Kuyini Okungenza Sithokoze Lanxa Sizondwa?

1. Kuyini okwakhulunywa nguJesu okwamangalisa abantu?

ENTSHUMAYELWENI yasentabeni uJesu wathi: “Liyathokoza nxa abantu belizonda.” (Luk. 6:22) Kufanele ukuthi abantu ababemlalele bamangala bemuzwa esitsho njalo. Phela akulamuntu ofuna ukuzondwa. Manje yindaba uJesu wakhuluma amazwi la? Lo ngumbuzo oqakathekileyo sibili ngoba lamuhla abalandeli bakaJesu bazondwa ngabantu abanengi. Esihlokweni lesi sizaxoxa ngokuthi kanti vele abantu basizondelani besesibona ukuthi kuyini okungenza sithokoze lanxa besizonda.

ABANTU BASIZONDELANI?

2-3. Kuyini okwenza amaKhristu eqiniso ahlukuluzwe futhi ukwazi lokho kwenza sibabone njani abasihlukuluzayo? (UJohane. 16:​2, 3)

² Basizondela ukukhonza uJehova. UJesu wathi kulabantu ababezahlukuluza abalandeli bakhe wasesitsho lokuthi abanye bazababulala lokubabulala. Wakhuluma ngabo wathi: “Abazange bangazi mina kanye loBaba.” (Bala uJohane 16:​2, 3.) Kodwa vele ngubani obangela ukuthi sihlukuluzwe? NguSathane. IBhayibhili lithi nguye “unkulunkulu womumo lo wezinto.” (2 Khor. 4:​3, 4) Uvale ingqondo zabantu ukuze bangalazi iqiniso ngoJehova kwasokusenza ukuthi bazonde labo abakhonza uNkulunkulu labafuna ukufunda ngaye. (Joh. 8:​42-44) Ukwazi lokho kwenza sibabone njani labo abasizondayo? Kuyasinceda ukuthi singabazondi njengoba sesikwazi ukuthi nguSathane obavale ingqondo.

³ Cabanga ngokwenzakala kumfowethu okuthiwa nguPavel,a ohlala elizweni lapho umsebenzi wethu ongavunyelwa khona. Wabotshwa, watshaywa kabuhlungu njalo wavalelwa ejele okwezinyanga ezinengi ngenxa nje yokukhonza uJehova. UPavel uthi: “Kuyangicacela ukuthi uSathane lamadimoni yibo abazama ukusivimba ukuthi sikhonze uJehova. Izisebenzi zejele ezinengi azisizondi, ziyabe zisenza umsebenzi wazo nje kuphela.” Omunye umfowethu weCroatia owayephathwa kubi ngabazali bakhe abangakhonziyo uthi: “Khathesi sengizwisisa ukuthi abazali bami ayisibo bantu ababi kodwa isitha sami esikhulu nguSathane.”—Efe. 6:12.

4. Sifundani kulokho okwenziwa nguJesu lomfundi uStefane? (Khangela lomfanekiso.)

⁴ Asibazondi ngitsho abantu abasiphatha kubi kodwa size sibathandazele lokubathandazela. (Mat. 5:44) Lokhu yikho kanye okwenziwa nguJesu lomfundi uStefane. Ngesikhathi uJesu ebethelwe esigodweni sokuhlutshwa wathandaza wathi: “Baba, bathethelele.” (Luk. 23:34) UJesu wacela uJehova ukuthi athethelele amasotsha eRoma ayethunywe ukuthi ambulale. Wayengabe ethandazela lalabo ababememeza besithi kabulawe, betshotshozelwa ngabakhokheli benkolo ababeyizitha zikaJesu. UJesu wananzelela ukuthi abantu labo babengakwazi abakwenzayo. Umfundi uStefane laye wacela uNkulunkulu ukuthi athethelele abantu abasebembulala. (Imiseb. 7:​58-60) UJehova wawuphendula yini umthandazo kaJesu lokaStefane? Ye waphendula. Yindaba sisitsho njalo? Abantu abanengi ababekhankasela ukuthi uJesu abulawe, bacina bephendukile, bakholwa kuye futhi babhabhathizwa. (Imiseb. 2:​36-41) LoSawuli waseThasu owayephakathi kwalabo ababevumelana lokubulawa kukaStefane wacina esengumKhristu. Wazisola kakhulu ngezinto ezimbi ayeke wazenza.—1 Thim. 1:13.

