Qala Ucabangisise

1-2. Ukuqala sicabangisise kuzasinceda njani?

UYAKE ucabange ukuthi abantu bayakudelela yini? Kumbe kulomuntu owake wakuphatha kubi? Sowake waba phakathi kwesimo esakwenza wesaba kakhulu yini? Ngezikhathi ezinjalo kungaba nzima ukuthi umuntu aqale acabangisise engakenzi lutho. Lanxa kunjalo kulamacebo aseBhayibhilini angasinceda ezimeni ezinjengalezi.

² Kanti kunceda ngani ukuthi umuntu ake azinike isikhathi sokucabanga? Kuyamnceda azwisise ukuthi kungani into ethile yenzakele. Ngokwesibonelo, ake sithi kulomuntu okucaphulileyo, kulokuthi uvuke ngolaka kuzakunceda ukuzama ukuzwisisa ukuthi umuntu lowo ubehloseni ngakukhulumileyo kumbe ngakwenzileyo. (Zaga. 10:19; Hubo. 4:4) Nxa singabantu abazwisisayo kuzabalula ukuthi sithethelele abanye, samukele amacebo esiwaphiwa ngabanye njalo sivume lokuqondiswa. (Zaga. 19:20) Abantu abazwisisayo bayazama ukukhuluma lokwenza okuthokozisa uJehova kanye labanye. Khathesi asixoxeni ngabanye abantu okukhulunywa ngabo eBhayibhilini ukuze sibone ukuthi ukuthobeka, lokungavuki ngolaka lokuthemba uJehova kungasinceda njani.

THOBEKA

3. Wayengubani uNamani?

³ Nxa sifuna ukuthokozisa uJehova kumele sithobeke, singazigqaji. (1 Phet. 5:5) Asixoxeni ngokwenzakala kweyinye indoda okuthiwa nguNamani eyayiyinduna yebutho leSiriya. Indoda le yayisaziwa futhi ihlonitshwa kakhulu. Lanxa kunjalo indoda le yayilomkhuhlane omubi kakhulu okuthiwa yibulephero.—2 Amakho. 5:1.

4. UNamani wenzani esezwe ukuthi wayengelatshwa ko-Israyeli?

⁴ UmkaNamani wayesetshenzelwa yintombazana engum-Israyeli. Intombazana le yamtshela ukuthi ko-Israyeli kwakulomphrofethi owayengenelisa ukwelapha uNamani. (2 Amakho. 5:​2, 3) UNamani wayengathi, ‘Kambe okuyintombazana kwako-Israyeli okuyisigqili sokungangitshela into yokwenza?’ Kodwa yena watshengisa ukuthi uthobekile ngoba wasuka wayacela imvumo enkosini yaseSiriya ukuthi aye ko-Israyeli ukuze elatshwe.—2 Amakho. 5:​4, 5.

5. Kuyini okwenzakalayo uNamani esefike ko-Israyeli?

⁵ UNamani wangena indlela waqonda ko-Israyeli. Uthe efika esigodlweni, inkosi uJehoramu yacabanga ukuthi uzokulwa. Kusenjalo umphrofethi u-Elisha wezwa udletshana lokuthi uNamani usesigodlweni senkosi, wasecela ukuthi inkosi imtshele abuye kuye. (2 Amakho. 5:​6-9) UNamani wathi efika wamangala ngoba lomuntu ayemlandile kazange aphume lokuphuma endlini kodwa wathuma inceku ukuthi izomtshela okwakumele akwenze ukuze asile.—2 Amakho. 5:10.

6. (a) Kungani uNamani waqala engafuni ukwenza ayekutshelwe yinceku ka-Elisha? (b) Izinceku zikaNamani zamncedisa njani futhi kwaphetha ngani? (U-2 Amakhosi 5:​13, 14)

⁶ Okwakhulunywa yinceku akuzange kumphathe uNamani, “wazonda wasuka wahamba.” (2 Amakho. 5:​11, 12) Kungani wenza njalo? Mhlawumbe wayebona angani u-Elisha wayemdelele kakhulu njengoba yena wayengumuntu olesikhundla. Kungenzeka lokuthi wayezitshela ukuthi u-Elisha weyisa iSiriya. UNamani wabona kungcono ukuthi azibuyelele kibo. Kodwa izinceku zakhe zananzelela ukuthi u-Elisha wayefuna ukumsiza, yikho zamncenga ukuthi acabangisise engakabuyeli eSiriya. UNamani wazithoba walalela lokho ayekutsheliwe futhi wasila.—Bala u-2 Amakhosi 5:​13, 14.

