DWƆN YEKILE

1 Gyisɛse Kelaese yekile*+ mɔɔ Nyamenle vale maanle ye kɛ ɔva ɔhile ye ngɛkɛlɛ+ ninyɛne mɔɔ ɔnrɛhyɛ na yeazi la. Na ɔzoanle ye anwumabɔvolɛ na ɔluale sɛkɛlɛneɛ zo ɔvale ɔmaanle ye akɛlɛ Dwɔn,+ 2 mɔɔ lile edwɛkɛ ne mɔɔ Nyamenle vale maanle nee daselɛ ne mɔɔ Gyisɛse Kelaese vale maanle, ɛhɛe, mɔɔ ɔnwunle ye la amuala anwo daselɛ la. 3 Anyelielɛ a le awie mɔɔ kenga ngapezo edwɛkɛ ɛhye kpole nee bɛdabɛ mɔɔ bɛtie na bɛdi ninyɛne mɔɔ bɛhɛlɛ ye wɔ nu la azo la,+ ɔluakɛ mekɛ ne ɛbikye.

4 Dwɔn ɛlɛkɛlɛ ahɔmaa asafo nsuu ne+ mɔɔ wɔ Ehyea maanzinli nu la:

Ɛlolɛ kpole nee anzodwolɛ ɛvi “Mɔɔ ɛnee wɔ ɛkɛ, na ɔtɛbɔ ɛkɛ na ɔlɛba,”+ nee sunsum nsuu ne+ mɔɔ wɔ ye belemgbunli ebia ne anyunlu, 5 yɛɛ Gyisɛse Kelaese, “Dasevolɛ Nɔhavo ne,”+ “mowuamra anu belamunli ralɛ ne,”+ nee “azɛlɛ ye azo arelemgbunli ne mɔ Tumivolɛ ne”+ ɛkɛ ɛha bɛ.

Ahenle mɔɔ kulo yɛ+ na ɔlua ye mogya ne azo yelie yɛ yevi yɛ ɛtane nu+— 6 na yeyɛ yɛ arelemgbunli+ nee ɛsɔfoma*+ yemaa ye Nyamenle nee ɔ Ze—ɛhɛe, yemɔ a anyunlunyia nee tumi ɛyɛ ye ɛdeɛ dahuu a. Amen.

7 Nea! Ɔlua amungu nu ɔlɛba,+ na ɛnyelɛ muala banwu ye, bɔbɔ bɛdabɛ mɔɔ bɛwɔle ɔ nvenle foa atwɛ la; na ɔdaye ti, azɛlɛ ye azo mbusua kɔsɔɔti bava nyanelilɛ abobɔ bɛ kɛnra azo.+ Ɛhɛe, Amen.

8 “Mame a mele Alefa nee Omiga* ne,”+ kɛ Gyihova* Nyamenle se la ɛne, “Mɔɔ ɛnee wɔ ɛkɛ, na ɔtɛbɔ ɛkɛ na ɔlɛba la, Tumivolɛ Bedevinli ne.”+

9 Medame Dwɔn, bɛ diema mɔɔ bɛ nee ye ɛlɛnwu amaneɛ+ noko yɛgyinla kpundii+ na yɛbanyia kyɛfoa wɔ belemgbunlililɛ ne+ anu wɔ Gyisɛse ati la,+ ɛnee mewɔ bɔra ne mɔɔ bɛfɛlɛ ye Patemɔso la azo ɔlua Nyamenle anwo edwɛkɛ mɔɔ menganle na menlile Gyisɛse anwo daselɛ la ati. 10 Ɔlua sunsum ne azo membale Awulae kenle ne anu na mendele ɛnelɛ bie mɔɔ le kɛ aweɛne tendenle ne la wɔ me nzi, 11 ɔse: “Mɔɔ ɛkɛnwu ye la, kɛlɛ ye wɔ nwomamobɔleɛ nu na fa kɔmaa asafo nsuu ne: wɔ Ɛfɛsɛse,+ Semɛna,+ Pɛgamɛm,+ Tayataela,+ Saadese,+ Feladɛlefea+ yɛɛ Lawɔdesia.”+

12 Mengakyile me nwo kɛ menea ahenle mɔɔ ɛlɛtendɛ ahile me la, na mɔɔ mengakyile me nwo la, menwunle nvutuke kɛnlaneɛ mbaka nsuu,+ 13 na ɛnee awie mɔɔ le kɛ sonla ra la wɔ kɛnlaneɛ mbaka ne avinli,+ ɔwula tɛladeɛ tendenle mɔɔ dwu ɔ gyakɛ aze na nvutuke tabule* hye ɔ kɛnra azo. 14 Bieko, ɛnee ɔ ti enrinli le fufule nwohyee kɛ boane enrinli, kɛ ezukɔtweaba, na ɔ nye le kɛ sendɔlɔra,+ 15 na ɛnee ɔ gyakɛ anwo ta kɛ kɔbele kpalɛ+ mɔɔ bɛholo ye wɔ fonlomo nu la, yɛɛ ɔ ne dielie kɛ nzule dɔɔnwo mɔɔ lua awolɛ zo la. 16 Ɛnee ɔlɛ nwɔlɔra nsuu wɔ ɔ sa fema ne anu,+ na konle dadeɛ tendenle anye nwiɔ mɔɔ anloa yɛ nla la+ vi ɔ nloa anu finde, na ɔ nyunlu le kɛ sɛnzɛne mɔɔ ɛlɛta kpole la.+ 17 Mɔɔ menwunle ye la, mempɛle menfinle ɔ gyakɛ anu kɛ asɛɛ mewu la.

Na ɔvale ɔ sa fema ne ɔdole me nwo zo na ɔhanle kɛ: “Mmasulo. Mame a mele Alimoa ne+ nee Awieleɛ ne,+ 18 nee teasenli ne a,+ na menwule,+ noko nea! mede aze dahuu,+ na melɛ ewule nee Nla* sanvɛ ne.+ 19 Ɔti kɛlɛ ninyɛne mɔɔ ɛnwunle ye la nee ninyɛne mɔɔ wɔ ɛkɛ nee ninyɛne mɔɔ bazi ɛhye anzi la to ɛkɛ. 20 Nwɔlɔra nsuu ne mɔɔ ɛnwunle bɛ wɔ me sa fema ne anu nee nvutuke kɛnlaneɛ mbaka nsuu ne anwo fealeranu edwɛkɛ nwuanzanwuanza ne abo a le ɛhye: Nwɔlɔra nsuu ne le asafo nsuu ne anwumabɔvolɛ ne mɔ, yɛɛ kɛnlaneɛ mbaka nsuu ne le asafo nsuu ne.+

2 “Kɛlɛ kɔmaa Ɛfɛsɛse+ asafo ne anwumabɔvolɛ ne+ kɛ: Ɛhye a mɔɔ lɛ nwɔlɔra nsuu ne mɔ wɔ ɔ sa fema ne anu na ɔlua nvutuke kɛnlaneɛ mbaka nsuu ne avinli la se a:+ 2 ‘Meze wɔ gyima nee wɔ ɛvɛlɛ nee wɔ kpundiigyinlanlɛ, ɛnlie menli mɔɔ yɛ ninyɛndane la ɛndo nu, yɛɛ wɔzɔ bɛdabɛ mɔɔ bɛka kɛ bɛle ɛzoanvolɛma noko bɛnle zɔ la wɔnlea,+ na wɔnwu kɛ bɛle adalɛ. 3 Eza ɛlɛgyinla kpundii, na me duma ne ati wɔgyinla ngyegyelɛ dɔɔnwo anu+ yɛɛ ɔtɛyɛle wɔ ɛvɛlɛ.+ 4 Noko melɛ ɛhye metia wɔ, kɛ wɔgyakyi ɛlɔlɛ ne mɔɔ ɛnee ɛlɛ ye alimoa ne la.

5 “‘Ɛhye ati kakye ɛleka mɔɔ ɛvi ɛdɔle aze la, na nu ɛ nwo+ na yɛ gyima mɔɔ alimoa ne ɛyɛle la. Wɔanyɛ ye zɔ a, mebara ɛ nwo ɛkɛ na meaye wɔ kɛnlaneɛbaka ne+ meavi ɛleka mɔɔ ɔgyi la, kyesɛ ɛnu ɛ nwo.+ 6 Noko debie kpalɛ ko wɔ ɛkɛ mɔɔ ɛlɛyɛ a: ɛkyi Nekɔlɔsoma eku ne gyima ne+ mɔɔ medame noko mekyi la. 7 Bɛmaa mɔɔ lɛ ɛnzolɛ la ɛdie mɔɔ sunsum ne ka kile asafo ne mɔ la:+ Mɔɔ kɛli konim la,+ mebamaa yeali ngoane baka ne+ mɔɔ gyi Nyamenle paladaese ne anu la ma ne bie.’

8 “Na kɛlɛ kɔmaa Semɛna asafo ne anwumabɔvolɛ ne kɛ: Ɛhye a ‘Alimoa ne nee Awieleɛ ne,’+ mɔɔ wule na yera ngoane nu bieko la se a:+ 9 ‘Meze wɔ amaneɛnwunlɛ nee wɔ ehyia—noko ɛle sukoavolɛ+—nee munzule edwɛkɛ mɔɔ bɛdabɛ mɔɔ bɛse bɛle Dwuuma noko bɛnle zɔ, emomu bɛle Seetan nyianusua nu menli ka la.+ 10 Mmasulo amaneɛ mɔɔ bado wɔ la.+ Nea! Abɔnsam bava bɛ nuhua bie mɔ agua efiade amaa bɛazɔ bɛ bɛanlea bɔkɔɔ, na bɛbanwu amaneɛ dedee kenle bulu. Di nɔhalɛ, bɔbɔ kɔdwu ewule nu, na mebamaa wɔ ngoane abotile.+ 11 Bɛmaa mɔɔ lɛ ɛnzolɛ la ɛdie+ mɔɔ sunsum ne ka kile asafo ne mɔ la: Mɔɔ kɛli konim la,+ ewule ne mɔɔ tɔ zo nwiɔ la bakpa ɔ ti.’+

12 “Kɛlɛ kɔmaa Pɛgamɛm asafo ne anwumabɔvolɛ ne kɛ: Ɛhye a mɔɔ lɛ konle dadeɛ tendenle anye nwiɔ ne mɔɔ yɛ nla la se a:+ 13 ‘Meze ɛleka mɔɔ ɛde la, kile kɛ, ɛde ɛleka mɔɔ Seetan ebia ne gyi la; noko ɛkɔ zo ɛsɔ me duma ne anu ɛsesebɛ,+ na wɔangyakyi diedi mɔɔ ɛlɛ ye wɔ me nu la anu,+ bɔbɔ wɔ me dasevolɛ nɔhavo Antɛpase mekɛ zo,+ ahenle mɔɔ bɛhunle ye wɔ ɛ nwo ɛkɛ ne,+ ɛleka mɔɔ Seetan de la.

14 “‘Noko, melɛ debie ekyi metia wɔ, ɛlɛ menli bie mɔ mɔɔ li Beelam ngilehilelɛ ne anzi la wɔ ɛkɛ,+ ahenle mɔɔ hilehilele Beelake+ kɛ ɔva azedolɛ bolɛ ɔdo Yizilayɛma anyunlu ɔmaa bɛli ninyɛne mɔɔ bɛva bɛbɔ afɔle bɛmaa awozonle na bɛbɔ adwɔmane ɛbɛla* la.+ 15 Zɔhane ala a ɛdawɔ noko ɛlɛ menli mɔɔ li Nekɔlɔsoma eku ne ngilehilelɛ ne anzi a.+ 16 Yemɔti nu ɛ nwo. Saa wɔanyɛ ye zɔ a, melɛba ɛ nwo lɔ ndɛndɛ, na mebava konle dadeɛ tendenle ne mɔɔ vi me nloa anu la me nee bɛ araho.+

17 “‘Bɛmaa mɔɔ lɛ ɛnzolɛ la ɛdie mɔɔ sunsum ne ka kile asafo ne mɔ la:+ Mɔɔ kɛli konim la,+ mebamaa ye mana ne mɔɔ vea la bie,+ yɛɛ mebamaa ye bolɛ fufule, na bɛhɛlɛ duma fofolɛ bie wɔ bolɛ ne azo mɔɔ awie biala ɛnze kyesɛ ahenle mɔɔ banyia ye la angomekye.’

18 “Kɛlɛ kɔmaa Tayataela+ asafo ne anwumabɔvolɛ ne kɛ: Ɛhye a Nyamenle Ara ne, mɔɔ ɔ nye le kɛ sendɔlɔra+ na ɔ gyakɛ le kɛ kɔbele kpalɛ la se a:+ 19 ‘Meze wɔ gyima nee wɔ ɛlɔlɛ nee diedi nee wɔ ɛzonlenlɛ gyima nee wɔ kpundiigyinlanlɛ, na wɔ gyima mɔɔ li amozi la tɛla mɔɔ ɛyɛle ye alimoa ne la.

20 “‘Noko melɛ ɛhye metia wɔ, kɛ ɛdie zɔhane raalɛ Gyɛzɛbɛle+ mɔɔ fɛlɛ ɔ nwo ngapezonli raalɛ la ɛto nu, ɔkilehile na ɔbɛlɛbɛla me ngɛkɛlɛ kɛ bɛbɔ adwɔmane ɛbɛla*+ na bɛli ninyɛne mɔɔ bɛva bɛbɔ afɔle bɛmaa awozonle la. 21 Na memaanle ye mekɛ kɛ ɔnlu ɔ nwo, noko ɔngulo kɛ ɔnu ɔ nwo ɔfi ye adwɔmane ɛbɛla* ne anwo. 22 Nea! Melɛba mearavuandi ye meado anwonyane ɛkpa zo, na meamaa bɛdabɛ mɔɔ bɛ nee ye sɛkye agyalɛ la anwu amaneɛ kpole, kyesɛ bɛnu bɛ nwo wɔ ye gyima ne anwo. 23 Na mebava ewulenzane meahu ɔ mra ne mɔ, amaa asafo ne mɔ amuala anwu kɛ medame a meneɛnlea sonla ti anu* nee ahonle nu a, na mebadua awie biala kakɛ kɛ mɔɔ ye gyima de la.+

24 “‘Noko, meka meahile bɛdabɛ mɔɔ bɛha mɔɔ bɛwɔ Tayataela, bɛdabɛ mɔɔ bɛnli ngilehilelɛ ɛhye anzi la kɔsɔɔti, bɛdabɛ mɔɔ bɛtɛnwunle mɔɔ bie mɔ fɛlɛ ye “Seetan ninyɛne mɔɔ anu le kuloonwu” la kɛ:+ Menrɛva adesoa gyɛne biala menrɛdo bɛ nwo zo. 25 Yemɔ ala a le kɛ, bɛzɔ mɔɔ bɛlɛ ye la anu kpalɛ kɔkpula kɛ mekɛra.+ 26 Na mɔɔ kɛli konim na ɔkɛyɛ me gyima ne ɔkɛhɔ awieleɛ la, mebamaa ye tumi wɔ maanle maanle ne mɔ anwo zo,+ 27 na ɔbava bulalɛ kpɔma yeaha menli ne kɛ mboaneneavolɛ la+ na yeabubu bɛ dwɔkɔdwɔkɔ kɛ ɛyɛba, kɛ mɔɔ medame noko menyia ye mevi me Ze ɛkɛ ne la. 28 Na mebava nwonlomɔ ɛwɔlɔra ne meamaa ye.+ 29 Bɛmaa mɔɔ lɛ ɛnzolɛ la ɛdie mɔɔ sunsum ne ka kile asafo ne mɔ la.’

