KƆMAA KƆLƆSAEMA

1 Medame Pɔɔlo mɔɔ ɔlua Nyamenle ɛhulolɛ zo meyɛ Kelaese Gyisɛse ɛzoanvolɛ la nee yɛ diema Timote,+ 2 ɛlɛkɛlɛ ahɔmaa nwuanzanwuanzama nee mediema nɔhavoma mɔɔ nee Kelaese le ko wɔ Kɔlɔsae la:

Yɛ Ze Nyamenle ɛlo bɛ kpole na ɔmaa bɛ anzodwolɛ.

3 Mekɛ biala mɔɔ yɛkɛyɛ asɔne yɛkɛmaa bɛ la, yɛyɛ Nyamenle, yɛ Awulae Kelaese Gyisɛse ɔ Ze ne mo, 4 ɔluakɛ yɛde kɛ bɛlie Kelaese Gyisɛse bɛli na bɛnyia nwuanzanwuanzama ne amuala anwo ɛlɔlɛ 5 ɔlua anyelazo ne mɔɔ ɛlɛkendɛ bɛ wɔ anwuma la ati.+ Bɛdele anyelazo ɛhye anwo edwɛkɛ dɛba ɔlua edwɛkpa ne anwo nɔhalɛ edwɛkɛ ne 6 mɔɔ ɛdwu bɛ ɛkɛ la azo. Kɛ mɔɔ edwɛkpa ne ɛlɛso ma na ɔlɛnyia anyuhɔlɛ wɔ ewiade amuala la,+ zɔhane ala a ɔlɛyɛ ye wɔ bɛ avinli ɔvi kenle mɔɔ bɛdele na bɛnwunle Nyamenle ɛlolɛ kpole ne kpalɛ wɔ nɔhalɛ nu la. 7 Ɛhye a bɛzukoa bɛvi yɛ gɔnwo akɛlɛ Ɛpafelase+ mɔɔ le yɛ kulovolɛ na ɔle Kelaese sonvolɛ nɔhavo ɔmaa yɛ la ɛkɛ a. 8 Eza yeha bɛ sunsum nu ɛlɔlɛ ne anwo edwɛkɛ yehile yɛ.

9 Ɛhye ati a ɔvi kenle mɔɔ yɛdele nwolɛ edwɛkɛ la, yɛtɛgyakyile kɛ yɛbayɛ asɔne yɛamaa bɛ+ na yɛazɛlɛ kɛ ye ɛhulolɛdeɛ ne anwo nɔhalɛ ndelebɛbo ne ɛyi bɛ tɛkɛɛ+ wɔ nrɛlɛbɛ nee sunsum nu ndelebɛbo muala anu a,+ 10 amaa bɛalua bɛamaa yeafɛta Gyihova* na bɛazɔ ɔ nye bɔkɔɔ wɔ mekɛ mɔɔ bɛlɛkɔ zo bɛazo ma wɔ gyima kpalɛ biala anu na bɛanyia Nyamenle anwo nɔhalɛ ndelebɛbo dɔɔnwo la;+ 11 na bɛnyia anwosesebɛ wɔ tumi muala anu kɛ mɔɔ ye anyunlunyia tumi ne de la,+ amaa bɛava abotane nee anyelielɛ bɛagyinla debie biala anloa, 12 na bɛayɛ Selɛ ne mɔɔ yemaa bɛfɛta kɛ bɛ nee nwuanzanwuanzama ne+ mɔɔ wɔ wienyi nu banyia agyapadeɛ ne la mo.

