Mishingo
15 Kwakaswika banhulume banova kuJudiya balayija banakwayina kuti: “Kana mungosomalajwa sokulayija kwaMozesi, amutochijwa.” 2 Koga Pawulu naBhanabhasi abajakavumilana kwakaba nokunyenyejana, kwakalongwa kuti Pawulu naBhanabhasi bende, nenyaya yadeni kubapositoli nokubakulwana muJelusalema. 12 Banhu bose bakawhilijila, bakatanga kuwhilila Pawulu naBhanabhasi bebabuja nozutondejelo zunji nozuchenamiso zwakabatiwa naMwali ebashingisa pakati paamwe maluji. 13 Pabakapeja kulebeleka, Jemusi wakati: “Banakwayina, ndiwhilileni. 14 Simiyoni wakababuja zwose pezhulu pokuti Mwali wakabakumbulukwa chini amwe maluji kuti eshale bamwe banhu banoshobwa nezina lilye pakati pabo. 15 Akale mawhi abaProfeti anovumilana nozu, sozwakakwalwa kuwi: 16 ‘Mushulwe mozo ndichabuya ndichabaka kabili itente lyaDavidi lyakawa; ndichabakulula matongo alyo libe sozwalyakabeli, 17 kuti banhu banosala bepyange Jehova nomoyo wose, pamwempela nabanhu bamaluji ose, banhu banoshobwa nezina lyangu, unodalo Jehova umuta zunu yozu, 18 zwakazibikanwa kuvila ntolo.’ 23 Bakawala lukwalo bakabapa kuti bende nalo lwakabeti: “Kubapositoli, nokubakulwana timumukwalila sabanakwayina bamomu Antiyoki, Siriya neKilikiya, titi: Chini! 24 Takawha kuti pana bamwe banhu bakezha kwakaleko beva yokuno, bekweja kumubuzila bukukutu nozo zwabakabelebeleka, bekweja kumupambula nozunu zwatisakalayilila, 25 isu tose tagala igota tikavumilana kuti kushalwe banhulume tibatume pamwempela nabalodikana bedu Bhanabhasi naPawulu, 26 banhulume yaba ndibo bakabiga bupenyu bwabo pengozi pezhulu pezina lyaShe wedu Jesu Kristo. 27 Nokudalo tatuma Judasi naSayilasi, kuti boomubuja zwakalezo namawhi emilomo yabo. 28 Nokuti umpepo unchena pamwempela nasu tashaluja kusomulemeja neyimwe mitolo kuzhe kozunu yozu zwamunokwelela kuta: 29 kuti muleke kulya zwakapilwa kuzubezhwa, ilopa, nenyama yemhuka jakasinwa nokupombola. Kana mungochenjelela kusota zunu yozu, zuchamukwendela zubhodo. Salani zubhodo!” 30 Banhulume yaba pabakabujwa kuti bende, bakabhuluka bekenda kuAntiyoki, bakaswika bakabunganisa banhu bose bakabapa lukwalo lwadeni. 31 Mushule mokulubala, bakashanta nokukutayijwa kwadeni.