MƆƆ LIMOA KƆMAA TIMOTE

1 Medame Pɔɔlo, mɔɔ yɛ Ngoanedievolɛ Nyamenle ne nee Kelaese Gyisɛse yɛ anyelazo ne, ɛmaa meyɛ Kelaese Gyisɛse ɛzoanvolɛ la,+ 2 melɛkɛlɛ meahɔmaa Timote,*+ me ra kpalɛ+ wɔ diedi ne anu:

Nyamenle Selɛ ne nee yɛ Awulae Kelaese Gyisɛse ɛlo wɔ kpole, bɛze wɔ anwunvɔne na bɛmaa wɔ anzodwolɛ.

3 Kɛ mɔɔ menganle kɛ ɛdɛnla Ɛfɛsɛse wɔ mekɛ mɔɔ melɛkɔ Masidonea la, zɔhane ala a meka meahile wɔ kɛkala a, amaa wɔaha wɔahile bie mɔ kɛ bɛmmakilehile ngilehilelɛ fofolɛ, 4 yɛɛ bɛmmatie adalɛ edwɛkɛ+ nee mbusua nu ɛhilehilelɛ. Ɛhye mɔ ɛnva debie kpalɛ biala ɛmba,+ emomu ɔmaa bɛka edwɛkɛ mɔɔ bɛngola bɛngile nu la na tɛ kɛ bɛkɛnyia debie bɛkɛvi Nyamenle ɛkɛ mɔɔ maa menli diedi nu yɛ se la. 5 Nɔhalɛ nu, bodane mɔɔ adehilelɛ* ɛhye gyi zo la a le ɛlɔlɛ+ mɔɔ vi ahonle mɔɔ anu te la nee adwenle* kpalɛ yɛɛ diedi+ mɔɔ nabalaba ɛnle nu la anu. 6 Bie mɔ ɛhwe bɛ nwo ɛvi ninyɛne ɛhye mɔ anwo na bɛhɔli edwɛkɛ mɔɔ anwo ɛngyia la anzi.+ 7 Bɛkulo kɛ bɛyɛ mɛla kilehilevolɛma,+ noko bɛnde edwɛkɛ mɔɔ bɛka anzɛɛ bɛgyi zo kyengye la abo.

8 Yɛze kɛ Mɛla ne le kpalɛ, saa awie di zo kɛ mɔɔ ɔfɛta la a, 9 noko ɔwɔ kɛ ɔnwu kɛ, tɛ tenlenenli ti a bɛdi mɛla a, emomu bɛdi bɛmaa mɛladonlɛma+ nee atuadelɛma, anzosesebɛma nee ɛtanevolɛma, bɛdabɛ mɔɔ bɛnli nɔhalɛ* nee bɛdabɛ mɔɔ bɛmbu debie mɔɔ le nwuanzanwuanza, menli mɔɔ ku bɛ papa mɔ nee bɛ mame mɔ, ahodiawu, 10 adwɔmanema,* mrenyia mɔɔ fa bɛ gɔnwo mɔ mrenyia,* bɛdabɛ mɔɔ bɛkye menli bɛsie, adalɛma, menli mɔɔ ka ndane adalɛ, yɛɛ debie biala mɔɔ tia ngilehilelɛ kpalɛ ne*+ 11 kɛ mɔɔ anyelielɛ Nyamenle ne anyunlunyia edwɛkpa ne mɔɔ bɛva bɛwula me sa nu de la.+