5. Ufundani kulokho okwenzakala kuCésar?

⁵ Lalamuhla uJehova uyayiphendula imithandazo yabantu bakhe nxa bethandazela labo ababaphatha kubi. Ake sixoxe ngalokho okwenzakala kuCésar, ohlala eVenezuela. Ngesikhathi esenguFakazi kaJehova uyise waqalisa ukumhlukuluza. UCésar uthi: “Umama wayesenza konke okukhangelelwe ukuthi kwenziwe yinkosikazi endlini. Wayemhlonipha sibili ubaba njalo emthanda uJehova. Yikho kanye asifundisa khona lathi. Wasifundisa lokuthi simlalele ubaba ngaphandle nxa esitshela ukuthi senze into engavumelani lentando kaNkulunkulu.” Ngokuhamba kwesikhathi ubaba kaCésar watshintsha. UCésar uthi: “Ngelinye ilanga ngathandaza kuJehova ngasengikhuluma lobaba ngimcela ukuthi ngimfundise iBhayibhili. Ubaba wavuma futhi lokho kwangithokozisa kakhulu.” Uyise wacina ebhabhathizwa. Lanxa kungayisibo bonke abasiphatha kubi abangatshintsha, abanye babo bangatshintsha nxa bengananzelela ukuthi siyabahlonipha. Sikulindele ngabomvu ukubona ukuthi uJehova “uMahluleli womhlaba wonke,” olesihawu uzabancedisa njani abanye abantu abasiphatha kubi ukuthi batshintshe besebemkhonza.—Gen. 18:25.

6. Kuyini okunye okwenza abantu basizonde? (UMakho 13:13)

⁶ Basizondela ukuthi sihlonipha uJesu. UJesu wathi amaKhristu eqiniso ayezazondwa ngabantu bonke “ngenxa yebizo lakhe.” (Bala uMakho 13:13.) Wayesitshoni uJesu? “Ibizo” ayekhuluma ngalo lapha litsho konke okuphathelane laye okugoqela lokuba yiNkosi yoMbuso kaNkulunkulu. Abantu abanengi abasizondayo bathemba ababusi ababekwe ngabantu kulokuthi bathembe uJesu Khristu iNkosi ebekwe nguNkulunkulu. UJesu waqalisa ukuba yiNkosi yoMbuso kaNkulunkulu ngo-1914 futhi sekuseduze ukuthi atshabalalise yonke imibuso yabantu.

7-8. Kuyini okunye okwenza abantu bakaJehova baphathwe kubi? (UJohane 15:​18-20) (Khangela lemifanekiso.)

⁷ Sizondelwa ukuthi sitshiyene labantu bomhlaba lo. UJesu watshela abafundi bakhe ukuthi babezazondwa ngabantu ngenxa yokuthi ‘abasibo bomhlaba.’ (Bala uJohane 15:​18-20.) AmaKhristu akuqala ayetshiyene labanye abantu. Lathi sitshiyene labantu bomhlaba lo. Esikucabangayo, lesikukhulumayo kanye lesikwenzayo akufanani lokwabantu abanengi. Lokho kwenza ukuthi abanye abafowethu labodadewethu bangaphathwa kuhle emisebenzini lasezikolo. (1 Phet. 4:​3, 4) Kuyasithokozisa ukuthi abanye abasizondayo bacina betshintsha nxa bebona indlela esiziphatha ngayo.

⁸ Asixoxeni ngokwenzakala ku-Ignacio, ohlala eCentral America. Esafunda kulomunye umbalisi owayehlala emchothoza ngenxa yendlela ayeziphethe ngayo. Kodwa wathi esezaqeda isikolo umbalisi lowo wambuza ukuthi wayekwenelisa njani ukuhlala esenza okutshiwo liBhayibhili lanxa abanye babemhleka futhi bemchothoza. U-Ignacio wamchasisela ukuthi ukulalela imithetho kaNkulunkulu kuyamvikela. Wanxusa umbalisi lo emhlanganweni webandla. Umbalisi wahamba sibili emhlanganweni lo, u-Ignacio wasala engelankani. Uthando lwabafowethu labodadewethu lwamthinta kakhulu. Kusukela mhlalokho wahle waqalisa ukungena yonke imihlangano. Ngokuhamba kwesikhathi, abantu baqalisa ukumzonda lokumchothoza umbalisi lo ngoba laye wayesefunda iBhayibhili. Lanxa kunjalo waqhubeka ebambelele waze wabhabhathizwa.

9-10. (a) Kuyini okunye okwenza amaKhristu angafanani labantu bomhlaba lo? (b) Okwenziwa ngumphostoli uPhawuli kusifundisani?

