EMƆSO
1 Edwɛkɛ mɔɔ Emɔso* mɔɔ ɛnee boka Tɛkowa+ mboaneneavolɛma ne anwo nyianle ye wɔ ɛnyelɛzodeɛnwunlɛ nu mɔɔ fale Yizilayɛ anwo la ɛne. Ɔnyianle ye wɔ Dwuda Belemgbunli Yuzaya+ yɛɛ Dwowahye+ ara Gyɛlɔbowam,+ Yizilayɛ belemgbunli ne mekɛ zo, ɛvolɛ nwiɔ kolaa na azɛlɛkpusulɛ ne azi.+ 2 Ɔhanle kɛ:
“Gyihova bakpo wɔ Zayɔn,
Yɛɛ ɔbamaa ɔ ne zo yeavi Gyɛlusalɛm.
Mboaneneavolɛma nyɛmoa adidileka ne mɔ bawe,
Yɛɛ Kamɛle ati zo ndile ne bawe.”+
3 “Edwɛkɛ mɔɔ Gyihova ɛha la ɛne,
‘“Kɛmɔ Damasekɛse ɛyɛ ɛtane fane dɔɔnwo la ati, menrɛmaa ɔnrɛha,
Ɔluakɛ bɛvale ma ɛwosolɛ mbulalɛ bɛwosole Geleade.+
5 Mebabubu Damasekɛse+ nlenkɛ mgbole nzi mbulalɛ ne mɔ;
Mebazɛkye menli mɔɔ wɔ Bikate-eevɛn la
Na meazɛkye ahenle mɔɔ di tumi* wɔ Bɛte-yidɛn la;
Na menli mɔɔ wɔ Selea la bahɔ akɛlɛzonlenlɛ nu wɔ Kɛɛ,”+ kɛ Gyihova se la ɛne.’
6 Edwɛkɛ mɔɔ Gyihova ɛha la ɛne,
‘“Kɛmɔ Gaza+ ɛyɛ ɛtane fane dɔɔnwo la ati, menrɛmaa ɔnrɛha,
Ɔluakɛ bɛvale menli dɔɔnwo bɛhɔle akɛlɛzonlenlɛ nu,+ na bɛvale bɛ bɛmaanle Yidɔm.
7 Yemɔti mebado senle wɔ Gaza+ bane ne anu,
Na ɔbayela ye tawa mgbole ne mɔ.
8 Mebazɛkye menli mɔɔ wɔ Ahyedɔdo la,+
Na meazɛkye ahenle mɔɔ di tumi* wɔ Ahyekɛlɔn+ la;
Mebahwe Ɛkelɔn+ anzo,
Na Filisitiama mɔɔ ɛha la bawu,”+ kɛ Tumivolɛ Awulae Gyihova se la ɛne.’
9 Edwɛkɛ mɔɔ Gyihova ɛha la ɛne,
‘Kɛmɔ Taya+ ɛyɛ ɛtane fane dɔɔnwo la ati, menrɛmaa ɔnrɛha,
Ɔluakɛ bɛvale menli dɔɔnwo bɛhɔle akɛlɛzonlenlɛ nu, na bɛvale bɛ bɛmaanle Yidɔm,
Yɛɛ kɛmɔ bɛangakye mediemayɛlɛ ngyekyeleɛ ne la ati.+
10 Yemɔti mebado senle wɔ Taya bane ne anu,
Na ɔbayela ye tawa mgbole ne mɔ.’+
11 Edwɛkɛ mɔɔ Gyihova ɛha la ɛne,
‘Kɛmɔ Yidɔm+ ɛyɛ ɛtane fane dɔɔnwo la ati, menrɛmaa ɔnrɛha,
Ɔluakɛ ɔvale konle dadeɛ ɔvoanle ɔ diema ne ndinlizo,+
Na ɔkpole kɛ ɔbaze ye anwunvɔne;
Ɔvale ɛya ɔtetele bɛ nu bɔkɔɔ,
Yɛɛ ɔvale bɛ nwo ɛya dahuu.+
13 Edwɛkɛ mɔɔ Gyihova ɛha la ɛne,
‘“Kɛmɔ Amɔnoma+ ɛyɛ ɛtane fane dɔɔnwo la ati, menrɛmaa ɔnrɛha,
Ɔluakɛ bɛkpukekpukele Geleade nrenzɛvolɛma akunlu amaa bɛadɛlɛ bɛ azɛlɛ ne anu.+
14 Yemɔti mebado senle wɔ Relaba+ bane ne anu,
Na ɔbayela ye tawa mgbole ne mɔ,
Bɛbava konle ɛnelɛ bɛadeɛdea nu wɔ konle kenle ne,
Na ninyɛne bazɛkye wɔ ahumu kpole kenle ne.
15 Na bɛ belemgbunli ne nee ye mgbanyima ne mɔ bahɔ akɛlɛzonlenlɛ nu,”+ kɛ Gyihova se la ɛne.’
2 “Edwɛkɛ mɔɔ Gyihova ɛha la ɛne,
‘“Kɛmɔ Mowabe+ ɛyɛ ɛtane fane dɔɔnwo la ati, menrɛmaa ɔnrɛha,
Ɔluakɛ ɔyelale Yidɔm belemgbunli ne mbowule ɔvale ɔyɛle ewole.*
2 Yemɔti mebado senle wɔ Mowabe,
Na ɔbayela Kileɔto+ tawa mgbole ne mɔ;
Mowabe bawu wɔ begyebegye ne anu,
Wɔ konle nu ɛdeɛdeanlɛ nee aweɛne ɛbɔlɛ ne anu.+
4 Edwɛkɛ mɔɔ Gyihova ɛha la ɛne,
‘Kɛmɔ Dwuda+ ɛyɛ ɛtane fane dɔɔnwo la ati, menrɛmaa ɔnrɛha,
Ɔluakɛ bɛkpole Gyihova mɛla* ne,
Yɛɛ bɛanli ye ngyehyɛleɛ ne mɔ azo;+
Adalɛ ko ne ala mɔɔ bɛ nenyia mɔ lile ɔ nzi la ɛmaa bɛminli.+
5 Yemɔti mebado senle wɔ Dwuda,
Na ɔbayela Gyɛlusalɛm tawa mgbole ne mɔ.’+
6 Edwɛkɛ mɔɔ Gyihova ɛha la ɛne,
‘Kɛmɔ Yizilayɛ ɛyɛ ɛtane fane dɔɔnwo la ati,+ menrɛmaa ɔnrɛha,
Ɔluakɛ bɛtɔne tenlenenli bɛdie dwɛtɛ fufule,
Yɛɛ bɛtɔne ehyianli bɛdie mgbɔlaboa.+
Awie nee ye papa fa raalɛ ko ne ala,
Na bɛgua me duma nwuanzanwuanza ne anwo evinli.
