PITA MƆƆ TƆ ZO NWIƆ

1 Saemɔn Pita, Gyisɛse Kelaese akɛlɛ nee ɛzoanvolɛ, ɛlɛkɛlɛ ahɔmaa bɛdabɛ mɔɔ ɔlua yɛ Nyamenle nee yɛ Ngoanedievolɛ Gyisɛse Kelaese tenleneyɛlɛ ti bɛnyia diedi mɔɔ sonle bolɛ kɛ yɛ ɛdeɛ ne* la:

2 Ɛlolɛ kpole nee anzodwolɛ molozo ɛlua Nyamenle nee yɛ Awulae Gyisɛse anwo nɔhalɛ ndelebɛbo zo ɛha bɛ,+ 3 ɔluakɛ Nyamenle ɛlua ye tumi ne azo yemaa yɛnyia debie biala mɔɔ yɛhyia* na yɛava nyamenlezonlenlɛ kpalɛ yɛabɔ yɛ ɛbɛla, ɔlua Ahenle mɔɔ luale ye anyunlunyia nee ɛbɛla kpalɛ zo vɛlɛle yɛ+ la anwo nɔhalɛ ndelebɛbo zo. 4 Yelua ɛhye mɔ azo yemaa yɛ ɛwɔkɛ mgbole mɔɔ sonle bolɛ,*+ na mekɛ mɔɔ bɛnriandi bɛvi ewiade ɛkpɔlɔlɛ mɔɔ atiakunluwɔzo ɛtane* fa ba la anwo la, bɛalua ɛhye mɔ azo bɛanyia Nyamenle subane ne mɔ bie.+

5 Ɛhye ati, bɛbɔ mɔdenle biala+ bɛva ɛbɛla kpalɛ bɛboka bɛ diedi ne anwo,+ na bɛva ndelebɛbo bɛboka bɛ ɛbɛla kpalɛ nwo,+ 6 bɛva bɛnwozohomonlɛ bɛboka bɛ ndelebɛbo nwo,+ bɛva kpundiigyinlanlɛ bɛboka bɛnwozohomonlɛ nwo, bɛva nyamenlezonlenlɛ kpalɛ bɛboka bɛ kpundiigyinlanlɛ nwo,+ 7 bɛva mediema ɛlɔlɛ bɛboka bɛ nyamenlezonlenlɛ kpalɛ nwo, na bɛva menli nwo ɛlɔlɛ bɛboka bɛ mediema ɛlɔlɛ nwo.+ 8 Na saa ɛhye mɔ amuala wɔ bɛ nu na bɛnyia ye molozo a, ɔnrɛmaa bɛnrɛdɛnla ɛkɛ ne mgbane anzɛɛ bɛnrɛyɛ menli mɔɔ ɛnzo ma*+ la wɔ yɛ Awulae Gyisɛse Kelaese anwo nɔhalɛ ndelebɛbo nu.

9 Na awie biala mɔɔ ɛhye mɔ ɛnle ye nu la anye ɛzi, ɔngola ɔnnwu wienyi ne,*+ na ɔ rɛle ɛvi kɛ bɛde ɔ nwo bɛvi ye ɛtane mɔɔ ɔyɛle ye dɛba ne la anwo.+ 10 Yemɔti, mediema, bɛbɔ mɔdenle biala bɛmaa bɛ ɛvɛlɛlɛ+ nee bɛ ɛkpalɛ ne ɛli munli, na saa bɛkɔ zo bɛyɛ ye zɔhane a, bɛnrɛdɔ aze ɛlɛ.+ 11 Nɔhalɛ nu, ɛhye a bamaa bɛanyia adenle* bɛahɔ yɛ Awulae nee yɛ Ngoanedievolɛ Gyisɛse Kelaese+ dahuu Belemgbunlililɛ ne anu a.+

