Adehilelɛ Maa Sukulu Zo Neavolɛma

WƆ ASAFO biala anu, bɛkpa kpanyinli ko kɛ ɔnlea Teokelase Ɛzonlenlɛ Sukulu ne azo. Saa bɛva ɛzonlelilɛ ɛhye bɛmaa wɔ a, sukulu ne anwo anyelielɛ mɔɔ ɛbanyia nee sukoavo biala anyuhɔlɛ mɔɔ ɛbadwenle nwo la bahola aboa kpalɛ amaa sukulu ne ayɛ nvasoɛ amaa bɛ asafo ne anu amra.

Wɔ gyima ne foa mɔɔ hyia la a le kɛ ɛbanlea dapɛne biala Teokelase Ɛzonlenlɛ Sukulu ne azo. Kakye kɛ saa ɛye sukoavoma mɔɔ ɛnyia gyimalilɛ la ɛsie ahane a, menli gyɛne noko ɛra debiezukoalɛ. Nea sukulu ne azo wɔ adenle mɔɔ ɔbamaa asafo ne amuala anyia ngakyelɛ mɔɔ fɛta na ɔmaa anwosesebɛ mɔɔ ɔbamaa wɔadwu sukulu ne anwo bodane mɔɔ bɛha nwolɛ edwɛkɛ wɔ buluku ɛhye mukelɛ 5 kɔdwu 8 anwo la.

Nyia sukoavoma amuala anwo anyelielɛ, saa bɔbɔ bɛ gyimalilɛ ne le ɛgengalɛ, yɛkile anzɛɛ ɛdendɛlɛ ɛmanlɛ a. Boa bɛ maa bɛnwu mɔɔ bɛlɛyɛ la kɛ ɔnle gyimalilɛ bie ala, emomu nwolɛ adenle mɔɔ bamaa bɛanyia anyuhɔlɛ wɔ Gyihova ɛzonlenlɛ nu. Mɔdenle mɔɔ bɛdabɛ mumua ne bɛbabɔ la a bamaa bɛanyia anyuhɔlɛ a. Noko nwolɛ hyia kɛ sukulu zo neavolɛ ne kile bɛ nwo anyelielɛ na ɔboa bɛ ɔmaa bɛte nvasoɛ mɔɔ wɔ folɛdulɛ foa ne mɔ azo la abo, na ɔkilehile kɛzi bɛbava bɛali gyima la anu. Amaa wɔahola wɔayɛ ɛhye la, tie ɛdendɛlɛ biala kpalɛ amaa wɔahola wɔaha mɔɔ ɛbanwu ye la anwo edwɛkɛ kpalɛ.

Nea kɛ ɛbabɔ sukulu ne abo na wɔawie wɔ mekɛ nloa. Yɛ neazo kpalɛ ɔlua wɔ edwɛkɛ mɔɔ ɛbaha ye wɔ mekɛ mɔɔ bɛhile anu la azo. Saa sukoavo bie mekɛ ne kpa nwo a, ɔwɔ kɛ ɛdawɔ anzɛɛ wɔ boavolɛ ne maa ɔnwu ye. Ɔwɔ kɛ sukoavo ne dwula ye edwɛkɛ ne na ɔfi bama ne azo. Saa bie mɔ di mekɛ a, maa wɔ edwɛkɛ ɛdeɛ ne ɛyɛ nzinrenzinra, na saa bɛkpɔne a ɛ nee adiema ne ɛzuzu nwo.

Saa ɛwɔ ɛkɛ a, ɔwɔ kɛ ɛnea sukulu ne azo. Saa ɔdwu mekɛ ne bie na wɔangola kɔ a, ɔwɔ kɛ kpanyinli gyɛne mɔɔ mgbanyima eku ne kpale ye la nea sukulu ne azo. Saa ɛhyia moalɛ wɔ ngyehyɛleɛ ne ɛyɛlɛ, gyimalilɛ kɛlata ne azo ɛhɛlɛlɛ nee ye ɛhyɛlɛ nu anzɛɛ awie mɔɔ bagyinla awie agyakɛ anu la a, sonvolɛ mɔɔ mgbanyima eku ne ɛkpa ye la bahola aboa wɔ wɔ ɛhye mɔ ɛyɛlɛ nu.

