MƆƆ TƆ ZO NWIƆ KƆMAA TIMOTE

1 Medame Pɔɔlo, mɔɔ ɔlua Nyamenle ɛhulolɛ zo meyɛ Kelaese Gyisɛse ɛzoanvolɛ kɛ mɔɔ ngoane ne mɔɔ ɔlua Kelaese Gyisɛse anwo zo anwo ɛwɔkɛ ne de la,+ 2 melɛkɛlɛ meahɔmaa me ra kulovolɛ Timote:+

Nyamenle Selɛ ne nee yɛ Awulae Kelaese Gyisɛse ɛlo wɔ, bɛze wɔ anwunvɔne na bɛmaa wɔ anzodwolɛ.

3 Meyɛ Nyamenle mɔɔ mefa adwenle* mɔɔ anu te mesonle ye* kɛ mɔɔ me nenyia mɔ yɛle la mo kɛ me rɛle ɛnvi wɔ wɔ me modolɛ nu alehyenlɛ nee aledwolɛ la. 4 Saa mekakye wɔ ɛzunlɛ ne a, ɛnee me nwo ɛlɛdɔ wɔ kɛ mekɛnwu wɔ amaa me nye alie kpole. 5 Ɔluakɛ mekakye wɔ diedi ne mɔɔ nabalaba ɛnle nu,+ mɔɔ alimoa ne ɔwɔ wɔ nana Loyese nee wɔ mame Yunise anu la, na melɛ anwodozo kɛ ɔwɔ ɛdawɔ noko wɔ nu.

6 Ɛhye ati mekakye wɔ kɛ maa Nyamenle ahyɛlɛdeɛ ne mɔɔ menvale me sa menguale ɛ nwo zo mɔɔ ɛnyianle la ɛhɔ zo ɛzɔ kɛ senle.+ 7 Ɔluakɛ Nyamenle ammaa yɛ sunsum mɔɔ maa yɛyɛ foanvoanle la,+ emomu sunsum mɔɔ maa yɛnyia tumi+ nee ɛlɔlɛ nee adwenle mɔɔ anu te la. 8 Yemɔti mmase Awulae anwo daselɛlilɛ ne+ nee medame mɔɔ ɔdaye ti meyɛ pilizanli la anwo nyiane, emomu, ɛdawɔ noko dua Nyamenle tumi ne azo nwu edwɛkpa ne anwo amaneɛ ne bie.+ 9 Ɔliele yɛ na ɔvɛlɛle yɛ kɛ yɛrayɛ nwuanzanwuanzama,*+ tɛ yɛ gyima ti ɔ, emomu ɔdaye ye bodane nee ye ɛlolɛ ti ɔ.+ Ɔluale Kelaese Gyisɛse anwo zo ɔvale ɛhye ɔmaanle yɛ ɔvi tete, 10 noko kɛkala bɛlua yɛ Ngoanedievolɛ Kelaese Gyisɛse+ mɔɔ bɛla ye ali la anwo zo bɛmaa yela ali wienyi, yemɔ a yeye ewule yevi ɛkɛ+ na yelua edwɛkpa ne azo+ yela ngoane+ nee sonlabaka mɔɔ ɛmkpɔlɔ la ali yehile yɛ a,+ 11 na ɛhye ati a bɛkpale me edwɛkpakavolɛ nee ɛzoanvolɛ yɛɛ kilehilevolɛ a.+

12 Ɛhye noko ati a melɛnwu amaneɛ ɛhye a,+ noko ɔnyɛ me nyiane.+ Ɔluakɛ meze Ahenle mɔɔ melie ye meli la na melɛ anwodozo kɛ ɔbahola yeabɔ mɔɔ meva mewula ɔ sa nu la anwo bane kɔkpula kenle zɔhane.+ 13 Kɔ zo sɔ edwɛkɛ kpalɛ*+ nwo ngyinlazo* ne mɔɔ ɛdele ɛvile me ɛkɛ la anu, na kɔ zo da diedi nee ɛlɔlɛ ali kɛ awie mɔɔ nee Kelaese Gyisɛse lua la. 14 Dua sunsum nwuanzanwuanza ne mɔɔ wɔ yɛ nu la moalɛ zo nea debie kpalɛ ɛhye mɔɔ bɛva bɛwula ɛ sa nu la azo boɛ.+

