MƆƆ LIMOA KƆMAA TƐSALONAEKAMA

1 Pɔɔlo, Seleveenɛse*+ nee Timote+ ɛlɛkɛlɛ ahɔmaa Tɛsalonaekama asafo ne mɔɔ le Nyamenle Selɛ ne nee Awulae Gyisɛse Kelaese ɛdeɛ la:

Ɛlolɛ kpole nee anzodwolɛ ɛha bɛ.

2 Yɛbɔ bɛ kɔsɔɔti duma wɔ yɛ asɔneyɛlɛ nu na yɛyɛ Nyamenle mo dahuu,+ 3 ɔluakɛ dahuu yɛkakye gyima mɔɔ bɛfa diedi bɛyɛ, gyima ɛsesebɛ mɔɔ bɛfi ɛlɔlɛ nu bɛyɛ nee bɛ kpundiigyinlanlɛ mɔɔ yɛ Awulae Gyisɛse Kelaese anu anyelazo+ ti bɛnyia ye wɔ yɛ Nyamenle nee Selɛ ne anyunlu la. 4 Mediema mɔɔ Nyamenle kulo bɛ, yɛze kɛ yekpa bɛ, 5 ɔluakɛ edwɛkpa ne mɔɔ yɛbɔ ye nolo la anlua ɛdendɛlɛ ngome zo a rale a, emomu ɔluale tumi nee sunsum nwuanzanwuanza ne nee diedi kpole zo, kɛ mɔɔ bɛze kɛ bɛdabɛ ti a yɛbɔle yɛ ɛbɛla zɔ la. 6 Na bɛzukoale yɛ+ nee Awulae,+ ɔluakɛ bɛvale anyelielɛ ne mɔɔ sunsum nwuanzanwuanza ne maa bɛnyia la bɛliele edwɛkɛ ne bɛdole nu wɔ anwongyelelɛ dɔɔnwo anu,+ 7 ɛhye ati bɛyɛle neazo bɛmaanle diedima mɔɔ wɔ Masidonea nee Akaya la amuala.

8 Ɔle nɔhalɛ kɛ, tɛ Gyihova* edwɛkɛ ne angome a vi bɛ ɛkɛ ne ɛdwu Masidonea nee Akaya a, emomu Nyamenle anu diedi mɔɔ bɛlɛ la ɛdɛlɛ ɛdwu ɛleka biala,+ yemɔti ɔngyia kɛ yɛka edwɛkɛ biala. 9 Na bɛdabɛ mumua ne bɛka mekɛ mɔɔ limoa mɔɔ yɛnwunle bɛ la anwo edwɛkɛ nee kɛzi bɛhwenle bɛ nwo bɛvile bɛ ananze ne mɔ anwo+ na bɛrayɛle tease nee nɔhalɛ Nyamenle ne ngɛkɛlɛ, 10 na bɛrale kɛ bɛbahendɛ ɔ Ra ne mɔɔ vi anwuma,+ mɔɔ ɔdwazole ye ɔvile mowuamra anu, Gyisɛse, mɔɔ ɔbalie yɛ yeavi ɛya ne mɔɔ ɛlɛba la anu la.+

2 Mediema, bɛdabɛ bɛze ye wienyi kɛ bɛ nwo lɔ mɔɔ yɛrale la anyɛ mgbane.+ 2 Ɔluakɛ bɛdabɛ bɛze kɛ yɛlimoale yɛnwunle amaneɛ na bɛbɔle yɛ aholoba wɔ Felepae+ bɔbɔ ɛdeɛ, noko yɛ Nyamenle ne maanle yɛnyianle akɛnrazilɛ* kɛ yɛha Nyamenle edwɛkpa ne+ yɛhile bɛ wɔ dwazotia dɔɔnwo* anu. 3 Ɔluakɛ folɛdulɛ ne mɔɔ yɛfa yɛmaa la ɛngyi adalɛ edwɛkɛ, adwenle ɛtane anzɛɛ mɛlɛbɛla zo, 4 na kɛ mɔɔ Nyamenle ɛlie yɛ ɛdo nu kɛ yɛfɛta kɛ ɔfa edwɛkpa ne ɔwula yɛ sa nu la, zɔhane ala a yɛtendɛ a, tɛ kɛ yɛfa yɛazɔ menli nye emomu yɛfa yɛazɔ Nyamenle mɔɔ neɛnlea yɛ ahonle nu la anye.+