3 “Kɛlɛ kɔmaa Saadese asafo ne anwumabɔvolɛ ne kɛ: Ɛhye a mɔɔ lɛ Nyamenle sunsum nsuu ne+ nee nwɔlɔra nsuu ne la se a:+ ‘Meze wɔ gyima kɛ ɛlɛ duma* kɛ ɛde ngoane nu, noko wɔwu.+ 2 Sinza,+ na miemia ninyɛne mɔɔ ɛha mɔɔ ɛlɛwu la anu, ɔluakɛ meannwu kɛ wɔwie wɔ gyima wɔ me Nyamenle ne anyunlu. 3 Yemɔti, kɔ zo kakye mɔɔ wɔnyia ye nee mɔɔ wɔde la na di zo, na nu ɛ nwo.+ Nɔhalɛ nu, saa wɔanzinza a mebara kɛ awule la,+ na ɛnrɛnwu mekɛ holɛ ko ne mɔɔ mebara ɛ nwo zo la ɛlɛ.+

4 “‘Noko, ɛlɛ menli* ekyi wɔ Saadese mɔɔ bɛanyɛ bɛ adɛladeɛ evinli a,+ na bɛbawula adɛladeɛ fufule bɛ nee me alua,+ ɔluakɛ bɛfɛta. 5 Ɔti mɔɔ kɛli konim la,+ bɛbawula ye tɛladeɛ fufule+ na menrɛye* ye duma menrɛvi ngoane buluku ne anu ɛlɛ,+ emomu mebabɔ ye duma wɔ me Ze nee ye anwumabɔvolɛma ne anyunlu.+ 6 Bɛmaa mɔɔ lɛ ɛnzolɛ la ɛdie mɔɔ sunsum ne ka kile asafo ne mɔ la.’

7 “Kɛlɛ kɔmaa Feladɛlefea asafo ne anwumabɔvolɛ ne kɛ: Ɛhye a mɔɔ le nwuanzanwuanza,+ ɔle nɔhavo,+ mɔɔ lɛ Devidi sanvɛ ne,+ mɔɔ buke a awie ɛndo nu na ɔto nu a awie ɛmbuke la se a: 8 ‘Meze wɔ gyima—nea! meva anlenkɛ mɔɔ bɛbuke la mezie ɛ nyunlu+ mɔɔ awie ɛngola ɛndo nu. Meze kɛ ɛlɛ tumi ekyi noko ɛlile me edwɛkɛ zo na wɔamkpo me duma. 9 Nea! Mebamaa bɛdabɛ mɔɔ bɛvi Seetan nyianusua nu mɔɔ bɛka kɛ bɛle Dwuuma noko bɛnle zɔ+ na bɛlɛbɔ adalɛ la—nea! mebamaa bɛarahoto* ɛ gyakɛ abo na bɛanwu kɛ mekulo wɔ. 10 Kɛmɔ ɛlile me kpundiigyinlanlɛ nwo edwɛkɛ ne azo* la ati,+ mebaye wɔ meavi sɔnea mekɛ+ mɔɔ bara ewiade amuala arazɔ menli mɔɔ de azɛlɛ ye azo anlea la anu. 11 Melɛba ndɛndɛ.+ Kɔ zo sɔ mɔɔ ɛlɛ la anu kpalɛ amaa awie anlie wɔ abotile ne.+

12 “‘Mɔɔ kɛli konim la—mebayɛ ye pila wɔ me Nyamenle ne ɛzonlenlɛsua nu, na ɔnrɛvi ɛkɛ ne ɔnrɛhɔ bieko, na mebahɛlɛ me Nyamenle ne duma+ yɛɛ me Nyamenle sua ne duma, Gyɛlusalɛm Fofolɛ ne+ mɔɔ vi Nyamenle ɛkɛ ne wɔ anwuma ɔbadwu aze la, yɛɛ me duma fofolɛ ne wɔ ɔ nwo.+ 13 Bɛmaa mɔɔ lɛ ɛnzolɛ la ɛdie mɔɔ sunsum ne ka kile asafo ne mɔ la.’

14 “Kɛlɛ kɔmaa Lawɔdesia asafo ne anwumabɔvolɛ ne+ kɛ: Ɛhye a Amen ne,+ dasevolɛ+ nɔhavo nee nɔhalɛnli,+ Nyamenle abɔdeɛ mɔlebɛbo ne se a:+ 15 ‘Meze wɔ gyima kɛ ɛnle weɛlɛkɔkɔ yɛɛ ɛnle wuluwulu. Me kunlu a anrɛɛ ɛle weɛlɛkɔkɔ anzɛɛ wuluwulu. 16 Ɔti kɛmɔ ɛle adodɔlera na ɛnle wuluwulu+ anzɛɛ weɛlɛkɔkɔ la ati,+ mebave wɔ meavi me nloa anu. 17 Ɛka kɛ, “Mele sukoavolɛ+ yɛɛ menyia me nwo na mengyia ɛhwee,” noko ɛnze kɛ ɛyɛ anwunvɔne na ɛ nwo yɛ alɔbɔlɛ na ɛle ehyianli, ɛ nye ɛzi yɛɛ ɛlɛ ɛ nwo zɔ, 18 metu wɔ folɛ kɛ tɔ nvutuke mɔɔ bɛva senle bɛdu nuhua evinli la fi me ɛkɛ amaa wɔanyia ɛ nwo, nee adɛladeɛ fufule amaa wɔahola wɔaziezie ɛ nwo, amaa ɛ nwo mɔɔ la zo la anla ali na wɔambɔ anyiemgba,+ na tɔ bɛ nye ayile+ fa kpokpa ɛ nye amaa wɔanwu debie.+

19 “‘Bɛdabɛ mɔɔ mekulo bɛ edwɛkɛ la amuala, metwi bɛ nyunlu na metea bɛ.+ Ɔti bɔ mɔdenle na nu ɛ nwo.+ 20 Nea! Megyi anlenkɛ ne anloa melɛbɔ nu. Saa awie te me ne na ɔbuke anlenkɛ ne a, mebara ye sua nu me nee ye arali nɔsolɛ aleɛ na ɔdaye noko ɔ nee me ali debie. 21 Mɔɔ kɛli konim la,+ mebamaa ɔ nee me adɛnla me belemgbunli ebia ne azo,+ kɛ mɔɔ menlile konim na me nee me Ze dɛnlanle+ ye belemgbunli ebia ne azo la. 22 Bɛmaa mɔɔ lɛ ɛnzolɛ la ɛdie mɔɔ sunsum ne ka kile asafo ne mɔ la.’”

4 Ɛhye anzi menwunle ye, na nea! anlenkɛ bie mɔɔ bɛbuke la wɔ anwuma lɔ, na ɛnelɛ mɔɔ limoa mɔɔ mendele kɛ ɔlɛtendɛ yeahile me la le kɛ aweɛne tendenle ne la, ɔse: “Fo bɛla ɛke, na mebahile wɔ ninyɛne mɔɔ bazi la.” 2 Ɛhye anzi, sunsum ne tumi ne rale me nwo zo ɛkɛ ne ala, na nea! ɛnee belemgbunli ebia bie gyi anwuma lɔ na awie de belemgbunli ebia ne azo.+ 3 Na Ahenle mɔɔ de zo la anyunlu ta kɛ gyasepa bolɛ+ nee saadese bolɛ,* yɛɛ nyangondonle mɔɔ ta kɛ ɛmelade la ɛbɔ belemgbunli ebia ne ɛyia.+

4 Na arelemgbunli mbia 24 ɛbɔ belemgbunli ebia ne ɛyia, na menwunle mgbanyima 24+ mɔɔ bɛwulowula adɛladeɛ fufule la kɛ bɛdede arelemgbunli mbia ɛhye mɔ azo, na bɛbobɔ nvutuke abotile. 5 Ɛsɛlɛmanye+ nee ɛnelɛ nee ezulehululɛ+ vi belemgbunli ebia ne anu rale; na ɛnee senle ahɛnlaneɛ nsuu ɛlɛsɔ wɔ belemgbunli ebia ne anyunlu, na bɛmɛ a le Nyamenle sunsum nsuu ne.+ 6 Nyevile mɔɔ ɔ nye te kɛ neanleɛ anu wienyi la wɔ belemgbunli ebia ne anyunlu.+

Tease abɔdeɛ nna mɔɔ ɛnyelɛ duodua bɛ nyunlu nee bɛ nzi amuala la wɔ belemgbunli ebia ne avinli* nee belemgbunli ebia ne anwo.+ 7 Tease abɔdeɛ ne mɔɔ limoa la le kɛ awenade,+ tease abɔdeɛ ne mɔɔ tɔ zo nwiɔ la le kɛ ɛnlankɛ ralɛ nyinli,+ tease abɔdeɛ ne mɔɔ tɔ zo nsa la+ anyunlu le kɛ sonla nyunlu, yɛɛ tease abɔdeɛ ne mɔɔ tɔ zo nna la+ le kɛ kɔleɛ mɔɔ ɛdu faa la.+ 8 Na tease abɔdeɛ nna ɛhye mɔ ko biala lɛ ndɛbalɛ nsia; ɛnyelɛ duodua bɛ nwo amuala nee bɛ ndɛba abo.+ Na bɛkɔ zo bɛka ye alehyenlɛ nee aledwolɛ kɛ: “Nwuanzanwuanza, nwuanzanwuanza, nwuanzanwuanza a le Gyihova*+ Nyamenle, Tumivolɛ Bedevinli ne, mɔɔ ɛnee wɔ ɛkɛ, na ɔtɛbɔ ɛkɛ na ɔlɛba la.”+

9 Mekɛ biala mɔɔ tease abɔdeɛ ne mɔ kɛva anyunlunyia nee enililɛ nee moyɛlɛ kɛmaa Mɔɔ de belemgbunli ebia ne azo, Ahenle mɔɔ de aze dahuu la,+ 10 mgbanyima 24 ne+ tu gua Mɔɔ de belemgbunli ebia ne azo la anyunlu na bɛsonle Ahenle mɔɔ de aze dahuu la, na bɛtudu bɛ abotile ne mɔ bɛgua belemgbunli ebia ne anyunlu bɛka kɛ: 11 “Gyihova* yɛ Nyamenle, ɛfɛta kɛ ɛdie anyunlunyia+ nee enililɛ+ nee tumi,+ ɔluakɛ ɛdawɔ a ɛbɔle ninyɛne kɔsɔɔti a,+ na wɔ ɛhulolɛ zo a bɛwɔ ɛkɛ na ɛbɔle bɛ a.”

5 Na menwunle nwomamobɔleɛ bie mɔɔ bɛhɛlɛ ɔ kunlu nee ɔ nzi na bɛva ɛyɛlɛ nsuu bɛzɔ ɔ nloa kpalɛ la wɔ Ahenle mɔɔ de belemgbunli ebia ne azo la asa fema ne anu.+ 2 Na menwunle kɛ anwumabɔvolɛ anwosesebɛ bie ɛlɛfa ɛnelɛ kpole adea nu kɛ: “Nwane a fɛta kɛ ɔkɛbuke nwomamobɔleɛ ne anu na ɔkɛwaye ye ɛyɛlɛ ne a?” 3 Noko awie biala ɛnle anwuma lɔ anzɛɛ azɛlɛ ye azo anzɛɛ azɛlɛ bo mɔɔ holale bukele nwomamobɔleɛ ne anzɛɛ ɔnleanle nu a. 4 Menzunle kpole kpalɛ ɔluakɛ bɛannwu awie biala mɔɔ fɛta kɛ ɔbuke nwomamobɔleɛ ne na ɔnea nu a. 5 Na mgbanyima ne mɔ ko zele me kɛ: “Mmasu. Nea! Dwuda abusua nu Awenade ne,+ Devidi+ ndinli ne+ ɛli konim,+ yemɔti ɔkola ɔbuke nwomamobɔleɛ ne na ɔwaye ɛyɛlɛ nsuu ne.”

6 Na menwunle boaneralɛ+ bie mɔɔ ɔzɔho kɛ bɛhu ye la+ wɔ belemgbunli ebia ne nee tease abɔdeɛ nna ne nee mgbanyima ne avinli,+ ɔlɛ mɛne nsuu yɛɛ ɛnyelɛ nsuu, na ɛnyelɛ ne a le Nyamenle sunsum nsuu ne+ mɔɔ bɛzoa bɛ wɔ azɛlɛ ye amuala azo la. 7 Ɛkɛ ne ala ɔhɔle ɔ nyunlu na ɔliele ɔvile Ahenle mɔɔ de belemgbunli ebia ne azo la asa fema ne anu.+ 8 Mekɛ mɔɔ ɔliele nwomamobɔleɛ ne la, tease abɔdeɛ nna ne nee mgbanyima 24 ne+ dule guale Boaneralɛ ne anyunlu, ɛnee bɛ nuhua ko biala lɛ haape nee nvutuke ahyɛnze mɔɔ ayilevuanlɛ ɛyi ye tɛkɛɛ la. (Ayilevuanlɛ ne le nwuanzanwuanzama ne asɔneyɛlɛ.)+ 9 Na bɛdole edwɛne fofolɛ bie+ kɛ: “Ɛfɛta kɛ ɛdie nwomamobɔleɛ ne na ɛwaye ɛyɛlɛ ne, ɔluakɛ bɛhunle wɔ na ɛvale wɔ mogya ne ɛdɔle menli ɛvile abusua nee aneɛ nee menli nee maanle biala anu+ ɛmaanle Nyamenle,+ 10 na ɛyɛle bɛ arelemgbunli+ nee ɛsɔfoma ɛmaanle yɛ Nyamenle ne,+ bɛbayɛ arelemgbunli+ na bɛanlea azɛlɛ ye azo.”

11 Akee menwunle ye na mendele anwumabɔvolɛma dɔɔnwo mɔɔ ɛbɔ ɛyia belemgbunli ebia ne nee tease abɔdeɛ ne nee mgbanyima ne mɔ la ane, na bɛ dodo le apenle apenle bulu bulu fane apenle apenle bulu bulu nee apenle apenle dɔɔnwo,+ 12 na bɛvale ɛnelɛ kpole bɛhanle kɛ: “Boaneralɛ ne mɔɔ bɛhunle ye la+ fɛta kɛ ɔnyia tumi nee anwonyia nee nrɛlɛbɛ nee anwosesebɛ nee enililɛ nee anyunlunyia nee nyilalɛ.”+

13 Na mendele kɛ abɔdeɛ biala mɔɔ wɔ anwuma lɔ nee azɛlɛ ye azo nee azɛlɛ bo+ nee nyevile zo nee debie biala mɔɔ wɔ nu la ɛlɛka kɛ: “Nyilalɛ nee enililɛ+ nee anyunlunyia nee tumi ɛyɛ Mɔɔ de belemgbunli ebia ne azo la+ nee Boaneralɛ ne+ ɛdeɛ dahuu.”+ 14 Tease abɔdeɛ nna ne hanle kɛ: “Amen!” na mgbanyima ne mɔ dule guale na bɛzonlenle.