8 Bɛdeda ndanlɛ mɔɔ awie mɔ ɛva ɛli agyinlanu ɛlie bosea la azo wɔ afɔlemokyea biala anyunlu;+
Yɛɛ bɛno nwanye mɔɔ bɛbɔ menli kakɛ bɛlie la wɔ bɛ nyamenle ne mɔ ɛzonlenlɛsua nu.’
9 ‘Noko medame a menzɛkyele Amɔlema menvile bɛ nyunlu a,+
Amɔlema mɔɔ ɛnee bɛ ndendenle le kɛ sida mbaka na bɛ nwo yɛ se kɛ oku mbaka la;
Menzɛkyele zolɛ ma ne nee ɔ bo ndinli ne mɔ.+
10 Menyele bɛ menvile Yigyibiti azɛlɛ zo,+
Na memaanle bɛluale fienemgbole ne anu ɛvolɛ 40,+
Kɛ bɛhɔva Amɔlema azɛlɛ ne bɛyɛ bɛ ɛdeɛ.
O Yizilayɛma, asoo ɔnle zɔ ɔ?’ kɛ Gyihova se la ɛne.
12 ‘Noko bɛhɔle zo bɛmaanle Nazalaema ne nza kɛ bɛnlo,+
Na bɛhanle bɛhilele ngapezoma ne kɛ: “Bɛmmaka ngapezo.”+
13 Yemɔti mebabɛtɛ bɛ wɔ bɛ bo zo ne,
Kɛ mɔɔ ehwili mɔɔ bɛpɛ ma bɛgua nu bɛmaa yeyi tɛkɛɛ la bɛtɛ debie wɔ ɔ bo la.
14 Sonla mɔɔ anwo yɛ ndɛ la ɛnrɛnyia ɛleka mɔɔ ɔnriandi yeahɔ a,+
Sonla mɔɔ anwo yɛ se la anwosesebɛ bawie,
Yɛɛ kovolɛ biala ɛnrɛhola ɛnrɛlie ɔ nwo.*
15 Awie mɔɔ to ɛda la ɛnrɛhola gyinla,
Awie mɔɔ agyakɛ abo yɛ ndɛ la ɛnrɛhola nriandi,
Yɛɛ awie mɔɔ ka ɛkpɔnwɔ la ɛnrɛhola ɛnrɛlie ɔ nwo.*
16 Kenle zɔhane, kovolɛma ne anu mɔɔ lɛ akɛnrasesebɛ* kpalɛ bɔbɔ la
Balɛ ɔ nwo zɔ anriandi,’+ kɛ Gyihova se la ɛne.”
3 “O Yizilayɛma, bɛdie edwɛkɛ mɔɔ Gyihova ɛha wɔ bɛ nwo la, ɔfale abusua ne mɔɔ ɔyele bɛ ɔvile Yigyibiti azɛlɛ zo la amuala anwo:
2 ‘Bɛ ngomekye a meze bɛ wɔ azɛlɛ ye azo mbusua kɔsɔɔti anu a.+
Ɛhye ati a mebamaa bɛabu bɛ ɛtane ne mɔ kɔsɔɔti anwo mgbonda la.+
3 Asoo menli nwiɔ bahola abɔ nu alua wɔ mekɛ mɔɔ bɛtɛyɛle ngyehyɛleɛ kɛ bɛyia* la ɔ?
4 Saa awenade ɛtɛnwunle nane kɛ ɔkye ye a, asoo ɔkpo wɔ kpɔkɛ nu?
Saa awenade kakula* ɛtɛkyele nane a, asoo ɔkulu wɔ ye dabelɛ ne?
5 Asoo aloma badɔ ɛhane nu wɔ azɛlɛ nwo wɔ mekɛ mɔɔ bɛtɛsuale ye ɛhane la ɔ?*
Asoo ɛhane ɛtɛkyele debie a ɔfuandi?
6 Saa bɛbɔ aweɛne nu wɔ suakpole zo a, asoo menli ne anwo ɛnwoso bɛ?
Saa esiane bie si suakpole ne azo a, asoo tɛ Gyihova a ɛyɛ a?
7 Ɔluakɛ Tumivolɛ Awulae Gyihova ɛnrɛyɛ debie biala
Kyesɛ ɔye ye fealeranu edwɛkɛ ne ɔkile ye azonvolɛ ngapezoma ne.+
8 Awenade ne ɛkpo!+ Nwane a ye ahonle ɛnrɛdu a?
Tumivolɛ Awulae Gyihova ɛdendɛ! Nwane a ɛnrɛha ngapezo a?’+
9 ‘Bɛbɔ ye nolo wɔ Ahyedɔdo tawa mgbole ne mɔ
Nee Yigyibiti azɛlɛ zo tawa mgbole ne mɔ azo.
Bɛha kɛ: “Bɛboɔboa bɛ nwo wɔ Samɛlea awoka ne mɔ azo;+
Bɛnlea ngyegyelɛ mɔɔ wɔ ɛkɛ
Nee nzisi mɔɔ wɔ zolɛ la.+
10 Ɔluakɛ bɛnze kɛzi bɛyɛ debie mɔɔ le kpalɛ la,” kɛ Gyihova se la ɛne,
“Bɛle menli mɔɔ ɛlɛboɔboa basabasayɛlɛ nee ɛzɛkyelɛ nloa wɔ bɛ tawa mgbole ne mɔ anu a.”’