12 Meyɛ yɛ Awulae Kelaese Gyisɛse mɔɔ maanle me anwosesebɛ la mo, ɔluakɛ yebu me nɔhavo na yeva me yewula ɛzonlenlɛ gyima bie anu,+ 13 dɛba ne ɛnee meka munzule edwɛkɛ, meyɛ menli kpɔdekpɔde yɛɛ membu debie ɛdeɛ.+ Noko bɛzele me anwunvɔne ɔluakɛ ɛnee menze yɛɛ ɛnee menlɛ diedi la ati a menyɛle a. 14 Noko yɛ Awulae lole me kpole bole zo na menyianle diedi nee ɛlɔlɛ menvile Kelaese Gyisɛse ɛkɛ. 15 Ɛhye le nɔhalɛ edwɛkɛ bɔkɔɔ mɔɔ ɔfɛta kɛ bɛdie bɛto nu a: Kelaese Gyisɛse rale ewiade ye anu kɛ ɔbalie ɛtanevolɛma ngoane.+ Medame a melimoa wɔ menli ɛhye mɔ anu a.+ 16 Noko bɛzele me anwunvɔne amaa Kelaese Gyisɛse alua medame mɔɔ melimoa la anwo zo ala ye abotane ne kɔsɔɔti ali, na yeamaa meayɛ neazo meamaa bɛdabɛ mɔɔ bɛbalie ye bɛali na bɛanyia dahuu ngoane la.+

17 Enililɛ nee anyunlunyia ɛha dahuu Belemgbunli ne+ mɔɔ ɛmkpɔlɔ,+ mɔɔ bɛnnwu ye,+ Nyamenle kokye ne+ dahuu. Amen.

18 Me ra Timote, mefa adehilelɛ* ɛhye meawula ɛ sa nu, kɛ mɔɔ ngapezo ne mɔ mɔɔ fale ɛ nwo de la, amaa wɔalua ɛhye mɔ azo wɔaho konle kpalɛ ne,+ 19 na kɔ zo sɔ diedi nee adwenle kpalɛ+ mɔɔ bie mɔ ɛva ɛzie ahane na bɛ diedi ɛdɔ nzule nu kɛ meli mɔɔ ɛnloma la anu. 20 Bɛ nuhua bie mɔ a le Haemɛneeyɛse+ nee Alɛzanda, na meva bɛ memaa Seetan+ amaa bɛadea bɛ na bɛanga munzule edwɛkɛ.

2 Mɔɔ limoa la, akee metu bɛ muala folɛ kɛ bɛva modolɛ, asɔneyɛlɛ, nzɛlɛlɛ mɔɔ bɛyɛ bɛmaa awie mɔ nee moyɛlɛ bɛzɛlɛ bɛmaa menli ngakyile kɔsɔɔti, 2 arelemgbunli nee tumivolɛma amuala,+ amaa yɛava koonwuyɛlɛ nee anzodwolɛ yɛabɔ yɛ ɛbɛla wɔ nyamenlezonlenlɛ kpalɛ nee mɔdenlebɔlɛ kɔsɔɔti anu.+ 3 Ɛhye le kpalɛ na ɔsɔ Nyamenle, yɛ Ngoanedievolɛ ne anye,+ 4 yemɔ a ɔkulo kɛ ɔdie menli ngakyile kɔsɔɔti+ na bɛnyia nɔhalɛ ne anwo nɔhalɛ ndelebɛbo a. 5 Ɔluakɛ Nyamenle kokye a wɔ ɛkɛ a,+ yɛɛ Nyamenle nee menli+ avinligyinlavolɛ ko,+ nrenyia bie, yemɔ a le Kelaese Gyisɛse,+ 6 mɔɔ vale ɔ nwo maanle kɛ ɛkpɔnedeɛ mɔɔ fɛta la ɔmaanle menli kɔsɔɔti la+—ɛhye a bɛbali nwolɛ daselɛ wɔ ye mekɛ nloa a. 7 Daselɛlilɛ+ ɛhye ati a bɛkpale me edwɛkpakavolɛ nee ɛzoanvolɛ a+—melɛka nɔhalɛ, membɔ adalɛ—mele maanle maanle kilehilevolɛ+ wɔ diedi nee nɔhalɛ ne anwo.