6 Na menwunle kɛ Boaneralɛ ne+ ɛwaye ɛyɛlɛ nsuu ne anu ko,+ na mendele kɛ tease abɔdeɛ nna ne anu ko+ vale ɛnelɛ mɔɔ le kɛ ezulehululɛ la hanle kɛ: “Bɛla!” 2 Na menwunle ye, na nea! ɛkpɔnwɔ fufule bie,+ na ahenle mɔɔ de zo la lɛ ɛda; na bɛmaanle ye abotile,+ na ɔvindele ɔhɔlile konim kɛ ɔwie ye konimlilɛ ne bɔkɔɔ.+

3 Mekɛ mɔɔ ɔwayele ɛyɛlɛ ne mɔɔ tɔ zo nwiɔ la,+ mendele kɛ tease abɔdeɛ ne mɔɔ tɔ zo nwiɔ la se: “Bɛla!” 4 Ɛkpɔnwɔ kɔkɔlɛ bie noko rale, na bɛmaanle ahenle mɔɔ de zo la adenle kɛ ɔye anzodwolɛ ɔvi azɛlɛ ye azo amaa bɛahuhu bɛ nwo, na bɛmaanle ye konle dadeɛ kpole bie.+

5 Mekɛ mɔɔ ɔwayele ɛyɛlɛ ne mɔɔ tɔ zo nsa la,+ mendele kɛ tease abɔdeɛ ne mɔɔ tɔ zo nsa la+ se: “Bɛla!” Na menwunle ye, na nea! ɛkpɔnwɔ bile bie, na ahenle mɔɔ de zo la lɛ tone wɔ ɔ sa nu. 6 Mendele debie mɔɔ dielie kɛ ɛnelɛ la wɔ tease abɔdeɛ nna ne avinli kɛ: “Hwiiti koate* ko denale*+ ko yɛɛ baale koate nsa denale ko; na anrɛɛ mmasɛkye ɔlivi nwole nee nwanye.”+

7 Mekɛ mɔɔ ɔwayele ɛyɛlɛ ne mɔɔ tɔ zo nna la, mendele tease abɔdeɛ ne mɔɔ tɔ zo nna la ane+ kɛ ɔse: “Bɛla!” 8 Na menwunle ye, na nea! ɛkpɔnwɔ nzonle bie, na ahenle mɔɔ de zo la duma a le Ewule. Na Nla* li ɔ nzi ɛkɛ ne ala. Na bɛmaanle bɛ azɛlɛ ne ngyɛnu nna anu ko azo tumi, kɛ bɛva dadeɛ nee ɛhɔne+ nee ewulenzane nee azɛlɛ ye azo nane anwo ɛzulolɛ bɛhu bɛ.+

9 Mekɛ mɔɔ ɔwayele ɛyɛlɛ ne mɔɔ tɔ zo nnu la, menwunle bɛdabɛ mɔɔ Nyamenle edwɛkɛ ne nee daselɛ mɔɔ bɛlile la ati+ bɛhunle bɛ la ɛkɛla ne mɔ*+ wɔ afɔlemokyea ne abo.+ 10 Bɛvale ɛnelɛ kpole bɛdeanle nu kɛ: “Tumivolɛ Awulae, nwuanzanwuanzanli nee nɔhavo,+ ɛkendɛ wɔahɔdwu kenlenzu na wɔabua bɛdabɛ mɔɔ bɛde azɛlɛ ye azo la ndɛne na wɔali yɛ mogya nwo nzenralɛ?”+ 11 Na bɛmaanle bɛ nuhua ko biala tɛladeɛ fufule tendenle,+ na bɛzele bɛ kɛ bɛlie bɛ menle ekyii kɔkpula kɛ bɛ gɔnwo mɔ ngɛkɛlɛ nee bɛ mediema mɔɔ bɛbahu bɛ kɛ bɛdabɛ ala la dodo ne anloa kɛdwu la.+

12 Na menwunle kɛ yewaye ɛyɛlɛ ne mɔɔ tɔ zo nsia la, na azɛlɛkpusulɛ kpole bie zile; na sɛnzɛne ne yɛle bile kɛ ɛrele mɔɔ bɛva enrinli* bɛyɛ la, na siane ne amuala yɛle kɛ mogya la,+ 13 na nwɔlɔra mɔɔ wɔ anwuma la dudule raguale azɛlɛ ye azo kɛ feege baka mɔɔ anwoma kpole ɛbɔ ye ɛmaa ye ma amunli ne mɔ ɛkpolo ɛgua la. 14 Na anwuma vile ɛkɛ ne kɛ nwomamobɔleɛ mɔɔ bɛnyenya ye la,+ na bɛdule boka biala nee bɔra biala bɛvile ɔ bo zo ne.+ 15 Akee azɛlɛ ye azo arelemgbunli, menli titili, sogya mgbanyima, sukoavolɛma, tumivolɛma, akɛlɛ biala nee dehelɛ biala hɔveale awolɛ mbɔne nee awolɛ mɔɔ wɔ awoka zo la anu.+ 16 Na bɛhɔle zo bɛhanle bɛhilele awoka nee awolɛ ne mɔ kɛ: “Bɛragua yɛ nwo zo+ na bɛva yɛ bɛvea bɛmaa yɛvi Mɔɔ de belemgbunli ebia ne azo la anyunlu+ nee Boaneralɛ ne ɛya ne anu,+ 17 ɔluakɛ bɛ ɛya kenle kpole ne ɛdwu,+ na nwane a kɛhola kɛgyinla a?”+

7 Ɛhye anzi menwunle anwumabɔvolɛma nna kɛ bɛgyigyi azɛlɛ ye muleɛ nna ne mɔ azo, na bɛdedɛ azɛlɛ ye azo anwoma nna ne anu ɛsesebɛ, amaa anwoma biala ambɔ azɛlɛ ye azo anzɛɛ nyevile zo anzɛɛ baka biala anwo. 2 Na menwunle anwumabɔvolɛ ko kɛ ɔlɛ tease Nyamenle ne nzonlɛyɛlɛdeɛ ne ɔvi aduduleɛ ɔlɛfo yeahɔ anwuma; na ɔvale ɛnelɛ kpole ɔdeanle nu ɔvɛlɛle anwumabɔvolɛma nna ne mɔɔ bɛmaa bɛ adenle kɛ bɛzɛkye azɛlɛ nee nyevile la, 3 na ɔhanle kɛ: “Bɛmmasɛkye azɛlɛ ye anzɛɛ nyevile anzɛɛ mbaka kɔkpula kɛ yɛkɛyɛ yɛ Nyamenle ne ngɛkɛlɛ ne mɔ nzonlɛ+ wɔ bɛ nwoma azo yɛkɛwie la.”+

4 Na mendele bɛdabɛ mɔɔ bɛzɔ bɛ nloa la dodo, 144,000,+ mɔɔ bɛzɔ bɛ nloa bɛvi Yizilayɛ abusua ekpunli biala anu la:+

9 Ɛhye anzi menwunle ye, na nea! menli ekpunli kpole bie mɔɔ awie ɛngola bɛ tia, mɔɔ bɛvi maanle maanle nee mbusua nee menli nee aneɛ ngakyile nu la+ kɛ bɛgyigyi belemgbunli ebia ne nee Boaneralɛ ne anyunlu, bɛwula adɛladeɛ fufule ndendenle;+ na bɛdedɛ mrɛlakɛ bɛ sa nu.+ 10 Na bɛvale ɛnelɛ kpole bɛdeanle nu kɛ: “Ngoanelielɛ vi yɛ Nyamenle ne mɔɔ de belemgbunli ebia ne azo la+ nee Boaneralɛ ne ɛkɛ.”+

11 Ɛnee anwumabɔvolɛ ne mɔ amuala gyigyi ɛkɛ ɛbɔ ɛyia belemgbunli ebia ne nee mgbanyima ne mɔ+ nee tease abɔdeɛ nna ne, na bɛbutulebutule bɛ nyunlu aze wɔ belemgbunli ebia ne anyunlu na bɛzonlenle Nyamenle, 12 bɛhanle kɛ: “Amen! Ayɛlɛyelɛ nee anyunlunyia nee nrɛlɛbɛ nee moyɛlɛ nee enililɛ nee tumi nee anwosesebɛ le yɛ Nyamenle ne ɛdeɛ dahuu.+ Amen.”

13 Na mgbanyima ne mɔ ko bizale me kɛ: “Menli ɛhye mɔ mɔɔ wula adɛladeɛ fufule ndendenle ne la,+ nwane mɔ ɔ, na bɛvi ni?” 14 Ɔti ɛkɛ ne ala membuale ye kɛ: “Me menle, ɛdawɔ a ɛze a.” Na ɔzele me kɛ: “Menli ɛhye mɔ a ɛvi anwongyelelɛ kpole ne anu a,+ na bɛkpo bɛ adɛladeɛ ne mɔ nwohyee wɔ Boaneralɛ ne mogya ne anu.+ 15 Ɛhye ati a bɛwɔ Nyamenle belemgbunli ebia ne anyunlu na bɛlɛsonle ye alehyenlɛ nee aledwolɛ wɔ ye ɛzonlenlɛsua ne anu a; na Mɔɔ de belemgbunli ebia ne azo la+ badɛlɛ ye ɛdanlɛsua ne anu wɔ bɛ nwo zo.+ 16 Ɛhɔne nee nzuhɔne ɛnrɛhu bɛ bieko, ewia ɛnrɛbɔ bɛ anzɛɛ wuluwulu kpole biala ɛnrɛhu bɛ,+ 17 ɔluakɛ Boaneralɛ ne+ mɔɔ wɔ belemgbunli ebia ne avinli la banlea bɛ,+ na ɔbahile bɛ adenle yeahɔ ngoane nzubula nwo.+ Na Nyamenle bakyikyi bɛ nye anwo monle biala.”+

8 Mekɛ mɔɔ ɔwayele+ ɛyɛlɛ ne mɔɔ tɔ zo nsuu la,+ anwuma lɔ yɛle dii kɛyɛ dɔnehwele foa ko. 2 Na menwunle anwumabɔvolɛma nsuu ne+ mɔɔ gyinla Nyamenle anyunlu la, na bɛvale aweɛne ndendenle nsuu bɛmaanle bɛ.

3 Anwumabɔvolɛ ko noko mɔɔ lɛ nvutuke ayilevuanlɛ kyɛnze* la ragyinlanle afɔlemokyea ne anwo,+ na bɛmaanle ye ayilevuanlɛ dɔɔnwo+ kɛ ɔva ɔboka nwuanzanwuanzama kɔsɔɔti asɔneyɛlɛ nwo ɔbɔ afɔle wɔ nvutuke afɔlemokyea ne+ mɔɔ gyi belemgbunli ebia ne anyunlu la azo. 4 Ayilevuanlɛ ne esike ne nee nwuanzanwuanzama ne asɔneyɛlɛ ne+ vi anwumabɔvolɛ ne asa anu vole hɔle Nyamenle anyunlu. 5 Na ɛkɛ ne ala anwumabɔvolɛ ne vale ayilevuanlɛ kyɛnze ne na ɔvale afɔlemokyea ne azo senle ne bie ɔguale nu ɔmaanle ɔyile, na ɔvuandinle ɔdole azɛlɛ ye azo. Na bɛdele ezulehululɛ nee ɛnelɛ na ɛsɛlɛmanye kpakyele+ yɛɛ azɛlɛ kpusule. 6 Na anwumabɔvolɛma nsuu ne mɔɔ dedɛ aweɛne ndendenle ne la+ zieziele bɛ nwo kɛ bɛbɔ.

7 Mɔɔ limoa la bɔle ye aweɛne tendenle ne. Na ezuawolɛ dɔle yɛɛ senle mɔɔ nee mogya ɛli afonla la rale, na bɛvuandinle bɛdole azɛlɛ ye azo;+ na azɛlɛ ye ngyɛnu nsa anu ko yelale, na mbaka ngyɛnu nsa anu ko yelale, na ndile amolɛ kɔsɔɔti yelale.+

8 Anwumabɔvolɛ ne mɔɔ tɔ zo nwiɔ la bɔle ye aweɛne tendenle ne. Na bɛvuandinle debie mɔɔ le kɛ boka kpole bie mɔɔ ɛlɛsɔ la bɛdole nyevile ne anu.+ Na nyevile ne ngyɛnu nsa anu ko hakyile mogya;+ 9 na tease abɔdeɛ* mɔɔ wɔ nyevile nu la ngyɛnu nsa anu ko wule,+ yɛɛ meli ngyɛnu nsa anu ko zɛkyele.

10 Anwumabɔvolɛ ne mɔɔ tɔ zo nsa la bɔle ye aweɛne tendenle ne. Na ɛwɔlɔra kpole bie mɔɔ ɛlɛsɔ kɛ kɛnlaneɛ la vi anwuma dɔle aze, na ɔdɔle azudenle ngyɛnu nsa anu ko nee nzubula zo.+ 11 Ɛwɔlɔra ne duma a le Ɛnwonle. Na nzule ngyɛnu nsa anu ko yɛle ɛnwonle, na nzule ne maanle menli dɔɔnwo wule ɔluakɛ ɛnee yeyɛ ɛnwonle.+

12 Anwumabɔvolɛ ne mɔɔ tɔ zo nna la bɔle ye aweɛne tendenle ne. Na sɛnzɛne ne ngyɛnu nsa anu ko nee siane ne ngyɛnu nsa anu ko nee nwɔlɔra ne mɔ ngyɛnu nsa anu ko zɛkyele,+ amaa bɛ nuhua ngyɛnu nsa anu ko ayɛ awozinli+ na alehyenlɛ ngyɛnu nsa anu ko annyia wienyi, yɛɛ aledwolɛ noko zɔhane ala.

13 Na menwunle ye, na mendele kɛ kɔleɛ bie ɛdu lua anwomanyunlu na ɔlɛ ɛnelɛ kpole ɔlɛka kɛ: “Bɛ gyakɔ, bɛ gyakɔ, bɛ gyakɔ,+ bɛdabɛ mɔɔ bɛde azɛlɛ ye azo la ɔlua aweɛne ndendenle ne mɔɔ ɛha mɔɔ anwumabɔvolɛma nsa ne ɛlɛba arabɔ la dede ne ati!”+

9 Anwumabɔvolɛ ne mɔɔ tɔ zo nnu la bɔle ye aweɛne tendenle ne.+ Na menwunle kɛ ɛwɔlɔra bie vi anwuma ɛradɔ azɛlɛ ye azo, na bɛvale kuma kuloonwu ne anloa* sanvɛ+ bɛmaanle ye. 2 Ɔbukele kuma ne anloa,* na esike vi kuma ne anu vindele kɛ fonlomo kpole nu esike, na kuma ne anu esike ne ati, sɛnzɛne ne yɛle kisii,+ na maanle nu noko yɛle zɔhane ala. 3 Na abɛbɛ dɔɔnwo vi esike ne anu rale azɛlɛ ye azo,+ na bɛmaanle bɛ tumi kɛ azɛlɛ ye azo nyamenleakɛlɛ ne mɔ ɛdeɛ ne la. 4 Bɛhanle bɛhilele bɛ kɛ bɛmmagyegye azɛlɛ ye azo ndile anzɛɛ nya amolɛ anzɛɛ baka biala, kyesɛ bɛdabɛ mɔɔ Nyamenle nzonlɛ ne bie ɛnle bɛ nwoma azo la ala.+

5 Na bɛmaanle abɛbɛ ne mɔ adenle kɛ bɛmmaku bɛ, emomu bɛhile bɛ nyane siane nnu, na bɛ nyanenwunlɛ ne le kɛ nyamenleakɛlɛ+ mɔɔ ɛbɔ sonla la. 6 Mekɛ zɔhane, menli bakpondɛ ewule noko bɛnrɛnwu ye, bɛbahulo kɛ bɛkɛwu noko ewule banriandi bɛ.

7 Na abɛbɛ ne mɔ le kɛ mgbɔnwɔ mɔɔ bɛziezie bɛ bɛmaa konle la;+ debie mɔɔ zɔho nvutuke abotile la bobɔ bɛ ti, yɛɛ bɛ nyunlu le kɛ sonla nyunlu, 8 bɛ ti enrinli le kɛ raalɛ ti enrinli. Na bɛ gye le kɛ awenade gye,+ 9 na bɛlɛ akɛnrazo enyinlike mɔɔ le kɛ bulalɛ akɛnrazo enyinlike la. Ɛnee bɛ ndɛba yɛ dede kɛ ehwili mɔɔ mgbɔnwɔ dɔɔnwo ɛlɛtwili bɛ ahɔ konle la.+ 10 Eza bɛlɛ dualɛ mɔɔ lɛ pɔezen kɛ nyamenleakɛlɛ la, na bɛ dua ne mɔ anu a tumi mɔɔ bɛfa bɛagyegye menli siane nnu la wɔ a.+ 11 Bɛlɛ belemgbunli mɔɔ nea bɛ nwo zo a, yemɔ a le kuma ne anwumabɔvolɛ ne.+ Hibulu nu ye duma a le Abadɔn,* na Giliki nu ye duma a le Apɔleɔn.*

12 Gyakɔ ko ɛpɛ nu. Nea! Gyakɔ nwiɔ+ li ɛhye anzi ɛlɛba.

13 Anwumabɔvolɛ ne mɔɔ tɔ zo nsia la+ bɔle ye aweɛne tendenle ne.+ Na mendele kɛ ɛnelɛ bie vi nvutuke afɔlemokyea ne+ mɔɔ wɔ Nyamenle anyunlu la mɛne ne mɔ anu 14 ɛlɛka ahile anwumabɔvolɛ ne mɔɔ tɔ zo nsia mɔɔ lɛ aweɛne tendenle ne la kɛ: “Sianyizianyi anwumabɔvolɛma nna ne mɔɔ bɛkyekye bɛ wɔ azule kpole Yufileti ne anloa la.”+ 15 Na bɛzianyinle anwumabɔvolɛma nna ne mɔɔ bɛziezie bɛ bɛmaa dɔnehwele nee kenle nee siane yɛɛ ɛvolɛ ne la kɛ bɛhu menli ne ngyɛnu nsa anu ko.