11 Zɔhane ati edwɛkɛ mɔɔ Tumivolɛ Awulae Gyihova ɛha la ɛne,
‘Kpɔvolɛ bie barabɔ azɛlɛ ne ayia,+
Ɔbalie wɔ anwosesebɛ ne,
Na yeasesa ninyɛne mɔɔ wɔ wɔ tawa mgbole ne mɔ anu la yeahɔ.’+
12 Edwɛkɛ mɔɔ Gyihova ɛha la ɛne,
‘Kɛ mɔɔ mboaneneavolɛ die boane gyakɛ nwiɔ anzɛɛ ɔ nzo ko fi awenade nloa anu la,
Zɔhane ala a Yizilayɛma ekyi bie banriandi avi bɛ agbɔvolɛ asa anu a,
Bɛdabɛ mɔɔ kɛkala bɛdede ɛkpa ngɛnlɛma nee mbia mɔɔ bɛda nu la azo* wɔ Samɛlea la.’+
13 ‘Bɛdie na bɛbɔ Gyekɔbo abozoamra kɔkɔ,’ kɛ Tumivolɛ Awulae Gyihova, ɛlɔne Nyamenle ne se la ɛne.
14 ‘Ɔluakɛ kenle mɔɔ mebamaa Yizilayɛ abu ye ɛtane ne mɔ amuala anwo mgbonda la,+
Eza mebamaa Bɛtɛle afɔlemokyea ne mɔ abu mgbonda;+
Bɛbapɛ afɔlemokyea ne azo mɛne ne mɔ bɛagua aze.+
15 Mebabubu fɔsɛlɛ sua ne nee wawaa sua ne meagua aze.’
4 “Bɛdie edwɛkɛ ɛhye, bɛmɛ Beehyan nlankɛ mbelɛ,
Mɔɔ bɛwɔ Samɛlea boka ne azo la,+
Bɛmɛ mraalɛ mɔɔ bɛlɛsisi koahweabanema+ na bɛabubu ehyiavolɛma,
Na bɛka bɛkile bɛ hu mɔ* kɛ, ‘Bɛva debie bɛrɛlɛ yɛ bɛmaa yɛnlo!’ la.
2 Tumivolɛ Awulae Gyihova ɛva ye nwuanzanwuanzayɛlɛ ne ɛha ndane kɛ,
‘“Nea! Mekɛ mɔɔ ɔbava menli mɔɔ ku nane pepɛ tɔne ye la koba yeahwe bɛ la ɛlɛba
Na ɔbava koba yeahwe menli mɔɔ ɛha la.
3 Bɛbalua adokule mɔɔ wɔ bane ne anu la anu, na ko biala bahɔ ɔ nyunlu fɔɔnwo;
Na bɛbavuandi bɛ bɛagua Haamɔn,” kɛ Gyihova se la ɛne.’
5 Bɛyela paano mɔɔ mgbɔvonle wɔ nu la bɛbɔ moyɛlɛ afɔle;+
Bɛbɔ ye nolo kɛ bɛlɛfi bɛ ɛhulolɛ nu bɛabɔ afɔle!
Ɔluakɛ debie mɔɔ bɛkulo ye ɛyɛlɛ la ɛne, O Yizilayɛma,’ kɛ Tumivolɛ Awulae Gyihova se la ɛne.
6 ‘Na mame, meammaa bɛannyia aleɛ bɛanli wɔ bɛ azuamgbole ne mɔ azo
Yɛɛ memaanle paano wiele bɛ azua kɔsɔɔti anu;+
Noko bɛanzia bɛamba me ɛkɛ,’+ kɛ Gyihova se la ɛne.
7 ‘Eza ɔka siane nsa na ma ɛdelɛ mekɛ ne adwu la meammaa ezule andɔ;+
Memaanle ezule dɔle suakpole ko azo noko bie andɔ suakpole gyɛne zo.
Ezule dɔle azɛlɛ ko azo
Noko azɛlɛ gyɛne mɔɔ ezule andɔ zo la azo wele resee.
8 Menli mɔɔ wɔ azuamgbole nwiɔ anzɛɛ nsa azo la hɔle suakpole ko azo hɔnlonle nzule,+
Noko yeanza bɛ,
Noko bɛanzia bɛamba me ɛkɛ,’+ kɛ Gyihova se la ɛne.
9 ‘Memaanle ewia katekate nee ewule zɛkyele aleɛ mɔɔ bɛlua la.+
Bɛyɛle tola nee vanye egyinli dɔɔnwo,
Na abɛbɛ lile bɛ feege mbaka nee bɛ ɔlivi mbaka ne mɔ;+
Noko eza bɛanzia bɛamba me ɛkɛ,’+ kɛ Gyihova se la ɛne.
10 ‘Memaanle ewulenzane rale bɛ nwo zo kɛ Yigyibiti ɛdeɛ ne la.+
Menvale konle dadeɛ mengunle bɛ mgbavolɛ ne mɔ+ na mengyele bɛ mgbɔnwɔ ne mɔ.+
Memaanle bɛ azokoɛleɛ ne mɔ bɔnle too ɔwolole bɛ bonyi nu;+
Noko bɛanzia bɛamba me ɛkɛ,’ kɛ Gyihova se la ɛne.
11 ‘Menzɛkyele bɛ
Kɛ mɔɔ Nyamenle zɛkyele Sodɔm nee Gomɔla la.+
Na ɛnee bɛle kɛ ɛyɛne sinli mɔɔ bɛye bɛvi senle nu la;
Noko bɛanzia bɛamba me ɛkɛ,’+ kɛ Gyihova se la ɛne.
12 Yemɔti mɔɔ mebava meayɛ wɔ la ɛne, O Yizilayɛ.
Kɛmɔ ɛhye a mebava meayɛ wɔ la ati,
Siezie ɛ nwo kɔyia wɔ Nyamenle ne, O Yizilayɛ.
13 Ɔluakɛ nea! Ɔdaye a ɔyɛle awoka ne mɔ+ na ɔbɔle anwoma ne a;+
Ɔka Ye nzuzulɛ ɔkile menli,
Ɔmaa alehyenlɛ kakyi awozinli,+
Na ɔtiedia awoka ne mɔ azo;+
Ye duma a le Gyihova, ɛlɔne Nyamenle ne.”
5 “O Yizilayɛma, bɛdie edwɛkɛ ɛhye mɔɔ melɛka meatia bɛ wɔ awolɛyelɛ* nu la:
2 ‘Yizilayɛ, bɛlɛra ne mɔɔ ɛnze nrenyia la, ɛdɔ aze;
Ɔnrɛhola dwazo bieko.
