MƆƆ TƆ ZO NWIƆ KƆMAA TƐSALONAEKAMA

1 Pɔɔlo, Seleveenɛse* nee Timote+ ɛlɛkɛlɛ ahɔmaa Tɛsalonaekama asafo ne mɔɔ le yɛ Ze Nyamenle ne nee Awulae Gyisɛse Kelaese ɛdeɛ la:

2 Nyamenle Selɛ ne nee Awulae Gyisɛse Kelaese ɛlo bɛ kpole na bɛmaa bɛ anzodwolɛ.

3 Mediema, ɔwɔ kɛ bɛdabɛ ti yɛyɛ Nyamenle mo dahuu. Ɛhye fɛta, ɔluakɛ bɛ diedi ɛlɛnyi ayɛ kpole yɛɛ bɛ ɛlɔlɛ mɔɔ bɛ nuhua ko biala lɛ ye wɔ ɔ gɔnwo anwo la ɛlɛyɛ kpole.+ 4 Zɔhane ati yɛfa bɛ yɛtu yɛ nwo+ wɔ Nyamenle asafo ne mɔ anu ɔlua bɛ kpundiigyinlanlɛ nee diedi mɔɔ bɛda ye ali wɔ bɛ kpɔdekpɔdeyɛlɛ nee bɛ anwongyelelɛ* muala mɔɔ bɛlɛyia* la anu la ati.+ 5 Ɛhye kile kɛ Nyamenle ndɛnebualɛ le fɔɔnwo, na ɛhye ati bɛbu bɛ kɛ bɛfɛta kɛ bɛnyia Nyamenle Belemgbunlililɛ ne mɔɔ yemɔti bɛlɛnwu amaneɛ la.+

6 Ɛhye ati ɔtenrɛ wɔ Nyamenle afoa nu kɛ ɔbava amaneɛnwunlɛ yeadua bɛdabɛ mɔɔ bɛlɛmaa bɛanwu amaneɛ la kakɛ.+ 7 Noko bɛdabɛ mɔɔ bɛlɛnwu amaneɛ la, bɛ nwo badɔ bɛ wɔ mekɛ mɔɔ bɛbaye Awulae Gyisɛse+ nee ye anwumabɔvolɛma mɔɔ bɛlɛ tumi la bɛavi anwuma bɛahile+ 8 wɔ sendɔlɔra nu la, na ɔbali bɛdabɛ mɔɔ bɛnze Nyamenle nee bɛdabɛ mɔɔ bɛndie yɛ Awulae Gyisɛse anwo edwɛkpa ne la nzenralɛ.+ 9 Bɛbava dahuu ɛzɛkyelɛ bɛahwe bɛdabɛ mɔɔ bɛle zɛhae la anzo+ na bɛavi Awulae anyunlu nee ye anyunlunyia tumi kpole ne anwo, 10 mekɛ mɔɔ ɔbara na bawula ɔdaye nee ye nwuanzanwuanzama ne mɔ anyunlunyia la, kenle zɔhane bɛdabɛ mɔɔ bɛnyianle diedi la anye balie ɔ nwo ɔluakɛ bɛliele daselɛ ne mɔɔ yɛlile la bɛlile.

11 Ɛhye ati dahuu yɛyɛ asɔne yɛmaa bɛ kɛ yɛ Nyamenle ne ɛbu bɛ kɛ bɛfɛta ye ɛvɛlɛlɛ ne,+ na ɔva ye tumi ne ɔyɛ debie kpalɛ biala mɔɔ sɔ ɔ nye la nee diedi gyima biala ɔwie. 12 Ɛhye bamaa bɛawula yɛ Awulae Gyisɛse duma ne anyunlunyia wɔ bɛ nyunlu na bɛ nee ye ayɛ ko, kɛ mɔɔ yɛ Nyamenle ne nee Awulae Gyisɛse Kelaese ɛlolɛ kpole ne de la.