Fa Sukoavoma Wula Nu. Si nolobɔlɛma kɔsɔɔti adua kɛ bɛva bɛ nwo bɛwula sukulu ne anu. Menli gyɛne mɔɔ bɛ nee asafo ne tu kpalɛ, bɛdie Baebolo ngilehilelɛ ne bɛto nu na bɛ ɛbɛlabɔlɛ nee Keleseɛne ngyinlazo yia la bahola ava bɛ nwo awula nu. Saa awie kulo kɛ ɔfa ɔ nwo ɔwula nu a, kanvo ye. Saa ɔtɛbayɛle nolobɔlɛnli a, kɛ sukulu zo neavolɛ la, ɔbayɛ kpalɛ kɛ ɛ nee ye bazuzu mɔɔ ɔwɔ kɛ ɔdwu nwo na yeafɛta la anwo wɔ mekɛ mɔɔ ahenle mɔɔ nee ye sukoa Baebolo ne la (anzɛɛ ye awovolɛ saa bɛle diedima a) wɔ ɛkɛ ne la. Ninyɛne ko ne ala a bɛ nee awie mɔɔ ɔkulo kɛ ɔyɛ nolobɔlɛnli mɔɔ bɛtɛsɔnenle ye la suzu nwo a. Bɛwɔ Organized to Do Jehovah’s Will ne mukelɛ 97 kɔdwu 99. Yɛ menli mɔɔ wɔ sukulu ne anu kɛkala la anwo kɛlɛtokɛ kpalɛ.

Fa Folɛdulɛ Kɛlata Ne Di Gyima. Sukoavo biala folɛdulɛ kɛlata ne wɔ ye buluku ɛdeɛ ne anu wɔ mukelɛ 79 kɔdwu 81. Kɛmɔ bɛva kɔla bɛhile la, saa sukoavo bie nyia ɛgengalɛ gyimalilɛ a, ɛbahola wɔamaa yeayɛ folɛdulɛ ne mɔɔ vi 1 kɔdwu 17 la. Saa gyimalilɛ ne le yɛkile a, folɛdulɛ 7, 52, nee 53 ala a ɛnrɛva ɛnrɛli gyima a. Saa gyimalilɛ ne le ɛdendɛlɛ noko a, folɛdulɛ 7, 18, yɛɛ 30 ala a ɛnrɛva ɛnrɛli gyima a.

Saa sukulu zo neavolɛ ne fa folɛdulɛ foa bie maa awie a ɔwɔ kɛ ɔfa pɛnsele ɔkɛlɛ ye wɔ “Kenle Mɔɔ Ɛnyianle Ye” la abo wɔ adenle mɔɔ la folɛdulɛ foa zɔhane anyunlu wɔ sukoavo ne buluku ne anu la anu. Saa sukoavo ne yɛ ye gyimalilɛ ne wie a, biza ye saa ɔyɛle gyimayɛlɛ ne mɔɔ wɔ folɛdulɛ foa ne awieleɛ la a. Saa ɔyɛle a, ɔwɔ kɛ ɛkɛlɛ ɛlɛka ne mɔɔ wɔ folɛdulɛ foa ne la anu. Saa ɛkpondɛ kɛ sukoavo ne di zɔhane folɛdulɛ foa ne anwo gyima bieko a, ɔngyia kɛ ɛbahɛlɛ debie wɔ folɛdulɛ foa ne; mmakɛlɛ debie wɔ “Kenle Mɔɔ Ɛwiele” la ɛlɛka ne anu. Saa sukoavo ne di nwolɛ gyima wie na ɔlɛkɔ folɛdulɛ fofolɛ zo a yɛɛ ɛbahɛlɛ “Kenle Mɔɔ Ɛwiele” ɛlɛka ne anu a. Eza saa ɔfa ndenle ne mɔ mɔɔ wɔ ye buluku ne anu wɔ mukelɛ 82 la bie ɔdi gyima a, ɔwɔ kɛ ɛkɛlɛ kenle mɔɔ ɔvale ɔlile gyima la wɔ nwolɛ wɔ ye buluku ne anu. Bɛgyakyi ɛleka wɔ folɛdulɛ kɛlata ne nee ndenle ne mɔ anwo amaa bɛahola bɛava biala bɛali gyima fane nwiɔ. Saa sukulu ne ɛlɛkɔ zo a, ɔwɔ kɛ sukoavoma ne dɛ bɛ buluku ne.