Bɛkpo ye wɔ ɔdaye ye azɛlɛ zo;
Awie biala ɛnle ɛkɛ mɔɔ ɔbamaa ye zo a.’
3 “Ɔluakɛ edwɛkɛ mɔɔ Tumivolɛ Awulae Gyihova ɛha la ɛne:
‘Sua mɔɔ fa menli apenle ko kɔ konle la, ɔbaha ɛya ko;
Yɛɛ mɔɔ fa menli ɛya ko kɔ konle la, ɔbaha bulu yeamaa Yizilayɛma.’+
4 “Ɔluakɛ edwɛkɛ mɔɔ Gyihova ɛha ɛhile Yizilayɛma la ɛne:
‘Bɛkpondɛ me na bɛnyia ngoane.+
5 Bɛmmakpondɛ Bɛtɛle,+
Bɛmmakɔ Gelegale+ anzɛɛ bɛpɛ nu bɛkɔ Biyɛ-hyiba,+
Ɔluakɛ Gelegale bahɔ akɛlɛzonlenlɛ nu,+
Yɛɛ Bɛtɛle bayɛ mgbane.*
6 Bɛkpondɛ Gyihova na bɛnyia ngoane,+
Amaa yeanzɔ kɛ senle la wɔ Dwosefi sua nu,
Na yeayela Bɛtɛle mɔɔ awie ɛngola ye nua a.
7 Bɛkakyi pɛlepɛlelilɛ bɛmaa ɔyɛ ɛnwonle,
Na bɛfuandi tenleneyɛlɛ bɛto azɛlɛ nwo.+
8 Ahenle mɔɔ yɛle Kaema nwɔlɔra ekpunli* ne nee Kisele nwɔlɔra ekpunli* ne la,+
Ahenle mɔɔ maa awozinli kabii kakyi alehyenlɛ,
Ahenle mɔɔ maa alehyenlɛ yɛ awozinli kɛ nɔɔzo,+
Ahenle mɔɔ boɔboa nyevile nu nzule nloa
Na ɔmaa ɔtɔ wɔ azɛlɛ ye azo la+
—Ye duma a le Gyihova.
9 Ɔbava ɛzɛkyelɛ yeara anwosesebɛma anwo zo ndɛndɛ,
Na yeazɛkye azua mɔɔ bɛlie nwolɛ bane la.
10 Bɛkyi menli mɔɔ twi bɛ nyunlu wɔ sua ne anlenkɛ kpole ne anloa la,
Yɛɛ bɛngulo menli mɔɔ ka nɔhalɛ la edwɛkɛ.+
11 Kɛmɔ bɛkpondɛ ɛya nwo adwule* bɛfi ehyianli ɛkɛ
Na bɛfa ye ma bɛtua adwule la ati,+
Bɛnrɛdɛnla azua mɔɔ bɛva awolɛ bɛzi la anu+
Yɛɛ bɛnrɛnlo vanye egyinli ngɛnlɛma mɔɔ bɛyɛ la anu nwanye.+
12 Ɔluakɛ meze kɛzi bɛyɛ ɛtane dɔɔnwo la
Nee kɛzi bɛ ɛtane ne mɔ mgbole de la
—Bɛgyegye tenlenema,
Bɛdie belaebo,
Yɛɛ bɛtietia ehyiavolɛma anwo zo wɔ sua ne anlenkɛ kpole ne anloa.+
13 Ɛhye ati bɛdabɛ mɔɔ bɛlɛ nwunu la bayɛ koonwu wɔ zɔhane mekɛ ne,
Ɔluakɛ ɔbayɛ anwongyelelɛ mekɛ.+
Na Gyihova, ɛlɔne Nyamenle ne nee bɛ adɛnla,
Kɛ mɔɔ bɛse ɔ nee bɛ de la.+
15 Bɛhyi mɔɔ le ɛtane la na bɛhulo mɔɔ le kpalɛ la,+
Bɛmaa pɛlepɛlelilɛ ɛhɔ zo wɔ sua ne anlenkɛ kpole ne anloa.+
Bie a Gyihova, ɛlɔne Nyamenle ne
Balo Dwosefi abozoamra mɔɔ ɛha la.’+
16 “Ɔti edwɛkɛ mɔɔ Gyihova, ɛlɔne Nyamenle Gyihova ɛha la ɛne:
‘Bɛbaye awolɛ wɔ gua ne mɔ kɔsɔɔti azo,
Yɛɛ bɛbaha ye wɔ awɔdenle ne mɔ kɔsɔɔti azo kɛ, “Aa! Aa!”
Bɛbaha bɛahile ɛyazonlɛma kɛ bɛli nyane
Yɛɛ menli mɔɔ ze su la kɛ bɛye awolɛ.’
17 ‘Bɛbaye awolɛ wɔ vanye egyinli biala anu;+
Ɔluakɛ mebaze bɛ avinli meahwe bɛ nzo,’ Gyihova a se a.
18 ‘Menli mɔɔ anwo dɔ Gyihova kenle ne la, bɛ gyakɔ!+
Na duzu a bɛ nye la kɛ ɔbazi Gyihova kenle ne a?+
Ɔbayɛ awozinli, ɔnrɛyɛ wienyi.+
19 Ɔbayɛ kɛ awie mɔɔ ɛnriandi awenade na yehɔyia ezizile,
Na ɔkɔ sua nu na ɔfa ɔ sa ɔto bane nwo a, ɛwɔlɛ ka ye la.
20 Gyihova kenle ne bayɛ awozinli, ɔnrɛyɛ wienyi;
Ɔbayɛ awozinli kabii, ɔnrɛda.
21 Mekyi, yɛɛ mekpo bɛ ɛvoyialilɛ ne mɔ,+
Yɛɛ me nye ɛnlie bɛ nyianu nwuanzanwuanza ne mɔ abo evuanlɛ ne anwo.
22 Saa bɛbɔ ɛyelalɛ afɔle nee ahyɛlɛ afɔle ngakyile bɛmaa me bɔbɔ a,
Me nye ɛnrɛlie nwolɛ;+
Yɛɛ bɛfa nane mɔɔ ɛlɔ la bɛbɔ anzodwolɛ afɔle a, me nye ɛnrɛzɔ ye.+
23 Bɛmmafa bɛ edwɛne dede ne mɔ bɛgyegye me;
24 Bɛmaa pɛlepɛlelilɛ ɛze kɛ azule,+
Na tenleneyɛlɛ ɛyɛ kɛ azudenle mɔɔ se dahuu la.
