Yoolakelela yoochuneyaxa yeeyo muchu vyakala onaphwaneleiye opaka, ori olakelela wiiveleela wa Yehova ni opaka makupa a emusi Awe. Yehova onachuna wi oothene yeereno yeeyo. Ntakhara heeni? Onachuna wi awo epuhe onthamwene ni yoowo nave ekhale okhala wookhala. (Malam. 30:​19, 20; Aka. 6:​7, 8) Nyenya Yehova hanamukhinyeererya muchu omurumeela yoowo. Owo onnamweemererya muchu ti muchu olakelela yeeyo onahaaleiye opaka. Hanka wakhala wi Mukristu opatisiwe oopaka yoocheka etokweene? Wakhala wi owo hacharunwe, onaphwanela oviihiwamo mmulokoni. (1 Ako. 5:13) Nto naamwi hiiha, Yehova onnaweherya moochuna wi namacheka onahaala omukookela Yoowo. Mweeparipari, nla nthowa noochuneya nenlo nimweerinhe owo ovahererya woopola: Wi eerihe okhala wooweryeya oleveleliwa anamacheka oocharuwa. Muluku ahu oosivelaxa onnaaveka anamacheka wi erukunuxe murima.—Sak. 1:3; Aro. 2:4; Tiy. 4:8. Mulipeleli, 08/2024 epaax. 14 ipara. 1-2

Vaavaa murummwa Yohani aarempeiye ekaarata awe yaneeraru achu akina yaanamwaramwaxa mahusiheryo awootha ni etannyaka okawanyeya. Nyenya, akina yaahititelela “weeca mu eparipari.” Awo yaanamwiiwelela Yehova ni “weeca mwawiiwanana ni malamulo awe.” (2 Yoh. 4, 6) Akristu yaala oororomeleya yaahiruuha ohakalala ohiya pahiru wa Yohani, nyenya tho wa Yehova. (Mas. 27:11) Tiheeni nnahuseryaahu? Ororomeleya onnaruuha ohakalala. (1 Yoh. 5:3) Ntoko yootakiherya, ninnahakalala osuwela wi ninnamweeriha Yehova okhala oohakalala. Yehova onnahakalalaxa vaavaa nnasepaahu opaka yeeyo eri yoonanara ni wiiwelela malamulo awe. Ankeelo tho wirimu ennahakalala. (Luka 15:10) Nave tho ninnakhala oohakalala vaavaa nnawoonaahu anna ni arokora ahu etitelelaka okhala oororomeleya. (2 Ate. 1:4) Mwawiihiiha, vaavaa mukhalelo yoola wa ichu onahaalaaya otoloxiwa, nnahaala okhala oohakalala osuwela wi nohooniherya ororomeleya wahu wa Yehova mu elapo yeeyo yaalamuleliwa ni Satana. Mulipeleli, 11/2024 epaax. 12 ipara. 17-18

Ophiyerya elukuluku taani munaphwanelaanyu omaliha mumvareryaka muchu muhaakumve wooniherya nchuno nanyu? Wakhala wi nyuwaano mootepa waakuvela oloca ni muchu, owo onanwerya woona wi nyuwaano hamunuupuwela mweephoole muhaakumve opaka yoolakelela. (Mas. 29:20) Mmakupa makina, wakhala wi nyuwaano moolekela vancipale onahaala okhala ntoko wi himwaano yoolakelela yeeparipari, xaxaxa wakhala wi muchu mukina oosuwela yoolakelela anyu. (Ekl. 11:4) Muupuwele, muhaakumve oloca ni muchu hamunaphwanela olekecheya wi munahaala okhala ni muchu yoowo. Nyenya munaphwanela olekecheya wi muri ooreheryeya ntakhara othela nave wi muchu mukina toophwanelela ntakhara nyuwo. Hanka wakhala wi nyuwaano mohoona wi ookhala onoochunaani? Waakhala wi hamunachuna opaka ompwana, mooniherye moorweela wa meerelo anyu. Yaahaala okhala yoonanara omweeriha muchu wuupuwela wi yookhalavo ekari ya opakano ompwana eniiha ehiri yeeyo.—Aef. 4:25. Mulipeleli, 05/2024 ipaax. 22-23 ipara. 9-10