8 Yemɔti, mekulo kɛ mrenyia yɛ asɔne wɔ ɛleka biala, na bɛfa nɔhalɛlilɛ bɛmaa bɛ sa zo+ mɔɔ ɛya+ nee kpolerazulɛ biala ɛnle nu a.+ 9 Zɔhane ala noko a ɔwɔ kɛ mraalɛ fa mɛlɛbɛnwoaze nee adwenle mɔɔ anu la ɛkɛ la* wula adɛladeɛ mɔɔ fɛta a,* tɛ enrinli ɛyɛlɛ ngakyile nee nvutuke anzɛɛ avikpa anzɛɛ adɛladeɛ mɔɔ ye awolɛ yɛ se la anu,+ 10 emomu wɔ adenle mɔɔ le kpalɛ maa mraalɛ mɔɔ bɛkile kɛ bɛsonle Nyamenle la azo,+ kile kɛ, ɔlua gyima kpalɛ ɛyɛlɛ zo.

11 Raalɛ ɛyɛ koonwu* ɛbɛlɛ ɔ nwo aze bɔkɔɔ ɛzukoa debie.+ 12 Memmaa raalɛ adenle kɛ ɔhilehile anzɛɛ ɔnyia nrenyia nwo zo tumi, emomu ɔyɛ koonwu.*+ 13 Ɔluakɛ bɛlimoale bɛbɔle Adam kolaa na bɛabɔ Yive.+ 14 Bieko, tɛ Adam a bɛbɛlɛbɛlale ye a, emomu raalɛ ne a bɛbɛlɛbɛlale ye bɔkɔɔ+ bɛmaanle ɔdonle mɛla a. 15 Noko, saa ɔkɔ zo ɔtɛnla* diedi nee ɛlɔlɛ nee anwodelɛ nee adwenle mɔɔ anu te la anu* a, ɔlua mralɛ ɛwolɛ zo bɛbabɔ ɔ nwo bane.+

3 Ɛhye le nɔhalɛ edwɛkɛ: Saa awie kpondɛ kɛ ɔyɛ neavolɛ a,+ ɛnee ɔkulo gyima kpalɛ. 2 Ɔti ɔwɔ kɛ neavolɛ yɛ awie mɔɔ edwɛkɛ ɛnle ɔ nwo, ɔ ye kokye, ɔ nye gyi ɔ ti anwo, ye adwenle nu la ɛkɛ,*+ ɔyɛ ye ninyɛne pɛpɛɛpɛ, ɔdie nyɛvolɛ,+ ɔkola ɔkilehile,+ 3 ɔnle nzanli,+ ɔnle basabasa,* emomu ɔte edwɛkɛ bo,+ ɔngulo butule,+ ɔ nye ɛmbolo ezukoa,+ 4 ɔle awie mɔɔ nea ye sua nu amra kpalɛ, ɔ mra fa enililɛ bɛlɛ bɛ nwo aze maa ye+ 5 (na saa awie ɛngola ɛnnea ye sua nu amra kpalɛ a, kɛ ɔkɛyɛ na yeahola yeanlea Nyamenle asafo ne azo ɛ?), 6 ɔnle kɛ ɔyɛ diedinli fofolɛ,*+ anrɛɛ ɔkɛmemaa ɔ nwo zo na bɛkɛbua ye ndɛne kɛ mɔɔ bɛbua Abɔnsam la. 7 Bieko, ɔwɔ kɛ menli mɔɔ ɛnle asafo ne anu la ka ɔ nwo edwɛkɛ kpalɛ+ amaa menli angua ɔ nyunlu aze* na yeandɔ Abɔnsam ɛhane nu.

