DWƆN MƆƆ LIMOA

1 Mɔɔ ɛnee wɔ ɛkɛ wɔ mɔlebɛbo ne, mɔɔ yɛde, mɔɔ yɛva yɛ nye yɛnwu ye, mɔɔ yɛnlea na yɛva yɛ sa yɛha ye, wɔ ngoane edwɛkɛ ne anwo la,+ 2 (ɛhɛe, bɛlale ngoane ne ali, na yɛnwu ye na yɛlɛdi nwolɛ daselɛ+ na yɛlɛka dahuu ngoane ne+ mɔɔ ɛnee wɔ Selɛ ne anwo ɛkɛ na bɛlale ye ali bɛhilele yɛ la anwo edwɛkɛ yɛahile bɛ), 3 mɔɔ yɛnwu ye nee mɔɔ yɛde la a yɛlɛka yɛahile bɛdabɛ noko a,+ amaa bɛdabɛ noko bɛ nee yɛ ava agɔnwolɛ.* Na yɛ nee Selɛ ne nee ɔ Ra Gyisɛse Kelaese a ɛva agɔnwolɛ ɛhye a.+ 4 Na yɛlɛkɛlɛ ɛhye mɔ amaa yɛ anyelielɛ ne ali munli.

5 Edwɛkɛ mɔɔ yɛdele yɛvile ye ɛkɛ na yɛlɛka yɛahile bɛ la a le ɛhye: Nyamenle le wienyi+ na awozinli biala ɛnle ye nu.* 6 Saa yɛka kɛ, “Yɛ nee ye le agɔnwolɛ,” noko yɛkɔ zo yɛdua awozinli nu a, ɛnee yɛlɛbɔ adalɛ na yɛnli nɔhalɛ.+ 7 Noko, saa yɛlua wienyi nu kɛ mɔɔ ɔdaye mumua ne ɔwɔ wienyi nu la a, ɛnee yɛle agɔnwolɛma, na ɔ Ra Gyisɛse mogya ne te yɛ nwo fi ɛtane muala anwo.+

8 Saa yɛka kɛ, “Ɛtane ɛnle yɛ nwo a,” ɛnee yɛlɛbɛlɛbɛla yɛ nwo+ na nɔhalɛ ne ɛnle yɛ nu. 9 Saa yɛka yɛ ɛtane a, ɔle nɔhavo nee tenlenenli, yemɔti ɔbava yɛ ɛtane yeahyɛ yɛ na yeade yɛ nwo yeavi ninyɛndane muala anwo.+ 10 Saa yɛka kɛ, “Yɛtɛyɛle ɛtane a,” ɛnee yɛlɛmaa yeayɛ adalɛ na ye edwɛkɛ ne ɛnle yɛ nu.

2 Me mra ngakula, melɛkɛlɛ bɛ ɛhye mɔ amaa bɛanyɛ ɛtane. Noko saa awie yɛ ɛtane a, yɛlɛ boavolɛ* wɔ Selɛ ne anwo lɔ, Gyisɛse Kelaese,+ tenlenenli ne.+ 2 Na ɔle yɛ ɛtane nwo mgbɔdalɛ afɔlebɔdeɛ,+ tɛ yɛ ngome, emomu menli mɔɔ wɔ ewiade amuala la noko boka nwo.+ 3 Na ɛhye a maa yɛnwu kɛ yɛze ye a, saa yɛkɔ zo yɛdi ye mɛla ne mɔ azo a. 4 Awie mɔɔ ka kɛ, “Meze ye,” noko ɔnli ye mɛla ne mɔ azo la le adalɛ na nɔhalɛ ne ɛnle ye nu. 5 Emomu awie biala mɔɔ di ye edwɛkɛ ne azo la, yemɔ a le sonla ne mɔɔ Nyamenle ɛlɔlɛ ne di munli wɔ ye nu amgba a.+ Ɛhye a maa yɛnwu kɛ yɛ nee ye le ko a.+ 6 Awie mɔɔ ka kɛ ɔ nee ye le ko la, ɔwɔ kɛ ɔkɔ zo ɔbɔ ye ɛbɛla kɛ mɔɔ Kelaese bɔle ye ɛbɛla la.*+