5 Nɔhalɛ nu, bɛze kɛ yɛanva edwɛkɛ menlemenle anzɛɛ anyebolo adwenle yɛangeda menli holɛ ko mɔɔ yɛde la azo yɛamba bɛ nwo lɔ;+ Nyamenle di yɛ daselɛ! 6 Zɔhane ala a yɛamkpondɛ menli nyunlu anyunlunyia yɛanvi bɛdabɛ anzɛɛ awie mɔ ɛkɛ a, noko kɛmɔ yɛle Kelaese ɛzoanvolɛma la ati, anrɛɛ yɛkola yɛyɛ adesoa kpole yɛmaa bɛ.+ 7 Emomu, mɔɔ yɛwɔ bɛ avinli la yɛyɛle bɛ bɛtɛbɛtɛ kɛ mɔɔ ɛrɛladane di ɔ mra adane* la. 8 Na kɛmɔ yɛlɛ bɛ nwo ɛlɔlɛ la ati, yɛbɔle kpɔkɛ* kɛ yɛnrɛva Nyamenle edwɛkpa ne angome yɛnrɛmaa bɛ, emomu yɛbava yɛ nwo* noko yɛamaa bɛ,+ ɔluakɛ bɛrayɛle yɛ alɔvolɛ.+

9 Nɔhalɛ nu, mediema, bɛkakye yɛ gyima ɛsesebɛ nee yɛ ɛvɛlɛ. Yɛyɛle gyima alehyenlɛ nee aledwolɛ amaa yɛanyɛ adesoa kpole yɛammaa bɛ nuhua ko biala+ wɔ mekɛ mɔɔ yɛlɛka Nyamenle edwɛkpa ne yɛahile bɛ la. 10 Bɛdi yɛ daselɛ, Nyamenle noko di yɛ daselɛ kɛ yɛyɛle nɔhavoma nee tenlenema mɔɔ edwɛkɛ biala ɛnle yɛ nwo la yɛmaanle bɛmɛ diedima ne. 11 Bɛze ye wienyi kɛ yɛhɔle zo yɛdule bɛ nuhua ko biala folɛ, yɛkyekyele bɛ rɛle na yɛlile bɛ daselɛ+ kɛ mɔɔ selɛ+ yɛ ɔ mra la, 12 amaa bɛahɔ zo bɛabɔ bɛ ɛbɛla bɛamaa yeafɛta Nyamenle ne+ mɔɔ ɛlɛfɛlɛ bɛ ahɔ ye Belemgbunlililɛ+ nee ye anyunlunyia ne anu la.+

13 Nɔhalɛ nu, ɛhye ati a dahuu yɛda Nyamenle ase la,+ ɔluakɛ mekɛ mɔɔ bɛnyianle Nyamenle edwɛkɛ ne mɔɔ bɛdele bɛvile yɛ ɛkɛ ne la, bɛanlie ye kɛ sonla edwɛkɛ, emomu bɛliele ye kɛ Nyamenle edwɛkɛ kɛ mɔɔ ɔde ye nɔhalɛ nu ala la, na yemɔ noko a ɛlɛyɛ gyima wɔ bɛmɛ diedima anu a. 14 Na mediema, bɛzukoale Nyamenle asafo ne mɔ mɔɔ wɔ Kelaese Gyisɛse anu wɔ Dwudiya la, ɔluakɛ bɛnwunle amaneɛ ko ne ala bie wɔ bɛ maanlema asa anu,+ kɛ mɔɔ bɛdabɛ noko bɛnwunle amaneɛ wɔ Dwuuma asa anu la, 15 bɛmɛ bɔbɔ a bɛhunle Awulae Gyisɛse+ nee ngapezoma ne na bɛyɛle yɛ kpɔdekpɔde a.+ Bieko, bɛnzɔ Nyamenle anye yɛɛ mɔɔ bɛyɛ la ɛmboa menli kɔsɔɔti, 16 wɔ mekɛ mɔɔ bɛlɛbɔ mɔdenle kɛ bɛnrɛmaa yɛnrɛha edwɛkɛ ne yɛnrɛhile maanle maanle ne anu amra amaa bɛanyia ngoane la.+ Bɛyɛ ɛhye bɛmaa bɛ ɛtane ne yɛ kpole. Noko kɛkala ye ɛya ne ɛra bɛ nwo zo.+

