DWOWƐLE
1 Gyihova edwɛkɛ mɔɔ rale Pɛtuwɛle ara nrenyia Dwowɛle* ɛkɛ ne la ɛne:
2 “Bɛdie ɛhye, bɛmɛ mgbanyima,
Bɛyɛ ɛnzolɛ, bɛdabɛ mɔɔ bɛde azɛlɛ ne azo la amuala.
Asoo debie mɔɔ le kɛ ɛhye la bie ɛzi bɛ mekɛ zo,
Anzɛɛ bɛ nenyia mɔ mekɛ zo ɛlɛ ɔ?+
3 Bɛha nwolɛ edwɛkɛ bɛhile bɛ mra,
Na bɛmaa bɛ mra ɛha nwolɛ edwɛkɛ ɛhile bɛ mra,
Na bɛ mra noko ɛha ɛhile awolɛndoazo mɔɔ bara la.
4 Mɔɔ abɛbɛ mɔɔ di ninyɛne gyakyile bɛ ɛkɛ la, abɛbɛ mgbole lile;+
Mɔɔ abɛbɛ mgbole gyakyile bɛ ɛkɛ la, abɛbɛ ngyikyi lile;
Mɔɔ abɛbɛ ngyikyi gyakyile bɛ ɛkɛ la, abɛbɛ mɔɔ sɛkye ninyɛne la lile.+
5 Bɛmɛ nzabovoma, bɛdwazo+ na bɛzu!
Bɛmɛ mɔɔ bɛno nwanye la amuala, bɛzu alɔbɔlɛ ɛzunlɛ,
Ɔluakɛ bɛye nwanye menlemenle bɛvi bɛ nloa.+
6 Na maanle bie ɛra me azɛlɛ ne azo, bɛ nwo yɛ se yɛɛ bɛnze bɛ nloa.+
Bɛ gye le kɛ awenade gye,+ yɛɛ bɛ awudwelɛ le kɛ awenade awudwelɛ.
7 Bɛzɛkye me vanye ne yɛɛ me feege baka ne ɛyɛ dosinli,
Bɛyeye nwolɛ abonle ne bɔkɔɔ na bɛvuandi bɛgua,
Bɛmaa bɛ ngane ne mɔ anwo ɛyɛ nwohyee.
8 Bɛzu alɔbɔlɛ ɛzunlɛ kɛ mɔɔ raalɛ mɔɔ ɛnze nrenyia* mɔɔ ɛheda ɛrele
Su nrenyia* mɔɔ gyale ye wɔ ye mbɛlɛra nu la.
9 Ma afɔlebɔlɛ+ nee nza afɔlebɔlɛ+ ɛwie Gyihova sua nu ɛkɛ;
Ɛsɔfo ne mɔ, Gyihova sonvolɛma ne, ɛlɛdi nyane.
10 Bɛzɛkye ɛya* nu ninyɛne, azɛlɛ ne ɛlɛdi nyane;+
Ɔluakɛ bɛzɛkye ma ne mɔ bɔkɔɔ, bɛnnyia nwanye fofolɛ, nwole bo ɛdu.+
11 Ɛyazonlɛma anyunlu ɛgua aze, vanye tola zo neavolɛma ɛlɛsu alɔbɔlɛ ɛzunlɛ,
Ɔlua hwiiti nee baale ne mɔ ati;
Ɔluakɛ ɛya ne mɔ anu ninyɛne ɛzɛkye.
12 Vanye ɛwu,
Feege baka ɛwu.
Pɔmegelanate, arɛlɛ nee ampolo,
Ɛbɔ nu mbaka kɔsɔɔti ɛwu;+
Ɔluakɛ anyelielɛ ɛhakyi anyiemgba wɔ menli ne avinli.
13 Bɛmɛ ɛsɔfoma, bɛheda ɛrele* na bɛli nyane;*
Bɛmɛ afɔlemokyea ne anwo sonvolɛma, bɛzu alɔbɔlɛ ɛzunlɛ.+
Bɛmɛ me Nyamenle ne sonvolɛma, bɛheda ɛrele bɛrɛla ɛke nɔe;
Ɔluakɛ bɛnva ma afɔlebɔlɛ+ nee nza afɔlebɔlɛ+ bɛmba bɛ Nyamenle ne sua nu bieko.