13 Yelie yɛ yevi awozinli nu tumi bo+ na yeva yɛ yera ye kulovolɛ Ralɛ ne belemgbunlililɛ ne anu, 14 ɔlua ɔ nwo zo a bɛkpɔne yɛ a, kile kɛ, bɛva yɛ ɛtane bɛhyɛ yɛ.+ 15 Yemɔ a ɔle Nyamenle ne mɔɔ bɛnnwu ye la ɛsaso,+ abɔdeɛ muala anu belamunli ralɛ a;+ 16 ɔluakɛ bɛluale ɔ nwo zo a bɛbɔle debie biala mɔɔ wɔ anwuma nee azɛlɛ ye azo a, ninyɛne mɔɔ bɛnwu bɛ nee ninyɛne mɔɔ bɛnnwu bɛ,+ arelemgbunli mbia o, mgbolema o, tumililɛ anzɛɛ tumivolɛma o. Bɛluale ɔ nwo zo a bɛbɔle ninyɛne mɔɔ ɛha la a,+ na bɛbɔle bɛmaanle ye. 17 Eza ɔlimoale ninyɛne mɔɔ ɛha la amuala anyunlu,+ na bɛluale ɔ nwo zo a bɛbɔle ninyɛne mɔɔ ɛha la a, 18 na yemɔ a ɔle sonlabaka ne, mɔɔ le asafo ne la ati a.+ Yemɔ a ɔle mɔlebɛbo ne, mowuamra ɛdwazolɛ ne anu belamunli ralɛ a,+ amaa yealimoa wɔ debie biala anu; 19 ɔluakɛ ɛnee ɔsɔ Nyamenle anye kɛ ɔbamaa yeali munli wɔ ninyɛne kɔsɔɔti nu,+ 20 na ɔlua ɔ nwo zo yeaha ɔdaye nee ninyɛne mɔɔ ɛha+ mɔɔ wɔ azɛlɛ ye azo anzɛɛ anwuma la amuala yeabɔ nu bieko. Anzodwolɛ ɛhye yɛle boɛ ɔlua ye mogya ne+ mɔɔ ɔhwinle ɔguale amaneɛnwunlɛ baka* ne azo la azo.

21 Nɔhalɛ nu, bɛmɛ mɔɔ dɛba ne ɛnee bɛhwe bɛ nwo na bɛyɛ agbɔvolɛ ɔluakɛ ɛnee bɛ adwenle wɔ ninyɛndane zo la, 22 yelua zɔhane sonla ne sonlabaka ne mɔɔ ɔvale ɔhɔle ewule nu la azo ɔ nee bɛ ɛbɔ nu bieko, amaa yeava bɛ yeahile kɛ bɛle nwuanzanwuanza mɔɔ dɛne nee edwɛkɛ biala ɛnle bɛ nwo wɔ ɔ nyunlu+— 23 noko kyesɛ bɛkɔ zo bɛtɛnla diedi ne anu,+ bɛgyinla adiabo ne azo+ na bɛgyinla kpundii+ mɔɔ bɛmmaa bɛndwe bɛ bɛnvi edwɛkpa ne mɔɔ bɛdele na bɛbɔle ye nolo bɛhilele abɔdeɛ muala mɔɔ wɔ aleɛabo la anwo anyelazo ne anwo a.+ Edwɛkpa ɛhye a medame Pɔɔlo, menyɛle nwolɛ sonvolɛ a.+

24 Kɛkala melɛdi fɛlɛko wɔ amaneɛ mɔɔ bɛdabɛ ti menwu ye la anwo,+ na melɛnwu amaneɛ kɛ Kelaese la, noko ɔwɔ kɛ menwu amaneɛ zɔhane mekɔ awieleɛ ɔlua ye sonlabaka ne,+ mɔɔ le asafo ne la ati.+ 25 Menyɛle asafo ɛhye sonvolɛ ɔlua gyima+ mɔɔ bɛdabɛ ti Nyamenle vale maanle me kɛ membɔ Nyamenle edwɛkɛ ne nolo kpalɛ la azo, 26 fealeranu edwɛkɛ nwuanzanwuanza ne+ mɔɔ bɛvale bɛveale ewiade ne*+ nee awolɛndoazo dɛba ne mɔ la. Noko kɛkala bɛye bɛhile ye nwuanzanwuanzama ne,+ 27 mɔɔ ɔsɔ Nyamenle anye kɛ ɔbamaa bɛanwu fealeranu edwɛkɛ nwuanzanwuanza ɛhye anyunlunyia nu anwonyia ne wɔ maanle maanle ne anu la,+ yemɔ a le Kelaese mɔɔ nee bɛ ɛyɛ ko la, ye anyunlunyia nwo anyelazo ne.+ 28 Yemɔ a yɛlɛbɔ ye nolo, yɛadu awie biala folɛ na yɛahilehile awie biala wɔ nrɛlɛbɛ muala anu a, amaa yɛava awie biala yɛahile kɛ ɔdi munli wɔ Kelaese anu.+ 29 Ɛhye ati melɛyɛ gyima ɛsesebɛ, melɛbɔ mɔdenle meava ye anwosesebɛ ne mɔɔ yɛ gyima kpole wɔ me nu la a meayɛ a.+