Saa ɛlɛkyɛ gyimalilɛ ne biala a, fa ɛdendɛlɛ folɛdulɛ kokye ala maa. Ɔle kpalɛ kɛ ɛbamaa bɛayɛ folɛdulɛ foa ne mɔ kɛmɔ bɛhyehyɛ bɛ la. Noko saa sukoavoma bie mɔ bɔ mɔdenle kpalɛ a, ɛbahola wɔazi bɛ adua kɛ bɛzukoa foa bie mɔ na bɛva bɛli gyima. Akee ɛbahola wɔaboa bɛ wɔ foa ne mɔ mɔɔ ɛdie ɛdi kɛ ɔbaboa kpalɛ yeamaa bɛanyia anyuhɔlɛ kɛ tendɛvolɛma nee kilehilevolɛma la anwo.

Saa sukoavo bie ɛli ɛvolɛ dɔɔnwo wɔ sukulu ne anu bɔbɔ a, ɔsukoa na ɔfa folɛdulɛ biala ɔdi gyima a ɔbanyia nvasoɛ kpole. Amaa wɔaboa sukoavoma mɔɔ bɛlɛ ngyianlɛ titile bie mɔ la, kɛ anrɛɛ ɛbamaa bɛali folɛdulɛ kɛlata ne azo kɛmɔ bɛhyehyɛ ye la, ɛbahola wɔakpa ɛdendɛlɛ subane bie mɔ wɔamaa bɛali nwolɛ gyima.

Folɛdulɛ. Saa ɛlɛtu folɛ a, fa Baebolo ne anu neazo nee ngyinlazo ne mɔ di gyima kpalɛ. Ɔwɔ kɛ sukoavo ne nwu ye kɛ folɛ ne nee kɛzi bɛdule ye la gyi ngyinlazo mɔɔ kpogya mɔɔ wɔ Nyamenle Edwɛkɛ ne anu la azo.

Kakye kɛ ɛ nee ɛ mediema mrenya nee mraalɛ a “ɛlɛyɛ gyima” a. (2 Kɔl. 1:24) Ɔwɔ kɛ ɛbɔ mɔdenle kɛ ɛbahɔ zo wɔanyia anyuhɔlɛ kɛ tendɛvolɛ nee kilehilevolɛ kɛ bɛdabɛ ala la. Ɛdawɔ mumua ne sukoa Nyia Teokelase Ɛzonlenlɛ Sukulu Ndetelɛ Zo Nvasoɛ buluku ne na fa folɛdulɛ ne di gyima, na yɛ neazo kpalɛ maa awie mɔ ɛyɛ bie.

Wɔ ɛhye ɛyɛlɛ nu, fa yɛ wɔ bodane kɛ ɛbaboa sukoavoma wɔamaa bɛayɛ kengavolɛma kpalɛ, tendɛvolɛma mɔɔ yɛ deɛ yɛɛ kilehilevolɛma mɔɔ bɔ mɔdenle. Amaa wɔahola wɔayɛ ɛhye la, bɔ mɔdenle fa moalɛ biala mɔɔ hyia la maa sukoavoma ne amaa bɛade ɛdendɛlɛ subane ngakyile ne mɔ abo, deɛmɔti nwolɛ hyia nee kɛzi bɛbahola bɛala bɛ ali la. Bɛziezie buluku ɛhye amaa yeaboa wɔ yeamaa wɔayɛ ye zɔ. Noko tɛ buluku ne anu edwɛkɛ mɔɔ ɛbagenga la ala a hyia a. Kilehile adwenle mɔɔ wɔ edwɛkɛ ne anu nee kɛzi bɛbava bɛali gyima la anu.

