Gyisɛse Ba Kɛ Belemgbunli

MEKƐ mɔɔ Gyisɛse yɛle anyezinliravolɛma nwiɔ ne mɔɔ sɛlɛzɛlɛ ezukoa la ayile wiele la anzi mekɛ ekyi, ɔrale namule ekyi bie mɔɔ bikye Gyɛlusalɛm la azo. Ɔhanle ɔhilele ye ɛdoavolɛma ne anu nwiɔ kɛ: ‘Bɛhɔ namule ne azo na bɛkɛnwu asoaso ralɛ wɔ ɛkɛ ne. Bɛzianyi ye na bɛva ye bɛrɛlɛ me.’

Mɔɔ bɛvale asoaso ne bɛrɛlɛle ye la, Gyisɛse dɛnlanle zolɛ. Akee ɔhanle ɔhɔle Gyɛlusalɛm mɔɔ ɛnee wɔ ɔ nyunlu ekyii la. Mɔɔ ɔbikyele suakpole ne la, menli dɔɔnwo vindele rayiale ye adenle. Bɛ nuhua dɔɔnwo sesɛle bɛ ndanlɛ wɔ adenle ne anu. Bie mɔ pepɛle arɛlɛ mrɛlakɛ. Bɛvale ɛhye mɔ noko bɛguale adenle ne anu, na bɛdeanle nuhua kɛ: ‘Nyamenle ɛyila belemgbunli ne mɔɔ lua Gyihova duma nu ɛlɛba la!’

Wɔ tete Yizilayɛ ɛnee arelemgbunli fofolɛ tɛnla asoaso ralɛ zo kɔ Gyɛlusalɛm na bɛfa bɛ nwo bɛkɔkile menli ne. Ɛhye a Gyisɛse ɛlɛyɛ la. Na menli ɛhye mɔ ɛlɛda ye ali kɛ bɛkulo kɛ Gyisɛse yɛ bɛ belemgbunli. Noko tɛ menli ne amuala a kulo ye a. Yɛkola yɛnwu ɛhye wɔ mɔɔ zile wɔ mekɛ mɔɔ Gyisɛse hɔle ɛzonlenlɛ sua ne anu la.

Gyisɛse yɛle menli mɔɔ anye ɛzi yɛɛ menli mɔɔ le abubura la ayile wɔ ɛzonlenlɛ sua ne anu. Mɔɔ ngakula ne mɔ nwunle ɛhye la, bɛyeyɛle Gyisɛse. Noko ɛhye manle ɛsɔfo ne mɔ vale ɛya, na bɛhanle bɛhilele Gyisɛse kɛ: ‘Ɛte mɔɔ ngakula ne mɔ ɛlɛkeha la?’

Gyisɛse buale kɛ: ‘Ɛhɛe, Mete. Bɛtɛkengale Baebolo ne ɛleka ne mɔɔ se: “Ngakula ndetendete nloa nu a Nyamenle bamaa ayɛlɛyelɛ ara la” ɔ?’ Yemɔti ngakula ne mɔ hɔle zolɛ yele Nyamenle belemgbunli ne ayɛlɛ.

Yɛkpondɛ kɛ yɛyɛ kɛ ngakula zɔhane ne mɔ la, tɛ zɔhane ɔ? Menli bie mɔ babɔ mɔdenle kɛ bɛmaa yɛagyakyi Nyamenle belemgbunlililɛ ne anwo edwɛkɛ ɛhanlɛ. Noko yɛbahɔ zo yɛaha nwanwane ninyɛne mɔɔ Gyisɛse bayɛ amaa menli la anwo edwɛkɛ.

Mekɛ mɔɔ Gyisɛse wɔ azɛlɛ ye azo la ɛnee ɔnle mekɛ mɔɔ ɔwɔ kɛ ɔbɔ ɔ bo ɔdi tumi a. Kenle nzu a mekɛ ɛhye badwu a? Ɛnee Gyisɛse ɛdoavolɛma ne kpondɛ kɛ bɛnwu ye. Yɛbazukoa ɛhye anwo debie wɔ mɔɔ doa zolɛ la anu.