2 Na mekpondɛ kɛ bɛnwu kɛzi melɛko ɛsesebɛ meamaa bɛ nee bɛdabɛ mɔɔ bɛwɔ Lawɔdesia+ nee bɛdabɛ mɔɔ bɛtɛnwunle me ɛlɛ* la amuala la. 2 Ɛhye bamaa bɛanyia arɛlekyekyelɛ+ na bɛayɛ ko wɔ ɛlɔlɛ nu+ na bɛanyia anwonyia ne mɔɔ vi bɛ ndelebɛbo kpalɛ nu la amuala, amaa bɛanyia Nyamenle fealeranu edwɛkɛ nwuanzanwuanza ne mɔɔ yemɔ a le Kelaese la anwo nɔhalɛ ndelebɛbo.+ 3 Ye nuhua a bɛva nrɛlɛbɛ nee ndelebɛbo anwonyia ne amuala bɛvea a.+ 4 Melɛka ɛhye amaa awie biala anva adalɛ edwɛkɛ menlemenle ambɛlɛbɛla bɛ. 5 Menle bɛ nwo lɔ wɔ nwonane nu ɛdeɛ, noko mewɔ bɛ nwo lɔ wɔ sunsum nu, na me nye die kɛ menwu bɛ ngyehyɛleɛ kpalɛ ne+ nee kɛzi bɛ diedi gyi kpundii wɔ Kelaese anu la.+

6 Ɛhye ati, kɛ mɔɔ bɛlie Awulae Kelaese Gyisɛse bɛdo nu la, bɛhɔ zo bɛ nee ye ɛlua, 7 bɛsosɔ ndinli na bɛnyi wɔ ye nu,+ na bɛzi pi wɔ diedi ne anu+ kɛ mɔɔ bɛhilehilele bɛ la, na bɛmaa moyɛlɛ ɛyi bɛ tɛkɛɛ.+

8 Bɛnlea boɛ na awie anva ewiade nrɛlɛbɛ nee mɛlɛbɛla mgbane+ mɔɔ gyi sonla amaamuo nee ewiade ye mɔlebɛbo ninyɛne zo na ɔngyi Kelaese ngilehilelɛ ne azo la anyɛ bɛ ngɛkɛlɛ; 9 ɔluakɛ Nyamenle subane ne mɔ amuala ɛyi ye sonlabaka ne tɛkɛɛ.+ 10 Yemɔti ɔlua ɔdaye mɔɔ ɔle arane nee tumililɛ muala ati la anwo zo, bɛngyia debie biala.+ 11 Kɛmɔ bɛ nee ye yɛle ko la ati, bɛdabɛ noko bɛpɛle bɛ mrenyiazo mɔɔ bɛanva ɛsalɛ a bɛpɛle a, bɛyele nwonane nu sonlabaka ne bɛvile ɛkɛ,+ ɛhye kile Kelaese anu mrenyiazo ɛpɛlɛ.+ 12 Ɔluakɛ bɛziele bɛ bɛbokale ɔ nwo wɔ ye ɛzɔnenlɛ ne anu,+ na kɛmɔ bɛ nee ye yɛle ko la ati, bɛdwazole bɛdabɛ noko bɛbokale ɔ nwo,+ ɔlua Nyamenle mɔɔ dwazole ye vile mowuamra anu la nwanwane gyima ne anu diedi mɔɔ bɛnyianle la azo.+

13 Bieko, ɛnee bɛ mɛladonlɛ nee bɛ mrenyiazo mɔɔ bɛtɛpɛle la ati ɛnee bɛwu ɛdeɛ, noko Nyamenle maanle bɛ nee ye rale ngoane nu.+ Ɔvile atiakunlukɛnlɛma nu ɔvale yɛ mɛladonlɛ kɔsɔɔti ɔhyɛle yɛ+ 14 na ɔkyikyile mɛla ne mɔɔ bɛhɛlɛ mɔɔ ɛnee tia yɛ+ la ɔvile ɛkɛ.+ Ɔyele ɔvile ɛkɛ na ɔvale ɔbɔle amaneɛnwunlɛ baka* ne anu.+ 15 Ɔkpale arane nee tumililɛ ne mɔ anwo ɛdanlɛ na ɔmaanle ɔlale ali wienyi wɔ bagua nu kɛ yeli bɛ nwo zo konim,+ na ɔluale zo* ɔlile bɛ nyunlu wɔ konimlilɛ ɛlɔnwɔnedolɛ nu.