16 Na ɛlɔne mɔɔ dede mgbɔnwɔ zo la dodo le mgbe ngoko ɛya nwiɔ;* mendele bɛ dodo ne. 17 Na kɛzi menwunle mgbɔnwɔ ne mɔ nee menli mɔɔ dede bɛ nwo zo la wɔ ɛnyelɛzodeɛnwunlɛ ne anu la ɛne: Bɛlɛ akɛnrazo enyinlike mɔɔ le woonwu kɛ senle nee buluwu nee yɛlo* la, na mgbɔnwɔ ne mɔ ati le kɛ awenade ti,+ na senle nee esike yɛɛ sɔlefa vi bɛ nloa anu vindele. 18 Na ngyegyelɛ nsa ɛhye mɔ, senle nee esike nee sɔlefa ne mɔɔ vi bɛ nloa anu vindele la hunle menli ne ngyɛnu nsa anu ko. 19 Mgbɔnwɔ ne mɔ tumi ne wɔ bɛ nloa nee bɛ dua ne mɔ anu, ɔluakɛ bɛ dua ne mɔ le kɛ nwɔlɛ mɔɔ dedɛ adile la, na ɛhye a bɛfa bɛgyegye menli a.

20 Na menli mɔɔ ɛha mɔɔ ngyegyelɛ ɛhye angu bɛ la annu bɛ nwo wɔ bɛ sa anloa gyima nwo; bɛangyakyi sunsum ɛtane nee nvutuke nee dwɛtɛ fufule nee kɔbele nee bolɛ nee baka ananze ne mɔ mɔɔ bɛnnwu debie, bɛnde edwɛkɛ na bɛndia la ɛzonlenlɛ.+ 21 Na bɛannu bɛ nwo wɔ bɛ kodiawuyɛlɛ anzɛɛ bɛ sunsum ɛtane nyɛleɛ anzɛɛ bɛ adwɔmane ɛbɛla* nee bɛ awule nwo.

10 Na menwunle anwumabɔvolɛ anwosesebɛ bieko kɛ ɔvi anwuma ɔlɛdwu, ɔheda amungu, yɛɛ nyangondonle wɔ ɔ ti zo, na ɔ nyunlu le kɛ sɛnzɛne ne la,+ yɛɛ ɔ gyakɛ* le kɛ senle pila, 2 na ɔlɛ nwomamobɔleɛ ekyi bie mɔɔ bɛdɛlɛ nu la ɔ sa anu. Na ɔvale ɔ gyakɛ fema ne ɔziele nyevile ne azo, na ɔvale bɛne ne ɔziele azɛlɛ ne azo, 3 na ɔvale ɛnelɛ kpole bie ɔdeanle nu kɛ awenade mɔɔ ɛlɛkpo la.+ Na mekɛ mɔɔ ɔdeanle nu la, ezulehululɛ nsuu ne+ dendɛle.

4 Na mekɛ mɔɔ ezulehululɛ nsuu ne dendɛle la, menyɛle kɛ mekɛlɛ, noko mendele ɛnelɛ bie vi anwuma+ kɛ: “Sɔ edwɛkɛ ne mɔɔ ezulehululɛ nsuu ne hanle la anloa, mmakɛlɛ.” 5 Anwumabɔvolɛ ne mɔɔ menwunle kɛ ɔgyi nyevile ne nee azɛlɛ ne azo la maanle ɔ sa fema ne zo anwuma, 6 na ɔvale Mɔɔ de aze dahuu,+ mɔɔ ɔbɔle anwuma nee ninyɛne mɔɔ wɔ nu nee azɛlɛ nee ninyɛne mɔɔ wɔ nu nee nyevile nee ninyɛne mɔɔ wɔ nu la+ duma ɔhanle ndane kɛ: “Ɔnrɛhendɛ bieko. 7 Emomu mekɛ mɔɔ anwumabɔvolɛ ne mɔɔ tɔ zo nsuu la+ ɛlɛba arabɔ ye aweɛne tendenle ne anu la,+ ɛnee fealeranu edwɛkɛ nwuanzanwuanza ne+ mɔɔ Nyamenle bɔle ye nolo hilele ye ngɛkɛlɛ ngapezoma ne mɔ kɛ edwɛkpa la+ ɛra nu bɔkɔɔ.”

8 Na ɛnelɛ ne mɔɔ mendele kɛ ɔvi anwuma+ ɔlɛtendɛ yeahile me la zele me bieko kɛ: “Kɔlie nwomamobɔleɛ ne mɔɔ bɛbuke nu la fi anwumabɔvolɛ ne mɔɔ gyi nyevile ne nee azɛlɛ ne azo la asa anu.”+ 9 Mengɔle anwumabɔvolɛ ne anwo ɛkɛ na menzele ye kɛ ɔva nwomamobɔleɛ ekyi ne ɔmaa me. Ɔzele me kɛ: “Die na di,+ na ɔbayɛ ɛnwonle wɔ ɛ kunlu, noko ɔbayɛ menlemenle kɛ wolɛ la wɔ ɛ nloa anu.” 10 Menliele nwomamobɔleɛ ekyi ne wɔ anwumabɔvolɛ ne asa anu na menlile,+ na ɔyɛle me nloa anu menlemenle kɛ wolɛ la,+ noko mekɛ mɔɔ menlile menwiele la, ɔyɛle ɛnwonle wɔ me kunlu. 11 Na bɛzele me kɛ: “Ɔwɔ kɛ ɛka menli nee maanle maanle nee aneɛ yɛɛ arelemgbunli dɔɔnwo anwo ngapezo bieko.”

11 Na bɛvale ndɔ baka*+ mɔɔ le kɛ kpɔma* la bɛmaanle me na ɔhanle kɛ: “Dwazo na suzu Nyamenle ɛzonlenlɛsua ne nee afɔlemokyea ne nee menli mɔɔ ɛlɛsonle wɔ ɛkɛ la. 2 Noko alienwo ne mɔɔ wɔ ɛzonlenlɛsua ne anzi la ɛdeɛ, ye fi nu, mmasuzu, ɔluakɛ bɛva bɛmaa maanle maanle ne na bɛbatietia sua nwuanzanwuanza ne azo+ siane 42.+ 3 Mebamaa me alasevolɛ nwiɔ aheda ɛrele na bɛaha ngapezo kenle 1,260.” 4 Ɛhye mɔ a bɛva ɔlivi mbaka nwiɔ ne+ nee kɛnlaneɛ mbaka nwiɔ ne+ bɛyɛ bɛ nwo sɛkɛlɛneɛ a, na bɛgyigyi azɛlɛ Menle ne anyunlu.+

5 Saa awie kpondɛ kɛ ɔsɛkye bɛ a, senle vi bɛ nloa anu finde basɛkye bɛ agbɔvolɛ. Saa awie kpondɛ kɛ ɔsɛkye bɛ a, kɛ ɔwɔ kɛ bɛku ye la ɛne. 6 Ɛhye mɔ lɛ tumi to anwuma nu+ amaa ezule andɔ+ wɔ mekɛ mɔɔ bɛlɛka bɛ ngapezo ne la, yɛɛ bɛlɛ nzule zo tumi bɛkola bɛmaa ɔkakyi mogya+ na bɛfa ewulenzane biala bɛba azɛlɛ ye azo wɔ mekɛ biala mɔɔ bɛkulo la.

7 Saa bɛwie bɛ daselɛlilɛ ne a, nane anwo ɛzulolɛ ne mɔɔ vi kuma kuloonwu ne anu bavinde la nee bɛ baho na yeali bɛ nwo zo konim na yeahu bɛ.+ 8 Na bɛ avunli badeda suakpole ne gua ne mɔɔ bɛfɛlɛ ye Sodɔm nee Yigyibiti wɔ sunsum nu la azo, ɛleka mɔɔ bɛhunle bɛ Awulae wɔ baka zo la. 9 Na menli nee mbusua nee aneɛ nee maanle maanle banlea bɛ avunli kenle nsa nee foa,+ na bɛnrɛmaa bɛnrɛzie bɛ. 10 Na menli mɔɔ de azɛlɛ ne azo la lile bɛ nwo fɛlɛko na bɛ nye liele, na bɛbava ahyɛlɛdeɛ bɛamaa bɛ nwo ngoko, ɔluakɛ ngapezoma nwiɔ ɛhye mɔ hilele menli mɔɔ de azɛlɛ ne azo la nyane.

11 Kenle nsa nee foa ne anzi, ngoane sunsum vi Nyamenle ɛkɛ rawolole bɛ nu,+ na bɛdwazole bɛgyinlanle bɛ gyakɛ azo, na ɛzulolɛ kpole hanle menli mɔɔ nwunle bɛ la. 12 Na bɛdele kɛ ɛnelɛ kpole bie vi anwuma ɛlɛka ahile bɛ kɛ: “Bɛvo bɛrɛla ɛke.” Na bɛvole bɛhɔle anwuma wɔ amungu ne anu, na bɛ agbɔvolɛ nwunle bɛ.* 13 Mekɛ ne anu ala, azɛlɛkpusulɛ kpole bie zile, na sua ne ngyɛnu bulu anu ko zɛkyele; na azɛlɛkpusulɛ ne hunle menli 7,000 na menli mɔɔ hale la ahonle dule na bɛwulale Nyamenle mɔɔ wɔ anwuma la anyunlunyia.

14 Gyakɔ mɔɔ tɔ zo nwiɔ la+ ɛpɛ nu. Nea! Gyakɔ mɔɔ tɔ zo nsa la ɛlɛba ndɛndɛ.

15 Anwumabɔvolɛ ne mɔɔ tɔ zo nsuu la bɔle ye aweɛne tendenle ne.+ Na ɛnelɛ mgbole bie vi anwuma hanle kɛ: “Ewiade belemgbunlililɛ ne ɛyɛ yɛ Awulae+ nee ye Kelaese ne+ Belemgbunlililɛ, na ɔbali belemgbunli dahuu.”+

16 Na mgbanyima 24 ne+ mɔɔ dede bɛ arelemgbunli mbia zo wɔ anwuma la butubutule bɛ nyunlu aze na bɛzonlenle Nyamenle, 17 bɛhanle kɛ: “Yɛyɛ wɔ mo, Gyihova* Nyamenle, Tumivolɛ Bedevinli, mɔɔ ɛnee ɛwɔ ɛkɛ na ɛtɛbɔ ɛkɛ+ la, ɔluakɛ wɔva wɔ tumi kpole ne na wɔbɔ ɔ bo ɛlɛdi belemgbunli.+ 18 Noko maanle maanle ne vale ɛya na wɔ ɛya ne rale, na mekɛ dwule kɛ ɛbua mowuamra ndɛne na ɛmaa wɔ ngɛkɛlɛ ngapezoma+ nee nwuanzanwuanzama ne mɔ nee bɛdabɛ mɔɔ bɛsulo wɔ duma, mgbole nee ngyikyi ahatualɛ,+ na ɛsɛkye bɛdabɛ mɔɔ bɛlɛsɛkye azɛlɛ ne la.”+

19 Na bɛbukele Nyamenle ɛzonlenlɛsua ne mɔɔ wɔ anwuma lɔ la, na bɛnwunle ye ngyekyeleɛ ɛlɛka ne wɔ ɛzonlenlɛsua ne anu.+ Na ɛsɛlɛmanye kpakyele yɛɛ bɛdele ɛnelɛ nee ezulehululɛ na azɛlɛ kpusule yɛɛ ezuawolɛ mgbole dɔle.

12 Akee bɛnwunle sɛkɛlɛneɛ kpole bie wɔ anwuma: Raalɛ bie+ mɔɔ heda sɛnzɛne ne na siane ne wɔ ɔ gyakɛ abo, na nwɔlɔra 12 abotile bɔ ɔ ti la, 2 ɛnee ɔlɛnrenzɛ. Na ɛnee ye awolɛ nyane nee ye awolɛ nu amaneɛnwunlɛ ɛmaa ɔlɛtea nu.

3 Bɛnwunle sɛkɛlɛneɛ bieko wɔ anwuma. Nea! Ɛwɔlɛ kɔkɔlɛ kpole bie ɛne,+ ɔ ti le nsuu yɛɛ ɔlɛ mɛne bulu na abotile nsuu bobɔ ɔ ti; 4 na ɔ dua hwenle nwɔlɔra mɔɔ wɔ anwuma la ngyɛnu nsa anu ko+ guale azɛlɛ ye azo.+ Na ɛwɔlɛ ne ragyinlanle raalɛ ne mɔɔ ako ɛha ye la anyunlu ɛkɛ,+ amaa saa ɔwo a yeahye ɔ ra ne yeali.*

5 Na ɔwole ralɛ nrenyia+ mɔɔ bava bulalɛ kpɔma ali maanle maanle kɔsɔɔti anwo zo tumi a.+ Na bɛvale ɔ ra ne bɛhɔmaanle Nyamenle wɔ ye belemgbunli ebia ne anwo lɔ. 6 Na raalɛ ne nriandile hɔle fienemgbole ne anu, ɛleka mɔɔ Nyamenle ɛziezie ɛmaa ye kɛ bɛmaa ye aleɛ kenle 1,260 la.+

7 Akee konle zile anwuma lɔ: Maekeɛle*+ nee ye anwumabɔvolɛma nee ɛwɔlɛ ne honle, na ɛwɔlɛ ne nee ye anwumabɔvolɛma nee bɛ honle 8 noko bɛangola bɛ,* na bɛannyia ɛleka wɔ anwuma lɔ bieko. 9 Yemɔti bɛvuandinle ɛwɔlɛ kpole ne+ bɛdole aze, mɔmoane ɛwɔlɛ ne+ mɔɔ bɛfɛlɛ ye Abɔnsam+ nee Seetan,+ mɔɔ ɛlɛbɛlɛbɛla azɛlɛ ye azo amra amuala la;+ bɛvuandinle ye bɛdole azɛlɛ ye azo,+ na bɛvuandinle ye anwumabɔvolɛ ne mɔ bɛbokale ɔ nwo bɛguale aze. 10 Mendele ɛnelɛ kpole bie wɔ anwuma lɔ kɛ:

“Bɔ zo mɔɔ yɛ Nyamenle ne ngoanelielɛ+ nee tumi nee Belemgbunlililɛ+ nee ye Kelaese ne tumi ne ɛra a, ɔluakɛ bɛvuandi mɔɔ to yɛ mediema ne mɔ ɛzonle la bɛdo aze, mɔɔ to bɛ ɛzonle alehyenlɛ nee aledwolɛ wɔ yɛ Nyamenle ne anyunlu la!+ 11 Na bɛlile ɔ nwo zo konim+ ɔlua Boaneralɛ ne mogya ne+ nee bɛ daselɛlilɛ edwɛkɛ ne ati,+ na wɔ ewule nu bɔbɔ, bɛangulo bɛ ɛkɛla.*+ 12 Ɛhye ati bɛmɛ anwuma nee bɛdabɛ mɔɔ bɛwɔ lɔ la, bɛli fɛlɛko! Azɛlɛ nee nyevile, bɛ gyakɔ,+ ɔluakɛ Abɔnsam ɛdwu ɛra bɛ nwo lɔ, na yeva ɛya kpole, ɔboalekɛ ɔze kɛ yeha ye mekɛ ekyi bie ala.”+

13 Mekɛ mɔɔ ɛwɔlɛ ne nwunle kɛ bɛvuandi ye bɛdo azɛlɛ ye azo la,+ ɔyɛle raalɛ ne mɔɔ wole ralɛ nrenyia ne la kpɔdekpɔde.+ 14 Noko bɛvale kɔleɛ kpole ne andɛba nwiɔ ne+ bɛmaanle raalɛ ne, amaa yeadu yeahɔ fienemgbole ne anu, ɛleka mɔɔ ɔde la, na bɛbamaa ye aleɛ mekɛ ko nee mekɛ nwiɔ nee mekɛ foa ko,*+ na yeavi ɛwɔlɛ ne anyunlu.+