8 Zɔhane ala a ɔwɔ kɛ asafo nu azonvolɛ anye ka aze a, bɛ nloa ɛnle nwiɔ nwiɔ,* bɛnva bɛ nwo bɛnwula nwanye dɔɔnwo ɛnlonlɛ nu, bɛnlua anyebolo adenle zo bɛnnyia bɛ nwo,+ 9 na bɛfa adwenle mɔɔ anu te la bɛsɔ diedi ne anwo fealeranu edwɛkɛ nwuanzanwuanza ne anu.+

10 Bieko, bɛlimoa bɛzɔ menli zɛhae mɔ bɛnlea kɛ bɛfɛta; na saa edwɛkɛ ɛnle bɛ nwo a bɛamaa bɛazonle kɛ azonvolɛ.+

11 Zɔhane ala a ɔwɔ kɛ mraalɛ noko yɛ menli mɔɔ anye gyi bɛ ti anwo a, bɛnzɛkye menli duma,+ bɛ nye ka aze, bɛdi nɔhalɛ wɔ debie biala anu.+

12 Ɔwɔ kɛ asafo nu sonvolɛ aye yɛ kokye, ɔnea ɔ mra nee ye sua nu amra kpalɛ. 13 Bɛdabɛ mɔɔ bɛyɛ bɛ gyima kpalɛ la ɛlɛnyia duma kpalɛ amaa bɛ nwo yɛɛ bɛkola bɛka bɛ diedi mɔɔ wɔ Kelaese Gyisɛse anu la anwo edwɛkɛ mɔɔ bɛnzulo.

14 Melɛkɛlɛ ɛhye mearɛlɛ wɔ, noko me nye la kɛ ɔnrɛhyɛ mebara ɛ nwo lɔ, 15 na saa mekyɛ a, wɔanwu kɛzi ɔwɔ kɛ ɛbɔ wɔ ɛbɛla wɔ Nyamenle sua nu,+ mɔɔ le tease Nyamenle ne asafo ne, nɔhalɛ ne pila nee ye adiabo la. 16 Nɔhalɛ nu, nyamenlezonlenlɛ kpalɛ nwo fealeranu edwɛkɛ nwuanzanwuanza ɛhye le kpole amgba: ‘Bɛlale ye ali wɔ nwonane nu,+ bɛbule ye tenlenenli wɔ sunsum nu,+ ɔyele ɔ nwo ɔhilele anwumabɔvolɛma,+ bɛhanle ɔ nwo edwɛkɛ wɔ maanle maanle ne anu,+ ewiade amra liele ye lile,+ bɛliele ye anwuma wɔ anyunlunyia nu.’

4 Noko edwɛkɛ ne mɔɔ vi sunsum nu la* ka ye wienyi kɛ mekɛ bie bara mɔɔ bie mɔ bahwe bɛ nwo avi diedi ne anwo na bɛahɔdie adalɛ edwɛkɛ mɔɔ vi sunsum nu* la+ nee sunsum ɛtane ngilehilelɛ, 2 na ɛhye lua adalɛ mɔɔ nabalabama,+ menli mɔɔ bɛ adwenle ɛwu kɛ asɛɛ bɛva bulalɛ mɔɔ ɛdɔlɔ woonwu bɛwula nu la bɔ la azo. 3 Bɛtua agyalɛ+ yɛɛ bɛka bɛkile menli kɛ bɛmmadi aleɛ+ mɔɔ Nyamenle ɛbɔ kɛ bɛdabɛ mɔɔ bɛlɛ diedi na bɛnwu nɔhalɛ ne wienyi la ɛva moyɛlɛ ɛli la.+ 4 Nyamenle abɔdeɛ muala le kpalɛ,+ na saa bɛfa moyɛlɛ bɛdie a ɔnle kɛ bɛkpo debie biala,+ 5 ɔluakɛ bɛfa Nyamenle edwɛkɛ ne nee asɔneyɛlɛ bɛte nwolɛ.