16 Yemɔti bɛmmamaa awie biala bua bɛ ndɛne wɔ mɔɔ bɛdi nee mɔɔ bɛno+ anzɛɛ ɛvoyialilɛ anzɛɛ siane fofolɛ+ anzɛɛ ɛnwomenlelielɛ kenle nwo.+ 17 Ninyɛne zɔhane mɔ le ninyɛne mɔɔ bara la sɔhovolɛ,+ na bɛ kpalɛ kpalɛ ne a le Kelaese.+ 18 Bɛmmamaa awie biala maa ahyɛlɛdeɛ ne bɔ bɛ,+ awie mɔɔ anye die adalɛ mɛlɛbɛnwoaze nee anwumabɔvolɛma ɛzonlenlɛ nwo la, “ɔgyinla”* ninyɛne mɔɔ ɔnwu ye la azo. Ɔfa ye nwonane nu adwenle ne ɔtu ɔ nwo mɔɔ ndelebɛbo biala ɛnle nu a, 19 yɛɛ ɔmbeta tile ne,+ ahenle mɔɔ ɔlua ɔ nwo zo a sonlabaka ne amuala nyia mɔɔ ɔhyia nwo na ɔmaa ye nvɛyeba ne mɔ amuala sosɔ bɛ nwo yɛ ko na ɔnyi kɛ mɔɔ Nyamenle kpondɛ kɛ ɔnyi la.+

20 Saa bɛ nee Kelaese wule wɔ ewiade ye mɔlebɛbo ninyɛne nwo a,+ ɛnee duzu ati a bɛkɔ zo bɛbɔ bɛ ɛbɛla kɛ bɛtɛbɔ ewiade ne anu na bɛdi mɛla mɔɔ le kɛ:+ 21 “Bɛmmasɔ nu, bɛmmasɔ bɛnea, bɛmmafa bɛ sa bɛka ye” la azo, 22 mɔɔ fale ninyɛne kɔsɔɔti mɔɔ bɛfa bɛyɛ debie a ɔsɛkye la anwo, kɛ mɔɔ menli mɛla nee bɛ ngilehilelɛ de la ɛ?+ 23 Ɔzɔho kɛ nrɛlɛbɛ wɔ ninyɛne ɛhye mɔ anu, noko bɛle ɛzonlenlɛ nu debie mɔɔ sonla ɛhyehyɛ nee adalɛ mɛlɛbɛnwoaze, bɛkile sonlabaka ne nyane,+ na ɔmboa ɔmmaa bɛngo bɛntia nwonane ne atiakunluwɔzo.

3 Saa bɛdwazo bɛ nee Kelaese a,+ ɛnee bɛhɔ zo bɛkpondɛ ninyɛne mɔɔ wɔ anwuma lɔ, ɛleka mɔɔ Kelaese de wɔ Nyamenle asa fema zo la.+ 2 Bɛva bɛ adwenle bɛzie ninyɛne mɔɔ wɔ anwuma lɔ la azo,+ na tɛ ninyɛne mɔɔ wɔ azɛlɛ ye azo la ɔ.+ 3 Ɔluakɛ bɛwule, na bɛva bɛ ngoane bɛvea Kelaese mɔɔ nee Nyamenle le ko la anu. 4 Saa bɛda Kelaese, yɛ ngoane ne ali a,+ bɛbala bɛdabɛ noko ali bɛaboka ɔ nwo wɔ anyunlunyia nu.+

5 Yemɔti, bɛhu bɛ sonlabaka ne nvɛyeba ne mɔ+ mɔɔ wɔ azɛlɛ ye azo la wɔ adwɔmane ɛbɛla,* evinli nyɛleɛ, nla nwo atiakunluwɔzo ɛtane,+ nganeɛdelɛ ɛtane nee anyebolo mɔɔ le awozonle ɛzonlenlɛ la anwo. 6 Ninyɛne ɛhye mɔ ati a Nyamenle ɛya ne ɛlɛba a. 7 Bɛdabɛ noko, mekɛ bie kɛ bɛbɔle bɛ ɛbɛla la ɛne.+ 8 Noko kɛkala, ɔwɔ kɛ bɛye ɛhye mɔ amuala bɛgua: ɛya, ɛya kpole, ninyɛndane,+ aholoba,+ yɛɛ bɛmmamaa edwɛkɛ ɛtane fi bɛ nloa anu finde.+ 9 Bɛmmabɔ adalɛ bɛkile bɛ nwo.+ Bɛye subane* dɛba ne+ nee ye nyɛleɛ ne mɔ bɛgua, 10 na bɛva subane fofolɛ ne+ mɔɔ bɛlua nɔhalɛ ndelebɛbo zo bɛlɛyɛ ye fofolɛ kɛ mɔɔ Ahenle mɔɔ bɔle ye la subane ne de la bɛwula,+ 11 ɛleka mɔɔ Gilikinli anzɛɛ Dwuunli, mrenyiazo mɔɔ bɛpɛ anzɛɛ bɛmpɛ, ɛyɛvolɛ, Siteanenli,* akɛlɛ anzɛɛ dehelɛ ɛnle ɛkɛ la; na Kelaese le ninyɛne muala na ɔwɔ ɔ muala anu la.+