7. Sifundani kulokho okwenziwa nguNamani? (IZaga 22:4) (Khangela lemifanekiso.)

⁷ Sifundani? Indaba le isifundisa ukuthi singaphongukwenza izinto singacabanganga. Ukuthobeka kuzasinceda ukuthi singenzi izinqumo sizondile njalo sikwamukele lokuthi kulezinto esingazaziyo. Yikho kuyabe kumele sivume ukuncediswa ngabanye abantu njalo singakhohlwa lokucela ukuncediswa nguJehova. Lanxa uNamani wayengakhonzi uJehova, kwakhanya ukuthi uthobekile ngoba walalela okwakhulunywa yintombazana engum-Israyeli, lalokho akutshelwa zinceku zakhe waphinda wenza lokho okwakukhulunywe ngumphrofethi kaJehova. Lanxa uNamani waqalisa ezigqaja wacina ethobekile futhi lokhu yikho okwamnceda ukuthi asile. Ake sithi kulomuntu oseluleke esebenzisa iLizwi likaNkulunkulu iBhayibhili kumbe kulokunye esikutshelwe yinhlanganiso kodwa kasikuzwisisi, sizakwenzani? Nxa sithobekile sizakusebenzisa khonokho esiyabe sikutsheliwe kodwa nxa sizigqaja sizakuninela khatshana.—Bala iZaga 22:4.

UNGAVUKI NGOLAKA

8. Kuyini okungenza sicine sivuka ngolaka?

⁸ Kwesinye isikhathi omunye umuntu angasiphatha kubi kumbe akhulume amazwi asizwisa ubuhlungu. Nxa umuntu angasiphatha njalo singavuka ngolaka ngoba siyabe sisizwa ubuhlungu. (Efe. 4:26) Manje kuyini okungasinceda ukuthi singavuki ngolaka esimeni esinjalo? Asiboneni ukuthi sifundani kulokho okwenziwa nguDavida lo-Abhigeli.

9. UNabhali wamphatha njani uDavida?

⁹ Ngesikhathi uDavida ebalekela uSawuli, wahamba wayahlala enkangala yasePharani. (1 Sam. 25:1) Wathi ekhonale yena lamadoda ayelawo bavikela abelusi kanye lezimvu zendoda eyayinothile okwakuthiwa nguNabhali. (1 Sam. 25:​15, 16) Abelusi bemihlambi kaNabhali sebebuyele eKhameli, uDavida wathuma amadoda ayelawo ukuthi ayecela ukudla kuNabhali. (1 Sam. 25:​6-8) UNabhali kazange asamukele isicelo sakhe kodwa watshingela izinceku lezo waze wathethisa loDavida.—1 Sam. 25:​10, 11.

10. UDavida lo-Abhigeli batshengisa njani ukuthi bayazwisisa? (U-1 Samuyeli 25:​32, 33) (Khangela lomfanekiso.)

¹⁰ Kumele ukuthi uyazwisisa ukuthi kungani uDavida wazonda wabila. Phela uDavida wayengesabi ukuveza imizwa yakhe. Yikho wahle wathi okungaqalwayo, wasuka lapho esefuna ukuyaqeda ngoNabhali. (1 Sam. 25:​13, 21, 22) UmkaNabhali u-Abhigeli wathi esizwa ukuthi uDavida usendleleni ufuna ukuzothanyela imuli kaNabhali, wahle watshiya konke ayekwenza wangena indlela esiyabona uDavida. Kungani u-Abhigeli wakhetha ukwenza njalo? Wayezwisisa ukuthi kungani uDavida wayezondile kodwa kazange akhohlwe ukuthi uDavida wayeyindoda elungileyo. Wayefuna ukumncedisa ehlise umoya. Yikho wamphathela ukudla wasexoxisana laye. (1 Sam. 25:​18, 23-31) Kwakhanya ukuthi uDavida uthobekile lokuthi uyazwisisa ngoba walalela lokho okwakhulunywa ngu-Abhigeli. U-Abhigeli wacebisa uDavida ngendlela evumelana lentando kaJehova. Lokhu kwenza ukuthi uDavida abeke amaphaphu phansi.—Bala u-1 Samuyeli 25:​32, 33.