15 Ɛze kɛ menli mɔɔ wɔ Ehyea+ maanzinli ne anu la kɔsɔɔti ɛhwe bɛ nwo ɛvi me nwo, Fegyɛlɛse nee Hɛmɔgyɛnize boka nwo. 16 Awulae ɛze Onɛsefɔlɛse+ sua nu amra anwunvɔne, ɔluakɛ ɛnee ɔta ɔmaa me anwosesebɛ na yeanyɛ ye nyiane kɛ mela efiade la. 17 Emomu, mɔɔ ɔrale Wulomu la, ɔbɔle mɔdenle ɔkpondɛle me na ɔnwunle me. 18 Awulae ɛmaa Gyihova* ɛze ye anwunvɔne wɔ kenle zɔhane. Ɛdawɔ ɛze ninyɛne dɔɔnwo mɔɔ ɔyɛle ɔmaanle me wɔ Ɛfɛsɛse la.

2 Yemɔti, me ra,+ kɔ zo nyia tumi wɔ ɛlolɛ kpole ne mɔɔ wɔ Kelaese Gyisɛse anu la anu; 2 na mɔɔ ɛdele ɛvile me ɛkɛ mɔɔ menli dɔɔnwo ɛli nwolɛ daselɛ la,+ fa ɛhye mɔ wula mrenyia nɔhavoma asa anu, amaa bɛdabɛ noko bɛafɛta bɔkɔɔ kɛ bɛkɛhilehile awie mɔ. 3 Kɛmɔ ɛle Kelaese Gyisɛse sogyanli kpalɛ la+ ati, ɛdawɔ noko nwu amaneɛ ne bie.+ 4 Awie biala mɔɔ ɛlɛyɛ sogya gyima la ɛnva ɔ nwo ɛnwulowula ɛbɛlabɔlɛ ɛhye anu gualilɛ nu* amaa yeazɔ ahenle mɔɔ vale ye kɛ sogyanli la anye. 5 Nwɔhoalilɛ nu bɔbɔ, awie mɔɔ kɛva ɔ nwo kɛwula nu la, bɛmmaa ye abotile kyesɛ ɔdi nwɔhoa ne kɛ mɔɔ nwolɛ mɛla ne mɔ kile la.+ 6 Ɔwɔ kɛ ɛyazonlɛnli mɔɔ yɛ gyima ɛsesebɛ la a dimoa di ye ɛya nu ma ne bie a. 7 Dwenle mɔɔ melɛka la anwo dahuu; Awulae bamaa wɔade ninyɛne kɔsɔɔti abo.*

8 Kakye kɛ bɛdwazole Gyisɛse Kelaese bɛvile mowuamra anu,+ na ɛnee ɔle Devidi ara+ kɛ mɔɔ edwɛkpa ne mɔɔ mebɔ ye nolo la kile la,+ 9 yemɔ anwo a melɛnwu amaneɛ na mela efiade kɛ ɛtanevolɛ la.+ Noko bɛnkyekye Nyamenle edwɛkɛ ne.+ 10 Ɛhye ati mekɔ zo megyinla kpundii wɔ debie biala anu ɔlua bɛdabɛ mɔɔ bɛkpa bɛ la ati,+ amaa bɛdabɛ noko ɔlua Kelaese Gyisɛse anwo zo bɛanyia ngoanelielɛ nee dahuu anyunlunyia. 11 Edwɛkɛ ɛhye le nɔhalɛ: Saa yɛ nee ye wule amgba a, ɛnee yɛ nee ye badɛnla ngoane nu;+ 12 saa yɛkɔ zo yɛgyinla kpundii a, yɛ nee ye bali belemgbunli;+ saa yɛkpo ye a, ɔdaye noko ɔbakpo yɛ;+ 13 saa yɛnli nɔhalɛ a, yemɔ ɔdi nɔhalɛ, ɔluakɛ ɔngola ɔmkpo ɔ nwo.