6 Saa ɛfa folɛdulɛ ɛhye ɛmaa mediema ne mɔ a, ɛbayɛ Kelaese Gyisɛse sonvolɛ kpalɛ mɔɔ bɛva diedi ne anwo edwɛkɛ ne nee ngilehilelɛ kpalɛ ne mɔɔ ɛli ɔ nzi pɛpɛɛpɛ la bɛtete wɔ a.+ 7 Kpo adalɛ edwɛkɛ mɔɔ ɛbulɛ ɛnle nu+ mɔɔ mraalɛ mgbanyinli ka bie la. Noko fa nyamenlezonlenlɛ kpalɛ tete ɛ nwo kɛ wɔ bodane. 8 Na agbɔkɛ nu ɛkpundilɛ zo nvasoɛ le ekyi, noko nyamenlezonlenlɛ kpalɛ zo lɛ nvasoɛ wɔ ninyɛne kɔsɔɔti anu, ɔluakɛ ɔlɛ ngoane ɛhye nee ngoane ne mɔɔ bara la anwo ɛwɔkɛ.+ 9 Ɛhye le nɔhalɛ edwɛkɛ mɔɔ ɔwɔ kɛ bɛdie bɛto nu bɔkɔɔ a. 10 Ɛhye ati a yɛyɛ gyima ɛsesebɛ na yɛyele yɛ nwo a,+ ɔluakɛ yɛva yɛ nye yɛdo tease Nyamenle ne anwo zo, yemɔ a ɔle menli ngakyile kɔsɔɔti+ bɛ Ngoanedievolɛ a,+ titili nɔhavoma ne.

11 Kɔ zo fa adehilelɛ ɛhye mɔ maa na kilehile bɛ. 12 Mmamaa awie biala bu wɔ kakula fa ɛ nyunlu kyikyi aze. Emomu yɛ neazo maa nɔhavoma ne wɔ ɛdendɛlɛ nu, ɛbɛlabɔlɛ nu, ɛlɔlɛ nu, diedi nu nee anwodelɛ nu. 13 Maa ɛ nye ɛbolo bagua nu ɛgengalɛ,+ folɛdulɛ* nee ngilehilelɛ nwo kɔkpula kɛ mekɛra. 14 Mmabu ɛ nye ɛgua ahyɛlɛdeɛ ne mɔɔ wɔ wɔ nu la azo, mɔɔ bɛluale ngapezo zo bɛvale bɛmaanle wɔ wɔ mekɛ mɔɔ mgbanyima eku ne vale bɛ sa guale ɛ nwo zo la.+ 15 Dwenledwenle ɛhye mɔ anwo; tu ɛ nwo maa bɛ bɔkɔɔ, amaa menli kɔsɔɔti anwu wɔ anyuhɔlɛ ne wienyi. 16 Nea ɛ nwo nee wɔ ngilehilelɛ ne boɛ dahuu.+ Kɔ zolɛ yɛ ɛhye mɔ, ɔluakɛ saa ɛyɛ ye zɔhane a, ɛbalie ɛ nwo nee bɛdabɛ mɔɔ bɛtie wɔ la ngoane.+

5 Mmatwi kpanyinli nyunlu.+ Emomu tendɛ kile ye kɛ selɛ, mgbavolɛ kɛ mediema mrenyia, 2 mraalɛ mgbanyinli kɛ mame mɔ, mbɛlɛra kɛ mediema mraalɛ, wɔ anwodelɛ muala anu.