17 Mediema, yɛvile* bɛ nwo ɛkɛ ne mekɛ ekyi bie anu (wɔ nwonane nu, na tɛ yɛ ahonle nu ɔ), kɛmɔ yɛ nwo dɔ bɛ kpole la ati, yɛbɔle mɔdenle biala kɛ yɛbanwu bɛ nyunlu bieko. 18 Ɛhye ati ɛnee yɛkulo kɛ yɛba bɛ nwo lɔ, ɛhɛe, medame Pɔɔlo, membɔle mɔdenle fane nwiɔ; noko Seetan ammaa yɛ adenle. 19 Na duzu a le yɛ anyelazo anzɛɛ yɛ anyelielɛ anzɛɛ yɛ fɛlɛkolilɛ abotile wɔ yɛ Awulae Gyisɛse anyunlu wɔ ye ɛralɛ ne anu a? Asoo tɛ yemɔ a le bɛdabɛ?+ 20 Nɔhalɛ nu, bɛmɛ a bɛle yɛ anyunlunyia nee yɛ anyelielɛ a.

3 Ɔti mɔɔ ɛnee yɛngola ɔ nloa gyinla bieko la, yɛzuzule kɛ ɔle kpalɛ kɛ yɛ ngome yɛkɛha Atɛnse;+ 2 na yɛzoanle Timote+ mɔɔ le yɛ diema nee Nyamenle sonvolɛ* mɔɔ ka Kelaese anwo edwɛkpa ne la kɛ ɔramaa bɛ anwosesebɛ na ɔkyekye bɛ rɛle wɔ bɛ diedi ne anwo, 3 amaa anwongyelelɛ ɛhye ammaa awie biala amkpo aze.* Ɔluakɛ bɛdabɛ bɛze kɛ ɔwɔ kɛ ninyɛne ɛhye mɔ to yɛ.+ 4 Mekɛ mɔɔ yɛwɔ bɛ nwo lɔ la, yɛhanle yɛhilele bɛ kɛ yɛbanwu amaneɛ, na yemɔ a ɛzi mɔɔ bɛnwu ye la.+ 5 Ɛhye ati a mekɛ mɔɔ mengola ɔ nloa gyinla bieko la, menzoanle ye amaa meanwu bɛ nɔhalɛlilɛ,+ saa bie a Sɔneavolɛ ne+ ɛzɔ bɛ ɛnlea ɛmaa yɛ gyima ɛsesebɛ ne ɛyɛ mgbane a.

6 Noko kɛkala Timote vi bɛ nwo lɔ ɛzia ɛra yɛ nwo ɛke+ ɛraha bɛ nɔhalɛlilɛ nee bɛ ɛlɔlɛ ne anwo edwɛkɛ kpalɛ, kɛ bɛkɔ zo bɛkakye yɛ kpalɛ dahuu na bɛkulo kɛ bɛnwu yɛ kɛ mɔɔ yɛdayɛ noko yɛkulo kɛ yɛnwu bɛ la. 7 Mediema, ɛhye ati a bɛ nɔhalɛlilɛ mɔɔ bɛda ye ali la ɛkyekye yɛ rɛle wɔ yɛ abodelɛ nee anwongyelelɛ muala anu a.+ 8 Ɔluakɛ saa bɛgyinla kpundii wɔ Awulae anu a ɔmaa yɛnyia anwosesebɛ.* 9 Na kɛ ɔkɛyɛ na bɛdabɛ ti yɛayɛ Nyamenle mo wɔ bɛ nwo anyelielɛ kpole mɔɔ yɛnyia ye wɔ Nyamenle anyunlu la anwo yɛava yɛadua ye kakɛ ɛ? 10 Alehyenlɛ nee aledwolɛ yɛyɛ nzɛlɛlɛ ɛsesebɛ kɛ yɛkɛnwu bɛ nyunlu na mɔɔ bɛhyia nwo wɔ bɛ diedi ne anwo la yɛava yɛamaa bɛ.+