7 Alɔvolɛ, mengɛlɛ mɛla fofolɛ biala membɛlɛ bɛ, emomu mɛla dɛba ne mɔɔ bɛnyianle ye mɔlebɛbo ne la.+ Mɛla dɛba ɛhye a le edwɛkɛ ne mɔɔ bɛdele la. 8 Bieko, melɛkɛlɛ mɛla fofolɛ mearɛlɛ bɛ mɔɔ le nɔhalɛ wɔ ɔdaye nee bɛdabɛ noko bɛ afoa nu a, ɔluakɛ awozinli ne ɛlɛpɛ nu na nɔhalɛ wienyi ne ɛlɛta dɛbadɛba.+

9 Awie biala mɔɔ ka kɛ ɔwɔ wienyi ne anu noko ɔkpɔ+ ɔ diema la tɛbɔ awozinli ne anu.+ 10 Awie biala mɔɔ kulo ɔ diema la de wienyi ne anu,+ na debie biala ɛnle ye nu mɔɔ tenda awie agyakɛ anu a. 11 Na awie biala mɔɔ kpɔ ɔ diema la de awozinli ne anu yɛɛ ɔlua awozinli ne anu,+ na ɔnze ɛleka mɔɔ ɔlɛkɔ la+ ɔluakɛ awozinli ne ɛzi ɔ nye.

12 Ngakula, melɛkɛlɛ bɛ ɔluakɛ ye duma ne ati bɛva bɛ ɛtane bɛhyɛ bɛ.+ 13 Egya mɔ, melɛkɛlɛ bɛ ɔluakɛ bɛranwu ahenle mɔɔ ɛnee wɔ ɛkɛ ne ɔvi mɔlebɛbo ne la. Mgbavolɛ, melɛkɛlɛ bɛ ɔluakɛ bɛli amumuyɛnli ne anwo zo konim.+ Ngakula, melɛkɛlɛ bɛ ɔluakɛ bɛranwu Selɛ ne.+ 14 Egya mɔ, melɛkɛlɛ bɛ ɔluakɛ bɛranwu ahenle mɔɔ ɛnee wɔ ɛkɛ ne ɔvi mɔlebɛbo ne la. Mgbavolɛ, melɛkɛlɛ bɛ ɔluakɛ bɛ nwo yɛ se+ yɛɛ Nyamenle edwɛkɛ ne de bɛ nu+ na bɛli amumuyɛnli ne anwo zo konim.+

15 Bɛmmakulo ewiade ye anzɛɛ ninyɛne mɔɔ wɔ ewiade ye anu la.+ Saa awie kulo ewiade ye a, Selɛ ne anwo ɛlɔlɛ ɛnle ye nu;+ 16 ɔluakɛ ewiade ye anu debie biala—nwonane nu atiakunluwɔzo+ nee ɛnyelɛzo atiakunluwɔzo+ nee ɛbɛlabɔlɛ nu ninyɛne mɔɔ awie fa tu ɔ nwo* la—ɛnvi Selɛ ne, emomu ɔvi ewiade ye. 17 Bieko, ewiade ne nee ye atiakunluwɔzo ɛlɛpɛ nu,+ noko awie mɔɔ yɛ Nyamenle ɛhulolɛdeɛ la de aze dahuu.+

18 Ngakula, yɛwɔ dɔnehwele ne mɔɔ li awieleɛ la anu na kɛ mɔɔ bɛdele kɛ mɔɔ dwazo tia Kelaese la bara la,+ kɛkala bɔbɔ menli dɔɔnwo mɔɔ dwazo tia Kelaese la ɛra,+ na ɛhye a maa yɛnwu kɛ yɛwɔ dɔnehwele ne mɔɔ li awieleɛ la anu a. 19 Bɛvi yɛ nu a bɛhɔle a, noko ɛnee bɛmboka yɛ nwo;+ ɔboalekɛ saa ɛnee bɛboka yɛ nwo a, anrɛɛ bɛ nee yɛ dɛnlanle. Noko bɛgyakyile yɛ bɛhɔle amaa yeala ali kɛ tɛ awie biala a boka yɛ nwo a.+ 20 Na bɛmɛ, nwuanzanwuanzanli ne ɛkpokpa bɛ,+ na bɛ muala bɛze nɔhalɛ ne. 21 Tɛ kɛ asɛɛ bɛnze nɔhalɛ ne+ la ati a melɛkɛlɛ bɛ a, melɛkɛlɛ bɛ ɔboalekɛ bɛze nɔhalɛ ne, yɛɛ adalɛ biala noko ɛnvi nɔhalɛ ne anu.+

