ZƐFANAYA
1 Edwɛkɛ mɔɔ Gyihova hanle hilele Zɛfanaya,* Kuhyae ara, Gɛdalaya ara, Amalaya ara, Hɛzikaya ara, wɔ Emɔn ara Dwosaya,+ Dwuda belemgbunli ne mekɛ zo la ɛne:
2 “Mebakpoa debie biala mɔɔ wɔ azɛlɛ ne azo la meagua ye lɔ,” kɛ Gyihova se la ɛne.+
3 “Mebakpoa menli nee nane.
Mebakpoa anwomanyunlu nloma nee nyevile nu fɛlɛ,+
Azedolɛ awolɛ ne mɔ*+ nee ɛtanevolɛma meagua bɛ lɔ;
Na mebaye alesama meavi azɛlɛ ne azo,” kɛ Gyihova se la ɛne.
4 “Mebadende me sa wɔ Dwuda
Nee menli mɔɔ de Gyɛlusalɛm la kɔsɔɔti anwo zo,
Na mebakyikyi Beeyale anwo debie biala meavi ɛke,+
Adalɛ nyamenle ɛsɔfoma nee ɛsɔfoma gyɛne aluma,+
5 Menli mɔɔ kɔ azua ti zo kɔbɔ bɛ ti aze maa anwuma ɛlɔne ne,+
Yɛɛ menli mɔɔ bɔ bɛ ti aze ka nɔhalɛlilɛ nwo ndane kile Gyihova+
Na mekɛ ko ne ala bɛka nɔhalɛlilɛ nwo ndane bɛkile Malekam la;+
6 Menli mɔɔ twe bɛ nwo fi Gyihova anwo+
Nee menli mɔɔ bɛmkpondɛ Gyihova anzɛɛ bɛmbiza ɔ bo zo la.”+
7 Bɛyɛ koonwu wɔ Tumivolɛ Awulae Gyihova anyunlu, ɔluakɛ Gyihova kenle ne ɛbikye.+
Gyihova ɛziezie afɔlebɔdeɛ bie; yede menli mɔɔ yedo ɛsalɛ yevɛlɛ bɛ la anwo.
8 “Wɔ Gyihova afɔlebɔlɛ kenle ne, mebamaa mgbanyima ne mɔ,
Belemgbunli ne amra mrenyia+ nee menli mɔɔ wula maanle gyɛne zo adɛladeɛ la kɔsɔɔti abu mgbonda.
9 Mebamaa awie biala mɔɔ bavo bama* ne azo wɔ zɔhane kenle ne,
Bɛdabɛ mɔɔ bɛfa basabasayɛlɛ nee mɛlɛbɛla bɛyi bɛ menle sua nu la abu mgbonda.”
10 Kɛ Gyihova se la ɛne, “Kenle zɔhane,
Bɛbade kɛ bɛlɛsu bɛadeɛdea nu wɔ Fɛlɛ Anlenkɛ Kpole ne anloa,+
Bɛlɛye awolɛ wɔ suakpole ne Maangyeba Fofolɛ ne azo,+
Yɛɛ bɛbade ɛzɛkyelɛ kpole ne wɔ awoka ne mɔ azo.
11 Bɛdabɛ mɔɔ bɛde Maketɛhye* la, bɛzu bɛye awolɛ,
Ɔluakɛ bɛzɛkye gualilɛma ne amuala;
Bɛzɛkye bɛdabɛ mɔɔ bɛsuzu dwɛtɛ fufule la kɔsɔɔti.