15 Na ɛwɔlɛ ne kpule nzule mɔɔ le kɛ azudenle la vile ɔ nloa anu wɔ raalɛ ne anzi kɛ azudenle ne ɛva ye. 16 Noko azɛlɛ ne raboale raalɛ ne na azɛlɛ ne bukele ɔ nloa anu memenle azudenle ne mɔɔ ɛwɔlɛ ne kpule vile ɔ nloa anu la. 17 Yemɔti ɛwɔlɛ ne vale raalɛ ne anwo ɛya na ɔhɔle kɛ ɔ nee ɔ bo zo amra mɔɔ ɛha+ mɔɔ bɛdi Nyamenle mɛla zo na bɛlɛyɛ Gyisɛse anwo daselɛlilɛ gyima ne la kaho.+

13 Na ɔhɔgyinlanle* nyevile ne anloa ɛnwea ne azo.

Na menwunle nane anwo ɛzulolɛ bie+ kɛ ɔvi nyevile ne anu ɔlɛfinde,+ ɔlɛ mɛne bulu yɛɛ ɔ ti le nsuu, na abotile bulu bobɔ ye mɛne ne anwo, na munzule aluma bobɔ ɔ ti anwo. 2 Na nane ne mɔɔ menwunle ye la le kɛ sobolɛ, ɔ gyakɛ le kɛ ezizile gyakɛ, yɛɛ ɔ nloa le kɛ awenade nloa. Na ɛwɔlɛ ne+ vale ye anwosesebɛ nee ye belemgbunli ebia ne nee tumi kpole maanle nane ne.+

3 Menwunle kɛ ɔ ti ne ko zɔho kɛ bɛbodale ye kpole bie, noko hanlɛ ne ɛhɔ,+ na azɛlɛ ye azo amra amuala dule doale nane ne na ɔ nwo yɛle bɛ ɛzulolɛ. 4 Na bɛzonlenle ɛwɔlɛ ne ɔluakɛ ɔmaanle nane ne tumi, na bɛzonlenle nane ne na bɛhanle kɛ: “Nwane a le kɛ nane ne a, na nwane a kɛhola nee ye kɛho a?” 5 Bɛmaanle ye ɛnloanlɛ mɔɔ ka edwɛkɛ mgbole nee munzule edwɛkɛ, na bɛmaanle ye tumi kɛ ɔyɛ mɔɔ ɔkulo la siane 42.+ 6 Na ɔbukele ɔ nloa ɔhanle munzule edwɛkɛ+ ɔtiale Nyamenle, ye duma nee ɛleka mɔɔ ɔde, bɔbɔ bɛdabɛ mɔɔ bɛwɔ anwuma lɔ la.+ 7 Bɛmaanle ye adenle kɛ ɔ nee nwuanzanwuanzama ne ɛho na ɔli bɛ nwo zo konim,+ na bɛmaanle ye tumi wɔ mbusua nee menli nee aneɛ nee maanle biala anwo zo. 8 Na menli mɔɔ de azɛlɛ ye azo la amuala bazonle ye. Bɛangɛlɛ bɛ nuhua biala duma wɔ Boaneralɛ ne mɔɔ bɛhunle ye la+ ngoane nwomamobɔleɛ ne anu,+ ɔvi ewiade ne mɔlebɛbo.

9 Saa awie lɛ ɛnzolɛ a, maa ɔdie.+ 10 Saa ɔwɔ kɛ awie kɔ akɛlɛzonlenlɛ nu a, ɔbahɔ akɛlɛzonlenlɛ nu. Saa awie bava konle dadeɛ ahu awie a,* ɔwɔ kɛ bɛfa konle dadeɛ bɛku ye.+ Ɛke a kpundiigyinlanlɛ+ nee diedi+ nwo hyia wɔ nwuanzanwuanzama ne afoa nu a.+

11 Akee menwunle nane anwo ɛzulolɛ bieko kɛ ɔvi azɛlɛ ne anu ɔlɛfinde, ɛnee ɔlɛ mɛne nwiɔ kɛ boaneralɛ la, noko ɔbɔle ɔ bo ɔdendɛle kɛ ɛwɔlɛ la.+ 12 Ɔfa alimoa nane anwo ɛzulolɛ ne tumi ne amuala ɔyɛ gyima+ wɔ ɔ nyunlu. Na ɔmaa azɛlɛ ye nee menli mɔɔ de zo la sonle alimoa nane ne mɔɔ bɛyɛle ye hanlɛ ne ayile la.+ 13 Na ɔyɛ nwanwane ninyɛne mgbole, ɔmaa senle bɔbɔ fi anwuma ba azɛlɛ ye azo wɔ alesama anyunlu.

14 Ɔlua sɛkɛlɛneɛ mɔɔ bɛmaa ɔyɛ ye wɔ nane ne anyunlu la ati, ɔbɛlɛbɛla menli mɔɔ de azɛlɛ ne azo la kɛ bɛyɛ ananze+ bɛmaa nane ne mɔɔ konle dadeɛ bodale ye noko yenyia anwosesebɛ bieko la.+ 15 Na bɛmaanle ye adenle kɛ ɔva ɛnwomenle* ɔmaa nane ne ananze ne, amaa nane ne ananze ne adendɛ na yeamaa bɛahu menli kɔsɔɔti mɔɔ bɛkɛkpo kɛ bɛkɛzonle nane ne ananze ne la.

16 Ɔyɛle ye kyengye kɛ menli kɔsɔɔti—mgbole nee ngyikyi, sukoavolɛma nee ehyiavolɛma, alehelɛ nee ngɛkɛlɛ—ɛmaa bɛyɛ bɛ nzonlɛ wɔ bɛ sa fema ne anwo anzɛɛ bɛ nwoma azo,+ 17 na awie biala ɛngola ɛndɔ anzɛɛ ɛndɔne debie, kyesɛ mɔɔ lɛ nzonlɛyɛlɛ ne bie, nane ne duma+ anzɛɛ ye duma ne nɔma ne la.+ 18 Ɛke a nrɛlɛbɛ nwo hyia a: Bɛmaa mɔɔ lɛ nwunu la ɛbu nane ne nɔma ne anwo mgbonda, ɔluakɛ ɔle sonla nɔma, na ye nɔma ne le 666.+

14 Akee menwunle ye, na nea! Boaneralɛ ne+ gyi Zayɔn Boka ne azo,+ na menli 144,000 ne+ mɔɔ bɛhɛlɛ ye duma nee ɔ Ze duma+ wɔ bɛ nwoma azo la boka ɔ nwo. 2 Mendele dede bie vi anwuma mɔɔ le kɛ nzule dɔɔnwo mɔɔ ɛlɛse nee ezulehululɛ mɔɔ anloa yɛ se la; na dede ne mɔɔ mendele la le kɛ edwɛndolɛma mɔɔ bɛlɛbɔ bɛ haape la. 3 Na bɛlɛto edwɛne bie mɔɔ zɔho edwɛne fofolɛ la+ wɔ belemgbunli ebia ne nee tease abɔdeɛ nna ne+ nee mgbanyima ne mɔ anyunlu,+ na awie biala angola anzukoa edwɛne zɔhane kyesɛ menli 144,000 ne+ mɔɔ bɛdɔ bɛ bɛvi azɛlɛ ye azo la ala. 4 Ɛhye mɔ a le menli mɔɔ bɛanva mraalɛ bɛangua bɛ nwo evinli la; nɔhalɛ nu, bɛle amunli.+ Ɛhye mɔ a le menli mɔɔ bɛdi Boaneralɛ ne anzi wɔ ɛleka biala mɔɔ ɔlɛkɔ la.+ Ɛhye mɔ a bɛdɔle bɛ+ bɛvile alesama anu kɛ ma mɔɔ limoa la+ bɛmaanle Nyamenle nee Boaneralɛ ne a, 5 na bɛannwu adalɛ biala wɔ bɛ nloa anu; dɛne biala ɛnle bɛ nwo.+

6 Na menwunle anwumabɔvolɛ bieko kɛ ɔlua anwomanyunlu, na ɔlɛ dahuu edwɛkpa ne kɛ ɔkabɔ ye nolo yeahile bɛdabɛ mɔɔ bɛde azɛlɛ ye azo la, maanle nee mbusua nee aneɛ nee menli kɔsɔɔti.+ 7 Ɔvale ɛnelɛ kpole ɔhanle kɛ: “Bɛzulo Nyamenle na bɛwula ye anyunlunyia, ɔluakɛ ye ndɛnebualɛ mekɛ ne ɛdwu,+ yemɔti bɛzonle Mɔɔ bɔle anwuma nee azɛlɛ ye nee nyevile+ nee azule* muala la.”

8 Anwumabɔvolɛ bieko, mɔɔ tɔ zo nwiɔ la lile ɔ nzi na ɔhanle kɛ: “Yedɔ aze! Babelɔn Kpole ne+ ɛdɔ aze,+ mɔɔ ɔmaanle maanle maanle kɔsɔɔti nlonle ye adwɔmane ɛbɛla* ɛya nza ne bie la!”+

9 Anwumabɔvolɛ bieko, mɔɔ tɔ zo nsa la lile bɛ nzi na ɔvale ɛnelɛ kpole ɔhanle kɛ: “Saa awie sonle nane anwo ɛzulolɛ ne+ nee ye ananze ne na ɔnyia ye nzonlɛyɛlɛ ne bie wɔ ɔ nwoma azo anzɛɛ ɔ sa fema ne anwo a,+ 10 ɔbanlo Nyamenle ɛyavalɛ nza ne mɔɔ bɛtɛfonlanle nu na bɛwola bɛgua Ye ɛya kanrɛlɛ ne anu la+ na bɛbahile ye nyane wɔ senle nee sɔlefa nu+ wɔ anwumabɔvolɛma nwuanzanwuanza nee Boaneralɛ ne anyunlu. 11 Na bɛ nyanenwunlɛ esike ne fo kɔ anwuma dahuu,+ na bɛnlie bɛ menle alehyenlɛ nee aledwolɛ, bɛdabɛ mɔɔ bɛsonle nane anwo ɛzulolɛ ne nee ye ananze ne nee awie biala mɔɔ nyia ye duma sɛkɛlɛneɛ ne bie la.+ 12 Ɛke a kpundiigyinlanlɛ nwo hyia wɔ nwuanzanwuanzama ne afoa nu a,+ bɛdabɛ mɔɔ bɛdi Nyamenle mɛla zo na bɛlɛ Gyisɛse diedi ne anu ɛsesebɛ la.”+

13 Na mendele ɛnelɛ bie vi anwuma, ɔse, “Kɛlɛ kɛ: Anyelielɛ a le bɛdabɛ mɔɔ bɛkɛwu wɔ Awulae anu+ ɔvi mekɛ ɛhye mɔɔ kɔ la. Ɛhɛe, kɛ sunsum ne se la ɛne, maa bɛlie bɛ menle wɔ bɛ gyima nwo, ɔluakɛ ninyɛne mɔɔ bɛyɛle la li bɛ nzi.”

14 Akee menwunle ye, na nea! amungu nwohyee bie, na awie mɔɔ zɔho sonla ra la de amungu ne azo,+ nvutuke abotile bɔ ɔ ti yɛɛ ɔlɛ ɛdedadeɛ nlane bie ɔ sa nu.

15 Anwumabɔvolɛ bieko vi ɛzonlenlɛsua ne anu vindele, ɔvale ɛnelɛ kpole ɔzele mɔɔ de amungu ne azo la kɛ: “Fa wɔ ɛdedadeɛ ne na te, ɔluakɛ mekɛ ɛdwu mɔɔ ɔwɔ kɛ bɛte a, na azɛlɛ ne azo ma ɛwie bolo.”+ 16 Na mɔɔ de amungu ne azo la dole ye ɛdedadeɛ ne wɔ azɛlɛ ye azo, na ɔdele ma mɔɔ wɔ azɛlɛ ne azo la.

17 Na anwumabɔvolɛ ko noko vi ɛzonlenlɛsua ne mɔɔ wɔ anwuma lɔ la anu vindele, na ɛnee ɔdaye noko ɔlɛ ɛdedadeɛ nlane bie.

18 Na anwumabɔvolɛ ko noko vi afɔlemokyea ne anwo vindele, yemɔ ɔlɛ tumi wɔ senle ne azo. Na ɔvale ɛnelɛ kpole ɔzele mɔɔ lɛ ɛdedadeɛ nlane ne la kɛ: “To wɔ ɛdedadeɛ nlane ne na boɔboa vanye mɔɔ wɔ azɛlɛ ye azo la aziakɛ ne anloa, ɔluakɛ ye ma ne ɛbolo.”+ 19 Anwumabɔvolɛ ne dole ye ɛdedadeɛ ne wɔ azɛlɛ ye azo, na ɔboɔboale azɛlɛ ye azo vanye ne anloa na ɔvuandinle ɔguale Nyamenle ɛya nwanye ɛhwihwinlɛ kuma kpole ne anu.+ 20 Bɛtietiale vanye ne azo wɔ suakpole ne kandiba lɔ, na mogya mɔɔ vi nwanye ɛhwihwinlɛ kuma ne anu rale la hɔle anwuma hɔdwule mgbɔnwɔ ne mɔ anloa nu bulalɛ ne anwo, ye tendenle kɛyɛ setedia* 1,600.

15 Na menwunle sɛkɛlɛneɛ bieko mɔɔ le kpole na ɔyɛ nwanwane la wɔ anwuma lɔ, anwumabɔvolɛma nsuu+ mɔɔ dedɛ ngyegyelɛ nsuu la. Ɛhye mɔ a li amozi a, ɔluakɛ ɔlua zo a Nyamenle ɛya ne bara awieleɛ a.+

2 Na menwunle debie mɔɔ le kɛ nyevile mɔɔ le kɛ neanleɛ+ mɔɔ nee senle ɛli afonla la, nee bɛdabɛ mɔɔ bɛlile nane anwo ɛzulolɛ ne nee ye ananze+ ne nee ye duma ne nɔma ne+ anwo zo konim la+ kɛ bɛgyigyi nyevile ne mɔɔ le kɛ neanleɛ la anloa, bɛdedɛ Nyamenle haape ne. 3 Ɛnee bɛlɛto Nyamenle akɛlɛ Mosisi edwɛne+ nee Boaneralɛ ne edwɛne ne+ kɛ:

“Gyihova* Nyamenle, Tumivolɛ Bedevinli,+ wɔ gyima le mgbole nee nwanwane.+ Dahuu* Belemgbunli,+ wɔ ndenle le fɔɔnwo nee nɔhalɛ.+ 4 Gyihova,* nwane a ɛnrɛzulo wɔ na ɔnrɛwula wɔ duma anyunlunyia a? Ɔluakɛ ɛ ngomekye a ɛle nɔhavo a.+ Maanle maanle kɔsɔɔti bara ɛ nyunlu arazonle wɔ+ ɔluakɛ yela ali kɛ ɛbua ndɛne fɔɔnwo.”

5 Ɛhye anzi menwunle kɛ bɛbuke daselɛlilɛ ɛdanlɛsua ɛzonlenlɛsua ne+ wɔ anwuma lɔ,+ 6 na anwumabɔvolɛma nsuu ne mɔɔ dedɛ ngyegyelɛ nsuu ne la+ vi ɛzonlenlɛsua ne anu vindele, bɛwula lenen adɛladeɛ mɔɔ anye te la na nvutuke tabule* hye bɛ kɛnra azo. 7 Tease abɔdeɛ nna ne anu ko vale nvutuke ahyɛnze nsuu maanle anwumabɔvolɛma nsuu ne, na ɛnee Nyamenle mɔɔ wɔ ɛkɛ ne dahuu la ɛya ne ɛyi bɛ tetɛkɛɛ.+ 8 Na Nyamenle anyunlunyia nee ye tumi ne ati, esike yile ɛzonlenlɛsua ne tɛkɛɛ,+ na awie biala angola anwolo ɛzonlenlɛsua ne anu hɔkpulale kɛ anwumabɔvolɛma nsuu ne ngyegyelɛ nsuu ne+ rale awieleɛ la.

