛ ne na bɛawula bɛ Ze mɔɔ wɔ anwuma la anyunlunyia.” (Mateyu 5:16) Ɛhye ati, yɛlɛfa ninyɛne mɔɔ ɛdwu zo, mɔɔ Yintanɛte ne boka nwo la yɛali gyima kpalɛ. Yɛ wɛbsaete, jw.org a le ɛleka mɔɔ yɛfa Gyihova Alasevolɛ diedi nee bɛ gyima nwo edwɛkɛ yɛgua a. Duzu a wɔ ɛkɛ a?

Kɛzi Baebolo ne bua kpuya mɔɔ bɛta bɛbiza la. Ɛbanwu kpuya mɔɔ hyia mɔɔ menli ɛbiza la bie mɔ anwo mualɛ wɔ ɛkɛ. Kɛ neazo la, Asoo Amaneɛnwunlɛ Bara Awieleɛ? nee Mowuamra Badɛnla Aze Bieko Amgba Ɔ? trate ne mɔ wɔ wɛbsaete ne azo wɔ aneɛ mɔɔ bo 700 la anu. Ɛbahola noko wɔanwu Ewiade Fofolɛ Ngilebɛbo ne wɔ aneɛ mɔɔ bo 150 la anu yɛɛ mbuluku ngakyile mɔɔ bɛfa bɛsukoa Baebolo ne, mɔɔ bie a le Duzu A Baebolo Ne Kola Kilehile Yɛ A? yɛɛ Ɛzinzalɛ Arane nee Awake! fofolɛ mɔɔ ɛra la wɔ ɛkɛ. Bɛkola bɛkenga mbuluku ɛhye mɔ dɔɔnwo anzɛɛ bɛbɔ bie bɛtie wɔ wɛbsaete ne azo anzɛɛ bɛkola bɛtwe bie MP3, PDF anzɛɛ EPUB. Ɛbahola wɔapelente bie wɔ aneɛ mɔɔ awie mɔɔ anye die nwolɛ la ka la anu na ɛ nee ye azukoa! Mumule aneɛ nu vidio ngakyile dɔɔnwo wɔ ɛkɛ. Ɛbahola wɔahwe Baebolo ɛgengalɛ mɔɔ bɛyɛ ye drama, Baebolo drama ngakyile nee edwɛne mɔɔ yɛ fɛ mɔɔ ɛbahola wɔabɔ wɔadie la wɔ ɛkɛ.

Gyihova Alasevolɛ anwo edwɛkɛ mɔɔ le nɔhalɛ. Eza bɛva yɛ ewiade amuala gyima ne anwo edwɛkɛ nee vidio mɔɔ le fofolɛ, edwɛkɛ mɔɔ kɛdo Gyihova Alasevolɛ nee mɔdenle mɔɔ yɛlɛbɔ yɛaboa menli mɔɔ esiane ɛdo bɛ la anwo edwɛkɛ bɛgua ɛkɛ. Ɛbahola wɔanwu nyianu ngakyile mɔɔ bɛbayɛ nee yɛ ɔfese ngakyile ne mɔ adelɛse wɔ ɛkɛ.

Ɔti, yɛlɛmaa nɔhalɛ wienyi ne ada wɔ azɛlɛ ye kɔsɔɔti azo. Menli mɔɔ wɔ ɛleka biala, mɔɔ Antarctica bɔbɔ boka nwo la ɛlɛnyia zolɛ nvasoɛ. Yɛ asɔneyɛlɛ a le kɛ “Gyihova edwɛkɛ ne kɛhɔ zo kɛdɛlɛ ndɛndɛ” wɔ aleɛabo ɛleka biala, na yɛkɛva yɛkɛwula Nyamenle anyunlunyia.​—2 Tɛsalonaekama 3:1.

• Kɛzi jw.org ɛlɛboa menli dɔɔnwo yeamaa bɛazukoa Baebolo ne ɛ?

• Duzu a ɛkulo kɛ ɛnwu ye wɔ yɛ wɛbsaete ne azo a?