12 Mekɛ zɔhane mebava kɛnlaneɛ meanleɛnlea Gyɛlusalɛm kpalɛ,
Na mebamaa menli mɔɔ anwo ɛdɔ bɛ* na bɛka ye wɔ bɛ ahonle nu kɛ,
‘Gyihova ɛnrɛyɛ kpalɛ yɛɛ ɔnrɛyɛ ɛtane’ la abu mgbonda.+
13 Bɛbasesa bɛ anwonyia na bɛazɛkye bɛ azua.+
Bɛbasisi azua noko bɛnrɛdɛnla nu;
Yɛɛ bɛbayɛ vanye egyinli noko bɛnrɛnlo nuhua nwanye ne bie.+
14 Gyihova kenle kpole ne ɛbikye!+
Gyihova kenle ne ane yɛ ɛnwonle.+
Ɛkɛ ne a kovolɛ badea nu azu a.+
15 Kenle zɔhane le ɛya kenle,+
Amaneɛnwunlɛ nee nyanelilɛ kenle,+
Ahumu nee ɛzɛkyelɛ kenle,
Awozinli nee awozinli kabii kenle,+
Amungu nee awozinli kabikabi kenle,+
16 Kenle mɔɔ bɛbade aweɛne nee konle+
Mɔɔ tia azuamgbole mɔɔ bɛlie nwolɛ bane nee tawa ndendenle ne mɔ ane la.+
17 Mebamaa alesama anwu amaneɛ,
Na bɛbadia kɛ anyenzinliravolɛma,+
Ɔluakɛ Gyihova a bɛyɛ ɛtane bɛtia ye a.+
18 Bɛ dwɛtɛ fufule anzɛɛ bɛ nvutuke ɛnrɛhola ɛnrɛlie bɛ wɔ Gyihova ɛya kenle ne;+
Ye ɛya ne le kɛ senle na ɔbayela azɛlɛ ne,+
Ɔluakɛ ɔbahu menli mɔɔ wɔ azɛlɛ ne azo la amuala yeamaa yeayɛ alɔbɔlɛ.”+
2 Kolaa na mɛla ne ayɛ gyima,
Kolaa na kenle ne aze kɛ abonle,
Kolaa na Gyihova ɛya wuluwulu ne ara bɛ nwo zo,+
Kolaa na Gyihova ɛya kenle ne ara bɛ nwo zo la,
3 Bɛkpondɛ Gyihova,+ bɛdabɛ mɔɔ bɛle bɛlɛvo* wɔ azɛlɛ ne azo la amuala,
Na bɛdi ye tenlene mɛla* ne mɔ azo la.
Bɛkpondɛ tenleneyɛlɛ, bɛkpondɛ mɛlɛbɛnwoaze.
Bie a* bɛbaheda bɛ nwo zo wɔ Gyihova ɛya kenle ne anu.+
4 Ɔluakɛ Gaza bayɛ sua mɔɔ bɛkpo ye;
Yɛɛ Ahyekɛlɔn bayɛ suadu.+
5 “Bɛdabɛ mɔɔ bɛde nyevile nloa wɔ Kɛlɛtema maanle nu la, bɛ gyakɔ!+
Gyihova nee bɛ lɛ edwɛkɛ.
O Keena, Filisitiama azɛlɛ, mebazɛkye wɔ,
Amaa sonla ko bɔbɔ anga zo.
6 Na nyevile ne anloa bayɛ nane adidileka,
Mɔɔ bula mɔɔ mboane no nu yɛɛ mboane tunli mɔɔ bɛva awolɛ bɛyɛ la a wɔ ɛkɛ a.
7 Ɔbayɛ Dwuda sua nu amra mɔɔ baha la maanzinli;+
Ɛkɛ ne a bɛbadidi a.
Bɛbala Ahyekɛlɔn azua ne mɔ anu nɔsolɛ nu.
Ɔluakɛ Gyihova bɛ Nyamenle ne banlea bɛ,
Na yeaboɔboa bɛ menli mɔɔ hɔle akɛlɛzonlenlɛ nu la anloa bieko.”+
8 “Mede Mowabe tendɛtia+ nee Amɔnoma aholoba ne,+
Menli mɔɔ bɛbɔle me menli ne aholoba na bɛdule bɛ nloa anu kɛ bɛdie bɛ azɛlɛ ne la.+
9 Ɔti mekɛ ala mɔɔ mede aze la,” kɛ ɛlɔne Gyihova, Yizilayɛ Nyamenle ne se la ɛne,
“Mowabe bayɛ kɛ Sodɔm,+
Na Amɔn ayɛ kɛ Gomɔla,+
Ɛleka mɔɔ ndile, ngyenle kuma nee azɛlɛ mɔɔ ɛzɛkye bɔkɔɔ wɔ la.+
Me menli ne mɔɔ baha la bɛave bɛ ninyɛne,
Na me maanle ne anu amra mɔɔ baha la baza bɛ alie bɛ azɛlɛ ne.
10 Bɛ anwomemaazo ne ati, debie mɔɔ bɛbanyia ye la ɛne,+
Ɔluakɛ bɛbɔle ɛlɔne Gyihova menli ne aholoba na bɛmemaanle bɛ nwo zo bɛtiale bɛ.
11 Gyihova anwo bayɛ bɛ ɛzulolɛ;
Ɔluakɛ ɔbazɛkye azɛlɛ ne azo nyamenle ne mɔ amuala,
Na maanle maanle mɔɔ bɛde mbɔra zo la kɔsɔɔti babɔ bɛ ti aze amaa ye,+
Biala bayɛ ɛhye wɔ ɛleka mɔɔ ɔwɔ la.
12 Mebava me konle dadeɛ ne meahu bɛdabɛ Yiteyopeama noko.+
13 Ɔbadende ɔ sa wɔ sɔlɔ na yeazɛkye Aselea,
Na ɔbamaa Nenɛvɛ adɔ mgbane,+ na yeayɛ resee kɛ ɛsɛlɛ zo.