14 Kɔ zo kakye bɛ ɛhye mɔ, na kilehile bɛ* wɔ Nyamenle anyunlu kɛ bɛmmadi edwɛkɛ agbɔkɛ nwo butule, ɔle debie mɔɔ nvasoɛ biala ɛnle zo ɔluakɛ ɔsɛkye* menli mɔɔ tie la adwenle. 15 Bɔ mɔdenle ɛsesebɛ fa ɛ nwo maa Nyamenle kɛ awie mɔɔ fɛta, gyimayɛvolɛ mɔɔ ɛnze ɛhwee nwo nyiane, na ɔfa nɔhalɛ edwɛkɛ ne ɔdi gyima kpalɛ la.+ 16 Na kpo edwɛkɛ mgbane mgbane mɔɔ tia debie nwuanzanwuanza la,+ ɔluakɛ bɛkɔwie ninyɛndane dɔɔnwo anu, 17 na bɛ edwɛkɛ ne badɛlɛ kɛ hanlɛ mɔɔ ɛdidi nwonane ne abo la. Haemɛneeyɛse nee Faelitɛse boka bɛ nwo.+ 18 Menli ɛhye mɔ ɛhwe bɛ nwo ɛvi nɔhalɛ ne anwo, ɔluakɛ bɛka kɛ ewudwazo ne ɛra dɛbadɛba,+ na bɛlɛsɛkye bie mɔ diedi. 19 Noko Nyamenle adiabo ne gyi kpundii, na bɛhɛlɛ nwolɛ kɛ, “Gyihova* ze bɛdabɛ mɔɔ bɛle ye ɛdeɛ la,”+ yɛɛ, “Bɛmaa awie biala mɔɔ bɔ Gyihova* duma la+ ɛhwe ɔ nwo ɛvi ninyɛndane nwo.”

20 Wɔ sua kpole biala anu, tɛ mbuakɛ mɔɔ bɛvale nvutuke anzɛɛ dwɛtɛ fufule ngome bɛyɛle la a wɔ nu a, emomu baka nee ndɛtɛlɛ ɛdeɛ noko wɔ nu, na bɛfa bie mɔ bɛyɛ ninyɛne mɔɔ enililɛ wɔ nu la yɛɛ bɛfa bie mɔ noko bɛyɛ ninyɛne mɔɔ enililɛ ɛnle nu la. 21 Ɔti saa awie twe ɔ nwo fi mɔɔ enililɛ ɛnle nu la anwo a, ɔbayɛ debie* mɔɔ bɛfa bɛdi gyima mɔɔ enililɛ wɔ nu, mɔɔ bɛde nwo, nwolɛ ɛra nvasoɛ ɛmaa ɔ menle, na bɛziezie ye bɛmaa gyima kpalɛ biala la. 22 Yemɔti nriandi mgbavolɛ nu atiakunluwɔzo, na ɛ nee bɛdabɛ mɔɔ bɛfa ahonle mɔɔ anu te bɛfɛlɛ Awulae la ɛli tenleneyɛlɛ, diedi, ɛlɔlɛ nee anzodwolɛ nzi.

23 Eza kpo ngoaseasɛm nee edwɛkɛ mgbane mgbane nwo kpolerazulɛ,+ ɔluakɛ ɛze kɛ ɔfa konle ɔba. 24 Ɔluakɛ ɔnle kɛ Awulae akɛlɛ ko, ɔwɔ kɛ ɔyɛ bɛtɛɛ* ɔmaa menli kɔsɔɔti,+ ɔkola ɔkilehile, na ɔkomo ɔ nwo zo wɔ mekɛ mɔɔ bɛkɛyɛ ye ɛtane la,+ 25 ɔfa bɛtɛɛyɛlɛ ɔkilehile atuadelɛma.+ Bie a Nyamenle bamaa bɛanlu bɛ nwo* amaa bɛanyia nɔhalɛ ne anwo nɔhalɛ ndelebɛbo,+ 26 amaa bɛ nye ara bɛ nwo zo na bɛanriandi bɛavi Abɔnsam ɛhane ne anu, ɔluakɛ yehye bɛ wɔ nu kɛ bɛyɛ ye ɛhulolɛdeɛ.+

3 Noko nwu ɛhye kɛ, wɔ mekɛ mɔɔ li awieleɛ la anu,+ mekɛ mɔɔ anu yɛ se la bara. 2 Ɔluakɛ menli bahulo bɛ ngome bɛ nwo,* bɛbahulo ezukoa, bɛbayɛ adubɛnwo, anwomemaazo, bɛbaha munzule edwɛkɛ, bɛbayɛ awovolɛ nwo anzosesebɛ, boniayɛma, bɛnrɛli nɔhalɛ, 3 menli mɔɔ ɛnlɛ sonla nwo ɛlɔlɛ, menli mɔɔ bɛ nee bɛ ɛnyɛ ngyehyɛleɛ, dumasɛkyevoma, menli mɔɔ ɛngomo bɛ nwo zo, menli mɔɔ anwo yɛ ɛzulolɛ, menli mɔɔ ɛngulo kpalɛyɛlɛ, 4 menli mɔɔ ye awie mɔ maa, menli mɔɔ le tufoande, menli mɔɔ tu bɛ nloa anu, menli mɔɔ kulo anyelielɛ na bɛngulo Nyamenle, 5 bɛyɛ bɛ nwo kɛ bɛzɔ nyamenlezonlenlɛ nu noko bɛnva nuhua tumi ne bɛmbɔ bɛ ɛbɛla;+ twe ɛ nwo fi menli zɛhae mɔ anwo. 6 Bɛ nuhua bie mɔ dua nrɛlɛbɛ adenle zo wolowolo azua nu bɛlɛbɛla menli na bɛfa mraalɛ mɔɔ bɛle bɛtɛɛ mɔɔ bɛ ɛtane ɛyɛ adesoa ɛmaa bɛ na atiakunluwɔzo ngakyile twehwe bɛ la bɛyɛ ngɛkɛlɛ, 7 bɛsukoa debie dahuu noko bɛnnyia nɔhalɛ ne anwo nɔhalɛ ndelebɛbo ɛlɛ.