22 Saa tɛ sonla ne mɔɔ ɛnlie ɛndo nu kɛ Gyisɛse a le Kelaese ne la a le adalɛ a, ɛnee nwane ɔ?+ Ɛhye a dwazo tia Kelaese a,+ yemɔ a ɔnlie Selɛ ne nee Ralɛ ne ɔndo nu a. 23 Awie biala mɔɔ ɛnlie Ralɛ ne ɛndo nu la ɛnlie Selɛ ne ɛndo nu.+ Na awie biala mɔɔ die Ralɛ ne to nu la,+ ɛlie Selɛ ne noko ɛdo nu.+ 24 Na bɛmɛ, bɛmaa mɔɔ bɛdele ye mɔlebɛbo ne la ɛdɛnla bɛ nu.+ Saa mɔɔ bɛdele ye mɔlebɛbo ne la tɛnla bɛ nu a, bɛdabɛ noko bɛ nee Ralɛ ne bayɛ ko na bɛ nee Selɛ ne ayɛ ko. 25 Bieko, ɛhye a le debie mɔɔ ɔdaye mumua ne ɔvale ɔbɔle yɛ ɛwɔkɛ a—dahuu ngoane.+

26 Melɛkɛlɛ bɛ ɛhye wɔ bɛdabɛ mɔɔ bɛlɛbɔ mɔdenle kɛ bɛbɛlɛbɛla bɛ la anwo. 27 Na bɛmɛ, ɛkpokpalɛ ne mɔɔ bɛnyianle bɛvile ye ɛkɛ ne la de bɛ nu,+ na ɔngyia kɛ awie kɛhilehile bɛ; emomu ɛkpokpalɛ ne mɔɔ vi ye ɛkɛ ne la ɛlɛkilehile bɛ ninyɛne kɔsɔɔti+ yɛɛ ɔle nɔhalɛ na ɔnle adalɛ. Na kɛ mɔɔ yehilehile bɛ la, bɛ nee ye ɛyɛ ko.+ 28 Ɔti kɛkala, ngakula, bɛ nee ye ɛyɛ ko amaa saa bɛda ye ali a, yɛahola yɛadendɛ mɔɔ yɛnzulo+ na yɛanva nyiane yɛanvi ɔ nyunlu wɔ mekɛ mɔɔ ɔkɛra la. 29 Saa bɛze kɛ ɔle tenlenenli a, ɛnee bɛnwu ye noko kɛ awie biala mɔɔ yɛ debie mɔɔ tenrɛ la , ɔdaye a ɔwole ye a.+

3 Bɛnlea kɛzi Selɛ ne ɛhulo yɛ kpole a,+ kɛ bɛvɛlɛ yɛ Nyamenle amra!+ Na yɛle zɔ noko. Ɛhye ati a ewiade ne ɛnze yɛ la,+ ɔluakɛ ɔnze ye.+ 2 Alɔvolɛ, kɛkala yɛle Nyamenle amra,+ noko kɛzi yɛbayɛ la ɛtɛdale ali.+ Yɛze kɛ mekɛ mɔɔ bɛbala ye ali la yɛbayɛ kɛ ɔdaye la, ɔluakɛ yɛbanwu ye kɛ mɔɔ ɔde ala la. 3 Na awie biala mɔɔ lɛ anyelazo ɛhye wɔ ye nu la maa ɔ nwo te+ kɛ mɔɔ ɔdaye noko ɔ nwo te la.