14 Nyɛmoa, nane ngakyile mɔɔ anwo yɛ ɛzulolɛ la* kɔsɔɔti bala ɛkɛ.
Azule nloa bɔngɔbɔngɔ nee fuke bala ye mpila ne mɔ mɔɔ ɛbubu la avinli nɔɔzo.
Ɛnelɛ bie bado edwɛne wɔ nvɛnzɛlɛ ne anu.
Bɛbazɛkye ye nlenkɛ ne mɔ;
Ɔluakɛ ɔbaza ye sida ndaboa ne mɔ yeagua zo.
15 Suakpole ne mɔɔ ɛnee memaa ɔ nwo zo na ɔlɛ banebɔlɛ la ɛne,
Ɛnee ɔka wɔ ye ahonle nu kɛ, ‘Medame a le medame, na awie bieko ɛnle ɛkɛ.’
Nea kɛzi ɔ nwo ɛyɛ menli ɛzulolɛ bie ɛ,
Ɛleka mɔɔ nane anwo ɛzulolɛ da la!
Awie biala mɔɔ bapɛ nu wɔ ɛkɛ la babɔ nvonloma na yeabɔ ɔ sa ati.”+
3 Suakpole ne mɔɔ ɛde atua, yegua ɔ nwo evinli na ɔsisi awie mɔ la gyakɔ!+
2 Yeandie awie biala edwɛkɛ;+ yeanlie ɛdenrɛdenrɛlɛ yeando nu.+
Yeanva ɔ nwo yeando Gyihova anwo zo;+ yeambikye ye Nyamenle ne.+
3 Ye mgbanyima mɔɔ wɔ zo la le kɛ awenade mɔɔ ɛlɛkpo la.+
Ye ndɛnebuavolɛma le kɛ bedi mɔɔ ɛvinde nɔsolɛ nu la;
Bɛngyakyi bowule ko bɔbɔ bɛmmaa aleɛ ɛngye zo.
4 Ye ngapezoma le adubɛnwo, bɛle mɛlɛbɛla.+
5 Gyihova le tenlenenli wɔ ye avinli;+ ɔnyɛ ɛtane biala.
Nwonlomɔ biala ɔmaa bɛnwu ye ndɛnebualɛ ne mɔ,+
Kɛ mɔɔ ɔmaa aleɛ kye dahuu la.
Noko ɛtanenli ne ɛnze anyiemgba deɛ holɛ.+
6 “Menzɛkyele maanle maanle; bɛ bane ayiazo tawa ne mɔ yɛle mgbane.
Menzɛkyele bɛ awɔdenle ne mɔ amaa awie biala anva zolɛ.
Bɛ azua ne mɔ zɛkyele, sonla ko bɔbɔ anga ɛkɛ, awie biala ɛnle zolɛ.+
7 Menganle kɛ, ‘Ye biala anu ɛbazulo me na wɔamaa meadenrɛdenrɛ wɔ,’+
Noko ɛnee ɛtane ala a bɛkulo kɛ bɛyɛ a.+
8 ‘Yemɔti bɛnyia abotane bɛhendɛ me,’+ kɛ Gyihova se la ɛne,
‘Kɔkpula kenle ne mɔɔ mebadwazo kɛ mesesa bɛ nwo ninyɛne la,*
Ɔluakɛ me ndɛnebualɛ a le kɛ meboɔboa maanle maanle nloa, meaha arelemgbunlililɛ meabɔ nu,
Na meawola me ɛya ne meagua bɛ nwo zo; me ɛya wuluwulu ne amuala;+
Ɔluakɛ me ɛya ne le kɛ senle na ɔbayela azɛlɛ ne amuala.+
9 Akee mebahakyi menli ne mɔ aneɛ ne meayɛ ye aneɛ tagyee,
Amaa bɛ muala bɛabɔ Gyihova duma,
Na bɛazonle ye wɔ koyɛlɛ nu.’+
10 Menli mɔɔ ɛlɛbodo me, me menli mɔɔ ɛbɔ asande la,*
Bava ahyɛlɛdeɛ avi Yiteyopea azule ne mɔ anloa maanzinli ne anu arɛlɛ me.+
11 Kenle zɔhane bɛnrɛbɔ wɔ anyiemgba
Wɔ nyɛleɛ mɔɔ ɛyɛle ɛdele atua ɛtiale me la amuala anwo,+
Ɔluakɛ mebaye anwomemaazoma mɔɔ tu bɛ nloa anu la meavi wɔ nu;
Na ɛnrɛmemaa ɛ nwo zo bieko ɛlɛ wɔ me boka nwuanzanwuanza ne azo.+
12 Mebamaa menli mɔɔ bɛlɛ bɛ nwo aze nee koahweabanema aha wɔ avinli,+
Na bɛbava Gyihova duma ne bɛayɛ bɛ ɛvealeka.