14 Bɛziezie bɛ nwo bɛmaa ɛhɔnehyelɛ; bɛvɛlɛ ayia nwuanzanwuanza.+
Bɛboɔboa mgbanyima nee menli mɔɔ wɔ azɛlɛ ne azo la amuala anloa,
Bɛhɔ Gyihova, bɛ Nyamenle ne sua nu,+ na bɛzu bɛvɛlɛ Gyihova bɛkpondɛ moalɛ.
15 Kenle ne ati, bɛ gyakɔ!
Ɔluakɛ Gyihova kenle ne ɛbikye,+
Na ɔbara kɛ ɛzɛkyelɛ mɔɔ vi Tumivolɛ Bedevinli ne ɛkɛ!
16 Asoo bɛtɛyele aleɛ bɛtɛfile ɛkɛ wɔ yɛ nye zo,
Yɛɛ bɛtɛyele anyelielɛ nee fɛlɛkolilɛ bɛtɛfile yɛ Nyamenle ne sua nu ɛkɛ ɔ?
17 Ma ne mɔ* nwoso wɔ bɛ sofi ne mɔ abo.
Ninyɛnezielɛ ɛleka ne mɔ ɛdɔ mgbane.
Bɛbubu ma ɛzielɛleka ne mɔ bɛgua, ɔluakɛ ma anyɛ kpalɛ.
18 Nyɛmoa bɔbɔ ɛlɛkponle!
Nlankɛ ekpunli luolua nu basabasa, ɔluakɛ bɛnnyia adidileka!
Yɛɛ mboane ekpunli nwu amaneɛ.
19 O Gyihova, wɔmɔ yɛɛ mebazu meavɛlɛ wɔ a;+
Ɔluakɛ senle ɛyela fienemgbole nu adidileka ne mɔ,
Yɛɛ sendɔlɔra ɛyela ɛbɔ nu mbaka kɔsɔɔti.
20 Nanemgbole bɔbɔ anwo ɛlɛdɔ wɔ,
Ɔluakɛ azudenle ne mɔ ɛsesa
Yɛɛ senle ɛyela fienemgbole nu adidileka ne mɔ.”
2 “Bɛbɔ aweɛne wɔ Zayɔn!+
Bɛdea nu wɔ me boka nwuanzanwuanza ne azo kɛ konle ɛlɛba.
Bɛmaa menli mɔɔ wɔ azɛlɛ ne azo la kɔsɔɔti anwo ɛwoso bɛ,
Ɔluakɛ Gyihova kenle ne ɛlɛba!+ Yebikye!
2 Ɔle awozinli nee alɔbɔlɛ kenle,+
Ɔle amungu nee awozinli kabii kenle,+
Ɔle kɛ aleɛbahye wienyi mɔɔ ɛlɛta awoka ne mɔ azo la.
Menli bie wɔ ɛkɛ mɔɔ bɛ nwo zonle kpalɛ na bɛ nwo yɛ se a;+
Bɛtɛnwunle bɛ ɛsaso ɛlɛ,
Yɛɛ bɛ ɛsaso ɛnrɛra bieko
Wɔ awolɛndoazo kɔsɔɔti ɛvolɛ ne mɔ anu.
3 Senle yela debie biala mɔɔ wɔ bɛ nyunlu la,
Yɛɛ sendɔlɔra yela debie biala mɔɔ wɔ bɛ nzi la.+
Azɛlɛ ne mɔɔ la bɛ nyunlu la le kɛ Yidɛn tola ne,+
Na mɔɔ wɔ bɛ nzi la le fienemgbole mɔɔ ɛdɔ mgbane,
Na debie biala ɛngola ɛnvi ɛsalɛ.
4 Bɛle kɛ mgbɔnwɔ,
Yɛɛ bɛnriandi kɛ konle mgbɔnwɔ.+
5 Bɛlɛwuluwulu awoka ne mɔ azo a, bɛ nwo yɛ dede kɛ konle ehwili,+
Bɛ nwo tite kɛ abɛlɛ dosinli mɔɔ senle ɛdɔ nu la.