4 Awie biala mɔɔ kɔ zo yɛ ɛtane la noko to mɛla, ɔti ɛtane le mɛladonlɛ. 5 Bɛze noko kɛ bɛlale ye ali kɛ ɔraye yɛ ɛtane ɔvi ɛkɛ,+ na ɛtane biala ɛnle ye nu. 6 Awie biala mɔɔ nee ye ɛyɛ ko la ɛngɔ zo ɛnyɛ ɛtane;+ awie biala mɔɔ kɔ zo yɛ ɛtane la ɛtɛnwunle ye yɛɛ ɔnze ye. 7 Ngakula, bɛmmamaa awie bɛlɛbɛla bɛ; awie biala mɔɔ yɛ mɔɔ tenrɛ la le tenlenenli, kɛ mɔɔ ɔdaye noko ɔle tenlenenli la. 8 Awie biala mɔɔ kɔ zo yɛ ɛtane la vi Abɔnsam, ɔluakɛ Abɔnsam a ɛyɛ ɛtane ɔvi mɔlebɛbo ne a.*+ Ɛhye ati a bɛlale Nyamenle Ara ne ali a, kɛ ɔbazɛkye Abɔnsam gyima.+

9 Awie biala mɔɔ Nyamenle ɛwo ye la ɛngɔ zo ɛnyɛ ɛtane,+ ɔluakɛ Ye ma* wɔ ye nu, na ɔngɔ zo ɔnyɛ ɛtane ɔluakɛ Nyamenle a ɛwo ye a.+ 10 Nɔhalɛ edwɛkɛ mɔɔ maa Nyamenle amra nee Abɔnsam amra da ali la a le ɛhye: Awie biala mɔɔ ɛngɔ zo ɛnyɛ mɔɔ tenrɛ la ɛnvi Nyamenle, zɔhane ala a awie mɔɔ ɛngulo ɔ diema la noko de a.+ 11 Edwɛkɛ mɔɔ mɔlebɛbo ne ala bɛdele la a le ɛhye, kɛ yɛhulo yɛ nwo ngoko;+ 12 ɔnle kɛ yɛyɛ kɛ Keen mɔɔ vi amumuyɛnli ne na ɔhunle ɔ diema ne la.+ Na duzu ati a ɔhunle ye a? Ɔluakɛ ɛnee ye gyima ɛnle kpalɛ,+ na ɔ diema ne ɛdeɛ le kpalɛ.+

13 Mediema, bɛmmamaa ɔsi bɛ nwo kɛ ewiade ne kpɔ bɛ la.+ 14 Yɛze kɛ yɛvi ewule nu yɛra ngoane nu,+ ɔluakɛ yɛkulo mediema ne mɔ.+ Awie mɔɔ ɛnlɛ ɛlɔlɛ la de ewule nu.+ 15 Awie biala mɔɔ kpɔ ɔ diema la le kodiawu,+ na bɛze kɛ kodiawu* biala ɛnlɛ dahuu ngoane.+ 16 Ɛhye a ɛmaa yɛnwu ɛlɔlɛ a, ɔluakɛ yemɔ a ɔvale ye ngoane* ɔbɔle afɔle ɔmaanle yɛ a,+ na ɔle yɛ gyima kɛ yɛdayɛ noko yɛkɛva yɛ ngoane* yɛkɛbɔ afɔle yɛkɛmaa yɛ mediema.+ 17 Na awie biala mɔɔ lɛ ewiade ye anu ninyɛne na ɔnwu ɔ diema mɔɔ ɛhyia, na ɔ kunlu ɛnyelɛyela ye ɛmmaa ye la, ɛnee kɛzi Nyamenle ɛlɔlɛ ne de ye nu ɛ?+ 18 Ngakula, bɛmmamaa yɛfa yɛ edwɛkɛhanlɛ anzɛɛ yɛ nloa+ mgbane yɛkulo menli, emomu bɛmaa yɛyɛ ye wɔ nyɛleɛ+ nee nɔhalɛ nu.+