16 Na mendele kɛ ɛnelɛ kpole bie vi ɛzonlenlɛsua ne anu+ ɛlɛka ahile anwumabɔvolɛma nsuu ne kɛ: “Bɛhɔwola Nyamenle ɛya ne mɔɔ wɔ ahyɛnze nsuu ne anu la bɛgua azɛlɛ ne azo.”+

2 Mɔɔ limoa la hɔle na ɔwolale mɔɔ wɔ ye kyɛnze ne anu la ɔguale azɛlɛ ne azo.+ Na nganlɛ mgbole mɔɔ yɛ nyane la+ dudule menli mɔɔ lɛ nane anwo ɛzulolɛ ne+ nzonlɛyɛlɛ ne nee bɛdabɛ mɔɔ bɛlɛsonle ye ananze ne la.+

3 Mɔɔ tɔ zo nwiɔ la wolale mɔɔ wɔ ye kyɛnze ne anu la guale nyevile ne anu.+ Na ɔhakyile ɔyɛle kɛ sonla mɔɔ ɛwu la mogya,+ na abɔdeɛ* biala mɔɔ ngoane wɔ nu la wule, ɛhɛe, nyevile ne anu ninyɛne ne.+

4 Mɔɔ tɔ zo nsa la wolale mɔɔ wɔ ye kyɛnze ne anu la guale azudenle nee nzubula muala anu.+ Na bɛhakyile mogya.+ 5 Mendele kɛ anwumabɔvolɛ ne mɔɔ nea nzule zo la se: “Wɔmɔ mɔɔ ɛnee ɛwɔ ɛkɛ+ na ɛtɛbɔ ɛkɛ, Nɔhavo,+ ɛle tenlenenli ɔlua ndɛne ɛhye mɔɔ wɔbua la ati,+ 6 ɔluakɛ bɛwolale nwuanzanwuanzama nee ngapezoma mogya bɛguale+ na wɔmaa bɛ mogya kɛ bɛnlo;+ ɔfɛta bɛ.”+ 7 Na mendele kɛ afɔlemokyea ne se: “Ɛhɛe, Gyihova* Nyamenle, Tumivolɛ Bedevinli,+ wɔ ndɛnebualɛ le nɔhalɛ nee fɔɔnwo.”+

8 Mɔɔ tɔ zo nna la wolale mɔɔ wɔ ye kyɛnze ne anu la guale sɛnzɛne ne azo,+ na bɛmaanle sɛnzɛne ne adenle kɛ ɔva senle ɔyelɛyela menli. 9 Na wuluwulu kpole yelɛyelale menli, noko bɛhanle Nyamenle mɔɔ lɛ ngyegyelɛ ɛhye mɔ azo tumi la duma ne anwo munzule edwɛkɛ, na bɛannu bɛ nwo yɛɛ bɛanwula ye anyunlunyia.

10 Mɔɔ tɔ zo nnu la wolale mɔɔ wɔ ye kyɛnze ne anu la guale nane anwo ɛzulolɛ ne belemgbunli ebia ne azo. Na awozinli vale ye belemgbunlililɛ ne,+ na bɛ nyanelilɛ ne ati bɛbɔle ɔ bo kɛ bɛkposa bɛ tafinlima, 11 noko bɛhanle anwuma Nyamenle ne anwo munzule edwɛkɛ ɔlua bɛ nyanelilɛ nee bɛ nganlɛ ne mɔ ati, na bɛannu bɛ nwo wɔ bɛ gyima nwo.

12 Mɔɔ tɔ zo nsia la wolale mɔɔ wɔ ye kyɛnze ne anu la guale azule kpole Yufileti ne anu,+ na azule ne sesanle+ amaa bɛaziezie adenle bɛamaa arelemgbunli+ mɔɔ vi aduduleɛ la.

13 Na menwunle sunsum nu edwɛkɛ mɔɔ anwo ɛnde* la nsa mɔɔ bɛle kɛ ahɛlɛne la kɛ bɛvi ɛwɔlɛ ne anloa anu nee nane anwo ɛzulolɛ ne+ anloa anu nee adalɛ ngapezonli ne anloa anu bɛvinde. 14 Nɔhalɛ nu, bɛle edwɛkɛ mɔɔ vi sunsum ɛtane ne mɔ ɛkɛ mɔɔ bɛyɛ sɛkɛlɛneɛ a,+ na bɛkɔ arelemgbunli mɔɔ wɔ azɛlɛ ye azo amuala la ɛkɛ ne kɛ bɛkaboɔboa bɛ nloa bɛamaa Nyamenle, Tumivolɛ Bedevinli ne+ kenle kpole ne anu konle ne.+

15 “Nea! Melɛba kɛ awule la.+ Anyelielɛ a le sonla mɔɔ sinza+ na ɔnea ye adɛladeɛ aguzo zo boɛ la, amaa yeanlɛ ɔ nwo zɔ wɔ menli nu na ɔ nyunlu angua aze.”+

16 Na bɛboɔboale bɛ nloa bɛhɔle ɛleka mɔɔ bɛfɛlɛ ye Hibulu nu Amagɛdɔn* la.+

17 Mɔɔ tɔ zo nsuu la wolale mɔɔ wɔ ye kyɛnze ne anu la guale anwoma ne anu. Na ɛnelɛ kpole bie vi ɛzonlenlɛsua ne anu,+ belemgbunli ebia ne azo hanle kɛ: “Yewie!” 18 Na ɛsɛlɛmanye nee ɛnelɛ nee ezulehululɛ rale, na azɛlɛkpusulɛ kpole mɔɔ bie ɛtɛsile ɛlɛ ɔvi mekɛ mɔɔ sonla rale azɛlɛ ye azo la zile,+ azɛlɛkpusulɛ kpole mɔɔ yɛ ɛzulolɛ. 19 Suakpole ne+ anu hyɛle nsa, na maanle maanle ne azua zɛkyele; na bɛhakyele Babelɔn Kpole ne+ wɔ Nyamenle anyunlu, kɛ bɛbava ye ɛya nza kanrɛlɛ ne bɛamaa ye.+ 20 Bieko, bɔra biala nriandile, na bɛannwu awoka.+ 21 Akee ezuawolɛ mgbole, mɔɔ ko biala anu ɛlomboɛ le kɛ talɛnte* ko la vi anwuma raguale menli nwo zo,+ na ngyegyelɛ mɔɔ ezuawolɛ ne vale rale la ati,+ menli hanle Nyamenle anwo munzule edwɛkɛ ɔluakɛ ɛnee ngyegyelɛ ne le kpole.

17 Anwumabɔvolɛma nsuu ne mɔɔ dedɛ ahyɛnze nsuu ne la anu ko+ rale na ɔzele me kɛ: “Bɛla maa mengile wɔ tuutuunli kpole ne mɔɔ de nzule dɔɔnwo ne azo la ndɛnebualɛ ne,+ 2 azɛlɛ ye azo arelemgbunli nee ye ɛbɔ adwɔmane ɛbɛla,*+ na menli mɔɔ de azɛlɛ ye azo la ɛnlo ye adwɔmane ɛbɛla* nza ne ɛbo.”+

3 Na ɔluale sunsum ne tumi zo ɔvale me ɔhɔle fienemgbole bie anu. Na menwunle raalɛ bie kɛ ɔde nane kɔkɔlɛ anwo ɛzulolɛ bie mɔɔ munzule aluma wɔ ɔ nwo amuala, ɔ ti le nsuu na ɔlɛ mɛne bulu la azo. 4 Raalɛ ne wula tɛladeɛ kɔkɔlɛ nee buluwu afonla nee kɔkɔlɛ,+ na yeva nvutuke nee awolɛ mɔɔ sonle bolɛ nee avikpa yeziezie ɔ nwo,+ na ɔlɛ nvutuke kanrɛlɛ mɔɔ kyibadeɛ nee ye adwɔmane ɛbɛla* ninyɛne mɔɔ anwo ɛnde ɛyi ye tɛkɛɛ la wɔ ɔ sa nu. 5 Bɛhɛlɛ duma bie mɔɔ le fealeranu edwɛkɛ la wɔ ɔ nwoma azo kɛ: “Babelɔn Kpole, tuutuuma nee azɛlɛ ye azo kyibadeɛ bɛ nli.”+ 6 Na menwunle kɛ nwuanzanwuanzama mogya nee Gyisɛse+ alasevolɛ mogya ɛmaa raalɛ ne ɛbo.

Mɔɔ menwunle ye la, ɔzinle me nwo kpole. 7 Ɔti anwumabɔvolɛ ne zele me kɛ: “Kɛmɔti a yezi ɛ nwo ɛ? Mebaha raalɛ ne+ nee nane ne mɔɔ ɔde ɔ nwo zo mɔɔ ɔ ti le nsuu na ɔlɛ mɛne bulu ne la anwo fealeranu edwɛkɛ meahile wɔ:+ 8 Nane anwo ɛzulolɛ ne mɔɔ ɛnwunle ye la ɛnee wɔ ɛkɛ, noko ɔnle ɛkɛ, na ɔbavi kuma kuloonwu ne anu yeavinde,+ na yeahɔ ɛzɛkyelɛ nu. Na menli mɔɔ de azɛlɛ ye azo—bɛdabɛ mɔɔ bɛangɛlɛ bɛ aluma wɔ ngoane nwomamobɔleɛ ne+ anu ɔvi ewiade ne mɔlebɛbo la—nwu kɛzi ɛnee nane anwo ɛzulolɛ ne wɔ ɛkɛ, noko ɔnle ɛkɛ, na ɔbara bieko la a, ɔbazi bɛ nwo.

9 “Ɛhye hyia adwenle nee nrɛlɛbɛ: Adile nsuu ne+ le awoka nsuu mɔɔ raalɛ ne de zolɛ a. 10 Na bɛle arelemgbunli nsuu: Nnu ɛdɔ aze, ko wɔ ɛkɛ, na ko ne mɔɔ ɛha la bɔ zo mɔɔ ɔbara a; noko saa ɔba a, ɔwɔ kɛ ɔtɛnla ɛkɛ ne mekɛ ekyi. 11 Na nane anwo ɛzulolɛ ne mɔɔ ɛnee wɔ ɛkɛ noko ɔnle ɛkɛ la,+ eza le belemgbunli mɔɔ tɔ zo mɔtwɛ, na ɔvi nsuu ne anu a ɔrale a, na ɔkɔ ɛzɛkyelɛ nu.

12 “Mɛne bulu ne mɔɔ ɛnwunle bɛ la le arelemgbunli bulu mɔɔ bɛtɛnyianle bɛ belemgbunlililɛ, noko bɛ nee nane anwo ɛzulolɛ ne banyia tumi kɛ arelemgbunli dɔnehwele ko. 13 Ɛhye mɔ lɛ adwenle ko, ɔti bɛfa bɛ tumi nee bɛ anwosesebɛ bɛmaa nane anwo ɛzulolɛ ne. 14 Bɛ nee Boaneralɛ ne baho,+ na kɛ mɔɔ ɔle awulae mɔ Awulae nee arelemgbunli Belemgbunli la ati,+ Boaneralɛ ne bali bɛ nwo zo konim.+ Bɛdabɛ mɔɔ bɛboka ɔ nwo mɔɔ bɛvɛlɛ bɛ na bɛkpa bɛ na bɛdi nɔhalɛ la noko bali konim.”+

15 Ɔzele me kɛ: “Azule ne mɔ mɔɔ ɛnwunle ye, ɛleka mɔɔ tuutuunli ne de la le mbusua nee menli dɔɔnwo nee maanle maanle nee aneɛ ngakyile.+ 16 Na mɛne bulu ne+ mɔɔ ɛnwunle bɛ nee nane anwo ɛzulolɛ ne la,+ ɛhye mɔ bakpɔ tuutuunli ne+ na bɛalie ɔ nwo ninyɛne bɛamaa yealɛ ɔ nwo zɔ, na bɛbali ye nwonane na bɛava senle bayela ye bɔkɔɔ.+ 17 Ɔluakɛ Nyamenle ɛva ɛwula bɛ ahonle nu kɛ bɛmaa ye nzuzulɛ ɛrɛla nu, ɛhɛe, kɛ bɛyɛ adwenle ko+ na bɛva bɛ belemgbunlililɛ ne bɛmaa nane anwo ɛzulolɛ ne,+ kɔkpula kɛ Nyamenle edwɛkɛ ne bara nu la. 18 Na raalɛ ne+ mɔɔ ɛnwunle ye la a le suakpole ne mɔɔ di azɛlɛ ye azo arelemgbunli nwo zo tumi la.”

18 Ɛhye anzi menwunle anwumabɔvolɛ ko noko kɛ ɔvi anwuma ɔlɛdwu aze, ɔlɛ tumi kpole na ye anyunlunyia dale azɛlɛ ye azo. 2 Na ɔvale ɛnelɛ kpole ɔdeanle nu kɛ: “Yedɔ aze! Babelɔn Kpole ne ɛdɔ aze,+ na yerayɛ sunsum ɛtane ne mɔ tɛnlabelɛ nee ɛleka mɔɔ sunsum biala mɔɔ anwo ɛnde* nee aloma biala mɔɔ anwo ɛnde na ɔle bɛkyi la fea a!+ 3 Na ɔlua ye adwɔmane ɛbɛla* nwo atiakunluwɔzo* nza ne ati, yenyia maanle maanle ne amuala,+ na azɛlɛ ye azo arelemgbunli nee ye bɔle adwɔmane,+ yɛɛ azɛlɛ ye azo gualilɛma* luale ye anwonyia ne mɔɔ ɔnze nwolɛ nyiane la tumi zo nyianle bɛ nwo.”

4 Na mendele ɛnelɛ bieko vi anwuma kɛ: “Bɛvi ye nu, me menli,+ saa bɛngulo kɛ bɛnyia ye ɛtane ne anu kyɛfoa na bɛnyia ye ngyegyelɛ ne bie a.+ 5 Ɔluakɛ ye ɛtane ne anloa ɛboɔboa ɛhɔdwu anwuma,+ na Nyamenle ɛhakye ye amumuyɛ ne.*+ 6 Bɛva mɔɔ ɔvale ɔyɛle awie mɔ la bie bɛdua ye kakɛ,+ ɛhɛe, bɛva ye mɔnwo nwiɔ bɛdua ye kakɛ;+ kanrɛlɛ ne+ mɔɔ ɔfonlanle ye wɔ nu la anu, bɛfonla ye mɔnwo nwiɔ bɛmaa ye.+ 7 Kɛzi ɔwulale ɔ nwo anyunlunyia nee kɛzi ɔnyianle anwonyia dɔɔnwo mɔɔ yeanze nwolɛ nyiane la, zɔhane ala a bɛmaa ɔnwu amaneɛ na ɔli nyane a. Ɔluakɛ ɔka ye wɔ ye ahonle nu kɛ: ‘Mede me ebia nu kɛ ɔbahyema, na menle kunlavolɛ, yɛɛ menrɛli nyane ɛlɛ.’+ 8 Ɛhye ati a ye ngyegyelɛ bara kenle ko demua la, ewule nee nyane nee ɛhɔne, na bɛbava senle bayela ye bɔkɔɔ,+ ɔluakɛ Gyihova* Nyamenle mɔɔ buale ye ndɛne la anwo yɛ se.+

9 “Na saa arelemgbunli mɔɔ wɔ azɛlɛ ye azo mɔɔ bɛ nee ye bɔle adwɔmane ɛbɛla* na bɛnyianle ye anwonyia ne mɔɔ ɔnze nwolɛ nyiane la bie la nwu ye ɛyelalɛ ne esike ne a, bɛbazu na bɛali ɔ nwo nyane. 10 Kɛmɔ bɛsulo ye amaneɛnwunlɛ ne la ati, bɛbagyinla moamoa bɛaha kɛ: ‘Gyakɔ, gyakɔ, wɔmɔ suakpole ye,+ suakpole Babelɔn mɔɔ ɛyɛ se, ɔluakɛ dɔnehwele ko anu ala, wɔ ndɛnebualɛ ɛra!’