Saa sukoavo bie bɔ foa bie anwo mɔdenle a, kanvo ye. Ka mɔɔ manle ɔyɛle deɛ la anwo edwɛkɛ ekyi anzɛɛ deɛmɔti mɔɔ ɔyɛle la anwo hyia la. Saa ɔwɔ kɛ ɔbɔ debie bie anwo mɔdenle a, maa ɔnwu deɛmɔti ɔhyia la. Kilehile kɛzi ɔbali nwolɛ gyima la anu. Dua ɛbulɛ zo maa ɔnwu mɔɔ ɔwɔ kɛ ɔyɛ la.

Kakye kɛ ɔyɛ se ɔmaa menli dɔɔnwo kɛ bɛbagyinla menli ekpunli nyunlu bɛamaa ɛdendɛlɛ. Saa awie te nganeɛ kɛ yeambɔ mɔdenle a, bie a ɔnrɛnwu ye saa ɔwɔ kɛ ɔtoa zo a. Sukoa Gyisɛse mɔɔ yeambu “baka mɔɔ bɛkposo ye” anzɛɛ yeangua nzule “senle mɔɔ asɛɛ ɛnlu la anu” la. (Mat. 12:20) Suzu sukoavo ne nganeɛdelɛ nwo. Saa ɛlɛtu sukoavo bie folɛ a, anrɛɛ nea saa ɔle fofolɛ anzɛɛ nolobɔlɛnli mɔɔ ɔlɛ anwubielɛ a. Nganvolɛ mɔɔ vi ahonle nu na ɔmaa anwosesebɛ la kola maa menli kɔ zo yɛ mɔɔ bɛbahola la.

Di sukoavo biala eni. Wulomuma 12:10 se: “Bɛbɔ mɔdenle bɛpele bɛbu bɛ gɔnwo mɔ kpalɛ kpalɛ.” Folɛdulɛ ɛhye fɛta maa Teokelase Ɛzonlenlɛ Sukulu ne folɛtuvolɛ ne. Saa sukoavo ne tɛla wɔ kpanyinli a, bɔ mɔdenle di 1 Temɔte 5:1, 2 adehilelɛ ne azo. Ɔnva nwo ɛvolɛ mɔɔ awie ɛli la, saa bɛdua ɛbulɛ zo bɛtu ye folɛ wɔ kɛzi ɔwɔ kɛ ɔyɛ ye ninyɛne la anwo a, ɔta ɔdie ɔto nu ndɛndɛ.​—Mrɛ. 25:11.

Saa ɛlɛtu sukoavo bie folɛ a, maa ɔnwu ndetelɛ ne bodane. Tɛ bodane ne a le kɛ ɔbayɛ deɛ na bɛahanvo ye wɔ ye ɛdendɛlɛ ne anwo na bɛaha kɛ ɔhɔ folɛdulɛ foa bieko azo. Tɛ bodane ne a le kɛ ɔbayɛ tendɛvolɛ nee kilehilevolɛ mɔɔ awie mɔ bɛahanvo ye. (Mrɛ. 25:27) Mɔɔ yɛkulo la a le kɛ yɛbava yɛ ɛdendɛlɛ ahyɛlɛdeɛ ne yɛaye Gyihova ayɛlɛ na yɛaboa awie mɔ yɛamaa bɛanwu ye na bɛahulo ye. Yɛ ndetelɛ ne baboa yɛ amaa yɛahola yɛayɛ gyima mɔɔ wɔ Mateyu 24:14 yɛɛ 28:19, 20 la kpalɛ. Ɔdwu mekɛ ne bie a bɛto ɛsalɛ bɛfɛlɛ mediema mrenya mɔɔ bɛzɔne na bɛfɛta la bɛmaa bɛnea ‘Nyamenle mboane ekpunli’ ne azo kɛ bagua nu tendɛvolɛma nee kilehilevolɛma.​—1 Pita 5:2, 3.

Ka kile sukoavoma ne kɛ bɛva kenle ekyi bɛgenga folɛdulɛ foa bieko mɔɔ bɛhilehile nu wɔ buluku ne anu la anu wɔ mekɛ mɔɔ bɛbava bɛamaa bɛ la. Si bɛ adua kɛ bɛva mɔɔ bɛlɛsukoa la bɛziezie bɛ foa ɛdeɛ ne wɔ sukulu ne anu, adawubɔlɛ nu, mualɛ ɛmanlɛ wɔ debiezukoalɛ bo yɛɛ daselɛlilɛ nu.