12 Zɔhane ati meyɛ me adwenle kɛ dahuu mebahakyehakye bɛ ninyɛne ɛhye mɔ, noko bɛze ninyɛne ɛhye mɔ yɛɛ bɛgyi nɔhalɛ ne mɔɔ wɔ bɛ nu la anu kpundii. 13 Noko mekɛ ala mɔɔ mewɔ ɛdanlɛsua* ɛhye anu la,+ menwu kɛ ɔle kpalɛ kɛ mekakyehakye bɛ,+ 14 na meze kɛ ɔnrɛhyɛ bɛbaye me ɛdanlɛsua ne kɛ mɔɔ yɛ Awulae Gyisɛse Kelaese noko lale ye ali hilele me la.+ 15 Mebabɔ mɔdenle mekɛ biala amaa saa mekɔ a, bɛdabɛ mumua ne bɛahola bɛahakye* ninyɛne ɛhye mɔ.

16 Tɛ adalɛ edwɛkɛ mɔɔ bɛhyehyɛ la azo a yɛluale yɛmaanle bɛnwunle yɛ Awulae Gyisɛse Kelaese tumi ne nee ye ɛralɛ ne a, emomu yɛdayɛ mumua ne yɛvale yɛ nye yɛnwunle ye anyunlunyia ne.+ 17 Na ɔnyianle enililɛ nee anyunlunyia ɔvile Nyamenle Selɛ ne ɛkɛ wɔ mekɛ mɔɔ anyunlunyia bedevinli ne hanle edwɛkɛ zɛhae hilele ye la: “Ɛhye a le me Ra mɔɔ mekulo ye, na melie ye medo nu a.”+ 18 Edwɛkɛ ɛhye a yɛdele yɛvile anwuma wɔ mekɛ mɔɔ ɛnee yɛ nee ye wɔ boka nwuanzanwuanza ne azo la.

19 Yemɔti bɛzi ngapezo edwɛkɛ ne pi kpalɛ bɛmaa yɛ, na ɔle kpalɛ kɛ bɛmaa bɛ nye ɛhɔ nwo kɛ kɛnlaneɛ+ mɔɔ ɛlɛta wɔ awozinli nu (kɔkpula kɛ aleɛ kɛhye na alehyenlɛ ɛwɔlɔra ne+ kɛvinde) wɔ bɛ ahonle nu la. 20 Mɔɔ limoa la, bɛze kɛ Ngɛlɛlera ne anu ngapezo biala ɛnvi sonla adwenle nu. 21 Ɔluakɛ ngapezo anlua sonla ɛhulolɛ zo amba ɛlɛ,+ emomu sunsum nwuanzanwuanza ne a hanle* menli maanle bɛhanle mɔɔ vi Nyamenle ɛkɛ ne la a.+

2 Noko, adalɛ ngapezoma vindele menli ne avinli kɛ mɔɔ adalɛ kilehilevolɛma noko bavinde bɛ avinli la.+ Ɛhye mɔ bawua bɛ nwo ava eku mɔɔ sɛkye adwenle la ara, na bɛbakpo menlenlɛ ne mɔɔ dɔle bɛ bɔbɔ la,+ na bɛahwe ɛzɛkyelɛ bɛamaa bɛ nwo ndɛndɛ. 2 Bieko, menli dɔɔnwo bali bɛ anyiemgba ɛbɛla* nzi,+ na bɛdabɛ ti bɛbaha nɔhalɛ adenle ne anwo edwɛkɛ ɛtane.+ 3 Eza anyebolo ti, bɛbava mɛlɛbɛla edwɛkɛ bɛasisi bɛ. Noko bɛ ndɛnebualɛ mɔɔ wɔ ɛkɛ ne dɛbadɛba la+ ɛnrɛhyɛ na ara, na bɛbazɛkye bɛ.+