Bɛle kɛ menli mɔɔ anwo yɛ se mɔɔ bɛhyehyɛ bɛ pɛpɛɛpɛ na bɛlɛkɔ konle la.+
6 Bɛdabɛ ti menli banwu amaneɛ.
Ɛzulolɛ bamaa awie biala anyunlu ahakyi.
7 Bɛteta kɛ ɛlɔnema,
Bɛfo bane kɛ sogyama,
Bɛ nuhua ko biala lua ye adenle zo,
Yɛɛ bɛnvi bɛ ndenle ne mɔ anu.
8 Bɛnzuhuzuhu bɛ nwo;
Ko biala lua ye adenle nu fɔɔnwo.
Saa bie tɔ akodeɛ nloa a,
Bɛdabɛ mɔɔ bɛha la ɛnzia bɛ nzi.
9 Bɛtu twi bɛkɔ suakpole ne azo, bɛnriandi bane ne mɔ anwo.
Bɛfo azua, bɛdua nvɛnzɛlɛ ne mɔ anu bɛwolo kɛ awule.
10 Azɛlɛ kpusu yɛɛ anwuma woso wɔ bɛ nyunlu.
Sɛnzɛne ne nee siane ne yɛ awozinli,+
Na nwɔlɔra ne mɔ ɛnda bieko.
11 Gyihova bamaa ɔ ne zo wɔ ye ɛlɔnema anyunlu+ ɔluakɛ ye ɛlɔnema anwo zonle kpalɛ.+
Mɔɔ ɛlɛmaa Ye edwɛkɛ ara nu la le tumivolɛ;
Gyihova kenle ne le kpole yɛɛ ɔyɛ ɛzulolɛ.+
Nwane a kɛhola ɔ nloa gyinla a?”+
12 Kɛ Gyihova se la ɛne, “Noko kɛkala bɔbɔ, bɛvi bɛ ahonle muala anu,
Bɛva ɛhɔnehyelɛ nee ɛzunlɛ nee alɔbɔlɛ ɛzunlɛ bɛzia bɛrɛla me nwo ɛke.+
13 Bɛtete bɛ ahonle nu,+ na tɛ bɛ adɛladeɛ nu ɔ,+
Na bɛzia bɛrɛla Gyihova bɛ Nyamenle ne ɛkɛ,
Ɔluakɛ ɔ kunlu yelɛyela ye* yɛɛ ɔse anwunvɔne, ɔkyɛ na yeava ɛya+ yɛɛ ɛlɔlɛ kpundii ɛyi ye tɛkɛɛ,+
Na ɔbazia yeazuzu munzule ne anwo.*
14 Nwane a ze a saa ɔbahakyi ye kpɔkɛzilɛ ne na yeazia yeazuzu nwolɛ*+
Na yeayila bɛ,
Amaa bɛabɔ ma afɔle nee nza afɔle bɛamaa Gyihova bɛ Nyamenle ne a?
15 Bɛbɔ aweɛne wɔ Zayɔn!
Bɛziezie bɛ nwo bɛmaa ɛhɔnehyelɛ; bɛvɛlɛ ayia nwuanzanwuanza.+
16 Bɛboɔboa menli ne anloa; bɛde asafo ne anwo.+
Bɛboɔboa mgbanyima ne mɔ anloa; bɛboɔboa ngakula nee mbɔdɔma mɔɔ no nyɛfonlɛ la anloa.+
Bɛmaa atɔfolɛ nrenyia ne ɛvi ye suakunlu ɛvinde, na atɔfolɛ raalɛ ne noko ɛvi ye suakunlu ɛvinde.
17 Bɛmaa ɛsɔfo ne mɔ, Gyihova sonvolɛma ne ɛrɛla
Abenlana ne nee afɔlemokyea ne avinli,+ na bɛzu bɛha kɛ:
‘O Gyihova, nwu wɔ menli ne anwunvɔne;
Mmamaa bɛgolo wɔ agyapadeɛ ne anwo,
Ɛmaa maanle maanle ne mɔ sie bɛ.