11 Akee yɛsɛlɛ kɛ yɛ Nyamenle nee Selɛ mumua ne nee yɛ Awulae Gyisɛse ɛbuke adenle ɛmaa yɛrɛla bɛ nwo lɔ. 12 Eza yɛsɛlɛ kɛ Awulae ɛmaa bɛnyia ɛlɔlɛ kpole na bɛhulo bɛ nwo ngoko+ nee awie biala bɛmaa ɔbo zo kɛ mɔɔ yɛdayɛ noko yɛlɛ bɛ nwo ɛlɔlɛ kpole la, 13 amaa yeamaa bɛ ahonle agyinla kpundii, nwolɛ ade saanwu mɔɔ edwɛkɛ biala ɛnle nwo wɔ yɛ Nyamenle+ nee Selɛ ne anyunlu wɔ mekɛ mɔɔ yɛ Awulae Gyisɛse+ nee ye nwuanzanwuanzama ne amuala kɛra la.

4 Awieleɛ ne, mediema, kɛmɔ yɛhilehile bɛ kɛzi ɔwɔ kɛ bɛbɔ bɛ ɛbɛla na bɛsɔ Nyamenle anye,+ na nɔhalɛ nu bɛlɛyɛ zɔ la, akee yɛsɛlɛ bɛ na yɛadu bɛ folɛ wɔ Awulae Gyisɛse duma nu kɛ bɛhɔ zo bɛyɛ ye molozo. 2 Ɔluakɛ bɛdabɛ bɛze adehilelɛ* ne mɔɔ yɛluale Awulae Gyisɛse anwo zo yɛvale yɛmaanle bɛ la.

3 Na Nyamenle ɛhulolɛdeɛ a le kɛ bɛ nwo kɛde+ na bɛkɛhwe bɛ nwo bɛkɛvi adwɔmane ɛbɛla* nwo.+ 4 Ɔwɔ kɛ bɛ nuhua ko biala nwu kɛzi ɔbahomo ɔdaye ye sonlabaka ne azo+ wɔ anwodelɛ+ nee enililɛ nu la, 5 tɛ wɔ nla nwo atiakunluwɔzo ɛtane mɔɔ bɛngola bɛngomo zo la anu+ kɛ mɔɔ maanle maanle ne mɔ mɔɔ bɛnze Nyamenle yɛ ye la.+ 6 Wɔ edwɛkɛ ɛhye anwo, ɔnle kɛ awie biala yɛ ɔ diema bie ɛtane anzɛɛ sisi ye, ɔluakɛ Gyihova* fa ninyɛne ɛhye mɔ amuala anwo anzohwenlɛ maa, kɛ mɔɔ yɛlimoale yɛhanle yɛhilele bɛ na eza yɛbɔle bɛ nwolɛ kɔkɔ ɛsesebɛ la. 7 Ɔluakɛ tɛ evinli nyɛleɛ ti a Nyamenle vɛlɛle yɛ a, emomu ɔvɛlɛle yɛ kɛ yɛrayɛ menli mɔɔ anwo te a.+ 8 Yemɔti, mɔɔ kɛkpo ngilehilelɛ ɛhye la ɛmkpo sonla, emomu ɔkpo Nyamenle+ mɔɔ fa ye sunsum nwuanzanwuanza ne maa bɛ la.+