3 Di ahunlanvolɛ mɔɔ le ahunlanvolɛ* amgba la eni.+ 4 Na saa kunlavolɛ bie lɛ mralɛ anzɛɛ nlɔnra a, ɛhye mɔ ɛlimoa ɛzukoa nyamenlezonlenlɛ kpalɛ wɔ bɛ azua nu+ na bɛdua bɛ awovolɛ nee bɛ nana mɔ kakɛ mɔɔ ɔfɛta bɛ la,+ ɔluakɛ ɛhye sɔ Nyamenle anye.+ 5 Raalɛ mɔɔ le kunlavolɛ amgba na ɔnlɛ ɛhwee la fa ɔ nye to Nyamenle anwo zo+ na ɔkɔ zo ɔbodo ɔyɛ asɔne alehyenlɛ nee aledwolɛ.+ 6 Na mɔɔ fa ɔ nwo maa nwonane ne atiakunluwɔzo la de aze ɛdeɛ, noko yewu. 7 Ɔti kɔ zo fa adehilelɛ* ɛhye mɔ maa, amaa awie annyia edwɛkɛ biala anga wɔ bɛ nwo. 8 Nɔhalɛ nu, saa awie ɛnnea ɔdaye ye menli, titili ye sua nu amra a, ɛnee yekpo diedi ne na ɔle ɛtanevolɛ ɔtɛla sonla mɔɔ ɛnlɛ diedi la.+

9 Mmakɛlɛ kunlavolɛ biala duma ɛboka nwo kyesɛ yeli ɛvolɛ 60 nee ɔ nzi, yɛɛ ɛnee ɔ hu le kokye ala, 10 yelie duma wɔ gyima kpalɛ nwo,+ ɔtetele ngakula,+ ɔliele nyɛvolɛ,+ ɔwowole nwuanzanwuanzama agyakɛ anwo,+ ɔboale menli mɔɔ wɔ anwongyelelɛ nu la,+ na ɔdule ɔ nwo ɔmaanle gyima kpalɛ biala ɛyɛlɛ.

11 Noko, mmakɛlɛ ahunlanvolɛ mbɛlɛra aluma ɛboka nwo, ɔluakɛ saa bɛ nla nwo atiakunluwɔzo ne bayɛ ngyegyelɛ wɔ bɛ nee Kelaese avinli a, ɛnee bɛkulo kɛ bɛkɔ agyalɛ. 12 Na bɛbanyia ndɛnebualɛ ɔluakɛ bɛkpo bɛ alimoa diedi* ne. 13 Mekɛ ko ne ala bɛsɛkye bɛ mekɛ, bɛduolua azua nu; tɛ kɛ bɛsɛkye bɛ mekɛ ala, eza bɛka awie mɔ anwo edwɛkɛ, bɛfa bɛ nloa bɛwulowula awie mɔ edwɛkɛ nu+ na bɛkeha edwɛkɛ mɔɔ ɔnle kɛ bɛka la. 14 Yemɔti mekulo kɛ ahunlanvolɛ mbɛlɛra ne mɔ kɔ agyalɛ,+ bɛwo mralɛ,+ bɛnea sua nu, amaa dwazotiama annyia adenle anga edwɛkɛ ɛtane antia yɛ. 15 Nɔhalɛ nu, bie mɔ ɛhwe bɛ nwo ɛhɔli Seetan anzi dɛbadɛba. 16 Saa diedinli raalɛ bie lɛ ahunlanvolɛ wɔ ye abusua nu a, ɔboa bɛ na yeanyɛ adesoa yeammaa asafo ne. Na asafo ne ahola aboa ahunlanvolɛ mɔɔ le ahunlanvolɛ amgba* la.+

17 Bɛbu mgbanyima mɔɔ di bɛ nyunlu wɔ adenle kpalɛ zo la+ kpole kpalɛ,+ titili bɛdabɛ mɔɔ bɛbɔ mɔdenle wɔ ɛdendɛlɛ nee ngilehilelɛ nu la.+ 18 Ɔluakɛ ngɛlɛlera ne se, “Mmakyekye ɛnlankɛ nyinli mɔɔ ɛlɛwoso ma la anloa,”+ eza ɔse, “Gyimayɛvolɛ ahatualɛ fɛta ye.”+ 19 Mmadie somolɛ mɔɔ bɛkɛbɔ kpanyinli* la ɛto nu kyesɛ ɔgyi alasevolɛ nwiɔ anzɛɛ nsa anloa anu edwɛkɛ zo.+ 20 Twi menli mɔɔ kɔ zo yɛ ɛtane la anyunlu wɔ menli mɔɔ wɔ ɛkɛ ne la kɔsɔɔti anyunlu,+ amaa yeayɛ kɔkɔbɔlɛ yeamaa menli mɔɔ ɛha la.* 21 Meka meahile wɔ wɔ Nyamenle nee Kelaese Gyisɛse yɛɛ anwumabɔvolɛma mɔɔ bɛkpa bɛ la anyunlu kɛ di adehilelɛ ɛhye mɔ azo, na mmanea menli nyunlu anzɛɛ mmayɛ nyeyenu biala.+