Kɛmɔti a ɔwɔ kɛ menli ne ka kɛ, “Nienwu a bɛ Nyamenle ne wɔ ɛ?”’+
18 Akee Gyihova banyia ɛlɔlɛ kpole amaa ye azɛlɛ ne
Na ɔ kunlu ayelɛyela ye amaa ye menli ne.+
19 Gyihova babua ye menli ne kɛ:
‘Mebamaa bɛanyia ma nee nwanye fofolɛ nee nwole,
Na bɛ kunlu adwo bɛ nwo bɔkɔɔ;+
Menrɛmaa maanle maanle ne mɔ ɛnrɛgolo bɛ nwo bieko.+
20 Mebavoa sɔlɔ amra meavi bɛ nwo ɛkɛ meahɔ moamoa;
Mebabɔ bɛ asande wɔ azɛlɛ mɔɔ le resee na yedɔ mgbane la azo,
Bɛ nyunlu kile aduduleɛ nyevile* ne
Yɛɛ bɛ nzi kile adɔleɛ nyevile* ne.
Bɛ nwo nganeɛ ɛtane ne bahɔ anwuma,
Bɛ nwo nvoanle ne bavo ahɔ anwuma kpalɛ;+
Ɔluakɛ Nyamenle bayɛ ninyɛne mgbole.’
21 O azɛlɛ, mmasulo.
Maa ɛ nye ɛlie na di fɛlɛko, ɔluakɛ Gyihova bayɛ ninyɛne mgbole.
22 Ɛbɔ nu nane, bɛmmasulo,
Ɔluakɛ bɛbanyia adidileka wɔ fienemgbole nu,+
Yɛɛ mbaka ne mɔ bazo ma;+
Feege baka nee vanye bazo dɔɔnwo.+
23 Bɛmɛ Zayɔnoma, bɛli fɛlɛko na bɛmaa bɛ nye ɛlie wɔ Gyihova bɛ Nyamenle ne anu;+
Ɔluakɛ ɔbamaa bɛ alimoa ezule mɔɔ bɛhyia nwo la,
Na yeamaa ezule adɔ amaa bɛ,
Alimoa ezule nee amozi ezule kɛ mɔɔ ɛnee ɔde la.+
24 Ma babu ɛleka mɔɔ bɛwoso ma la,
Na nwanye fofolɛ nee nwole bayi abu zo wɔ kuma mɔɔ bɛtwihwi ma wɔ nu la anu.+
25 Mebava ninyɛne mɔɔ abɛbɛ mgbole, abɛbɛ ngyikyi, abɛbɛ mɔɔ sɛkye ninyɛne yɛɛ mɔɔ abɛbɛ mɔɔ di ninyɛne
Zɛkyele ye wɔ ɛvolɛ dɔɔnwo anu la meazia meamaa wɔ,
Me ɛlɔne kpole ne mɔɔ menzoanle bɛ wɔ ɛ nwo ɛkɛ la.+
26 Ɛbali aleɛ ɛ ko ayi,+
Na wɔaye Gyihova wɔ Nyamenle ne,+
Mɔɔ ɛyɛ nwanwane ninyɛne ɛmaa wɔ la duma ne ayɛlɛ;
Me menli ne anyunlu ɛnrɛgua aze bieko ɛlɛ.+
27 Na bɛbanwu kɛ mewɔ Yizilayɛma avinli+
Na medame a mele Gyihova bɛ Nyamenle ne a+—awie bieko ɛnle ɛkɛ!
Me menli ne anyunlu ɛnrɛgua aze bieko ɛlɛ.
28 Ɛhye anzi mebawola me sunsum+ ne meagua nwonane biala anwo zo,
Na bɛ mra mrenyia nee bɛ mra mraalɛ baha ngapezo,
Bɛ mgbanyima baha ɛlalɛ,
Na bɛ mgbavolɛ anwu ɛnyelɛzodeɛnwunlɛ.+
29 Na mebawola me sunsum ne bie meagua
Me ngɛkɛlɛ mrenyia nee ngɛkɛlɛ mraalɛ bɔbɔ anwo zo wɔ mekɛ zɔhane anu.