11 “Gualilɛma mɔɔ bɛwɔ azɛlɛ ye azo la noko ɛlɛsu ali ɔ nwo nyane, ɔluakɛ awie ɛnle ɛkɛ mɔɔ ɔbadɔ bɛ ninyɛne ne amuala bieko a, 12 ninyɛne mɔɔ le kɛ nvutuke, dwɛtɛ fufule, awolɛ mɔɔ sonle bolɛ, avikpa, lenen kpalɛ, ɛdanlɛ kɔkɔlɛ nee buluwu afonla, selekye nee ɛdanlɛ kɔkɔlɛ; yɛɛ debie biala mɔɔ bɛva baka mɔɔ bɔ evuanlɛ bɛyɛ; nee debie biala mɔɔ bɛva ɛzɛlɛ* bɛyɛ, nee debie biala mɔɔ bɛva baka mɔɔ sonle bolɛ, kɔbele, bulalɛ nee mabolo* bɛyɛ la; 13 akee senamɔn, Yindia sinzimile, ayilevuanlɛ, nwole evuanlɛ, ɛyɛlɛvuanlɛ, nwanye, ɔlivi nwole, esamo kpalɛ, hwiiti, nlankɛ, mboane, mgbɔnwɔ, ehwili, ngɛkɛlɛ nee menli ngoane.* 14 Ɛhɛe, ma kpalɛ ne mɔɔ ɛnee ɛkulo* la ɛbɔ wɔ, yɛɛ aleɛ kpalɛ nee ninyɛne mgbalɛ kɔsɔɔti ɛvi ɛ sa, ɛnrɛnyia bɛ bieko.

15 “Gualilɛma ne mɔɔ dɔnenle ninyɛne ɛhye mɔ na bɛluale ɔ nwo zo bɛnyianle bɛ nwo la bagyinla moamoa ɔluakɛ bɛsulo ye amaneɛnwunlɛ ne, na bɛbazu bɛali nyane 16 na bɛaha kɛ: ‘Gyakɔ, gyakɔ, suakpole mɔɔ heda lenen kpalɛ, ɛdanlɛ kɔkɔlɛ nee buluwu afonla, na ɔwula tɛladeɛ kɔkɔlɛ na ɔfa nvutuke ninyɛne, awolɛ mɔɔ sonle bolɛ nee avikpa ɔsiezie ɔ nwo kɛnlɛma la,+ 17 ɔluakɛ dɔnehwele ko anu ala anwonyia kpole ɛhye ɛminli!’

“Na melikavolɛ biala nee awie biala mɔɔ dua nyevile zo tu adenle nee awie biala mɔɔ yɛ meli nu gyima nee bɛdabɛ mɔɔ bɛyɛ nyevile zo gyima la amuala gyinlanle moamoa, 18 na mɔɔ bɛlɛnea esike ne mɔɔ vi ye ɛyelalɛ ne anu ɛlɛba la, bɛdeanle nu bɛhanle kɛ: ‘Sua boni a le kɛ suakpole ne a?’ 19 Bɛvale ndɛtɛlɛ bɛguale bɛ ti zo na bɛdeanle nu bɛzunle na bɛlile nyane, na bɛhanle kɛ: ‘Gyakɔ, gyakɔ, suakpole mɔɔ nuhua a bɛdabɛ mɔɔ bɛ meli gua nyevile zo la kɔsɔɔti luale ye anwonyia ne azo nyianle bɛ nwo la, ɔluakɛ dɔnehwele ko ala anu, bɛzɛkye ye bɔkɔɔ!’+

20 “O anwuma,+ di fɛlɛko wɔ mɔɔ ɛdo ye la anwo, bɛmɛ nwuanzanwuanzama+ nee ɛzoanvolɛma nee ngapezoma noko, bɛli fɛlɛko, ɔluakɛ bɛdabɛ ti a Nyamenle ɛbua ye ndɛne a!”+

21 Na anwumabɔvolɛ anwosesebɛ bie maanle bolɛ mɔɔ le kɛ ɛdibolɛ kpole bie la zo na ɔvuandinle ɔdole nyevile ne anu ɔhanle kɛ: “Kɛ bɛbavuandi Babelɔn suakpole ne ndɛndɛ bɛado ye lɔ la ɛne, na bɛnrɛnwu ye bieko.+ 22 Na bɛnrɛde edwɛndolɛma mɔɔ bɛbɔ haape, bɛdabɛ mɔɔ bɛto edwɛne, bɛdabɛ mɔɔ bɛbɔ fulutu nee bɛdabɛ mɔɔ bɛbɔ aweɛne ndendenle la ane bieko wɔ wɔ nu ɛlɛ. Na bɛnrɛnwu dwinvolɛ biala mɔɔ yɛ gyima la wɔ wɔ nu bieko, yɛɛ bɛnrɛde ɛdibolɛ ne wɔ wɔ nu bieko. 23 Kɛnlaneɛ wienyi biala ɛnrɛda wɔ wɔ nu bieko, na bɛnrɛde atɔfolɛ nrenyia nee atɔfolɛ ne wɔ wɔ nu bieko; ɔluakɛ ɛnee wɔ gualilɛma a le menli mgbole wɔ azɛlɛ ye azo a, na ɛluale wɔ sunsum ɛtane nyɛleɛ zo+ ɛbɛlɛbɛlale maanle maanle ne mɔ amuala. 24 Ɛhɛe, ye nuhua a bɛnwunle ngapezoma nee nwuanzanwuanzama+ nee bɛdabɛ mɔɔ bɛhunle bɛ wɔ azɛlɛ ye azo la amuala mogya a.”+

19 Ɛhye anzi mendele debie mɔɔ le kɛ menli dɔɔnwo ane la wɔ anwuma. Bɛhanle kɛ: “Bɛye Gyaa ayɛlɛ!*+ Ngoanelielɛ nee anyunlunyia nee tumi le yɛ Nyamenle ne ɛdeɛ, 2 ɔluakɛ ye ndɛnebualɛ le nɔhalɛ nee fɔɔnwo.+ Na yebua tuutuunli kpole ne mɔɔ yeva ye adwɔmane ɛbɛla* yezɛkye azɛlɛ ye la ndɛne, na yeli ye ngɛkɛlɛ ne mɔ mogya ne mɔɔ wɔ ɔ sa anwo la anwo nzenralɛ.”+ 3 Ndɛndɛ ne ala bɛhanle ye fane nwiɔ ne azo kɛ: “Bɛye Gyaa ayɛlɛ!*+ Na esike mɔɔ vi ye nu la fo kɔ anwuma dahuu.”+

4 Na mgbanyima 24 ne+ nee tease abɔdeɛ nna ne+ dule guale na bɛzonlenle Nyamenle mɔɔ de belemgbunli ebia ne azo la na bɛhanle kɛ: “Amen! Bɛye Gyaa ayɛlɛ!”*+

5 Bieko, ɛnelɛ bie vi belemgbunli ebia ne anwo hanle kɛ: “Bɛye yɛ Nyamenle ne ayɛlɛ, bɛmɛ ye ngɛkɛlɛ+ mɔɔ bɛsulo ye la kɔsɔɔti, ngyikyi nee mgbole.”+

6 Na mendele ɛnelɛ bie mɔɔ le kɛ menli dɔɔnwo ane nee azule dɔɔnwo mɔɔ lua awolɛ zo nee ezulehululɛ kpole ne la. Bɛhanle kɛ: “Bɛye Gyaa ayɛlɛ,*+ ɔluakɛ Gyihova* yɛ Nyamenle ne, Tumivolɛ Bedevinli ne,+ ɛbɔ ɔ bo ɛlɛdi belemgbunli!+ 7 Bɛmaa yɛ nye ɛlie na yɛli fɛlɛko kpole na yɛwula ye anyunlunyia, ɔluakɛ Boaneralɛ ne atɔfolɛlielɛ ne ɛdwu zo na ɔ ye ɛziezie ɔ nwo. 8 Ɛhɛe, bɛmaa ye adenle kɛ ɔheda lenen kpalɛ mɔɔ anye te la—ɔluakɛ lenen kpalɛ ne gyi ɛkɛ maa nwuanzanwuanzama ne tenlene nyɛleɛ ne mɔ.”+

9 Na ɔzele me kɛ, “Kɛlɛ kɛ: Anyelielɛ a le bɛdabɛ mɔɔ bɛdo ɛsalɛ bɛvɛlɛ bɛ kɛ bɛrɛla Boaneralɛ ne atɔfolɛlielɛ nɔsolɛ aleɛlilɛ ne abo la.”+ Eza ɔzele me kɛ: “Ɛhye le edwɛkɛ nɔhalɛ mɔɔ vi Nyamenle ɛkɛ.” 10 Ɛhye ati mendule mendɔle ɔ gyakɛ anu kɛ mesonle ye. Noko ɔzele me kɛ: “Nea boɛ! Mmayɛ zɔ!+ Mele akɛlɛ kɛ ɛdawɔ nee ɛ mediema mɔɔ lɛ Gyisɛse anwo daselɛlilɛ gyima ne anu la.+ Sonle Nyamenle!+ Ɔluakɛ Gyisɛse anwo daselɛlilɛ a maa bɛka ngapezo a.”+

11 Menwunle kɛ anwuma ɛbuke, na nea! ɛkpɔnwɔ fufule bie ɛne.+ Na mɔɔ de zo la bɛfɛlɛ ye Nɔhavo+ nee Nɔhalɛnli,+ na ɔbua ndɛne yɛɛ ɔko konle wɔ tenleneyɛlɛ nu.+ 12 Ɔ nye le sendɔlɔra,+ na abotile* dɔɔnwo bobɔ ɔ ti. Ɔlɛ duma bie mɔɔ bɛhɛlɛ wɔ ɔ nwo mɔɔ awie biala ɛnze kɛ ɔdaye ala, 13 na ɔwula tɛladeɛ aguzo mɔɔ mogya ɛheha* nu, na duma mɔɔ bɛfa bɛfɛlɛ ye la a le Nyamenle Edwɛkɛ Ne.+ 14 Bieko, ɛnee anwuma ɛlɔne mɔɔ dede mgbɔnwɔ fufule zo la li ɔ nzi, na bɛwulowula lenen fufule kpalɛ mɔɔ anye te la. 15 Na konle dadeɛ tendenle nlane bie vi ɔ nloa anu finde+ mɔɔ ɔbava yeazɛkye maanle maanle ne mɔ a, na ɔbava bulalɛ kpɔma yeali bɛ nwo zo tumi.+ Bieko, ɔtietia Nyamenle Tumivolɛ Bedevinli ne ɛya kpole nwanye ɛhwihwinlɛ kuma ne azo.+ 16 Ɔlɛ duma bie mɔɔ bɛhɛlɛ wɔ ye tɛladeɛ aguzo ne anu, ɛhɛe, wɔ ye ɛzɔlɛ nwo kɛ, arelemgbunli Belemgbunli yɛɛ awulae mɔ Awulae.+

17 Akee menwunle anwumabɔvolɛ bie kɛ ɔgyi sɛnzɛne ne anu, ɔvale ɛnelɛ kpole ɔdeanle nu ɔzele nloma mɔɔ tu dua anwomanyunlu la amuala kɛ: “Bɛrɛla, bɛboɔboa bɛ nloa bɛrɛla Nyamenle nɔsolɛ aleɛlilɛ kpole ne abo,+ 18 na bɛrali arelemgbunli nwonane nee sogya mgbanyima nwonane nee anwosesebɛma nwonane+ nee mgbɔnwɔ nee menli mɔɔ dede zo la nwonane,+ yɛɛ menli kɔsɔɔti, alehelɛ nee ngɛkɛlɛ yɛɛ ngyikyi nee mgbole nwonane.”

19 Na menwunle nane anwo ɛzulolɛ ne nee azɛlɛ ye azo arelemgbunli nee bɛ ɛlɔne kɛ bɛboɔboa bɛ nloa kɛ bɛ nee mɔɔ de ɛkpɔnwɔ ne azo la nee ye ɛlɔne kaho.+ 20 Na bɛhyele nane anwo ɛzulolɛ ne nee adalɛ ngapezonli ne+ mɔɔ yɛle sɛkɛlɛneɛ wɔ ɔ nyunlu ɔvale ɔbɛlɛbɛlale menli mɔɔ nyianle nane anwo ɛzulolɛ ne nzonlɛyɛlɛ ne+ nee bɛdabɛ mɔɔ bɛsonle ye ananze ne la.+ Akee bɛvuandinle bɛ mu nwiɔ anyewɔzo bɛguale senle tandane ne mɔɔ sɔlefa ɛlɛsɔ wɔ nu la anu.+ 21 Na bɛvale konle dadeɛ tendenle ne mɔɔ vi mɔɔ de ɛkpɔnwɔ ne azo anloa anu vindele la bɛhunle bɛdabɛ mɔɔ bɛhale la.+ Na nloma ne mɔ amuala lile bɛ nwonane maanle bɛ ko yile.+

20 Na menwunle kɛ anwumabɔvolɛ bie vi anwuma ɛlɛdwu na ɔlɛ kuma kuloonwu ne sanvɛ ne+ nee kyeenyi kpole bie ɔ sa nu. 2 Ɔhyele ɛwɔlɛ ne,+ mɔmoane ɛwɔlɛ ne,+ mɔɔ yemɔ a le Abɔnsam+ nee Seetan la,+ na ɔkyekyele ye ɛvolɛ 1,000. 3 Na ɔvuandinle ye ɔdole kuma kuloonwu ne anu+ na ɔdole nu na ɔzɔle ɔ nloa, amaa yeambɛlɛbɛla maanle maanle ne bieko kɔkpula kɛ ɛvolɛ 1,000 ne kɛra ye awieleɛ la. Ɛhye anzi ɔwɔ kɛ bɛgyakyi ye ekyii.+

4 Na menwunle arelemgbunli mbia, na bɛmaanle bɛdabɛ mɔɔ bɛdede zo la tumi kɛ bɛbua ndɛne. Ɛhɛe, menwunle bɛdabɛ mɔɔ Gyisɛse anwo daselɛlilɛ nee Nyamenle anwo edwɛkɛhanlɛ ti bɛhunle bɛ* la ɛkɛla ne mɔ,* nee bɛdabɛ mɔɔ bɛanzonle nane anwo ɛzulolɛ ne anzɛɛ ye ananze ne yɛɛ bɛannyia nane ne nzonlɛyɛlɛ ne bie wɔ bɛ nwoma azo anzɛɛ bɛ sa anwo la.+ Na bɛrale ngoane nu na bɛ nee Kelaese lile belemgbunli+ ɛvolɛ 1,000. 5 (Mowuamra mɔɔ hale la+ amba ngoane nu kɔkpula kɛ ɛvolɛ 1,000 ne rale ye awieleɛ la.) Ewudwazo ne mɔɔ limoa la ɛne.+ 6 Anyelielɛ nee nwuanzanwuanza a le awie biala mɔɔ kɛnyia ewudwazo ne mɔɔ limoa la anu kyɛfoa la;+ ewule ne mɔɔ tɔ zo nwiɔ la+ ɛnlɛ ɛhye mɔ anwo zo tumi,+ emomu bɛbayɛ Nyamenle nee Kelaese ɛsɔfoma,+ na bɛ nee ye bali belemgbunli ɛvolɛ 1,000.+

7 Saa ɛvolɛ 1,000 ne ba ye awieleɛ ala a, bɛbaye Seetan bɛavi ye efiade ne, 8 na ɔbavinde yeahɔbɛlɛbɛla maanle maanle ne mɔ mɔɔ wɔ azɛlɛ ye muleɛ nna ne azo la, Gɔgo nee Meegɔgo, na yeaboɔboa bɛ nloa yeamaa konle ne. Bɛ dodo le kɛ ɛnweazo ɛnwea. 9 Bɛhɔle azɛlɛ ye azo ɛleka biala na bɛbɔle nwuanzanwuanzama ne azokoɛleɛ ne nee suakpole ne mɔɔ Nyamenle anye die nwolɛ la bɛyiale. Noko senle vi anwuma rayelale bɛ.+ 10 Na bɛvuandinle Abɔnsam mɔɔ ɛlɛbɛlɛbɛla bɛ la bɛdole senle nee sɔlefa tandane ne anu, ɛleka mɔɔ ɛnee nane anwo ɛzulolɛ ne+ nee adalɛ ngapezonli ne wɔ la;+ na bɛbahile bɛ nyane* alehyenlɛ nee aledwolɛ dahuu.