⁹ Okunye okwenza singafanani labantu bomhlaba yikuthi asingeni kwezombusazwe futhi asiyi empini. (Joh. 18:36) URoma 13:1 usikhuthaza ukuthi sihloniphe iziphathamandla futhi yikho kanye esikwenzayo. Lanxa kunjalo, asingeni kwezombusazwe, asidingi izikhundla kwezombusazwe futhi asivoteli muntu. Kungani singakwenzi konke lokho? Siqotho kuJehova futhi sisekela uMbuso wakhe okhokhelwa nguKhristu. Lokho sekubangele ukuthi oFakazi bakaJehova abanengi babotshwe. Lanxa kunjalo, abafowethu labodadewethu ababotshiweyo abayekeli ukutshumayela. Benza njengomphostoli uPhawuli. Laye wabotshwa okwesikhathi eside kodwa kazange ayekele ukutshumayela. (Imiseb. 24:27; 28:​16, 30) Wayetshumayeza wonke umuntu kungelani lokuthi ngabalindi bejele, izisebenzi zemthethwandaba, ababusi ngitsho lamakhosi. Kungenzakala lokuthi waze watshumayeza leziphathamandla ezazingaphansi kombusi weRoma uNero.—Imiseb. 9:15.

¹⁰ Abafowethu labodadewethu ababotshiweyo labo batshumayeza bonke abazimisele ukubalalela. Kungaba ngabahluleli, iziphathamandla zikahulumende kumbe abalindi bamajele. Omunye umfowethu owavalelwa ejele okweminyaka engu-6 ngenxa yokungangeni kwezombusazwe uthi ukuba sejele wayengakuboni kuyisijeziso kodwa wayekubona kulithuba ayeliphiwe nguJehova lokuthi atshumayeze abantu abathobekileyo ababesejele. Khona kuyisibusiso sibili ukuthola ithuba lokutshumayeza abantu abanjalo. (Kol. 4:3) Khathesi asixoxeni ngokuthi kuyini okwenza sithokoze lanxa sizondwa ngenxa yokukhonza uJehova.

OKWENZA SITHOKOZE LANXA SIZONDWA

11. Kuyini okumele sikukhumbule nxa sihlukuluzwa? Nika isibonelo.

¹¹ Yikwazi ukuthi iBhayibhili lathi kuzabanjalo. Esiphrofethweni sakuqala esiseBhayibhilini uJehova wathi uSathane lenzalo yakhe babezabazonda labo abathanda uJehova. (Gen. 3:15) UJesu laye wakugcizelela lokhu emaVangelini womane. (Mat. 10:22; Mak. 13:​9-12; Luk. 6:​22, 23; Joh. 15:20) Labanye abalobi beBhayibhili babhala ngakho. (2 Thim. 3:12; Jak. 1:2; 1 Phet. 4:​12-14; Jud. 3, 17-19) Ngakho nxa abantu besihlukuluza asethuki kodwa sihle sikhumbule ukuthi yikugcwaliseka kwesiphrofetho. Khona nje ukuthi siyahlukuluzwa kwenza siqiniseke ukuthi sikhonza uNkulunkulu weqiniso. Omunye udadewethu ohlala elizweni lapho umsebenzi wethu ongavunyelwa khona uthi: “Ngesikhathi ngizinikela kuJehova ngangikwazi mhlophe ukuthi ngelinye ilanga ngizahlukuluzwa. Ngakho kwathi sekufikile angizange ngesabe kumbe ngimangale.” Omunye walabo ababemhlukuluza ngumkakhe. Wayemphatha kubi waze watshisa iBhayibhili lakhe lamabhuku ayewasebenzisa. Udadewethu kazange esabe kumbe abuyele emuva kodwa ukholo lwakhe lwaqhubeka luqina. (Heb. 10:39) Uqhubeka esithi: “Ngangikwazi ukuthi ngizahlukuluzwa njengoba vele iBhayibhili lisithi amaKhristu azahlukuluzwa. Ukuphathwa kubi kwenza ngangathandabuzi ukuthi ngisenkolweni yeqiniso.”

12. Kuyini okwanceda omunye umfowethu ukuthi aqinisele ngesikhathi ehlukuluzwa?

¹² Lanxa sikwazi sibili ukuthi sizahlukuluzwa kwezinye izikhathi kubanzima ukukubekezelela. Omunye umfowethu owake wabotshwa uthi: “Kwezinye izikhathi ngangikhathazeka ngize ngikhale.” Manje kuyini okwanceda umfowethu lo ukuthi aqinisele? Uqhubeka esithi: “Ngangihlala ngithandaza. Ngangisithi nxa ngivuka ngihle ngikhuleke. Vele kwakusithi nje kungaba lento engikhathazayo ngihle ngithandaze. Kwesinye isikhathi abanye abantu babesenza izinto ezingicaphulayo, ngiwuzwe umoya wami kodwa ngihle ngigijime ngiyezivalela esambuzini ngikhuleke.” Okunye okwanceda umfowethu lo yikucabanga ngezinceku zikaJehova ezahlala ziqotho kuJehova lanxa zazithwele nzima. Konke lokhu kwamnceda ukuthi aqinisele futhi abe lokuthula uJesu akuthembisa abalandeli bakhe.—Joh. 14:27; 16:33.

