Nyamenle Agbɔvolɛ A Le Nwane Mɔ?

Nyamenle kpɔvolɛ kpole kpalɛ a le Seetan Abɔnsam. Ɔle sunsum nu abɔdeɛ mɔɔ dele Gyihova anwo atua a. Seetan kɔ zo dwazo tia Nyamenle na ɔfa ngyegyelɛ dɔɔnwo ɔba alesama anwo zo. Seetan le amumuyɛ. Ɔle adalɛ nee kodiawu.​—Dwɔn 8:44.

Sunsum nu abɔdeɛ gyɛne rabokale Seetan anwo bɛdele Nyamenle anwo atua. Baebolo ne fɛlɛ bɛ sunsum ɛtane. Sunsum ɛtane ne mɔ le alesama agbɔvolɛ kɛ Seetan la. Bɛkulo kɛ bɛboda menli. (Mateyu 9:32, 33; 12:22) Gyihova bazɛkye Seetan nee ye sunsum ɛtane ne mɔ bɔkɔɔ. Mekɛ ekyi bie ala a bɛlɛ mɔɔ bɛbava bɛagyegye alesama a.​—Yekile 12:12.

Saa ɛkpondɛ kɛ ɛyɛ Nyamenle agɔnwo a, ɛnee ɔnle kɛ ɛyɛ mɔɔ Seetan kpondɛ kɛ ɛyɛ la. Seetan nee sunsum ɛtane ne mɔ kpɔ Gyihova. Bɛle Nyamenle agbɔvolɛ, na bɛkpondɛ kɛ bɛmaa ɛyɛ Nyamenle kpɔvolɛ. Ɔwɔ kɛ ɛkpa mɔɔ ɛkulo kɛ ɛsɔ ɔ nye la​—Seetan anzɛɛ Gyihova. Saa ɛkulo dahuu ngoane a, ɛnee ɔwɔ kɛ ɛkpa kɛ ɛbayɛ Nyamenle ɛhulolɛdeɛ. Seetan lɛ ndenle dɔɔnwo mɔɔ ɔdua zo ɔbɛlɛbɛla menli a. Ɔlɛyɛ menli dɔɔnwo koasea.​—Yekile 12:9.