11 Na menwunle belemgbunli ebia fufule bie nee Mɔɔ de zolɛ la.+ Azɛlɛ nee anwuma nriandile vile ɔ nyunlu,+ na bɛannyia ɛleka biala bɛammaa bɛ. 12 Na menwunle mowuamra, mgbole nee ngyikyi, kɛ bɛgyigyi belemgbunli ebia ne anyunlu, na bɛbukebukele nwomamobɔleɛ nu. Na bɛbukele nwomamobɔleɛ bieko noko anu; ngoane buluku ne ɛne.+ Bɛgyinlanle mɔɔ bɛhɛlɛ ye wɔ nwomamobɔleɛ ne mɔ anu la azo bɛbuale mowuamra ndɛne kɛ mɔɔ bɛ nyɛleɛ de la.+ 13 Na nyevile yele mowuamra mɔɔ wɔ nu la rale, na ewule nee Nla* yele mowuamra mɔɔ wɔ bɛ nu la rale, na bɛbuale bɛ ndɛne ngoko ngoko kɛ mɔɔ bɛ nyɛleɛ de la.+ 14 Na bɛvuandinle ewule nee Nla* bɛguale senle tandane ne anu.+ Ɛhye a le ewule ne mɔɔ tɔ zo nwiɔ la,+ senle tandane ne.+ 15 Bieko, bɛvuandinle awie biala mɔɔ bɛangɛlɛ ye duma wɔ ngoane buluku ne anu la+ bɛdole senle tandane ne anu.+

21 Na menwunle anwuma fofolɛ nee azɛlɛ fofolɛ;+ ɔluakɛ ɛnee alimoa anwuma ne nee alimoa azɛlɛ ne ɛpɛ nu,+ na nyevile+ ɛnle ɛkɛ bieko. 2 Eza menwunle suakpole nwuanzanwuanza ne, Gyɛlusalɛm Fofolɛ ne, kɛ ɔvi Nyamenle anwo lɔ wɔ anwuma ɔlɛdwu aze+ na bɛziezie ye kɛ atɔfolɛ mɔɔ bɛhyehyɛ ye kɛnlɛma bɛkamaa ɔ hu la.+ 3 Akee mendele ɛnelɛ kpole bie menvile belemgbunli ebia ne azo kɛ: “Nea! Nyamenle ɛdanlɛsua ne wɔ alesama avinli, na ɔ nee bɛ badɛnla na bɛayɛ ye menli. Na Nyamenle mumua ne nee bɛ balua.+ 4 Na ɔbakyikyi bɛ nye anwo monle kɔsɔɔti,+ na ewule ɛnle ɛkɛ bieko,+ yɛɛ alɔbɔlɛ nee ɛzunlɛ nee nyane ɛnle ɛkɛ bieko.+ Alimoa ninyɛne ne ɛpɛ nu.”

5 Na Mɔɔ de belemgbunli ebia ne azo la+ hanle kɛ: “Nea! Melɛyɛ ninyɛne kɔsɔɔti fofolɛ.”+ Eza ɔhanle kɛ: “Kɛlɛ, ɔluakɛ edwɛkɛ ɛhye le zɔ* yɛɛ ɔle nɔhalɛ.” 6 Na ɔzele me kɛ: “Bɛra nu bɛwie! Mame a mele Alefa nee Omiga* ne a, mɔlebɛbo nee awieleɛ ne.+ Mɔɔ nzuhɔne ɛlɛku ye la, mebamaa ye ngoane nzubula ne anu nzule ne bie mɔɔ ɔndua ɛhwee a.+ 7 Mɔɔ kɛli konim la banyia ɛhye mɔ, na mebayɛ ye Nyamenle na yeayɛ me ra. 8 Na bɛdabɛ mɔɔ bɛle foanvoanle nee bɛdabɛ mɔɔ bɛnlɛ diedi+ yɛɛ bɛdabɛ mɔɔ bɛ nwo ɛnde na bɛyɛ kyibadeɛ yɛɛ ahodiawu+ nee adwɔmanema*+ nee bɛdabɛ mɔɔ bɛyɛ sunsum ɛtane nyɛleɛ nee awozonle ɛzonlenlɛma nee adalɛma kɔsɔɔti+ banyia bɛ kyɛfoa wɔ tandane ne mɔɔ senle nee sɔlefa sɔ nu la anu.+ Ɛhye a le ewule ne mɔɔ tɔ zolɛ nwiɔ la.”+

9 Anwumabɔvolɛma nsuu ne mɔɔ ɛnee dedɛ ahyɛnze nsuu ne mɔɔ ngyegyelɛ nsuu ne mɔɔ li amozi la ɛyi ye tɛkɛɛ la anu ko+ rale na ɔzele me kɛ: “Bɛla maa mengile wɔ atɔfolɛ ne, Boaneralɛ ne aye ne.”+ 10 Ɔti ɔluale sunsum ne tumi zo ɔvale me ɔhɔle boka kpole tendenle bie azo, na ɔhilele me suakpole nwuanzanwuanza Gyɛlusalɛm mɔɔ vi Nyamenle anwo lɔ wɔ anwuma ɛlɛdwu aze+ 11 na ɔlɛ Nyamenle anyunlunyia la.+ Ɔta kɛ bolɛ mɔɔ sonle bolɛ, kɛ gyasepa bolɛ mɔɔ ɛlɛta kɛ neanleɛ la.+ 12 Ɔlɛ bane kpole tendenle nee nlenkɛ mgbole 12, yɛɛ anwumabɔvolɛma 12 gyigyi nlenkɛ mgbole ne mɔ anloa, na bɛhɛlɛ Yizilayɛ mbusua 12 ne aluma wɔ nlenkɛ mgbole ne mɔ anwo. 13 Nlenkɛ nsa wɔ aduduleɛ, nlenkɛ nsa wɔ sɔlɔ, nlenkɛ nsa wɔ nyiakɛ, yɛɛ nlenkɛ nsa wɔ adɔleɛ.+ 14 Suakpole ne bane ne noko lɛ adiabo awolɛ 12, na bɛhɛlɛ aluma 12 mɔɔ le Boaneralɛ ne ɛzoanvolɛma 12 ne aluma la wɔ nwolɛ.+

15 Ɛnee ahenle mɔɔ nee me ɛlɛtendɛ la lɛ nvutuke baka ɛzuzudeɛ mɔɔ ɔfa yeazuzu suakpole ne nee ye nlenkɛ mgbole ne mɔ nee ye bane ne la.+ 16 Na suakpole ne lɛ afoa nna, na ye tendenle nee ye tɛtɛlɛ sɛ. Na ɔvale baka ɛzuzudeɛ ne ɔzuzule suakpole ne, ɔle setedia 12,000;* ye tendenle nee ye tɛtɛlɛ nee ye anwumahɔlɛ sɛ. 17 Eza ɔzuzule ye bane ne, ɔle kubit 144* kɛ mɔɔ sonla ɛzuzudeɛ nee kɛ mɔɔ anwumabɔvolɛ ɛzuzudeɛ noko de la. 18 Bɛvale gyasepa a bɛdole bane ne a,+ na ɛnee suakpole ne le nvutuke tagyee mɔɔ anye le kɛ neanleɛ mɔɔ anu le wienyi la. 19 Bɛvale awolɛ mɔɔ sonle bolɛ la ngakyile kɔsɔɔti bie bɛwulale suakpole ne bane ne adiabo: adiabo ne mɔɔ limoa la le gyasepa, mɔɔ tɔ zo nwiɔ la le safaya, mɔɔ tɔ zo nsa la le kalesedoni, mɔɔ tɔ zo nna la le ɛmelade, 20 mɔɔ tɔ zo nnu la le saadonese, mɔɔ tɔ zo nsia la le saadese, mɔɔ tɔ zo nsuu la le kelesɔlaete, mɔɔ tɔ zo mɔtwɛ la le bɛlele, mɔɔ tɔ zo ngɔnla la le topaze, mɔɔ tɔ zo bulu la le kelesɔpelase, mɔɔ tɔ zo bulu nee ko la le gyasente, mɔɔ tɔ zo bulu nee nwiɔ la le ametese. 21 Ɛnee nlenkɛ mgbole 12 ne mɔ noko le avikpa 12; bɛvale avikpa ko bɛyɛle anlenkɛ kpole ko biala. Ɛnee suakpole ne awɔdenle ne mɔ le nvutuke tagyee mɔɔ anye le kɛ neanleɛ mɔɔ anu le wienyi la.

22 Meannwu ɛzonlenlɛsua wɔ ɛkɛ, ɔluakɛ Gyihova* Nyamenle, Tumivolɛ Bedevinli ne+ nee Boaneralɛ ne a le ye ɛzonlenlɛsua a. 23 Ɛnee suakpole ne ɛngyia sɛnzɛne anzɛɛ siane ne wienyi ne, ɔluakɛ Nyamenle anyunlunyia ta wɔ ɛkɛ,+ yɛɛ Boaneralɛ ne a le ye kɛnlaneɛ a.+ 24 Na maanle maanle ne mɔ balua ye wienyi ne anu,+ yɛɛ azɛlɛ ye azo arelemgbunli bava bɛ anyunlunyia ara ɛkɛ. 25 Bɛnrɛtoto ye nlenkɛ mgbole ne mɔ anu alehyenlɛ nu ɛlɛ, ɔluakɛ aleɛ ɛnrɛdwo ɛkɛ.+ 26 Na bɛbava maanle maanle ne mɔ anyunlunyia nee bɛ enililɛ bɛara ɛkɛ.+ 27 Noko debie biala mɔɔ anwo ɛnde nee awie biala mɔɔ yɛ debie mɔɔ le kyibadeɛ na ɔle mɛlɛbɛla la ɛnrɛhɔ ɛkɛ;+ bɛdabɛ mɔɔ bɛhɛlɛ bɛ aluma wɔ Boaneralɛ ne ngoane buluku ne anu la angome a bahɔ ɛkɛ a.+

22 Na ɔhilele me ngoane nzule azudenle ne+ mɔɔ ɔ nye te nwohyee kɛ neanleɛ la kɛ ɔvi Nyamenle nee Boaneralɛ ne belemgbunli ebia ne anu ɔlɛse+ 2 yeahɔ suakpole ne awɔdenle kpole ne avinli lɔ. Ngoane mbaka mɔɔ so ma ngakyile 12 la gyigyi azudenle ne anloa nwiɔ ne, bɛso bɛ ma siane biala. Na mbaka ne nya ne mɔ a bɛfa bɛyɛ maanle maanle ne mɔ ayile a.+

3 Na munzule biala ɛnrɛra bieko. Emomu Nyamenle nee Boaneralɛ ne belemgbunli ebia ne+ bagyinla suakpole ne azo, na ye ngɛkɛlɛ bazonle ye;* 4 na bɛbanwu ɔ nyunlu,+ yɛɛ bɛbahɛlɛ ye duma wɔ bɛ nwoma azo.+ 5 Eza aleɛ ɛnrɛdwo bieko,+ na bɛnrɛhyia kɛnlaneɛ anzɛɛ sɛnzɛne ne wienyi ne, ɔluakɛ Gyihova* Nyamenle bada wienyi agua bɛ nwo zo,+ na bɛbali arelemgbunli dahuu.+

6 Ɔzele me kɛ: “Edwɛkɛ ɛhye le zɔ* yɛɛ ɔle nɔhalɛ;+ ɛhɛe, Gyihova,* Nyamenle ne mɔɔ vale ye sunsum ne maanle ngapezoma ne la+ ɛzoa ye anwumabɔvolɛ kɛ ɔye ninyɛne mɔɔ ɔnrɛhyɛ na asisi la ɔhile ye ngɛkɛlɛ. 7 Nea! Melɛba ndɛndɛ.+ Anyelielɛ a le awie biala mɔɔ di ngapezo edwɛkɛ mɔɔ wɔ nwomamobɔleɛ ɛhye anu azo la.”+

8 Medame Dwɔn a mendele na menwunle ninyɛne ɛhye mɔ a. Mekɛ mɔɔ mendele na menwunle ninyɛne ɛhye mɔ la, mendule mendɔle anwumabɔvolɛ ne mɔɔ hilele me ninyɛne ɛhye mɔ la agyakɛ anu kɛ mesonle ye. 9 Noko ɔzele me kɛ: “Nea boɛ! Mmayɛ zɔ! Mele sonvolɛ kɛ ɛdawɔ nee ɛ mediema ngapezoma ne nee bɛdabɛ mɔɔ bɛdi edwɛkɛ mɔɔ wɔ nwomamobɔleɛ ɛhye anu azo la ala. Sonle Nyamenle.”+

10 Eza ɔzele me kɛ: “Mmasɔ ngapezo edwɛkɛ mɔɔ wɔ nwomamobɔleɛ ɛhye anu la anloa, ɔluakɛ mekɛ ne ɛbikye. 11 Mɔɔ le amumuyɛ la ɛhɔ zo ɛyɛ ye amumuyɛ ne, na mɔɔ anwo ɛgua evinli la anwo ɛhɔ zo ɛgua evinli; noko mɔɔ le tenlenenli la ɛhɔ zo ɛyɛ mɔɔ le tenlene la, na mɔɔ le nwuanzanwuanza la ɛhɔ zo ɛyɛ nwuanzanwuanza.

12 “‘Nea! Melɛba ndɛndɛ, na melɛ ahatualɛ wɔ me nwo ɛke mɔɔ mebava meadua awie biala kakɛ kɛ mɔɔ ye gyima de la.+ 13 Mame a mele Alefa nee Omiga* ne a,+ alimoa nee amozi ne, mɔlebɛbo nee awieleɛ ne. 14 Anyelielɛ a le bɛdabɛ mɔɔ bɛkpo bɛ adɛladeɛ ne mɔ la,+ amaa bɛanyia adenle bɛahɔ ngoane mbaka ne mɔ anwo+ na bɛahola bɛalua nlenkɛ mgbole ne mɔ anu bɛahɔ suakpole ne azo.+ 15 Suakpole ne anzi lɔ a ahwea* ne mɔ nee bɛdabɛ mɔɔ bɛyɛ sunsum ɛtane nyɛleɛ nee adwɔmanema* nee ahodiawu nee awie biala mɔɔ kulo adalɛ na ɔbɔ adalɛ la wɔ a.’+

16 “‘Medame Gyisɛse a menzoanle me anwumabɔvolɛ kɛ ɔrali ɛhye mɔ anwo daselɛ ɔhile bɛ ɔmaa asafo ne mɔ a. Mame a mele Devidi ndinli ne nee ɔ ra ne+ nee nwonlomɔ ɛwɔlɔra ne mɔɔ ta la a.’”+

17 Na sunsum ne nee atɔfolɛ ne+ kɔ zo ka kɛ, “Bɛla!” na maa awie biala mɔɔ kɛde la ɛha kɛ, “Bɛla!” na maa mɔɔ nzuhɔne ɛlɛku ye la ɛrɛla;+ maa awie biala mɔɔ kulo la ɛralie ngoane nzule mɔɔ ɔndua ɛhwee a.+

18 “Medi awie biala mɔɔ te nwomamobɔleɛ ɛhye anu ngapezo edwɛkɛ ne la daselɛ kɛ: Saa awie fa debie boka ɛhye mɔ anwo a,+ Nyamenle bava ngyegyelɛ mɔɔ bɛhɛlɛ ye wɔ nwomamobɔleɛ ɛhye anu la aboka ɔ nwo;+ 19 na saa awie ye debie fi nwomamobɔleɛ ɛhye anu ngapezo edwɛkɛ ne anu a, Nyamenle baye ye afoa nu ɛdeɛ mɔɔ wɔ ngoane mbaka ne mɔ+ nee suakpole nwuanzanwuanza ne anu+ mɔɔ bɛhɛlɛ nwolɛ edwɛkɛ wɔ nwomamobɔleɛ ɛhye anu la avi ɛkɛ.

20 “Mɔɔ di ɛhye mɔ anwo daselɛ la se, ‘Ɛhɛe, melɛba ndɛndɛ.’”+

“Amen! Awulae Gyisɛse, bɛla.”

21 Awulae Gyisɛse ɛlolɛ kpole ne ɛha nwuanzanwuanzama ne.