25 O Yizilayɛma, asoo bɛvale afɔlebɔdeɛ nee ahyɛlɛ afɔlebɔdeɛ ngakyile bɛrɛlɛle me
Wɔ ɛvolɛ 40 ne mɔɔ bɛlile ye wɔ fienemgbole ne anu la anu ɔ?+
26 Akee bɛbazoa bɛ Belemgbunli Sakɛte, yɛɛ Kaewan,*
Bɛ ananze ne mɔ, bɛ nyamenle ne ɛwɔlɔra ne mɔɔ bɛdabɛ bɛyɛle la,
27 Na mebamaa bɛahɔ akɛlɛzonlenlɛ nu wɔ Damasekɛse+ anzi moamoa,’ kɛ ahenle mɔɔ ye duma a le Gyihova, ɛlɔne Nyamenle ne, se la ɛne.”+
6 “Bɛdabɛ mɔɔ bɛ nwo ɛdɔ bɛ* wɔ Zayɔn,
Bɛdabɛ mɔɔ bɛte nganeɛ kɛ bɛ nwo le kɔlɔɔnwo wɔ Samɛlea boka ne azo,+
Maanle mɔɔ le kpole wɔ maanle maanle ne mɔ avinli la anu menli titili,
Bɛdabɛ mɔɔ Yizilayɛma kɔ bɛ ɛkɛ la, bɛ gyakɔ!
2 Bɛpɛ nu bɛhɔ Kaleni na bɛnlea.
Bɛvi ɛkɛ ne a bɛhɔ Heemate Kpole,+
Na bɛtolo bɛhɔ Gate mɔɔ wɔ Filisitia la.
Asoo bɛle kpalɛ bɛtɛla arelemgbunlililɛ* ɛhye mɔ,
Anzɛɛ azua ɛhye mɔ azɛlɛ ne le kpole tɛla bɛ ɛdeɛ ne ɔ?
4 Bɛda ɛkpa mɔɔ bɛva ɛzɛlɛ* bɛyɛ la azo+ na bɛtɛlɛdɛlɛ bɛ nwo wɔ mbia mɔɔ bɛda nu la anu,+
Bɛdi mboane nee nlankɛ mralɛ* mɔɔ ɛlɔ la;+
5 Bɛhyehyɛ edwɛne mɔɔ bɛbava haape* bɛabɔ la,+
Na bɛyɛ edwɛnebɔlɛ ninyɛne kɛ mɔɔ Devidi yɛle la;+
6 Bɛno nwanye wɔ ahyɛnze nu+
Na bɛfa nwole kpalɛ bɛkpokpa bɛ nwo.
Noko bɛndwenle* Dwosefi amaneɛnwunlɛ ne anwo.+
7 Yemɔti bɛdabɛ a bɛbalimoa bɛahɔ akɛlɛzonlenlɛ nu a,+
Na menli mɔɔ ɛdɛlɛdɛlɛ bɛ nwo la anyelielɛ kpole ne bara awieleɛ.
8 ‘Tumivolɛ Awulae Gyihova ɛva ɔ nwo* ɛha ndane kɛ,+
“Mekyi Gyekɔbo anwomemaazo ne,+
Mengulo ye aranemgbole ne mɔ,+
Na mebaye sua ne nee debie biala mɔɔ wɔ zo la meamaa ye agbɔvolɛ,’+ kɛ Gyihova, ɛlɔne Nyamenle ne se la ɛne.
9 “‘“Na saa menli bulu ka sua ko anu a, bɛdabɛ noko bɛbawu. 10 Busuanli bie* barasesa bɛ avinde na yeayela bɛ ngoko. Ɔbayeye bɛ mbowule yeavi sua ne anu yeavinde; akee ɔbaha yeahile awie mɔɔ wɔ sua ne akunlu la kɛ, ‘Awie bieko tɛbɔ ɛ nwo ɛkɛ ɔ?’ Na ɔbaha kɛ, ‘Awie ɛnle ɛkɛ!’ Na busuanli ne baha kɛ, ‘Yɛ koonwu! Ɔluakɛ mekɛ ɛtɛdwule mɔɔ bɛbɔ Gyihova duma a.’”
11 Ɔluakɛ Gyihova a se bɛyɛ a,+
Na ɔbabubu sua kpole ne dwɔkɔdwɔkɔ,
Na yeabubu sua ekyi ne yeamaa yeayɛ ewula.+
12 Asoo mgbɔnwɔ nriandi wɔ bodane zo,
Anzɛɛ awie bamaa nlankɛ avundu ɛkɛ ne?
Ɔluakɛ bɛhakyi pɛlepɛlelilɛ bɛmaa yeyɛ baka mɔɔ le pɔezen,
Yɛɛ bɛhakyi tenleneyɛlɛ ma bɛmaa yeyɛ ɛnwonle.+
13 Bɛ nye die debie mgbane nwo,
Na bɛka kɛ, “Asoo tɛ yɛ anwosesebɛ a ɛmaa yɛnyia tumi kpole a?”+
14 Ɛhye ati, O Yizilayɛma, mebamaa maanle bie ara bɛ nwo zo,+
‘Na bɛbasisi bɛ ɔvi Libo-heemate*+ kɔdwu Alaba Azudenle* ne anloa,’” kɛ Gyihova, ɛlɔne Nyamenle ne se la ɛne.