8 Na kɛ mɔɔ Gyaneze nee Gyambilize dwazole tiale Mosisi la, zɔhane ala a menli ɛhye mɔ kɔ zo dwazo tia nɔhalɛ ne a. Menli ɛhye mɔ adwenle ɛzɛkye bɔkɔɔ, bɛmbu bɛ kɛ bɛli diedi ne anzi. 9 Noko bɛnrɛnyia anyuhɔlɛ biala, ɔluakɛ bɛ ngoaseade ne bala ali wɔ menli kɔsɔɔti anyunlu kɛ mrenyia nwiɔ zɔhane la.+ 10 Noko wɔmɔ wɔli me ngilehilelɛ, me ɛbɛlabɔlɛ+ nee me bodane ne anzi pɛpɛɛpɛ, na wɔnwu me diedi, me abotane, me ɛlɔlɛ, me kpundiigyinlanlɛ ne, 11 kpɔdekpɔdeyɛlɛ nee amaneɛnwunlɛ mɔɔ le kɛ mɔɔ menwunle ye wɔ Anteɔko,+ Ayekoneɛm,+ Lesetela+ la amuala. Mengyinlanle kpɔdekpɔdeyɛlɛ ɛhye mɔ anloa na Awulae liele me vile ɔ muala anu.+ 12 Nɔhalɛ nu, bɛdabɛ mɔɔ bɛkulo kɛ bɛfa nyamenlezonlenlɛ kpalɛ bɛbɔ bɛ ɛbɛla kɛ Kelaese Gyisɛse ɛdoavolɛma la amuala, bɛbayɛ bɛdabɛ noko kpɔdekpɔde.+ 13 Na amumuyɛma nee adalɛma bahɔ bɛ nyunlu wɔ ɛtaneyɛlɛ nu, bɛbabɛlɛbɛla menli na awie mɔ noko abɛlɛbɛla bɛdabɛ.+

14 Noko wɔmɔ, kɔ zo di ninyɛne mɔɔ wɔzukoa na wɔlie wɔli kɛ ɔle nɔhalɛ la anzi,+ ɔluakɛ ɛze menli mɔɔ ɛzukoale ɛvile bɛ ɛkɛ ne la 15 yɛɛ sumunli wɔ ngakula nu,+ ɛze ngɛlɛlera nwuanzanwuanza ne+ mɔɔ kola maa ɛnwu nrɛlɛbɛ na ɛdua Kelaese Gyisɛse anu diedi zo ɛnyia ngoane la.+ 16 Ngɛlɛlera ne amuala vi Nyamenle sunsum nu,+ na ɔle kpalɛ ɔmaa ngilehilelɛ,+ bɛ nyunlu ɛhwilɛ, ninyɛne ɛdenrɛdenrɛlɛ,* menli ɛtetelɛ wɔ tenleneyɛlɛ nu,+ 17 amaa Nyamenle sonla ne afɛta bɔkɔɔ, mɔɔ bɛziezie ye bɛmaa gyima kpalɛ biala a.

4 Meka meahile wɔ wɔ Nyamenle nee Kelaese Gyisɛse, ahenle mɔɔ babua anyewɔzoamra nee mowuamra+ ndɛne,+ ɔlua ɔ nwo mɔɔ ɔbala ye ali+ nee ye Belemgbunlililɛ ne azo la anyunlu kɛ:+ 2 Ka edwɛkɛ ne;+ yele ɛ nwo yɛ ye ndɛndɛ wɔ mekɛ kpalɛ nee mekɛ mɔɔ anu yɛ se la anu, twi bɛ nyunlu,+ bɔ bɛ kɔkɔ ɛsesebɛ, tu bɛ folɛ, wɔ abotane nee ngilehilelɛ kpalɛ muala anu.+ 3 Ɔluakɛ mekɛ bie bara mɔɔ bɛnrɛdie ngilehilelɛ kpalɛ ne* a,+ emomu bɛbali bɛdabɛ bɛ atiakunluwɔzo nzi, na bɛaboɔboa kilehilevolɛma anloa bɛamaa bɛ nwo bɛamaa bɛahoto bɛ nzo nu.*+ 4 Bɛbagyakyi nɔhalɛ ne ɛdielɛ na bɛahɔdie adalɛ edwɛkɛ. 5 Noko wɔmɔ, maa ɛ nye ɛla ɛkɛ wɔ debie biala anu, gyinla ngyegyelɛ nloa,+ yɛ edwɛkpakavolɛ gyima ne,* yɛ wɔ ɛzonlenlɛ gyima ne kpalɛ.+