Gyimalilɛ Ɛhyehyɛlɛ. Yeanyɛ boɛ fee la ɔwɔ kɛ ɛkyɛ gyimalilɛ ne ɛmaa bɛ kɛyɛ dapɛne nsa kolaa na mekɛ ne adwu. Ɔbayɛ boɛ a, ɔwɔ kɛ bɛkɛlɛ sukoavo biala gyimalilɛ ne bɛmaa ye.

Ɔwɔ kɛ ɛfa foa ne mɔ mɔɔ fane asafo ne ɛhilehilelɛ nwo la ɛmaa mgbanyima, saa ɔbayɛ boɛ a bɛdabɛ mɔɔ bɛbahola foa zɔhane mɔ yɛ kpalɛ la, yɛɛ azonvolɛ mɔɔ ze kilehile kpalɛ la.

Amaa wɔanwu gyimalilɛ mɔɔ ɔwɔ kɛ ɛfa ɛmaa mediema mrenya nee mraalɛ la, di adehilelɛ mɔɔ wɔ sukulu ngyehyɛleɛ ne anu la anzi. Saa mediema mraalɛ mɔɔ yɛ gyimalilɛ ne la zonle tɛla mrenya ne mɔ a, nea kɛ ɛbamaa mediema mrenya ne mɔ anyia adenle ayɛ gyimalilɛ mɔɔ ɔnle ɛgengalɛ ngome la.

Suzu awie biala tɛnlabelɛ nwo wɔ mekɛ mɔɔ ɛlɛhyehyɛ gyimalilɛ ne la. Asoo ɔbayɛ kpalɛ kɛ ɛbamaa kpanyinli anzɛɛ sonvolɛ bie gyima wɔ sukulu ne anu wɔ nɔsolɛ zɔhane mɔɔ ɔlɛ gyimalilɛ wɔ Ɛzonlenlɛ Nyianu ne anu anzɛɛ bagua nu ɛdendɛlɛ wɔ zɔhane dapɛne ne anu wɔ asafo ne anu la ɔ? Asoo ɔbayɛ kpalɛ kɛ ɛbamaa adiema raalɛ bie gyimalilɛ wɔ nɔsolɛ ko ne ala mɔɔ ɔ ra kakula mɔɔ ɔwɔ kɛ ɔboa ye la noko lɛ gyimalilɛ la ɔ? Ye titile ne, saa ahenle ne le kakula anzɛɛ Baebolo sukoavo mɔɔ bɛtɛsɔnenle ye a, asoo edwɛkɛ tile ne fɛta ɔ? Nea kɛ ɛdendɛlɛ subane ne fɛta sukoavo ne gyimalilɛ ne.

Wɔ mediema mraalɛ ne mɔ gyimalilɛ ne anu, fane dɔɔnwo ne ala sukoavo ne a balua adehilelɛ mɔɔ wɔ mukelɛ 78 nee 82 la azo akpa ndenle mɔɔ fɛta la. Ɔwɔ kɛ ɛmaa ye boavolɛ ko, noko eza bɛbahola bɛava boavolɛ bieko bɛali gyima. Saa sukoavo bie sɛlɛ kɛ ɛmaa ɔ nee boavolɛ mɔɔ fɛta mɔɔ ɔbahola yeali ndenle bie anwo gyima la a, ɔwɔ kɛ ɛsuzu ye edwɛkɛ ne anwo.

Ekpunli Mɔɔ Tɔ Zo Nwiɔ. Saa sukoavoma mɔɔ wɔ sukulu ne anu la bo 50 a, bɛbahola bɛakpondɛ ɛleka fofolɛ bɛayɛ sukulu ne bie wɔ ɛkɛ. Bɛbahola bɛanlea asafo ne ngyianlɛ nwo na bɛava ngyehyɛleɛ ɛhye bɛayɛ sukoavoma gyimalilɛ ne amuala anzɛɛ nwiɔ ne mɔɔ li awieleɛ la ala.

