Mishingo
27 Pabakezha nabo bakabamisa mbeli kweSanihedrini . Akale umpristi unkulwana wakababhuzisisa 28 wakati: “Takamubuja kuti muleke kulayija nozwe zina yelyi, koga lingani! mwazhaja iJelusalema nendayijo yenu, koga moda kuti ilopa lyonhu yoyu libe pezhulu pedu.” 29 Koga Pita nabamwe bapositoli bakashandula beti: “Tokwelela kuwhilila Mwali pana kuti tiwhilile banhu. 30 Mwali wamatategulu edu wakamusa Jesu, yoyo wamwakabulaya, muntulika pedanda. 31 Mwali wakonyamulila kuluboko lulwe lolulyi soMmilili Unkulwana nonChiji, kutila kuti Israyeli efije zubi zuzwe elekelelwe. 32 Akale isu tibasumikiji bozunu yozu pamwempela nompepo unchena, yoyo Mwali waakapa yabo banonwhilila sontongi.” 33 Pabakawha yozu, bakalwajilwa zokuti bakabeda kubabulaya. 34 Koga umwe umFarisi unowi Gamaliyeli wakanyamuka muSanihedrini; wakabeli undayiji woNdawu wakabelemekejwa nonhu wose, akale wakalayilila kuti banhulume bebhiswe pazhe. 35 Wakati kuna ibo: “Imwi banhulume bokuIsrayeli chenjelani nozwamunoda kuta kubanhu yaba. 36 Kwakezha unhulume unowi Tudasi, wakabezuti unhu ulokosha, akale wakabeli negapo lyabanhulume banoswika 400 bakabontobela. Koga iye wakabulayiwa akale bakabontobela bakamwachukijana zwabakabeda kuta zwakapelela pakalepo. 37 Mushule mumwe kwakezha Judasi wokuGalileya, nonshaji wokubalwa kwabanhu, nebo wakachengela banhu kuti bontobele. Unhulume yoyu wakabulayiwa akale bakabontobela bakamwachukijana. 38 Penyaya yeyi imi ndinoti kunamwi, musingwinile inyaya jabanhulume yaba, siyanani nabo. Nokuti yozu kana zukalongwa nabanhu kana kuti ulinshingo wabanhu, zuchapalala; 39 koga kana zuli zwaMwali, amutootubula kuzupalaja. Mungodalo mungawanikwa mulwisana naMwali.” 40 Bakawhilila kulaya kwadeni, bakashoba bapositoli, bakabaloba, bakababuja kuti beleke kulebeleka pezhulu pezina lyaJesu, bakabasiya bakenda. 41 Nokudalo bakabhuda muSanihedrini beshanta nokuti bakabeziba kuti banokwelela kulobwa pezhulu pezina yelyo. 42 Mazhuba ose bakandilila mbeli bepupula indebo imbuya pezhulu paKristo Jesu mutempeli nomujingumba jabanhu besinoleka.