2 Noko mediema, mɔɔ fale yɛ Awulae Gyisɛse Kelaese+ ɛralɛ ne nee yɛ nloa mɔɔ bɛbaboɔboa bɛahɔ ɔ nwo lɔ la anwo la,+ yɛsɛlɛ bɛ kɛ 2 bɛmmamaa bɛfa sunsum* nu edwɛkɛ anzɛɛ edwɛkɛ biala mɔɔ bɛka anzɛɛ kɛlata mɔɔ bɛkile kɛ ɔvi yɛ ɛkɛ ne la bɛsɛkye bɛ adwenle ndɛndɛ+ anzɛɛ bɛfa bɛtu bɛ ahonle kɛ Gyihova* kenle ne ɛdwu.+

3 Bɛmmamaa awie biala bɛlɛbɛla bɛ wɔ adenle biala anu, ɔluakɛ zɔhane kenle ne ɛnrɛra kyesɛ ɛkpɔkyelɛ ne+ dimoa ba, na bɛda mɛladonlɛnli ne,+ ɛzɛkyelɛ ralɛ ne ali.+ 4 Ɔle dwazotiavolɛ na ɔmemaa ɔ nwo zo ɔtɛla awie biala mɔɔ bɛfɛlɛ ye nyamenle anzɛɛ debie biala mɔɔ bɛsonle ye la, yemɔti ɔtɛnla aze wɔ Nyamenle ɛzonlenlɛsua ne anu na ɔda ɔ nwo ali wɔ bagua nu kɛ ɔle nyamenle. 5 Asoo bɛngakye kɛ mekɛ mɔɔ mewɔ bɛ nwo lɔ la, ɛnee meka ɛhye mɔ mekile bɛ?

6 Na kɛkala bɛze debie mɔɔ ɛlɛsi adenle ne la, amaa bɛala ye ali wɔ ye mekɛ nloa. 7 Nɔhalɛ nu, mɛladonlɛ ɛhye mɔɔ le fealeranu debie la ɛbɔ ɔ bo dɛbadɛba,+ noko ɔbahɔ zo kɔkpula kɛ debie mɔɔ kɛkala ɛlɛsi adenle ne la bavi ɛkɛ. 8 Akee bɛbala mɛladonlɛnli ne ali, na Awulae Gyisɛse bava ɔ nloa anu sunsum ne aye ye avi ɛkɛ+ na yealua ye ɛralɛ ne mɔɔ bala ali la azo yeazɛkye ye bɔkɔɔ.+ 9 Noko mɛladonlɛnli ne ɛralɛ ne balua Seetan tumi zo+ nee nwanwane gyima nee adalɛ sɛkɛlɛneɛ nee nwanwane ninyɛne+ 10 nee adenle ɛtane biala azo yeava yeabɛlɛbɛla+ bɛdabɛ mɔɔ bɛlɛkɔ ɛzɛkyelɛ nu la amaa yeayɛ anzohwenlɛ, ɔluakɛ bɛannyia nɔhalɛ ne anwo ɛlɔlɛ na bɛalie bɛ ngoane. 11 Ɛhye ati a Nyamenle ɛmaa adalɛ ngilehilelɛ ɛbɛlɛbɛla bɛ la, amaa bɛalie adalɛ bɛali+ 12 na bɛabua bɛ muala ndɛne ɔluakɛ bɛanlie nɔhalɛ ne bɛanli, emomu bɛ nye liele ɛtane nwo.

13 Noko bɛmɛ mediema mɔɔ Gyihova* kulo bɛ, bɛdabɛ ti ɔwɔ kɛ yɛyɛ Nyamenle mo dahuu, ɔluakɛ mɔlebɛbo ne Nyamenle kpale bɛ+ maanle ngoanelielɛ ɔlua sunsum ne mɔɔ ɔvale ɔdele bɛ nwo+ nee nɔhalɛ ne anu diedi mɔɔ bɛlɛ la ati. 14 Ɔluale edwɛkpa ne mɔɔ yɛka la azo a ɔvɛlɛle bɛ ɔmaanle ɛhye a, amaa bɛanyia yɛ Awulae Gyisɛse Kelaese anyunlunyia ne.+ 15 Yemɔti mediema, bɛgyinla kpundii+ na bɛzɔ ninyɛne mɔɔ yɛhilehilele bɛ la anu,+ saa ɔle edwɛkɛ mɔɔ yɛhanle anzɛɛ kɛlata mɔɔ vi yɛ ɛkɛ ne la bɔbɔ a. 16 Bieko, yɛ Awulae Gyisɛse Kelaese mumua ne nee yɛ Ze Nyamenle ne mɔɔ hulole yɛ+ na yelua ɛlolɛ kpole zo yemaa yɛ dahuu arɛlekyekyelɛ nee anyelazo kpalɛ la,+ 17 ɛkyekye bɛ rɛle na ɔmaa bɛgyinla kpundii* wɔ gyima nee edwɛkɛ kpalɛ biala anu.