19 Ɛhye a bamaa yɛanwu kɛ yɛvi nɔhalɛ ne anu a, na yɛbamaa yɛ ahonle azi pi* wɔ ɔ nyunlu 20 wɔ debie biala mɔɔ yɛ ahonle* kɛbua yɛ fɔlɛ wɔ nu la anwo, ɔluakɛ Nyamenle le kpole tɛla yɛ ahonle yɛɛ ɔze debie biala.+ 21 Alɔvolɛ, saa yɛ ahonle ɛmbua yɛ fɔlɛ a, ɛnee yɛkola yɛtendɛ mɔɔ yɛnzulo wɔ Nyamenle anyunlu;+ 22 na debie biala mɔɔ yɛkɛbiza la yɛnyia yɛfi ye ɛkɛ,+ ɔluakɛ yɛlɛdi ye mɛla zo yɛɛ yɛlɛyɛ mɔɔ sɔ ɔ nye la. 23 Ye mɛla ne ala a le kɛ: yɛnyia diedi wɔ ɔ Ra Gyisɛse Kelaese duma nu+ na yɛhulo yɛ nwo ngoko,+ kɛ mɔɔ mɛla mɔɔ ɔvale ɔmaanle yɛ la kile la. 24 Bieko, awie mɔɔ di ye mɛla zo la nee ye le ko na ɔdaye noko ɔ nee ye le ko.+ Na mɔɔ maa yɛnwu kɛ ɔ nee yɛ le ko la a le sunsum ne mɔɔ ɔvale ɔmaanle yɛ la.+

4 Alɔvolɛ, bɛmmadie sunsum nu edwɛkɛ* kɔsɔɔti bɛdi,+ emomu bɛzɔ sunsum nu edwɛkɛ* ne mɔ bɛnlea saa bɛvi Nyamenle a,+ ɔluakɛ adalɛ ngapezoma dɔɔnwo ɛra ewiade.+

2 Debie mɔɔ kɛmaa bɛkɛnwu kɛ sunsum nu edwɛkɛ ne vi Nyamenle la a le ɛhye: Sunsum nu edwɛkɛ biala mɔɔ die to nu kɛ Gyisɛse Kelaese rale nwonane nu la vi Nyamenle.+ 3 Na sunsum nu edwɛkɛ biala mɔɔ ɛnlie Gyisɛse ɛndo nu la ɛnvi Nyamenle.+ Bieko, ɛhye a le sunsum nu edwɛkɛ ne mɔɔ vi ahenle mɔɔ dwazo tia Kelaese mɔɔ bɛdele kɛ ɔbara+ na kɛkala ɔwɔ ewiade ye anu dɛbadɛba la.+

4 Ngakula, bɛmɛ bɛvi Nyamenle, yɛɛ bɛli bɛ nwo zo konim,+ ɔluakɛ ahenle mɔɔ wɔ bɛ afoa la+ le kpole tɛla ahenle mɔɔ wɔ ewiade ne afoa la.+ 5 Bɛmɛ bɛvi ewiade;+ ɛhye ati a bɛka ewiade ye edwɛkɛ na ewiade ye tie bɛ a.+ 6 Yɛmɛ yɛvi Nyamenle. Awie biala mɔɔ ze Nyamenle la tie yɛ;+ awie biala mɔɔ ɛnvi Nyamenle la ɛndie yɛ.+ Ɛhye a maa yɛnwu sunsum nu edwɛkɛ mɔɔ le nɔhalɛ nee sunsum nu edwɛkɛ mɔɔ le adalɛ a.+

7 Alɔvolɛ, bɛmaa yɛhɔ zo yɛhulo yɛ nwo ngoko,+ ɔluakɛ ɛlɔlɛ vi Nyamenle na awie biala mɔɔ lɛ ɛlɔlɛ la Nyamenle a ɛwo ye a na ɔze Nyamenle.+ 8 Awie biala mɔɔ ɛnlɛ ɛlɔlɛ la ɛnze Nyamenle, ɔluakɛ Nyamenle le ɛlɔlɛ.+ 9 Ɛhye azo a bɛluale bɛlale Nyamenle ɛlɔlɛ ne ali wɔ yɛ nwo a, Nyamenle zoanle ɔ Ra kokye ne+ wɔ ewiade amaa ɔlua ɔ nwo zo yɛanyia ngoane.+ 10 Ɛhye anu a ɛlɔlɛ ne wɔ a, tɛ yɛdayɛ a yɛhulole Nyamenle a, emomu yemɔ a ɔhulole yɛ na ɔzoanle ɔ Ra ne kɛ ɔrabɔ yɛ ɛtane nwo+ mgbɔdalɛ afɔle a.+