9 Noko, mɔɔ fale mediema ɛlɔlɛ nwo la,+ ɔngyia kɛ yɛkɛlɛ nwolɛ debie yɛbɛlɛ bɛ ɔluakɛ Nyamenle ɛhilehile bɛ kɛ bɛhulo bɛ nwo ngoko.+ 10 Nɔhalɛ nu, bɛlɛyɛ zɔ bɛamaa mediema kɔsɔɔti mɔɔ wɔ Masidonea ɛleka biala la. Noko mediema, yɛtu bɛ folɛ kɛ, bɛhɔ zo bɛyɛ bɛmaa ɔbo zo. 11 Bɛbɔ mɔdenle kɛ bɛkɛdɛnla anzodwolɛ nu,+ bɛmmafa bɛ nloa bɛwulowula awie mɔ edwɛkɛ nu,+ na bɛva bɛ sa bɛyɛ gyima+ kɛ mɔɔ yɛhilehilele bɛ la, 12 amaa bɛabɔ ɛbɛla kpalɛ wɔ menli mɔɔ wɔ alienwo la anyunlu+ mɔɔ bɛnrɛhyia debie biala a.

13 Bieko, mediema, yɛkpondɛ kɛ bɛnwu nɔhalɛ ne mɔɔ fale bɛdabɛ mɔɔ bɛla wɔ ewule nu* la anwo,+ amaa bɛanli nyane kɛ menli mɔɔ ɛha mɔɔ ɛnlɛ anyelazo la.+ 14 Na saa yɛlɛ diedi kɛ Gyisɛse wule na yedwazo bieko a,+ zɔhane ala a Nyamenle balua Gyisɛse anwo zo ava bɛdabɛ mɔɔ bɛla wɔ ewule nu la aboka ɔ nwo azia ara ngoane nu a.+ 15 Na ɛhye a yɛlua Gyihova* edwɛkɛ zo yɛka yɛahile bɛ a, kɛ yɛdayɛ mɔɔ Awulae ɛralɛ ne badwu la yɛtɛte ngoane nu la ɛnrɛlimoa bɛdabɛ mɔɔ bɛla wɔ ewule nu la anyunlu; 16 ɔluakɛ Awulae mumua ne bava ɛnelɛ kpole, anwumabɔvolɛ kpanyinli ɛnelɛ nee Nyamenle aweɛne tendenle ne ɔvi anwuma lɔ yeadwu,+ na bɛdabɛ mɔɔ bɛwu wɔ Kelaese anu la balimoa adwazo.+ 17 Yemɔ anzi, bɛbava yɛdayɛ mɔɔ yɛha mɔɔ yɛtɛte aze la, nee bɛ muala wɔ amungu nu+ yɛahɔyia Awulae+ wɔ anwomanyunlu; yemɔti yɛ nee Awulae badɛnla dahuu.+ 18 Ɔti bɛhɔ zo bɛva edwɛkɛ ɛhye mɔ bɛkyekye bɛ rɛle ngoko.

5 Mediema, mekɛ ne nee ɛlobɔ ne anwo ɛdeɛ, ɔngyia kɛ yɛkɛhɛlɛ bɛ wɔ nwolɛ. 2 Ɔluakɛ bɛdabɛ bɛze ye wienyi kɛ Gyihova* kenle ne+ bara kɛ awule ba nɔɔzo ala la.+ 3 Mekɛ mɔɔ bɛlɛka kɛ, “Anzodwolɛ nee banebɔlɛ!” la, arɛlevilɛ nu ala ɛzɛkyelɛ bara bɛ nwo zo+ kɛ mɔɔ awolɛ nyane ka nrenzɛvolɛ la, na bɛnrɛhola nriandi wɔ adenle biala azo. 4 Noko bɛmɛ mediema, bɛnle awozinli nu, bɛnle kɛ nwule mɔɔ kenle zɔhane barado bɛ arɛlevilɛ nu la, 5 ɔluakɛ bɛ muala bɛle wienyi nee alehyenlɛ nu mralɛ.+ Yɛnle aledwolɛ anzɛɛ awozinli nu mralɛ.+