13 Yizilayɛma mɔɔ baha la+ ɛnrɛva ɛtaneyɛlɛ ɛnrɛzie bɛ nye zo;+
Bɛnrɛbɔ adalɛ, anzɛɛ bɛnrɛnwu mɛlɛbɛla ɛtafinlimalɛ wɔ bɛ nloa anu;
Bɛbadidi na bɛala, na awie biala ɛnrɛha bɛ ɛzulolɛ.”+
14 O Zayɔn,* fa anyelielɛ tea nu!
O Yizilayɛ, tea nuhua wɔ konimlilɛ nu!+
O Gyɛlusalɛm,* maa ɛ nye ɛlie na fa wɔ ahonle muala di fɛlɛko!+
15 Gyihova ɛye ndɛnebualɛ ne mɔ mɔɔ tia wɔ la ɛvi ɛkɛ.+
Yemaa wɔ agbɔvolɛ ɛzia bɛ nzi.+
Gyihova, Yizilayɛ Belemgbunli ne wɔ wɔ avinli.+
Ɛnrɛzulo ngyegyelɛ bieko.+
16 Kenle zɔhane bɛbaha bɛahile Gyɛlusalɛm kɛ:
“O Zayɔn, mmasulo.+
Mmamaa ɛ sa nu to.
17 Gyihova wɔ Nyamenle ne wɔ wɔ avinli.+
Ɔle Tumivolɛ la ati, ɔbalie wɔ.
Ɔ nye balie ɛ nwo wɔ fɛlɛkolilɛ kpole nu.+
Ɔ kunlu badwo ɔ nwo* wɔ ye ɛlɔlɛ ne anu.
Ɔ nye balie ɛ nwo na yeava anyelielɛ yeadeɛdea nu.
18 Mebaboɔboa menli mɔɔ bɛamba wɔ ɛvoyialilɛ ne mɔ abo la ati bɛlɛdi nwolɛ nyane la anloa;+
Bɛamba bie ɔluakɛ ɛnee ye anyiemgba ne gua bɛ ti zo.+
19 Nea! Mekɛ zɔhane, me nee menli mɔɔ sisi wɔ la kɔsɔɔti bali;+
Mebalie awie mɔɔ tia tɔ zo la,+
Na meaboɔboa menli mɔɔ ɛbɔ asande la anloa.+
Mebamaa bɛaye bɛ ayɛlɛ na bɛalie duma
Wɔ azɛlɛ mɔɔ bɛbɔle bɛ anyiemgba wɔ zolɛ la kɔsɔɔti azo.
20 Mekɛ mɔɔ mebaboɔboa bɛ nloa la,
Mebava bɛ meara sua nu wɔ zɔhane mekɛ ne.
Ɔluakɛ mebamaa bɛalie duma na bɛaye bɛ ayɛlɛ+ wɔ menli mɔɔ wɔ azɛlɛ ye azo la amuala avinli,
Wɔ mekɛ mɔɔ mebaboɔboa bɛ menli mɔɔ hɔle akɛlɛzonlenlɛ nu la anloa wɔ bɛ nye zo la,” kɛ Gyihova se la ɛne.+
Ɔ bo kile “Gyihova Ɛva Ɛzie.”
Ɔbayɛ kɛ, awozonle ɛzonlenlɛ nwo ninyɛne anzɛɛ nyɛleɛ.
Ɔbahola yeayɛ bama ne mɔɔ belemgbunli ebia ne gyi zo la.
Ɔbayɛ kɛ Gyɛlusalɛm ɛleka bie mɔɔ bikye Fɛlɛ Anlenkɛ Kpole ne la.
Hibulu aneɛ nu, “menli mɔɔ le kɛ nwanye mɔɔ ɛla ɔ bo” wɔ debie nu.
Anzɛɛ “ɔlɛpele ndɛndɛ!”
Hibulu aneɛ nu, “anyalɛ.”
Anzɛɛ “bɛbɛlɛ bɛ nwo aze.”
Hibulu aneɛ nu, “ye ndɛnebualɛ.”
Anzɛɛ “Wɔannea a.”
Anzɛɛ “sɛnzɛnegyinla.”
Hibulu aneɛ nu, “nanemgbole mɔɔ wɔ maanle ne anu la.”
Anzɛɛ “metwe ɔ nzo.”
Anzɛɛ ɔkola ɔkile, “mebadwazo kɛ dasevolɛ la.”
Hibulu aneɛ nu, “me menli mɔɔ ɛbɔ asande la ara raalɛ ne.”
Hibulu aneɛ nu, “Zayɔn ara raalɛ.”
Hibulu aneɛ nu, “Gyɛlusalɛm ara raalɛ.”
Anzɛɛ “Ɔbayɛ koonwu; Ɔ nwo badɔ ye.”