Saa ɔbayɛ boɛ a, ɔwɔ kɛ kpanyinli mɔɔ fɛta la nea ekpunli ne mɔɔ tɔ zo nwiɔ la azo. Saa kpanyinli ɛnle ɛkɛ a, bɛbahola bɛava sonvolɛ mɔɔ fɛta la bɛali gyima. Ɔwɔ kɛ mgbanyima eku ne a kpa folɛtuvolɛma ɛhye mɔ a. Ɔwɔ kɛ ɛ nee ekpunli mɔɔ tɔ zo nwiɔ la azo neavolɛ ne yɛ ko amaa bɛanwu sukoavoma ne mɔdenlebɔlɛ nee kɛzi ɔwɔ kɛ bɛboa bɛ la.

Ɛgengalɛ Ɛzukoalɛ. Saa mgbanyima eku ne nwu ye kɛ menli dodo bie mɔɔ wɔ asafo ne anu la hyia ndetelɛ amaa bɛahola bɛagenga aneɛ mɔɔ asafo ne fa di gyima la a, bɛbahola bɛayɛ ngyehyɛleɛ ɛhye bɛaboka Teokelase Ɛzonlenlɛ Sukulu ne anwo. Bɛbahola bɛava bɛahile kɛzi bɛkenga anzɛɛ bɛkɛlɛ la, anzɛɛ bɛbahola bɛava bɛaboa menli mɔɔ bɛ ɛgengalɛ ɛnvie kpalɛ la.

Ɔnle kɛ bɛyɛ ndetelɛ ɛhye mɔ wɔ mekɛ mɔɔ sukoavoma ɛlɛyɛ bɛ gyimalilɛ wɔ Teokelase Ɛzonlenlɛ Sukulu ne anu la. Amaa bɛaboa bɛ kpalɛ la, ɔbahyia mekɛ dɔɔnwo yeadɛla kɛ anrɛɛ bɛbayɛ bɛaboka sukulu ne anwo la. Mgbanyima ne mɔ bɛahola azuzu mɔɔ bɛhyia nee mekɛ mɔɔ bɛbava bɛayɛ la anwo. Saa bɛsuzu nwo bɛwie a, akee bɛbahile kɛ ɔwɔ kɛ bɛyɛ ye ekpunli anzɛɛ bɛkile bɛ ngoko ngoko a.

Bɛbahyia kilehilevolɛ mɔɔ fɛta la anwo. Ɔbayɛ boɛ a, bɛva gyimalilɛ ne bɛmaa adiema nrenya mɔɔ ze kenga kpalɛ na ɔze bɛ aneɛ ne kpalɛ la. Saa bɛanyia adiema nrenya a, mgbanyima ne mɔ bahola amaa adiema raalɛ mɔɔ bɔ mɔdenle na ɔyɛ neazo kpalɛ la aboa. Saa ɔlɛkile ekpunli ne debie a, ɔwɔ kɛ ɔkeda ɔ ti zo.​—1 Kɔl. 11:3-10; 1 Tem. 2:11, 12.

Bɛyɛ Sukoa Ɛgengalɛ Nee Ɛhɛlɛlɛ buluku ne wɔ aneɛ dɔɔnwo anu. Bɛyɛ ye mɔɔ bɛfa bɛsukoa ɛgengalɛ nee ɛhɛlɛlɛ. Bɛbahola bɛanlea kɛzi menli mɔɔ wɔ ekpunli ne anu ɛgengalɛ de la anwo na bɛava mbuluku gyɛne bɛali gyima. Saa sukoavoma ne nyia anyuhɔlɛ mɔɔ fɛta la a, ɔwɔ kɛ bɛsi bɛ adua kɛ bɛva bɛ nwo bɛwula Teokelase Ɛzonlenlɛ Sukulu ngyehyɛleɛ ne anu dahuu.

Kɛ Teokelase Ɛzonlenlɛ Sukulu zo neavolɛ la, ɛbahola wɔayɛ dɔɔnwo wɔaboa asafo ne. Siezie ɛ nwo kpalɛ maa ɔ nee folɛdulɛ mɔɔ wɔ Wulomuma 12:6-8 la ɛyia na yeye ɛ kunlu yɛ wɔ gyima ne kɛ ahyɛlɛdeɛ mɔɔ vi Nyamenle ɛkɛ.