6 Na mame, bɛlɛwola me bɛagua kɛ nza mɔɔ bɛfa bɛabɔ afɔle la dɛbadɛba,+ yɛɛ mekɛ mɔɔ mefa meahɔ la*+ ɛbikye. 7 Meho konle kpalɛ ne,+ mezu ɛnriandilɛ ne mewie,+ mezɔ diedi ne anu. 8 Ɔvi mekɛ ɛhye mɔɔ kɔ la, mɔɔ wɔ ɛkɛ maa me la a le tenleneyɛlɛ abotile ne+ mɔɔ Awulae mɔɔ bua ndɛne fɔɔnwo+ bava amaa me kɛ ahatualɛ wɔ kenle zɔhane la,+ noko tɛ me ngome ɔ, emomu bɛdabɛ mɔɔ bɛkulo ɔ nwo mɔɔ ɔbala ye ali la amuala noko.

9 Bɔ mɔdenle bɛla me nwo ɛke ndɛndɛ. 10 Ɔluakɛ Dimase+ ɛhulo ewiade ɛhye* la ati, yekpo me na yehɔ Tɛsalonaeka, Kelɛsɛnze ɛhɔ Galeehyea, Taetɛse ɛhɔ Dalemeehyea. 11 Yeha Luku angomekye ala wɔ me nwo ɛke. Ɛ nee Maake ɛrɛla, ɔluakɛ ɔboa me wɔ ɛzonlenlɛ gyima ne anu. 12 Na mezoa Tekekɛse+ wɔ Ɛfɛsɛse. 13 Saa ɛlɛba a, fa ɛyɛlɛ tɛladeɛ ne mɔɔ mengyakyile ye wɔ Kaapɛse anwo ɛkɛ ne wɔ Tulowase la bɛla, yɛɛ nwomamobɔleɛ ne mɔ, titili nane nwoma mbuluku mralɛ ne mɔ.

14 Alɛzanda mɔɔ le kɔbele dwinvolɛ la yɛle me ɛtane kpole. Gyihova* badua ye kakɛ wɔ ye nyɛleɛ ne anwo.+ 15 Ɛdawɔ noko nea ɛ nwo boɛ wɔ ɔ nwo ɔluakɛ ɔdwazo ɔtia yɛ edwɛkɛ ne kpole kpalɛ.

16 Mekɛ mɔɔ limoa mɔɔ mekaye me nloa la, awie biala angyinla me nzi, bɛ muala bɛkpole me—mesɛlɛ kɛ Nyamenle ɛva ɛhyɛ bɛ. 17 Noko Awulae gyinlanle me nzi na ɔmaanle me tumi, amaa ɔlua me nwo zo bɛabɔ edwɛkpa ne nolo bɔkɔɔ na maanle maanle ne amuala ade;+ na bɛliele me bɛvile awenade ne anloa anu.+ 18 Awulae balie me avi munzule biala anu na yealie me ngoane yeahɔ ye anwuma Belemgbunlililɛ ne anu.+ Anyunlunyia ɛha ye dahuu. Amen.

19 Mebiza Peleseka nee Akoyela+ nee Onɛsefɔlɛse sua nu amra.+

20 Yilasetɛse+ hale Kɔlente, yɛɛ mengyakyile Tulofemɛse+ wɔ Maelitɛse ɔluakɛ ɛnee ɔnde kpɔkɛ. 21 Bɔ mɔdenle bɛla kolaa na fɔsɛlɛ ne ara.

Yubulɛse biza wɔ, ɔ nee Pudɛnse nee Laenɛse nee Kolɔdea yɛɛ mediema ne mɔ amuala.

22 Awulae nee sunsum ne mɔɔ ɛda ye ali la ɛdɛnla. Ye ɛlolɛ kpole ne ɛha bɛ.