4 Na Nyamenle anva angyɛ anwumabɔvolɛma mɔɔ yɛle ɛtane la,+ emomu ɔvuandinle bɛ ɔguale Tatalɛse,*+ na bɛgua bɛ kyeenyi* wɔ awozinli kabii nu kɛ bɛhendɛ ndɛnebualɛ.+ 5 Yɛɛ yeanva yeangyɛ tete ewiade ne,+ emomu ɔliele Nowa, tenleneyɛlɛ nwo edwɛkpakavolɛ+ nee menli nsuu+ ngoane wɔ mekɛ mɔɔ ɔvale azuyilɛ ɔzɛkyele ɛtanevolɛma ewiade ne la.+ 6 Na ɔbuale Sodɔm nee Gomɔla fɔlɛ wɔ mekɛ mɔɔ ɔmaanle bɛ azua ne mɔ dɔle nzonle+ ɔvale ɔhilele ɛtanevolɛma mɔɔ bara la.+ 7 Na ɔliele tenlenenli Lɔɔto,+ mɔɔ mɛladonlɛma ne anyiemgba ɛbɛla* ne gyegyele ye kpole la— 8 ɔluakɛ mɔɔ zɔhane tenlenenli ne nwunle ye na ɔdele wɔ mekɛ mɔɔ ɔde menli ne avinli alehyenlɛ biala la yɛle ye tenlene ɛkɛla* ne abodelɛ ɔlua bɛ ninyɛndane ti. 9 Zɔhane ati, Gyihova* ze kɛzi ɔdie menli mɔɔ sonle ye la ɔfi sɔnea nu+ na ɔfa ɛtanevolɛma ɔsie ɔmaa ɛzɛkyelɛ* wɔ ndɛnebualɛ kenle a,+ 10 titili bɛdabɛ mɔɔ bɛbɔ mɔdenle bɛgua awie mɔ anwo evinli+ na bɛmbu tumililɛ la.+

Bɛsi bɛ kɛnra bɛmemaa bɛ nwo zo, bɛnzulo kɛ bɛbadendɛ bɛatia anyunlunyiama, 11 noko anwumabɔvolɛma mɔɔ bɛlɛ anwosesebɛ nee tumi kpole bɛtɛla bɛ bɔbɔ la ɛnva tendɛtia ɛndo bɛ ɛzonle, ɔluakɛ bɛbu Gyihova.*+ 12 Noko menli ɛhye mɔ mɔɔ bɛle kɛ nane mɔɔ bɛnlɛ adwenle na bɛwo bɛ kɛ bɛhye bɛ na bɛzɛkye bɛ la, tendɛ ɛtane tia debie biala mɔɔ bɛnze la.+ Bɛ adenle ɛtane ne bava bɛ ahɔ ɛzɛkyelɛ nu, 13 amumuyɛ mɔɔ bɛyɛ la ati, bɛbadua bɛ nwolɛ kakɛ.

Bɛ anyelielɛ ala a le atiakunluwɔzo mɔɔ bɛdi ɔ nzi+ ewia henlema la. Bɛ nwo le ngehanleɛ nee dɛne na bɛ nye die nwo* kɛ bɛbava adalɛ ngilehilelɛ bɛabɛlɛbɛla bɛ wɔ mekɛ mɔɔ bɛ nee bɛ ɛlɛbɔ nu ali aleɛ la.+ 14 Agyalɛzɛkyelɛ gyi bɛ nye zo+ na bɛngola bɛndwe bɛ nwo bɛnvi ɛtane nwo, yɛɛ bɛbɛlɛbɛla menli* mɔɔ ɛnzi pi la. Bɛtete bɛ ahonle wɔ anyebolo nu. Bɛle munzule ngakula. 15 Bɛkpo adenle fɔɔnwo ne na bɛminli. Bɛva Biyɔ ara Beelam+ mɔɔ ɔhulole ɛtane nwo ahatualɛ la adenle zo,+ 16 noko bɛhwile ɔ nyunlu wɔ ye mɛladonlɛ ne anwo.+ Nane mɔɔ ɛndendɛ bɔbɔ la vale sonla ɛnelɛ zile ngapezonli ne ɛlanebɔlɛ ne adenle.+