6 Yemɔti bɛmmamaa yɛdafe kɛ menli mɔɔ ɛha la,+ emomu bɛmaa yɛzinza+ na yɛ nye ɛla ɛkɛ.+ 7 Ɔluakɛ menli mɔɔ dafe la da nɔɔzo, yɛɛ menli mɔɔ bo nza la bo nɔɔzo.+ 8 Noko yɛmɛ mɔɔ yɛle alehyenlɛ nu mralɛ la, bɛmaa yɛ nye ɛla ɛkɛ na yɛwula diedi nee ɛlɔlɛ akɛnrazo enyinlike ne na yɛzoa ngoanelielɛ anyelazo ne kɛ bulalɛ kyɛlɛ.+ 9 ɔluakɛ Nyamenle amkpa yɛ kɛ ye ɛya ne ɛrɛla yɛ nwo zo, emomu ɔkpale yɛ kɛ yɛlua Awulae Gyisɛse Kelaese anwo zo yɛnyia ngoane.+ 10 Ɔwule ɔmaanle yɛ,+ amaa saa yɛ nye gyi zo o, yɛla o,* yɛ nee ye adɛnla ngoane nu.+ 11 Yemɔti bɛhɔ zo bɛmaa bɛ nwo anwosesebɛ* na bɛboa bɛ nwo ngoko+ kɛ mɔɔ bɛlɛyɛ ye ala la.

12 Mediema, akee yɛsɛlɛ bɛ kɛ bɛbu bɛdabɛ mɔɔ bɛlɛyɛ gyima ɛsesebɛ wɔ bɛ avinli na bɛnea bɛ nwo zo wɔ Awulae anu na bɛtu bɛ folɛ la; 13 na bɛli bɛ eni kpole kpalɛ wɔ ɛlɔlɛ nu ɔlua bɛ gyima ne mɔɔ bɛyɛ la ati.+ Bɛ muala bɛdɛnla anzodwolɛ nu.+ 14 Bieko, mediema, yɛsɛlɛ bɛ kɛ bɛbɔ menli mɔɔ lua ye basabasa la kɔkɔ,*+ bɛkyekye menli mɔɔ arɛle ɛbɔ la arɛle, bɛboa mɔɔ ɛyɛ bɛtɛɛ la, bɛnyia awie biala anwo abotane.+ 15 Bɛnlea na awie anva ɛtane andua awie ɛtane kakɛ,+ dahuu bɛkpondɛ mɔɔ le kpalɛ la bɛmaa bɛ nwo ngoko nee awie mɔ.+

16 Bɛmaa bɛ nye ɛlie dahuu.+ 17 Bɛhɔ zo bɛyɛ asɔne.+ 18 Bɛyɛ mo wɔ debie biala anwo.+ Ɛhye a Nyamenle kulo kɛ bɛyɛ kɛ Kelaese Gyisɛse ɛdoavolɛma a. 19 Bɛmmanua sunsum ne senle ne.+ 20 Bɛmmabu ngapezo ne mɔ kɛ nwolɛ ɛngyia.+ 21 Bɛzɔ ninyɛne kɔsɔɔti bɛnlea;+ bɛzɔ mɔɔ le kpalɛ la anu kpundii. 22 Bɛhwe bɛ nwo bɛvi ɛtane biala anwo.+

23 Anzodwolɛ Nyamenle mumua ne ɛde bɛ nwo bɔkɔɔ. Na bɛbɔ bɛ sunsum nee bɛ ɛkɛla* nee bɛ sonlabaka ne anwo bane bɛmaa ɔli munli wɔ adenle biala anu, na edwɛkɛ biala amba bɛ nwo wɔ yɛ Awulae Gyisɛse Kelaese ɛralɛ ne anu.+ 24 Ahenle mɔɔ ɛlɛfɛlɛ bɛ la le nɔhavo, na ɔbayɛ ye zɔ.

25 Mediema, bɛhɔ zo bɛyɛ asɔne bɛmaa yɛ.+

26 Bɛva bɛ nloa anwo ɛvolɛ nwuanzanwuanza bɛbizebiza mediema ne mɔ amuala ahye.

27 Mesɛlɛ bɛ wɔ Awulae duma nu kɛ bɛgenga kɛlata ɛhye bɛhile mediema ne mɔ amuala.+

28 Yɛ Awulae Gyisɛse Kelaese ɛlolɛ kpole ne nee bɛ ɛdɛnla.