7 Debie mɔɔ Tumivolɛ Awulae Gyihova maanle menwunle ye la ɛne: Nea! Ɔzoanle abɛbɛ dɔɔnwo bie wɔ mekɛ mɔɔ ma mɔɔ li amozi* la bɔle ɔ bo kɛ ɔfifi la. Ɛhye a le ma mɔɔ li amozi wɔ mekɛ mɔɔ bɛpɛle belemgbunli ne ndile mɔɔ ɔfa ɔmaa ye nyɛmoa bɛwiele la. 2 Mɔɔ abɛbɛ ne mɔ lile azɛlɛ ne azo ndile ne wiele la, menganle kɛ: “O Tumivolɛ Awulae Gyihova, mesɛlɛ wɔ, fa kyɛ bɛ!+ Kɛ ɔkɛyɛ na Gyekɔbo agyinla ɛ? Ɔluakɛ ɔnlɛ anwosesebɛ!”+
3 Yemɔti Gyihova ziale zuzule* ɛhye anwo.+ Na Gyihova hanle kɛ: “Ɔnrɛzi zɔ.”
4 Debie mɔɔ Tumivolɛ Awulae Gyihova maanle menwunle ye la ɛne: Nea! Tumivolɛ Awulae Gyihova hanle kɛ ɔfa senle yeadea bɛ. Senle ne maanle nyevile ne sesanle, na ɔyelale azɛlɛ ne foa bie. 5 Akee menganle kɛ: “O Tumivolɛ Awulae Gyihova, mesɛlɛ wɔ, mmayɛ ɛhye.+ Kɛ ɔkɛyɛ na Gyekɔbo agyinla ɛ? Ɔluakɛ ɔnlɛ anwosesebɛ!”+
6 Yemɔti Gyihova ziale zuzule*+ ɛhye anwo. Na Tumivolɛ Awulae Gyihova hanle kɛ: “Ɛhye noko ɛnrɛzi zɔ.”
7 Debie mɔɔ ɔmaanle menwunle ye la ɛne: Nea! Ɛnee Gyihova gyi bane bie mɔɔ bɛvale ɛzuzunyɛma bɛdole nwo a bɛdole la azo, na ɛnee ɔlɛ ɛzuzunyɛma ɔ sa nu. 8 Akee Gyihova zele me kɛ: “Emɔso, duzu a ɛnwu ye a?” Yemɔti menganle kɛ: “Ɛzuzunyɛma ɔ.” Akee Gyihova hanle kɛ: “Kɛkala mefa ɛzuzunyɛma meado me menli Yizilayɛ anwo. Menrɛze bɛ anwunvɔne bieko.+ 9 Mebazɛkye Ayezeke ɛzonlenlɛ ɛleka ne mɔ,+ na meazɛkye Yizilayɛ ɛzonlenlɛ azua ne mɔ;+ na mebava konle dadeɛ meara Gyɛlɔbowam sua nu amra anwo zo.”+
10 Bɛtɛle Ɛsɔfo Amazaya+ zoanle maanle bɛhɔhanle edwɛkɛ ɛhye bɛhilele Yizilayɛ Belemgbunli Gyɛlɔbowam+ kɛ: “Emɔso ɛlɛfa ɛ nwo adwenle ɛtane wɔ Yizilayɛma avinli ɛke ala.+ Menli mɔɔ wɔ azɛlɛ ne azo la ɛnrɛhola ye edwɛkɛ ne kɔsɔɔti anloa gyinla.+ 11 Ɔluakɛ edwɛkɛ mɔɔ Emɔso ɛha la ɛne, ‘Gyɛlɔbowam bawu dadeɛ nloa, na ye biala anu, Yizilayɛ bavi ye azɛlɛ zo ahɔ akɛlɛzonlenlɛ nu.’”+
12 Akee Amazaya zele Emɔso kɛ: “O wɔmɔ ɛnyelɛzodeɛnwunlɛnli, kɔ, nriandi kɔ Dwuda azɛlɛ zo, di aleɛ* wɔ ɛkɛ na ka ngapezo wɔ ɛkɛ.+ 13 Noko mmaka ngapezo bieko wɔ Bɛtɛle,+ ɔluakɛ ɔle belemgbunli ɛzonlenlɛsua+ yɛɛ belemgbunlililɛ sua.”
14 Akee Emɔso buale Amazaya kɛ: “Ɛnee menle ngapezonli anzɛɛ ngapezonli ra; ɛnee menea mboane+ yɛɛ sikamɔ feege mbaka.* 15 Noko Gyihova maanle mengyakyile mboaneneavolɛ gyima ne, na Gyihova zele me kɛ: ‘Kɔha ngapezo kile me menli Yizilayɛma.’+ 16 Yemɔti akee tie Gyihova edwɛkɛ ne: ‘Ɛse, “Mmaka ngapezo ɛtia Yizilayɛ,+ yɛɛ mmaka edwɛkɛ biala+ ɛtia Ayezeke abozoamra.” 17 Zɔhane ati edwɛkɛ mɔɔ Gyihova ɛha la ɛne: “Ɛ ye bayɛ tuutuunli wɔ suakpole ne azo, na ɛ mra mrenyia nee ɛ mra mraalɛ bawu dadeɛ nloa. Bɛbava nyɛma bɛazuzu wɔ azɛlɛ ne bɛava, na ɛdawɔ mumua ne ɛbawu wɔ azɛlɛ mɔɔ zolɛ ɛnde la azo; na ye biala anu, Yizilayɛ bavi ye azɛlɛ zo ahɔ akɛlɛzonlenlɛ nu.”’”+
8 Debie mɔɔ Tumivolɛ Awulae Gyihova maanle menwunle ye la ɛne: Nea! Menwunle kɛndɛne mɔɔ wawaa nu mbakama* wɔ nu la. 2 Akee ɔhanle kɛ, “Emɔso, duzu a ɛnwu ye a?” Membuale kɛ, “Kɛndɛne mɔɔ wawaa nu mbakama wɔ nu la.” Akee Gyihova zele me kɛ: “Me menli Yizilayɛma awieleɛ mekɛ ɛdwu. Menrɛze bɛ anwunvɔne bieko.+ 3 ‘Zɔhane kenle ne, ɛzonlenlɛsua ne anu edwɛne ne mɔ bahakyi awolɛyelɛ,’+ Tumivolɛ Awulae Gyihova a ɛha a. ‘Bɛbavuandi avunli bɛagua ɛleka biala+—bɛyɛ koonwu!’