11 Alɔvolɛ, saa Nyamenle ɛhulo yɛ zɛhae a, ɛnee ɔle yɛ gyima kɛ yɛdayɛ noko yɛkɛhulo yɛ nwo ngoko.+ 12 Awie biala ɛtɛnwunle Nyamenle ɛlɛ.+ Saa yɛkɔ zo yɛkulo yɛ nwo ngoko a, ɛnee Nyamenle de yɛ nu na ye ɛlɔlɛ ne ɛli munli wɔ yɛ nu.+ 13 Ɛhye a maa yɛnwu kɛ yɛ nee ye le ko na ɔdaye noko ɔ nee yɛ le ko a, ɔboalekɛ yeva ye sunsum ne yemaa yɛ. 14 Bieko, yɛdayɛ mumua ne yɛnwu ye yɛɛ yɛdi nwolɛ daselɛ kɛ Selɛ ne ɛzoa ɔ Ra ne kɛ ewiade ne ngoanedievolɛ.+ 15 Awie biala mɔɔ die Gyisɛse to nu kɛ ɔle Nyamenle Ara la,+ Nyamenle nee ye le ko yɛɛ ɔdaye noko ɔ nee Nyamenle le ko.+ 16 Na yɛranwu ye kɛ Nyamenle kulo yɛ yɛɛ yɛdie yɛdi.+

Nyamenle le ɛlɔlɛ,+ na awie mɔɔ de ɛlɔlɛ nu la nee Nyamenle le ko yɛɛ Nyamenle nee ye le ko.+ 17 Wɔ adenle ɛhye azo bɛmaa ɛlɔlɛ ɛli munli wɔ yɛ nu, amaa yɛahola yɛadendɛ mɔɔ yɛnzulo*+ wɔ ndɛnebualɛ kenle ne, ɔboalekɛ kɛ mɔɔ ɔdaye ɔde la, zɔhane ala a yɛdayɛ noko yɛle wɔ ewiade ye anu a. 18 Ɛzulolɛ biala ɛnle ɛlɔlɛ nu,+ noko ɛlɔlɛ mɔɔ di munli la tu* ɛzulolɛ, ɔluakɛ ɛzulolɛ twe yɛ sia. Nɔhalɛ nu, mɔɔ ɛzulolɛ ɛha ye la ɛtɛdile munli wɔ ɛlɔlɛ nu.+ 19 Yɛda ɛlɔlɛ ali, ɔluakɛ ɔlimoale ɔhulole yɛ.+

20 Saa awie ka kɛ, “Mekulo Nyamenle,” na ɔkpɔ ɔ diema a, ɛnee ɔle adalɛ.+ Ɔluakɛ awie mɔɔ ɛngulo ɔ diema+ mɔɔ ɔnwu ye la ɛnrɛhola ɛnrɛhulo Nyamenle mɔɔ ɔnnwu ye la.+ 21 Na ɛhye a le mɛla mɔɔ yeva yemaa yɛ a, kɛ awie biala mɔɔ kulo Nyamenle la ɔwɔ kɛ kulo ɔ diema noko.+

5 Awie biala mɔɔ die di kɛ Gyisɛse a le Kelaese ne la, Nyamenle a ɛwo ye a,+ na awie biala mɔɔ kulo ahenle mɔɔ wole ye la kulo ɔ ra ne noko. 2 Debie mɔɔ maa yɛnwu kɛ yɛkulo Nyamenle amra la+ a le kɛ yɛkɛhulo Nyamenle na yɛkɛli ye mɛla zo. 3 Na ɛhye a Nyamenle anwo ɛlɔlɛ kile a, kɛ yɛkɛli ye mɛla ne mɔ azo;+ yɛɛ ye mɛla ne mɔ ɛnle adesoa,+ 4 ɔluakɛ awie biala* mɔɔ Nyamenle ɛwo ye la di ewiade ne anwo zo konim.+ Na mɔɔ ɛli ewiade ne anwo zo konim la a le yɛ diedi.+

5 Nwane a kola di ewiade ne anwo zo konim a?+ Asoo tɛ awie mɔɔ die di kɛ Gyisɛse le Nyamenle Ara la ɔ?+ 6 Ɛhye a le ahenle mɔɔ luale nzule nee mogya zo rale la, Gyisɛse Kelaese, tɛ nzule angome,+ emomu ɔluale nzule nee mogya zo.+ Na sunsum ne a di daselɛ a,+ ɔluakɛ sunsum ne a le nɔhalɛ ne. 7 Na ninyɛne nsa a di daselɛ a: 8 sunsum ne+ nee nzule ne+ yɛɛ mogya ne;+ na bɛmɛ nsa bɛdi daselɛ ko.