30 Na mebayɛ nwanwane ninyɛne wɔ anwuma nee azɛlɛ ye azo,
Mogya nee senle yɛɛ esike mungumungu.+
31 Sɛnzɛne ne bahakyi awozinli na siane ne ahakyi mogya+
Kolaa na Gyihova kenle kpole ne mɔɔ yɛ ɛzulolɛ la ara.+
32 Na awie biala mɔɔ kɛbɔ Gyihova duma la bɛbalie ye ngoane;+
Na kɛ mɔɔ Gyihova ɛha la, menli bavi ɛsalɛ wɔ Zayɔn Boka ne azo nee Gyɛlusalɛm,+
Bɛdabɛ mɔɔ bɛbanyia bɛ ti la a Gyihova fɛlɛ bɛ a.”
3 “Ɔluakɛ nea! kenle zɔhane nee mekɛ zɔhane,
Mɔɔ mebava Dwudama nee Gyɛlusalɛmma mɔɔ bɛwɔ akɛlɛzonlenlɛ nu meazia meara la,+
2 Eza mebaboɔboa maanle maanle kɔsɔɔti anloa
Na meava bɛ meara Gyɛhɔhyafate* Bɔnza ne anu.
Mebabua bɛ ndɛne wɔ ɛkɛ+
Ɔlua me menli ne nee me agyapadeɛ Yizilayɛ ati,
Ɔluakɛ bɛbɔle bɛ asande wɔ maanle maanle ne anu,
Na bɛhyɛle me azɛlɛ ne bɛvale.+
3 Ɔluakɛ bɛguale me menli ne ati ma;*+
Bɛfa kakula nrenyia bɛmaa bɛdie tuutuunli
Yɛɛ bɛtɔne kakula raalɛ bɛtɔ nwanye bɛno.
4 O Taya nee Saedɛn yɛɛ Filisitia maanzinli ne mɔ amuala,
Duzu a bɛdabɛ noko bɛlɛ bɛtia me a?
Bɛlɛtua me kakɛ wɔ debie bie anwo ɔ?
Saa bɛlɛtua me kakɛ a,
Ɛnee mebayɛ ye ndɛ meadua bɛ kakɛ wɔ mɔɔ bɛyɛ la anwo.+
5 Ɔluakɛ bɛva me dwɛtɛ fufule nee nvutuke,+
Yɛɛ bɛva me ninyɛne ngɛnlɛma mɔɔ sonle bolɛ la bɛhɔ bɛ ɛzonlenlɛsua ne mɔ anu;
6 Eza bɛdɔne Dwudama nee Gyɛlusalɛmma bɛmaa Gilikima,+
Amaa bɛaye bɛ bɛavi bɛ azɛlɛ ne azo bɛahɔ moamoa;
7 Mebamaa bɛazia bɛavi ɛleka mɔɔ bɛdɔnenle bɛ bɛhɔle la bɛara,+
Na meava mɔɔ bɛvale bɛyɛle bɛ la bie meayɛ bɛ.
8 Mebadɔne bɛ mra mrenyia nee bɛ mra mraalɛ meamaa Dwudama,+
Na bɛdabɛ noko bɛadɔne bɛ bɛamaa Hyibama, maanle bie mɔɔ wɔ moamoa la;
Gyihova mumua ne a ɛha a.
9 Bɛbɔ ɛhye nolo wɔ maanle maanle ne mɔ avinli:+
‘Bɛziezie bɛ nwo* bɛmaa konle! Bɛmaa katakyiema ɛdwazo!
Bɛmaa ɛlɔnema ne amuala ɛhɔ bɛ nyunlu na bɛteta bɛ!+
10 Bɛbolo bɛ funduazɛlɛ ne mɔ bɛyɛ konle dadeɛ, na bɛbolo bɛ ɛyazonlɛ mbulalɛ ne mɔ bɛyɛ atwɛ.
Bɛmaa mɔɔ ɛnlɛ anwosesebɛ la ɛha kɛ: “Me nwo yɛ se.”