3 Yemɔti mediema, bɛhɔ zo bɛyɛ asɔne bɛmaa yɛ+ kɛ Gyihova* edwɛkɛ ne kɛhɔ zo kɛdɛlɛ ndɛndɛ+ na bɛawula ye anyunlunyia kɛ mɔɔ bɛdabɛ noko bɛlɛyɛ ye la, 2 na bɛalie yɛ bɛavi ɛtanevolɛma nee amumuyɛma asa anu,+ ɔluakɛ tɛ menli ne amuala a lɛ diedi a.+ 3 Noko Awulae le nɔhavo, na ɔbamaa bɛ anwosesebɛ na yeabɔ bɛ nwo bane yeavi amumuyɛnli ne asa anu. 4 Bieko, yɛlɛ Awulae anu anwodozo wɔ bɛ nwo kɛ, bɛlɛdi yɛ adehilelɛ ne mɔ azo yɛɛ bɛbahɔ zo bɛali zo. 5 Awulae ɛhɔ zo ɛhile bɛ ahonle ne mɔ adenle kpalɛ ɛhɔ Nyamenle ɛlɔlɛ ne anwo+ nee Kelaese anwo kpundiigyinlanlɛ ne anu.+

6 Mediema, akee yɛlɛmaa bɛ adehilelɛ wɔ yɛ Awulae Gyisɛse Kelaese duma nu kɛ bɛhwe bɛ nwo bɛvi adiema biala mɔɔ lua ye basabasa+ na ɔnli adehilelɛ mɔɔ bɛnyianle bɛvile yɛ ɛkɛ ne azo la anwo.+ 7 Na bɛdabɛ mumua ne bɛze kɛzi ɔwɔ kɛ bɛsukoa yɛ la,+ ɔluakɛ yɛanyɛ yɛ ninyɛne basabasa wɔ bɛ avinli, 8 yɛɛ yɛanli awie biala aleɛ mgbane.*+ Emomu, yɛyɛle gyima ɛsesebɛ na yɛvɛle alehyenlɛ nee aledwolɛ amaa yɛanva adesoa kpole yɛando bɛ nuhua biala anwo zo.+ 9 Tɛ kɛ yɛnlɛ adenle kɛ yɛkɛyɛ zɔ,+ emomu, ɛnee yɛkpondɛ kɛ yɛfa yɛ nwo yɛyɛ neazo amaa bɛazukoa yɛ.+ 10 Nɔhalɛ nu, mekɛ mɔɔ yɛwɔ bɛ nwo lɔ la, ɛnee yɛta yɛka yɛkile bɛ kɛ: “Mɔɔ ɛngulo kɛ ɔyɛ gyima la, ɔnle kɛ ɔdi aleɛ.”+ 11 Ɔluakɛ yɛde kɛ bɛ nuhua bie mɔ luolua nu basabasa,+ bɛnyɛ gyima biala, emomu bɛfa bɛ nwo bɛwulowula edwɛkɛ mɔɔ ɛnvale bɛ nwo la anu.+ 12 Yɛka yɛahile menli mɔɔ le zɛhae la na yɛadu bɛ folɛ wɔ Awulae Gyisɛse Kelaese anu kɛ, ɔwɔ kɛ bɛyɛ koonwu bɛyɛ bɛ gyima na bɛdi aleɛ mɔɔ bɛdabɛ mumua ne bɛkɛnyia la.+

13 Noko mediema, bɛmmagyakyi kpalɛyɛlɛ. 14 Na saa awie anli yɛ edwɛkɛ ne mɔɔ wɔ kɛlata ɛhye anu la azo a, bɛyɛ ahenle zɔhane nzonlɛ na bɛ nee ye mmatu bieko,+ amaa ɔ nyunlu agua aze. 15 Noko bɛmmabu ye kɛ ɔle kpɔvolɛ, emomu bɛhɔ zo bɛdu ye folɛ+ kɛ adiema la.

16 Akee anzodwolɛ Awulae mumua ne ɛmaa bɛ anzodwolɛ dahuu wɔ adenle biala anu.+ Awulae nee bɛ muala ɛdɛnla.

17 Medame Pɔɔlo, me ahyebizalɛ mɔɔ meva me sa mehɛlɛ+ mɔɔ le sɛkɛlɛneɛ wɔ me kɛlata biala anu la ɛne; kɛ mekɛlɛ la ɛne.

18 Yɛ Awulae Gyisɛse Kelaese ɛlolɛ kpole ne nee bɛ muala ɛdɛnla.