9 Saa yɛdie menli daselɛlilɛ yɛto nu a, ɛnee Nyamenle daselɛlilɛ le kpole tɛla yemɔ. Ɔluakɛ daselɛ mɔɔ Nyamenle ɛli la ɛne, daselɛ mɔɔ yeli ye wɔ ɔ Ra ne anwo la. 10 Mɔɔ die Nyamenle Ara ne di la lɛ daselɛlilɛ ne wɔ ye nu. Mɔɔ ɛnlie Nyamenle ɛnli la ɛmaa yeyɛ adalɛ,+ ɔluakɛ yeanlie daselɛ mɔɔ Nyamenle ɛli wɔ ɔ Ra ne anwo la yeanli. 11 Na daselɛlilɛ ne a le ɛhye, Nyamenle ɛmaa yɛ dahuu ngoane,+ na ngoane ɛhye wɔ ɔ Ra ne anu.+ 12 Mɔɔ die Ralɛ ne to nu la lɛ ngoane ɛhye; mɔɔ ɛnlie Nyamenle Ara ne ɛndo nu la ɛnlɛ ngoane ɛhye.+

13 Melɛkɛlɛ ɛhye mearɛlɛ bɛ amaa bɛdabɛ mɔɔ bɛdie Nyamenle Ara ne duma bɛdi la+ anwu kɛ bɛlɛ dahuu ngoane.+ 14 Na anwodozo* mɔɔ yɛlɛ wɔ ye nu la+ a le kɛ, debie biala mɔɔ yɛkɛbiza ye wɔ ye ɛhulolɛ zo la, ɔtie yɛ.+ 15 Na saa yɛze kɛ yɛbiza ye debie biala a ɔtie yɛ a, ɛnee yɛze kɛ yɛ sa baha mɔɔ yɛbiza la, ɔluakɛ yɛbiza yɛvi ye ɛkɛ.+

16 Saa awie nwu kɛ ɔ diema ɛlɛyɛ ɛtane mɔɔ ɛngɔnwie ewule nu a, ɔzɛlɛ ɔmaa ye na Nyamenle bamaa ye ngoane,+ ɛhɛe, bɛdabɛ mɔɔ bɛlɛyɛ ɛtane mɔɔ ɛngɔnwie ewule nu la. Ɛtane bie wɔ ɛkɛ mɔɔ ɔwie ewule.+ Menga ye kɛ ɔzɛlɛ ɛtane ɛhye anwo. 17 Nyɛleɛ biala mɔɔ ɛndenrɛ la le ɛtane,+ noko ɛtane bie wɔ ɛkɛ mɔɔ ɛngɔnwie ewule nu.

18 Yɛze kɛ awie biala mɔɔ Nyamenle ɛwo ye la ɛngɔ zo ɛnyɛ ɛtane, emomu ahenle mɔɔ Nyamenle ɛwo ye la* sinza ye na amumuyɛnli ne ɛngola ɛnzɔ ye nu.*+ 19 Yɛze kɛ yɛvi Nyamenle, noko ewiade ye amuala wɔ amumuyɛnli ne tumi bo.+ 20 Na yɛze kɛ Nyamenle Ara ne ɛra,+ na yemaa yɛnyia nwunu* amaa yɛanyia nɔhavo ne anwo ndelebɛbo. Na ɔlua ɔ Ra Gyisɛse Kelaese anwo zo yɛ nee nɔhavo ne ɛyɛ ko.+ Ɛhye a le nɔhalɛ Nyamenle ne nee dahuu ngoane ne a.+ 21 Ngakula, bɛnlea bɛ nwo boɛ wɔ awozonle ɛzonlenlɛ* nwo.+