17 Ɛhye mɔ le nzubula mɔɔ ɛsesa nee nzulemungu mɔɔ ahumu bɔ ye kɔ la, na awozinli kabii wɔ ɛkɛ ne maa bɛ.+ 18 Bɛka edwɛkɛ mgbole mɔɔ nrɛlɛbɛ ɛnle nu la. Na bɛdua nwonane nu atiakunluwɔzo+ nee anyiemgba ɛbɛla* zo bɛbɛlɛbɛla menli mɔɔ ɛnriandi ɛvi bɛdabɛ mɔɔ bɛyɛ ɛtane anwo la.+ 19 Bɛfa fanwodi bɛbɔ ɛwɔkɛ noko bɛdabɛ mumua ne bɛle ɛkpɔlɔlɛ ngɛkɛlɛ;+ ɔluakɛ saa awie di ɔ gɔnwo anwo zo konim a ɔfa ye ɔyɛ akɛlɛ.*+ 20 Nɔhalɛ nu, saa ɔlua Awulae nee Ngoanedievolɛ Gyisɛse Kelaese anwo nɔhalɛ ndelebɛbo zo bɛnriandi bɛfi ewiade ye evinli nwo,+ na bɛsia bɛkɔyɛ ninyɛne ɛhye mɔ bieko na ɔfo bɛ nwo zo a, bɛ awieleɛ sɛkye tɛla alimoa ne.+ 21 Ɔle kpalɛ kɛ anrɛɛ bɛannwu tenleneyɛlɛ adenle ne tɛla kɛ bɛkɛnwu ye na nzinlii bɛkɛhwe bɛ nwo bɛkɛvi mɛla nwuanzanwuanza ne mɔɔ bɛva bɛmaa bɛ la anwo.+ 22 Bɛmaa ɛrɛlɛ ɛhye ɛyɛ nɔhalɛ kɛ: “Twea ne ɛzia ɛhɔ ye ɛveleɛ ne anwo yɛɛ kpolike ne mɔɔ bɛbia ye la ɛzia ɛhɔboto ndɛtɛlɛ.”+

3 Alɔvolɛ, ɛhye a le me kɛlata mɔɔ tɔ zo nwiɔ mɔɔ melɛkɛlɛ bɛ a, na kɛ mɔɔ menganle ye wɔ alimoa ɛdeɛ ne anu la, mekakyehakye bɛ adwenle amaa nuhua ala ɛkɛ ne wienyi,+ 2 na bɛahakye edwɛkɛ mɔɔ ngapezoma nwuanzanwuanza ne mɔ ɛha ɛdo ɛkɛ ne yɛɛ mɛla ne mɔɔ Awulae nee Ngoanedievolɛ ne ɛlua bɛ ɛzoanvolɛma ne anwo zo ɛva ɛmaa bɛ la. 3 Mɔɔ limoa la, bɛnwu ɛhye kɛ mekɛ mɔɔ li awieleɛ la anu agolobɛnwoma mɔɔ di bɛ atiakunluwɔzo nzi la bara na bɛagolo bɛ nwo+ 4 bɛaha kɛ: “Ye ɛralɛ ne mɔɔ ɔbɔle nwolɛ ɛwɔkɛ la wɔ nienwu?+ Nea, ɔvi kenle mɔɔ yɛ nenyia mɔ lale wɔ ewule nu la, kɛ debie biala de, ɔvi abɔdeɛ mɔlebɛbo la a ɔde a.”+

5 Na bɛ nye fuu bɛbu bɛ nye bɛgua nɔhalɛ edwɛkɛ ɛhye azo kɛ, tete ne ɛnee anwuma wɔ ɛkɛ na ɔlua Nyamenle edwɛkɛ zo azɛlɛ mɔɔ gyi ye kpundii la vi nzule nu rale na ɛnee nzule ɛbɔ ye ɛyia;+ 6 na ɔlua zo a nzule yile zɛkyele ewiade ne mɔɔ ɛnee wɔ ɛkɛ ne wɔ zɔhane mekɛ ne la.+ 7 Na ɔlua edwɛkɛ ko ne ala azo, bɛva anwuma nee azɛlɛ ne mɔɔ wɔ ɛkɛ ne la bɛzie ɛkɛ bɛmaa senle na bɛlɛfa bɛahendɛ ndɛnebualɛ kenle ne nee amumuyɛma ɛzɛkyelɛ ne.+