12 Bɛle menli mɔɔ Nyamenle ɛkpa bɛ,+ nwuanzanwuanzama nee alɔvolɛ, yemɔti bɛwula ahunluyelɛyelalɛ,+ atiakunlukɛnlɛma, mɛlɛbɛnwoaze,*+ bɛtɛɛyɛlɛ+ nee abotane.+ 13 Saa bɛ nuhua bie lɛ edwɛkɛ tia ɔ gɔnwo bɔbɔ a,+ bɛhɔ zo bɛnyia abotane bɛmaa bɛ nwo na bɛva bɛhyɛ bɛ nwo bɔkɔɔ.+ Kɛ mɔɔ Gyihova* ɛva bɛ ɛtane ɛhyɛ bɛ bɔkɔɔ la, bɛdabɛ noko bɛyɛ ye zɔhane ala.+ 14 Na ɛhye mɔ amuala anzi, bɛwula ɛlɔlɛ,+ ɔluakɛ ɔmaa menli koyɛlɛ di munli.+

15 Bieko, bɛmaa Kelaese anzodwolɛ ne ɛhile bɛ ahonle mɔɔ ɔwɔ kɛ ɔyɛ la,*+ ɔluakɛ bɛvɛlɛle bɛ bɛrale zɔhane anzodwolɛ ne anu wɔ sonlabaka ko anu. Bɛhile anyezɔlɛ. 16 Bɛmaa Kelaese edwɛkɛ ne ɛyɛ gyima dɔɔnwo wɔ bɛ nu wɔ nrɛlɛbɛ muala anu. Bɛhɔ zo bɛva edwɛne,+ ayɛlɛyelɛ nee sunsum nu moyɛlɛ edwɛne bɛhilehile bɛ nwo na bɛmaa bɛ nwo anwosesebɛ,* na bɛdo edwɛne wɔ bɛ ahonle nu bɛmaa Gyihova.*+ 17 Wɔ bɛ edwɛkɛ nee bɛ nyɛleɛ biala anu, bɛyɛ debie biala wɔ Awulae Gyisɛse duma nu na bɛlua ɔ nwo zo bɛyɛ Nyamenle Selɛ ne mo.+

18 Yelɛma, bɛbɛlɛ bɛ nwo aze bɛmaa bɛ hu mɔ+ kɛ mɔɔ ɔfɛta wɔ Awulae anu la. 19 Kunlima, bɛhɔ zo bɛhulo bɛ ye mɔ,+ na bɛmmafa bɛ nwo ɛya kpole.*+ 20 Ngakula, bɛdie bɛ awovolɛ wɔ debie biala anu,+ ɔluakɛ ɛhye a sɔ Awulae anye a. 21 Selɛma, bɛmmaka bɛ mra ɛya+ na bɛ rɛle ambɔ.* 22 Ngɛkɛlɛ, bɛdie bɛ menle mɔ mɔɔ bɛwɔ azɛlɛ ye azo la wɔ debie biala anu,+ tɛ mekɛ mɔɔ menli ɛlɛnea bɛ la angome, kɛ bɛyɛ bɛazɔ menli nye ala, emomu bɛyeye bɛ ahonle nu bɛyɛ ye wɔ Gyihova* anwo ɛzulolɛ nu. 23 Debie biala mɔɔ bɛyɛ la, bɛvi ɛkɛla* muala anu bɛyɛ kɛ bɛyɛ bɛamaa Gyihova,*+ na tɛ menli, 24 ɔluakɛ bɛze kɛ Gyihova* ɛkɛ a bɛbanyia agyapadeɛ ne kɛ ahatualɛ a.+ Bɛzonle bɛ Menle Kelaese. 25 Nɔhalɛ nu, mɔɔ yɛ ɛtane la banyia ye ɛtane ne anwo ahatualɛ,+ ɔnnea sonla nyunlu.+

4 Bɛmɛ menlenlɛma, bɛ nee bɛ ngɛkɛlɛ ɛli ye wɔ adenle kɛnlɛma mɔɔ le kpalɛ la azo, ɔluakɛ bɛze kɛ bɛdabɛ noko bɛlɛ bɛ Menle wɔ anwuma.+