11 Bɛrɛla na bɛboa bɛ nwo ngoko, maanle maanle mɔɔ ɛbɔ ɛyia la kɔsɔɔti, bɛboɔboa bɛ nloa!’”+
O Gyihova, maa wɔ ɛlɔnema* ɛrɛla ɛleka ɛhye.
12 “Maa maanle maanle ne mɔ ɛboɔboa bɛ nloa na bɛrɛla Gyɛhɔhyafate Bɔnza ne anu;
Ɔluakɛ ɛkɛ ne a mebadɛnla amaa meabua maanle maanle mɔɔ zuozua bɛ la kɔsɔɔti ndɛne a.+
13 Bɛva bɛ ɛdedadeɛ ne ɔluakɛ ma ne ɛbolo.
Bɛrɛla na bɛratietia zo, ɔluakɛ kuma ne mɔɔ bɛtwihwi nwanye wɔ nu la ɛyi.+
Ninyɛne mɔɔ bɛtwihwi nwanye bɛgua nu la ɛyiyi ɛbulu zo, ɔluakɛ bɛ ɛtane ɛzo.
14 Menli dɔɔnwo, menli dɔɔnwo wɔ ndɛnebualɛ bɔnza ne anu,
Ɔluakɛ Gyihova kenle ne ɛbikye wɔ ndɛnebualɛ bɔnza ne anu.+
15 Sɛnzɛne ne nee siane ne bayɛ awozinli,
Yɛɛ nwɔlɔra ne mɔ ɛnrɛda bieko.
16 Na Gyihova bahulu wɔ Zayɔn,
Ɔbamaa ɔ ne zo wɔ Gyɛlusalɛm.
Na anwuma nee aze* bakpusu;
Noko Gyihova bayɛ ɛvealeka amaa ye menli ne,+
Ɔbayɛ aranemgbole yeamaa Yizilayɛma.
17 Na bɛbanwu kɛ medame a mele Gyihova bɛ Nyamenle ne, mɔɔ mede Zayɔn, me boka nwuanzanwuanza ne azo a.+
18 Kenle zɔhane nwanye menlemenle bavi awoka ne mɔ azo azonyi agua,+
Meleke bazonyi awoka ngyikyi zo,
Na nzule baze wɔ Dwuda azudenle kɔsɔɔti anu.
19 Noko Yigyibiti badɔ mgbane,+
Yɛɛ Yidɔm bayɛ fienemgbole mɔɔ ɛdɔ mgbane,+
Ɔlua amumuyɛ mɔɔ bɛyɛle Dwudama,+
Mɔɔ bɛ azɛlɛ zo a bɛhanle menli mɔɔ ɛnze nwolɛ bie mogya bɛguale la ati.+
20 Noko menli badɛnla Dwuda dahuu,
Yɛɛ menli noko badɛnla Gyɛlusalɛm wɔ awolɛndoazo kɔsɔɔti anu.+
Ɔ bo kile “Gyihova Le Nyamenle.”
Anzɛɛ “bɛlɛra.”
Anzɛɛ “ɔ hu.”
Anzɛɛ “egyinli.”
Hibulu aneɛ nu, “bɛbɛza.”
Anzɛɛ “bɛbila bɛ kɛnra azo.”
Anzɛɛ ɔkola ɔkile, “Feege mɔɔ ɛwe.”
Anzɛɛ “ɔle dovolɛ.”
Anzɛɛ “ɔbali nwolɛ nyane.”
Anzɛɛ “ɔbanlu ɔ nwo.”
Ɛhye kile, Nyevile Wulera.
Ɛhye kile, Mɛdetɛlenia Nyevile.
Ɔ bo kile “Gyihova Le Ndɛnebuavolɛ.”
Nea Edwɛkɛbohilelɛ.
Hibulu aneɛ nu, “Bɛde bɛ nwo.”
Anzɛɛ “wɔ anwosesebɛma.”
Anzɛɛ “azɛlɛ.”
Anzɛɛ “Azudenle ne anloa.”