8 Noko alɔvolɛ, bɛmmamaa bɛ rɛle fi ɛhye kɛ kenle ko le Gyihova* anye zo ɛvolɛ apenle ko, yɛɛ ɛvolɛ apenle ko le ɔ nye zo kenle ko.+ 9 Gyihova* ɛngyɛ ye ɛwɔkɛ nwo+ kɛ mɔɔ bie mɔ bu ye kɛ ɔkyɛ la, emomu ɔlɛ bɛ nwo abotane ɔluakɛ ɔngulo kɛ bɛsɛkye awie biala, emomu ɔkulo kɛ menli kɔsɔɔti nu bɛ nwo.+ 10 Na Gyihova* kenle ne+ bara kɛ awule la,+ nuhua a anwuma bava ɛnelɛ kpole apɛ nu a,+ na ninyɛne mɔɔ ɛlɔ katukatu la baholo, na azɛlɛ ne nee nuhua gyima bala ali.+

11 Kɛmɔ ninyɛne ɛhye mɔ amuala baholo wɔ adenle zɛhae azo la ati, bɛdwenle menli holɛ ko mɔɔ ɔwɔ kɛ bɛyɛ wɔ ɛbɛlabɔlɛ nwuanzanwuanza nee nyamenlezonlenlɛ kpalɛ nu la anwo, 12 wɔ mekɛ mɔɔ bɛlɛkendɛ na bɛamaa Gyihova* kenle ne ɛralɛ adɛnla bɛ adwenle nu kpalɛ la,*+ nuhua a bɛbazɛkye anwuma+ wɔ sendɔlɔra nu na ye wuluwulu kpole ne aholo nuhua ninyɛne ne mɔ a! 13 Na kɛ mɔɔ ye ɛwɔkɛ ne kile la, yɛlɛkendɛ anwuma fofolɛ nee azɛlɛ fofolɛ,+ na ɛhye mɔ anu a tenleneyɛlɛ badɛnla a.+

14 Ɛhye ati alɔvolɛ, kɛmɔ bɛlɛkendɛ ninyɛne ɛhye mɔ la ati, bɛbɔ mɔdenle kɛ awieleɛ bɔkɔɔ ne ɔbanwu bɛ kɛ ngehanleɛ nee dɛne biala ɛnle bɛ nwo na bɛde anzodwolɛ nu.+ 15 Bieko, bɛbu yɛ Awulae abotane ne kɛ ngoanelielɛ kɛ mɔɔ yɛ diema kulovolɛ Pɔɔlo noko luale nrɛlɛbɛ ne mɔɔ bɛva bɛmaa ye la azo hɛlɛle bɛ la,+ 16 ɔhanle ɛhye mɔ anwo edwɛkɛ kɛ mɔɔ ɔyɛ ye wɔ ye ngɛlata ne mɔ amuala anu la. Noko ninyɛne bie mɔ mɔɔ bɛ bo ɛdelɛ yɛ se la wɔ nu, na bɛdabɛ mɔɔ bɛtɛkilehilele bɛ na bɛnzi pi la kyibehyiba ninyɛne ɛhye mɔ, kɛ mɔɔ bɛyɛ Ngɛlɛlera ne mɔɔ ɛha la bɛfa bɛsɛkye bɛ nwo la.

17 Zɔhane ati, bɛmɛ alɔvolɛ, kɛmɔ bɛze ɛhye dɛba la ati, bɛnlea boɛ na mɛladonlɛma anlua bɛ nvonleɛ zo ambɛlɛbɛla bɛ na mekɛ mɔɔ bɛgyi ye kpundii* la bɛandɔ aze.+ 18 Kyɛkyɛ, emomu bɛhɔ zolɛ bɛnyi wɔ yɛ Awulae nee Ngoanedievolɛ Gyisɛse Kelaese ɛlolɛ kpole nee ɔ nwo ndelebɛbo nu. Yemɔ a anyunlunyia ɛha ye ɛnɛ nee dahuu a. Amen.