13. Kuyini okungasinceda siqinisele nxa sihlukuluzwa?

¹³ Yikuthanda uJehova labafowethu. Langesikhathi uJesu esebuhlungwini futhi esekhangelane lokufa waqhubeka emthanda uJehova futhi ebathanda labafundi bakhe. (Joh. 13:1; 15:13) Nxa lathi simthanda uJehova futhi sibathanda labafowethu labodadewethu sizenelisa ukuqinisela nxa sihlukuluzwa. Kungani sisitsho njalo? Kasihloleni okwenzakala kumphostoli uPhawuli.

14. Kuyini okwenza uPhawuli wahlala ethembekile lanxa wayesekhangelane lokufa?

¹⁴ UPhawuli wathi esezabulawa wabhalela umngane wakhe uThimothi wathi: “Phela uNkulunkulu kasiphanga umoya wobugwala kodwa wasipha owamandla lowothando.” (2 Thim. 1:7) Wayesitshoni uPhawuli? Wayesitsho ukuthi nxa umuntu emthanda kakhulu uJehova uyazimisela ukuqhubeka ethembekile lanxa ephakathi kobunzima obukhulu. (2 Thim. 1:8) Lanxa uPhawuli wayekwazi ukuthi wayengabulawa ngenxa yokukhonza uJehova, indlela ayemthanda ngayo yenza waba lesibindi futhi waqhubeka ebambelele ekukhonzeni kweqiniso.—Imiseb. 20:​22-24.

15. Abafowethu labodadewethu batshengise njani ukuthi bayathandana? (Khangela lomfanekiso.)

¹⁵ Siyabathanda kakhulu abafowethu labodadewethu abaqhubeka bethembekile kuJehova lanxa behlukuluzwa. Lamuhla abafowethu labodadewethu bazimisele ukuncedisa abanye babo lanxa lokho kungabafaka engozini. Benza khona kanye okwenziwa ngu-Akhwila loPhrisila, abazange bathikaze ukuncedisa uPhawuli lanxa lokho kwakungabafaka ebunzimeni. (Rom. 16:​3, 4) Ngokwesibonelo, eRussia abafowethu labodadewethu abanengi bayahamba emithethwandaba besiyaqinisa abanye babo. Omunye udadewethu owayebotshiwe wathi ebona abafowethu labodadewethu begcwele emthethwandaba waphelelwa, waswela lokuthi athini. Ukubabona kwamthinta kakhulu futhi kwamqinisa. Kuyazikhanyela ukuthi indlela esithandana ngayo iyasiqinisa nxa sisebunzimeni.

16. Kuyini okwenza umphostoli uPhetro wathi labo abaphathwa kubi ngenxa yokukhonza uNkulunkulu bayathokoza? (U-1 Phetro 4:14)

¹⁶ Siyakwazi ukuthi uNkulunkulu uyathokoza nxa siqinisela. (Bala u-1 Phetro 4:14.) Umphostoli uPhetro wathi bayathokoza labo abaqiniselayo nxa bephathwa kubi ngenxa yokukhonza uNkulunkulu. Kuyini okubenza bathokoze? Ukuphathwa kubi kuyabe kutshengisa ukuthi umoya kaNkulunkulu ‘uhlezi phezu kwabo.’ UPhetro wayekwazi ukuthi nxa ungaqinisela usala uthokoza ngoba uyabe ukwazi ukuthi uthokozisa uNkulunkulu. Ngemva nje kwePhentekhosti lika-33 C.E., amapholisa ethempeli athunywa ukuthi ayebopha uPhetro labanye abaphostoli ngenxa yokuthi babetshumayela. Kodwa uPhetro kazange ethuke, waba lesibindi walumela ukholo lwakhe. (Imiseb. 5:​24-29) Lanxa batshaywa, abazange bayekele ukutshumayela. Babethokoza ngoba “uNkulunkulu wayebone kufanele ukuthi bahlukuluzwe ngenxa yebizo [likaJesu].” Lokhu kutshengisa ukuthi lathi singathokoza nxa siphathwa kubi.—Imiseb. 5:​40-42.

17. UJesu wabatshelani abafundi bakhe ngelanga abotshwa ngalo?

¹⁷ Ngelanga uJesu abotshwa ngalo watshela abafundi bakhe wathi: “Lowo ongithandayo uzathandwa nguBaba futhi lami ngizamthanda.” (Joh. 14:21) Sisilindele ngabomvu isikhathi lapho okuyabe kungaselabantu abasizondayo. Siyabe sesiphila labantu abasithandayo kuphela. (2 Thes. 1:​6-8) Asiqhubekeni sikhumbula lokhu esixoxe ngakho ngoba kuzasinceda sihlale sithokoza lanxa besasekhona abasizondayo.