4 Bɛdie, bɛmɛ mɔɔ bɛtietia ehyiavolɛma anwo zo
Na bɛsɛkye bɛlɛvoma mɔɔ wɔ azɛlɛ ne azo,+
5 Na bɛka kɛ, ‘Kenlenzu a siane fofolɛ ɛvoyialilɛ ne bapɛ nu+ na yɛadɔne yɛ ma ɛ?
Yɛɛ kenlenzu a Ɛnwomenlelielɛ kenle ne+ bapɛ nu na yɛadɔne yɛ ma,
Amaa yɛayɛ yifa* ɛzuzudeɛ ne ekyi
Na yɛayɛ hyikɛle* tone ne kpole,
Amaa yɛawua yɛ tone ne anu yɛava yɛabɛlɛbɛla bɛ ɛ?+
6 Amaa yɛava dwɛtɛ fufule yɛadɔ bɛdabɛ mɔɔ bɛhyia
Na yɛava mgbɔlaboa yɛadɔ ehyiavolɛma,+
Na yɛadɔne ma mɔɔ ɛnle kpalɛ la.’
8 Ɛhye ati, azɛlɛ ne bawoso,
Na awie biala mɔɔ wɔ zo la bali nyane.+
Asoo ɔ muala ɛnrɛyi kɛ Naele ne la,
Yɛɛ ɔnrɛyi na ɔnrɛhwe kɛ Yigyibiti Naele ne la ɔ?’+
9 ‘Kenle zɔhane,
Mebamaa sɛnzɛne ne ahɔdɔ ewiazo ketekete,
Yɛɛ mebamaa azɛlɛ ne azo ayɛ kisii wɔ alehyenlɛ nu,’ kɛ Tumivolɛ Awulae Gyihova se la ɛne.+
10 ‘Mebamaa bɛ ɛvoyia ne mɔ ahakyi nyanelilɛ+
Na bɛ edwɛne ne mɔ ahakyi awolɛyelɛ.
Mebava ɛrele meapɛ awie biala abo, yɛɛ awie biala ati zo bakpa;
Mebamaa yeayɛ kɛ awie mɔɔ ɛlɛsu ɔ ra nrenyia kokye mɔɔ ɛwu la,
Na kenle zɔhane awieleɛ bayɛ ɛnwonle.’
11 ‘Nea! Mekɛ ɛlɛba mɔɔ mebamaa ɛhɔne ara azɛlɛ ne azo a,
Tɛ aleɛ ɛhɔne anzɛɛ nzuhɔne ɔ,+
Emomu Gyihova edwɛkɛ ne ɛdielɛ nwo ɛhɔne ɔ,’ kɛ
Tumivolɛ Awulae Gyihova se la ɛne.
12 Bɛbakpɔsa bɛavi ɛnweanloa bɛahɔ ɛnweanloa
Na bɛavi sɔlɔ bɛahɔ aduduleɛ.
Bɛbaluolua nu bɛakpondɛ Gyihova edwɛkɛ ne, noko bɛnrɛnwu ye.
13 Kenle zɔhane, ɔlua nzuhɔne ne ati, mbɛlɛra anwofɛlɛko mɔɔ bɛnze mrenyia la anye zo babulu bɛ,
Yɛɛ mgbavolɛ noko anye zo babulu bɛ;
14 Bɛdabɛ mɔɔ bɛfa Samɛlea ɛtane ne bɛka ndane+ na bɛka kɛ,
“O Dan, mekɛ ala mɔɔ wɔ nyamenle ne de aze la!”+
Yɛɛ, “Mekɛ ala mɔɔ Biyɛ-hyiba adenle ne+ wɔ ɛkɛ ne la!”
Bɛbadɔ aze, na bɛnrɛdwazo bieko.”+
9 Menwunle Gyihova+ kɛ ɔgyi afɔlemokyea ne anwuma, na ɔhanle kɛ: “Bɔ pila ne ati zo, na nlenkɛ ne mɔ abo bakpusu. Pepɛ mpila ne ati ne mɔ, na mebava konle dadeɛ meahu bɛdabɛ mɔɔ bɛha la. Bɛ nuhua biala ɛnrɛhola nriandi, yɛɛ awie biala mɔɔ babɔ mɔdenle kɛ ɔnriandi la ɛnrɛhola kɔ.+
2 Saa bɛfunvu bɛkɔfea Nla* kunlu a,
Me sa bahwe bɛ avi ɛkɛ;
Yɛɛ saa bɛkɔ anwuma a,
Mebahwe bɛ meara aze.
3 Saa bɛkɔfea Kamɛle ati zo a,
Mebakpondɛ bɛ wɔ ɛkɛ na meahye bɛ.+
Saa bɛye bɛ nwo bɛfi me nye zo bɛkɔfea nyevile ne abo nehane a,
Mebamaa ɛwɔlɛ akeka bɛ wɔ ɛkɛ.
4 Saa bɛ agbɔvolɛ kye bɛ kɔ akɛlɛzonlenlɛ nu a,
Mebamaa konle dadeɛ ara bɛ nwo zo wɔ ɛkɛ na yeahu bɛ;+
Mebadu me nye meazie bɛ nwo meamaa bɛayia ngyegyelɛ, na tɛ nyilalɛ ɔ.+
5 Ɔluakɛ Tumivolɛ Awulae, ɛlɔne Gyihova, a le Ahenle mɔɔ fa ɔ sa ka azɛlɛ ne a,
Amaa yeaholo,+ na menli mɔɔ de zolɛ la amuala bali nyane;+
Na ɔ muala bayi kɛ Naele ne,
Na yeahwe kɛ Yigyibiti Naele ne la.+
6 ‘Ahenle mɔɔ ɔye ye adenle ɔto anwuma
Na ɔyɛ ye ninyɛnezielɛ ɛleka wɔ azɛlɛ ne ati zo la;
Ahenle mɔɔ boɔboa nyevile nu nzule nloa,
Ɔmaa ɔtɔ ɔgua azɛlɛ ne azo la+
—Ye duma a le Gyihova.’+
7 ‘O Yizilayɛma, asoo bɛnle kɛ Kuhyama la wɔ me nye zo ɔ?
Asoo meanye Yizilayɛ meanvi Yigyibiti azɛlɛ zo,+
Meanye Filisitiama meanvi Kiliti,+ yɛɛ meanye Seleama meanvi Kɛɛ ɔ?’+ kɛ Gyihova se la ɛne.
8 ‘Nea! Tumivolɛ Awulae Gyihova anye wɔ belemgbunlililɛ ne mɔɔ di ɛtane la anwo zo,
Na ɔbaye ye yeavi azɛlɛ ne azo.+
Noko menrɛminli Gyekɔbo abozoamra abo zo bɔkɔɔ,’+ kɛ Gyihova se la ɛne.