2 Bɛhɔ zo bɛyɛ asɔne,+ bɛva moyɛlɛ bɛhɔ zo bɛzinza wɔ asɔneyɛlɛ nu.+ 3 Mekɛ ko ne ala, bɛyɛ asɔne bɛmaa yɛdayɛ noko,+ amaa Nyamenle abuke adenle amaa yɛ na yɛabɔ Kelaese anwo fealeranu edwɛkɛ nwuanzanwuanza ne mɔɔ ɔti mela efiade la nolo,+ 4 na meabɔ ye nolo kpalɛ kɛ mɔɔ ɔfɛta kɛ meyɛ ye la.

5 Bɛhɔ zo bɛ nee bɛdabɛ mɔɔ bɛmboka bɛ nwo la ɛlua nrɛlɛbɛ nu, na bɛva bɛ mekɛ bɛli gyima kpalɛ.*+ 6 Bɛmaa bɛ ɛdendɛlɛ ɛyɛ fɛ dahuu na ngyenle ɛrɛla nu,+ amaa bɛanwu kɛzi ɔwɔ kɛ bɛbua awie biala la.+

7 Tekekɛse+ mɔɔ le me diema kulovolɛ nee sonvolɛ nɔhavo nee me gɔnwo akɛlɛ wɔ Awulae anu la baha me nwo edwɛkɛ kɔsɔɔti ahile bɛ. 8 Melɛsoa ye meara bɛ nwo lɔ amaa bɛanwu kɛzi yɛ nwo de la na yeakyekye bɛ rɛle. 9 Ɔ nee Onɛsemɛse,+ me diema nɔhavo mɔɔ mekulo ye na ɔvi bɛ nehane la a ɛlɛba a; bɛbaha mɔɔ ɛlɛkɔ zo wɔ ɛke la amuala bɛahile bɛ.

10 Alesetaakɛse+ mɔɔ nee me la efiade la biza bɛ, yɛɛ Maake+ mɔɔ le Baanabase busuanli (mɔɔ bɛhanle bɛhilele bɛ kɛ ɔba bɛ nehane a bɛlie ye+ kɛnlɛma la), 11 nee Gyisɛse mɔɔ bɛfɛlɛ ye Gyɛsetɛse la noko biza bɛ, bɛboka bɛdabɛ mɔɔ bɛpɛ bɛ mrenyiazo la anwo. Ɛhye mɔ ala a le me gɔnwo mɔ gyimayɛvoma wɔ Nyamenle Belemgbunlililɛ ne anwo a, na bɛkyekye me rɛle* kpole kpalɛ. 12 Ɛpafelase+ mɔɔ le Kelaese Gyisɛse akɛlɛ na ɔvi bɛ nehane la biza bɛ. Dahuu ɔyɛ asɔne ɛsesebɛ ɔmaa bɛ amaa bɛagyinla kpundii kɛ menli mɔɔ ɛnyi sunsum nu la na bɛanyia anwodozo kpole wɔ Nyamenle ɛhulolɛdeɛ ne amuala anu. 13 Na medi ɔ nwo daselɛ kɛ ɔyɛ gyima ɛsesebɛ ɔmaa bɛ nee menli mɔɔ wɔ Lawɔdesia nee Haelapɔlese la.

14 Luku,+ ayileyɛvolɛ kulovolɛ ne nee Dimase+ biza bɛ. 15 Mebiza mediema mɔɔ wɔ Lawɔdesia nee adiema raalɛ Nemefa nee asafo ne mɔɔ wɔ ye sua nu ɛkɛ ne la.+ 16 Na saa bɛkenga kɛlata ɛhye wɔ bɛ ɛkɛ ne bɛwie a, bɛyɛ ngyehyɛleɛ bɛmaa bɛgenga ye wɔ+ Lawɔdesiama asafo ne noko anu na bɛdabɛ noko bɛgenga Lawɔdesia ɛdeɛ ne. 17 Akee bɛha bɛhile Aakepɛse kɛ:+ “Nea ɛzonlenlɛ gyima ne mɔɔ ɛnyianle ye ɛvile Awulae ɛkɛ ne la azo boɛ, amaa wɔayɛ wɔawie.”

18 Medame Pɔɔlo me sa anloa ɛne,+ mebiza bɛ. Bɛhakye kɛ mela efiade.+ Ɛlolɛ kpole ɛha bɛ.