Cakusankhula cakufunika kwene-kwene comwe munthu angacite ni kubzipereka kuna Yahova acikhala mbali ya banja lace. Yahova akufuna kuti munthu ali-wentse acite bzimwebzi. Thangwe ranyi? Iye akufuna kuti wanthu akhale pa uxamwali bwakulimba na iye, nakuti akhale na moyo wakusaya kumala. (Deut. 30:19, 20; Agal. 6:7, 8) Tsono Yahova ambangingimiza lini munthu kuti amutumikire. Iye ambasiya kuti munthu ali-wentse asankhule yekha bzomwe akufuna kucita. Tsono tani Mkristau wakubatizidwa akasaya kubvera malamulo ya Mulungu acicita pikado ikulu? Iye akasaya kukungula, an’funika kucosedwa m’gwere. (1 Ako. 5:13) Napo bziri tenepo, Yahova ambafunisisa kuti munthuyo adzabwerere pomwe kwa iye. Ndipopa iye adapereka cakulombolera kuti bzikhale bzakukwanisika kuti wanthu omwe acita pikado zikulu akakungula alekereredwe. Yahova ni Mulungu wa lufoyi omwe ambakumbira wale omwe acita pikado kuti akungule. — Zak. 1:3; Aro. 2:4; Tiy. 4:8. w24.08 14 ¶1-2

Pa nthawe yomwe mpostolo Juwau adanemba tsamba lace lacitatu, wanthu winango akhamwaza bzipfunziso bzakunama mu gwere bzomwe bzidacitisa kuti gwere likhale lakugawanika. Tsono winango adapitiriza “kufamba m’cadidi.” Iwo akhabvera Yahova ndipo ‘akhafamba mwakubverana na lamulo yace.’ (2 Juw. 4, 6) Akristau wakukhulupirikawa adakondwesa Juwau pabodzi na Yahova. (Mim. 27:11) Kodi tikupfunza ciyani? Tikakhala wakukhulupirika kwa Yahova tin’dzakhala wakukondwa ndipo tin’dzacitisambo anzathu kuti akhalembo wakukondwa. (1 Juw. 5:3) Timbakhala wakukondwa tikadziwa kuti tikukondwesa Yahova. Iye ambakomedwa kwene-kwene akawona tikulamba mayezo mu dzikoli ticibvera malamulo yace. Anjo kudzulu ambakondwambo. (Luk. 15:10) Ifepano timbakhalambo wakukondwa tikambawona anzathu akupitiriza kukhala wakukhulupirika. (2 Ates. 1:4) Ndipo dzikoli likadzapfudzidwa, ifepano tin’dzakhala wakukondwa kwene-kwene thangwe ra kudziwa kuti tidakhala wakukhulupirika kwa Yahova mu dziko lomwe likhatongedwa na Sathani. w24.11 12 ¶17-18

Kodi mun’funika kumudziwa munthuyo kwa nthawe itali tani pomwe mukanati kumuuza momwe mukubvera? Imwepo mukafulumiza kumuuza munthuyo, iye an’dzawona ninga kuti imwepo mumbacita bzakusankhula pomwe mukanati kukumbuka. (Mim. 29:20) Tsono, akazindikira kuti imwepo mukumufuna koma mukumuuza lini momwe mukubvera iye an’dzakumbuka kuti imwepo mumbazeza kwene-kwene pomwe mukanati kucita cakusankhula. (Mpal. 11:4) Kumbukirani kuti pomwe imwepo mukanati kumuuza munthu momwe mukubvera, mun’funika lini kukhala wakutsimikiza kuti munthuyo muti mudzalowolane naye. Koma mun’funika kukhala wakutsimikiza kuti muli wakukonzekadi kolowola ayai kulowodwa nakuti imwepo mukuwona kuti munthu munangoyo angakhale wabwino kulowolana naye. Kodi n’ciyani comwe imwepo mun’funika kucita mukazindikira kuti pana munthu omwe akufuna kukudziwani bwino? Penu imwepo mukufuna lini kukhala naye pa umakhadzi mulatizeni na bzicito bzanu. Bzingakhale bzakuipa kwene-kwene kumucitisa munthuyo kukumbuka ninga kuti mukufuna kukhala naye pa umakhadzi uko ne. — Aef. 4:25. w24.05 22-23 ¶9-10