22 Mmapele ɛ nwo ɛfa ɛ sa ɛgua awie biala anwo zo;*+ mmamaa awie mɔ ɛtane ne bie ka wɔ; kɔ zo maa ɛ nwo ɛde.

23 Mmano nzule bieko,* emomu ɛ ko nee ɛ nwo mɔɔ ta toto wɔ la ati, anrɛɛ no nwanye ekyi.

24 Menli ne bie mɔ ɛtane da ali wienyi na ɔkɔwie ndɛnebualɛ nu, noko bie mɔ ɛdeɛ da ali nzinlii.+ 25 Zɔhane ala a gyima kpalɛ noko da ali wienyi a,+ na mɔɔ ɛnla ali bɔbɔ la bɛngola bɛnvea zolɛ.+

6 Bɛmaa bɛdabɛ mɔɔ bɛle ngɛkɛlɛ la ɛhɔ zo ɛbu bɛ menle mɔ kɛ bɛfɛta enililɛ kpole,+ amaa bɛanga Nyamenle duma ne nee ngilehilelɛ ne anwo edwɛkɛ ɛtane.+ 2 Bieko, bɛdabɛ mɔɔ bɛ menle mɔ le diedima la mmakpo kɛ bɛkɛli bɛ eni kɛmɔ bɛle mediema la ati. Emomu, bɛzonle bɛ kpalɛ ɔluakɛ menli mɔɔ ɛlɛnyia bɛ gyima kpalɛ ne azo nvasoɛ la le diedima nee alɔvolɛ.

Kɔ zo kilehile ɛhye mɔ na fa folɛdulɛ ɛhye mɔ maa. 3 Saa awie kilehile ngilehilelɛ fofolɛ bie na ɔnlie yɛ Awulae Gyisɛse Kelaese ngilehilelɛ kpalɛ*+ ɛhye nee nyamenlezonlenlɛ kpalɛ nwo ngilehilelɛ ne ɔndo nu a,+ 4 ɔmemaa ɔ nwo zo na ɔnde debie biala abo.+ Kpolerazulɛ nee edwɛkɛ agbɔkɛ nwo butulelilɛ ɛli ye adwenle.+ Ninyɛne ɛhye mɔ fa anyebolo, konle, aholoba nee menli nwo adwenle ɛtane ba, 5 bɛkɔ zo bɛsu edwɛkɛ ekyi biala mɔɔ menli mɔɔ bɛ adwenle ɛzɛkye+ na bɛnde nɔhalɛ ne abo la ka la anwo kpolera, na bɛdwenle kɛ nyamenlezonlenlɛ kpalɛ maa bɛnyia bɛ nwo.+ 6 Nɔhalɛ nu, nvasoɛ kpole wɔ nyamenlezonlenlɛ kpalɛ+ nee mɔɔ yɛlɛ mɔɔ yɛmaa yɛ kunlu dwo nwo la azo. 7 Ɔluakɛ yɛanva ɛhwee yɛamba ewiade, yɛɛ yɛnrɛva ɛhwee yɛnrɛvi nu yɛnrɛhɔ.+ 8 Ɔti saa yɛlɛ aleɛ* nee adɛladeɛ* a, yɛbamaa yɛ kunlu adwo ɛhye mɔ anwo.+

