Mokanwo
Duzu A Sheol nee Hades Kile A?
BƐVALE Hibulu edwɛkɛkpɔkɛ sheʼohlʹ nee Giliki edwɛkɛkpɔkɛ haiʹdes bɛlile gyima wɔ Baebolo ne anu mɔɔ bo fane 70, wɔ aneɛ mɔɔ bɛlumua bɛvale bɛhɛlɛle la anu. Edwɛkɛ agbɔkɛ nwiɔ zɔhane fane ewule nwo. Baebolo ngilebɛbo bie mɔ kile ɔ bo kɛ ɛbolɔ anzɛɛ hell. Maa yɛnlea kɛzi bɛva sheʼohlʹ nee haiʹdes bɛli gyima wɔ Baebolo ne ɛleka ngakyile la.
Nolobɔvo ne 9:10 ka kɛ: “Gyima anzɛɛ ndwenlenwo anzɛɛ adwenle anzɛɛ nrɛlɛbɛ biala ɛnle Ɛbolɔ [sheʼohlʹ] mɔɔ ɛlɛkɔ la.” Asoo ɛhye kile kɛ sheʼohlʹ kile ɛleka kpɔtee bie mɔɔ yɛzie yɛ dɔvolɛ bie la ɔ? Kyɛkyɛ. Saa Baebolo ne ka ɛleka kpɔtee bie mɔɔ bɛsie awie anzɛɛ nla nwo edwɛkɛ a, ɔnva Hibulu nee Giliki edwɛkɛ agbɔkɛ sheʼohlʹ nee haiʹdes ɔnli gyima na emomu ɔfa edwɛkɛ agbɔkɛ gyɛne a ɔdi gyima a. (Mɔlebɛbo 23:7-9; Mateyu 28:1) Bieko, Baebolo ne ɛnva edwɛkɛkpɔkɛ sheʼohlʹ ɛngile kuma ko mɔɔ bɛsie menli dɔɔnwo wɔ nu la.—Mɔlebɛbo 49:30, 31.
Ɛnee akee, duzu a sheʼohlʹ kile a? Nyamenle Edwɛkɛ ne kile kɛ sheʼohlʹ anzɛɛ haiʹdes kile debie mɔɔ tɛla kuma mɔɔ bɛsie menli dɔɔnwo wɔ nu a. Kɛ neazo la, Ayezaya 5:14 kile kɛ, “ɛbolɔ [sheʼohlʹ] ɛbuke ɔ nloa wanaanwo.” Ɔwɔ nuhua kɛ, saa yɛbaha a, sheʼohlʹ ɛme mɔwuamra dɔɔnwo ɛdeɛ, noko ɔda ali kɛ ɔ ko ɛtɛyile. (Mrɛlɛbulɛ 30:15, 16) Ɛleka mɔɔ bɛsie menli mɔɔ ɛwu la kola yi ɛdeɛ, noko ‘ɛbolɔ ako ɛnyi ɛlɛ.’ (Mrɛlɛbulɛ 27:20) Sheʼohlʹ ɛnyi ɛlɛ. Ɔnlɛ ɛweɛne. Ɛhye ati sheʼohlʹ anzɛɛ haiʹdes ɛngile ɛleka kpɔtee bie mɔɔ wɔ ɛkɛ a. Emomu, ɔkile ɛleka mɔɔ mɔwuamra amuala wɔ, mɔɔ ɔle sɛkɛlɛneɛ adenle zo ɛleka mɔɔ alesama ɛlafe wɔ ewule nu la.
Baebolo ne ewudwazo ngilehilelɛ ne eza boa yɛ maa yɛte sheʼohlʹ nee haiʹdes abo kpalɛ. Nyamenle Edwɛkɛ ne fa sheʼohlʹ nee haiʹdes ka mɔwuamra mɔɔ bɛbadwazo bɛ la anwo edwɛkɛ.a (Dwobu 14:13; Gyima ne 2:31; Yekile 20:13) Nyamenle Edwɛkɛ ne eza kile kɛ, tɛ menli mɔɔ zonlenle Gyihova la angomekye a wɔ sheʼohlʹ anzɛɛ haiʹdes a, emomu menli dɔɔnwo mɔɔ anzonle ye la noko wɔ ɛkɛ. (Mɔlebɛbo 37:35; Edwɛndolɛ 55:15) Ɛhye ati, Baebolo ne kilehile kɛ, “ɛtanevolɛma nee kpalɛyɛlɛma badwazo ara ngoane nu.”—Gyima ne 24:15.
a Mɔɔ nee ɛhye ɛnle ko la, bɛha mɔwuamra mɔɔ bɛnrɛdwazo bɛ la anwo edwɛkɛ kɛ bɛnle sheʼohlʹ anzɛɛ haiʹdes, na emomu bɛwɔ Gehenna, mɔɔ bɛhile ɔ bo wɔ Nzema Baebolo ne anu wɔ ɛke kɛ “ɛbolɔ senle” anzɛɛ “abɔnsam senle.” (Mateyu 5:30; 10:28; 23:33) Noko ɔngile zɔ yɛɛ Gehenna ɛngile ɛleka kpɔtee bie kɛmɔ sheʼohlʹ yɛɛ haiʹdes de ala la.