9 ‘Ɔluakɛ nea! Medame a mese bɛyɛ a,
Na mebahegye Yizilayɛma wɔ maanle maanle ne mɔ anu,+
Kɛ mɔɔ awie fa akegyebɛ kegye debie,
Na bolɛ ko bɔbɔ ɛndɔ aze la.
10 Ɛtanevolɛma mɔɔ wɔ me menli ne anu la amuala bawu dadeɛ nloa,
Bɛdabɛ mɔɔ bɛlɛka kɛ, “Ngyegyelɛ biala ɛnrɛdo yɛ anzɛɛ ɛnrɛbikye yɛ la.”’
11 ‘Kenle zɔhane, mebamaa Devidi kpɔda* ne+ mɔɔ ɛgologolo la zo,
Mebaduodua nuhua adokule ne mɔ,
Na meayɛ ye ɛleka mɔɔ ɛzɛkye la boɛ;
Mebazi ye bieko kɛ ye dɛba ne ala la,+
Nee maanle maanle mɔɔ me duma la bɛ nwo zo la amuala bɛayɛ bɛ ɛdeɛ,’ kɛ Gyihova mɔɔ ɛlɛyɛ ɛhye la se la ɛne.
13 ‘Nea! Mekɛ ɛlɛba,
Mɔɔ bɛgua zo bɛlɛte ma dɔɔnwo ne la, ɛnee azɛlɛ ɛvundulɛ mekɛ ɛdwu,
Yɛɛ bɛgua zo bɛlɛtwihwi vanye ma dɔɔnwo ne la, ɛnee ma ɛgualɛ mekɛ ɛdwu;+
Na nwanye mɔɔ yɛ fɛ la bazonyi avi awoka ne mɔ azo,+
Yɛɛ nwanye baze* awoka ngyikyi ne mɔ azo,’+ kɛ Gyihova se la ɛne.
14 ‘Mebaboɔboa me menli Yizilayɛma mɔɔ ɛhɔ akɛlɛzonlenlɛ nu la anloa meara,+
Na bɛbazia bɛakyekye azua mɔɔ ɛzɛkye la na bɛadɛnla zo;+
Bɛbayɛ vanye egyinli na bɛanlo nuhua nwanye,+
Yɛɛ bɛbayɛ tola na bɛali nuhua ma.’+
15 ‘Mebalua bɛ wɔ bɛ azɛlɛ ne azo,
Na bɛnrɛdu bɛ
Bɛnrɛvi azɛlɛ ne mɔɔ meva memaa bɛ la azo bieko ɛlɛ,’+ kɛ Gyihova wɔ Nyamenle ne se la ɛne.”
Ɔ bo kile “Ɔle Adesoa” anzɛɛ “Ɔzo Adesoa.”
Hibulu aneɛ nu, “ahenle mɔɔ lɛ belemgbunli kpɔma ne.”
Hibulu aneɛ nu, “ahenle mɔɔ lɛ belemgbunli kpɔma ne.”
Anzɛɛ “ɔmaanle ɔdɔle nzonle.”
Hibulu aneɛ nu, “ndɛnebuavolɛ.”
Anzɛɛ “adehilelɛ.”
Anzɛɛ “ye ɛkɛla.”
Anzɛɛ “ye ɛkɛla.”
Anzɛɛ “mɔɔ ahonle yɛ se.”
Anzɛɛ “bɛtɛyɛle ngyehyɛleɛ bɛtɛyiale.”
Anzɛɛ “awenade kakula mɔɔ anwo yɛ se la.”
Anzɛɛ ɔkola ɔkile, “wɔ mekɛ mɔɔ aleɛ ɛngua zo la?”
Anzɛɛ “Damasekɛse ɛkpa zo.”
Anzɛɛ “ɛzonle mɛne.”
Anzɛɛ ɔkola ɔkile, “azua dɔɔnwo.”
Anzɛɛ “bɛ menle mɔ.”
Anzɛɛ “bɛde atua.”
Anzɛɛ “ngyɛnu bulu anu ko.”
Anzɛɛ “nyanelilɛ edwɛne.”
Anzɛɛ ɔkola ɔkile, “bayɛ ngonyia debie.”
Ɔbayɛ Pelɛdese nwɔlɔra ne mɔɔ wɔ Tɔɔlɔso nwɔlɔra ekpunli ne anu la.
Ɔbayɛ Orelayɔn nwɔlɔra ekpunli ne.
Anzɛɛ “azɛlɛ nwo adwule.”
Tete ɛdeɛ ne le ngakyile fi ɛnɛ mekɛ ye getaa nwo.
Bie a ananze nwiɔ ɛhye mɔ a le pelanɛte Satane ne mɔɔ ɛnee bɛsonle ye la.
Anzɛɛ “bɛ ti anu yɛ bɛ fɛ.”
Ɔda ali kɛ ɔfale Dwuda nee Yizilayɛ arelemgbunlililɛ ne mɔ anwo.
Anzɛɛ “ɛzonle mɛne.”
Anzɛɛ “nlankɛ mralɛ nyinli.”
Anzɛɛ “getaa.”
Hibulu aneɛ nu, “bɛ nwo ando bɛ wɔ.”
Anzɛɛ “ye ɛkɛla.”
Hibulu aneɛ nu, “Ye papa adiema nrenyia.”
Anzɛɛ “Heemate adenle zo.”
Anzɛɛ “Bɔnza.” Nea Edwɛkɛbohilelɛ.
Ɛhye kile, wɔ January nee February anu.
Anzɛɛ “nlunle ɔ nwo wɔ.”
Anzɛɛ “nlunle ɔ nwo wɔ.”
Hibulu aneɛ nu, “di paano.”
Anzɛɛ “yɛɛ mekpakyekpakye sikamɔ feege ma nwo.”
Titili feege.
Nea Mok. B14.
Nea Mok. B14.
Anzɛɛ “Sheol,” ɛhye kile, alesama nla. Nea Edwɛkɛbohilelɛ.
Anzɛɛ “ɛdanlɛsua; sua ekyi.”
Hibulu aneɛ nu, “baholo.”