9 Noko menli mɔɔ anye ɛbolo kɛ bɛkɛnyia bɛ nwo la tɔ sɔnea nee ɛhane+ yɛɛ ngoasea nee munzule atiakunluwɔzo mɔɔ fa menli kɔ ɛzɛkyelɛ bɔkɔɔ nu la anu.+ 10 Na ezukoa nwo anyebolo le ɛtane kɔsɔɔti ndinli, na bie mɔ ɛli ɔ nzi yemaa bɛminli bɛvi diedi ne anwo na bɛva nyanelilɛ dɔɔnwo bɛwowɔ bɛ nwo.+

11 Na wɔmɔ Nyamenle sonla, nriandi fi ninyɛne ɛhye mɔ anwo. Emomu di tenleneyɛlɛ, nyamenlezonlenlɛ kpalɛ, diedi, ɛlɔlɛ, kpundiigyinlanlɛ nee bɛtɛɛyɛlɛ nzi.+ 12 Ko diedi konle kpalɛ ne; sɔ dahuu ngoane ne mɔɔ yemɔti bɛvɛlɛle wɔ na ɛlile nwolɛ daselɛ kɛnlɛma wɔ bagua nu wɔ menli dɔɔnwo anyunlu la anu kpundii.

13 Megyi Nyamenle ne mɔɔ maa ninyɛne kɔsɔɔti ngoane, nee Kelaese Gyisɛse mɔɔ gyinlanle Pɔnteɛse Paelɛte anyunlu+ lile daselɛ kɛnlɛma la anyunlu meka meahile wɔ kɛ 14 di edwɛkɛ ne azo mɔɔ ɛmmaa ngehanleɛ anzɛɛ edwɛkɛ biala ɛmba nwo kɔkpula kɛ yɛ Awulae Gyisɛse Kelaese kɛla ɔ nwo ali,+ 15 mɔɔ anyelielɛ Tumivolɛ kokye ne bahile wɔ ye mekɛ nloa la. Yemɔ a ɔle arelemgbunli Belemgbunli nee awulae mɔ Awulae a,+ 16 mɔɔ ɔ ngome a ɔngola ɔnwu,+ mɔɔ ɔde wienyi mɔɔ bɛngola bɛmbikye ye la anu,+ mɔɔ awie biala ɛtɛnwunle ye anzɛɛ ɛngola ɛnnwu ye la.+ Enililɛ nee dahuu tumi le ye ɛdeɛ. Amen.

17 Ka kile bɛdabɛ mɔɔ bɛnyia bɛ nwo wɔ ewiade ɛhye* anu la kɛ bɛmmamemaa bɛ nwo zo,* na bɛfa bɛ nye bɛto anwonyia mɔɔ sɛkye la azo,+ emomu bɛva bɛ nye bɛdo Nyamenle mɔɔ maa yɛnyia debie biala molozo na yɛ nye die la anwo zo.+ 18 Ka kile bɛ kɛ bɛyɛ kpalɛ, bɛyɛ sukoavolɛma wɔ gyima kpalɛ nu, bɛyɛ atiakunlukɛnlɛma,* bɛhyɛ debie,+ 19 na bɛva bɛyɛ adiabo kpalɛ bɛzie kɛ anwonyia la bɛmaa kenle bie,+ amaa bɛahola bɛazɔ nɔhalɛ ngoane ne anu kpundii.+

20 Timote, bɔ mɔɔ bɛva bɛwula ɛ sa nu la anwo bane,+ na twe ɛ nwo fi edwɛkɛ mgbane mgbane mɔɔ tia debie nwuanzanwuanza yɛɛ adalɛ “nrɛlɛbɛ” nwo kpolerazulɛ nwo.+ 21 Nrɛlɛbɛ ɛhye mɔɔ bie mɔ vale dule bɛ nwo la ɛmaa bɛminli bɛvi diedi ne anwo.

Ɛlolɛ kpole ɛha bɛ.