11. Kuzasinceda njani ukuba ngabantu abazwisisayo? (IZaga 19:11)

¹¹ Sifundani? Nxa singabantu abazwisisayo, sizalwisa ukungavuki ngolaka nxa sicatshulwe ngomunye umuntu. Lokhu kuzasinceda ukuthi singadali umonakalo esingeke senelise ukuwulungisa. U-Abhigeli wazama ukuncedisa uDavida abone izinto ngendlela kaJehova futhi lokhu kwanceda uDavida wehlisa ulaka. (Bala iZaga 19:11.) Nxa lawe kulomuntu okucaphulileyo, zama ukungaphindiseli. (Jak. 1:19) Thandaza kuJehova umcele akuncedise ukuthi ungavuki ngolaka.

12. Abanye bangasincedisa njani?

¹² UJehova wasebenzisa u-Abhigeli ukuze ancedise uDavida ukuthi ehlise umoya. Lalamuhla, uJehova angasebenzisa abafowethu labodadewethu ukuthi basincedise singavuki ngolaka. Yikho nxa kulomuntu okucaphulileyo kumbe kulento engahambi kuhle, zama ukucela ukucetshiswa ngomunye umuntu ebandleni. (Zaga. 12:15; 20:18) Wena ungenelisa yini ukulingisela u-Abhigeli, ucebise umuntu oyabe ecaphukile? Ungenelisa yini ukuncedisa lowomuntu azame ukucabanga ngendlela ezathokozisa uJehova? Nxa unganceda omunye umuntu ukuthi ehlise ulaka, uyabe uthokozisa uJehova.

THEMBA UJEHOVA

13. Kuyini okumele sikukhumbule nxa sisesaba?

¹³ Kwesinye isikhathi singaba phakathi kobunzima obukhulu obungenza sesabe. Manje kuyini okuzasinceda ngezikhathi ezinjalo? Yikukhumbula ukuthi uJehova ulamandla okusincedisa kuloba yisiphi isimo esingaba kuso. (Hubo. 27:1) Lanxa thina sesicabange safika ekucineni ngohlupho esiyabe siphakathi kwalo, kumele sikhumbule ukuthi inhlupho zethu zincane kakhulu nxa ziqathaniswa lamandla kaJehova. Khathesi asixoxeni ngendlela uJehova ancedisa ngayo umphrofethi wakhe uJona. Umphrofethi lo wayemthanda uJehova kodwa wakhulelwa yikwesaba ngesikhathi uJehova emnika umsebenzi owawukhanya unzima.

14. Kuyini okungabe kwenza uJona wesaba ukwenza lokho ayekuthunywe nguJehova?

¹⁴ UJehova wathuma uJona ukuthi ayexwayisa abantu beNiniva. (Jona. 1:​1, 2) Umango wokusuka ko-Israyeli usiya eNiniva wawungasowokudlala ngoba uJona wayengathatha phose inyanga yonke ukuyafika khona. Labantu bakhona babelesihluku besaziwa ngodlakela. (Nahu. 3:​1, 7) Kunguwe owawuthunywe edolobheni leli wawuzakwenzani? UJona wathi okunje angeke ngikumele, nanguya eqonda khonale eThashishi.—Jona. 1:3.

15. Kuyini okwanceda uJona ukuthi amthembe uJehova? (UJona 2:​6-9)

¹⁵ UJona uthe esabaleka, uJehova wenza isimanga esamkhumbuza ukuthi uJehova ulamandla. (Jona. 1:​15, 17) Okwenzakala mhlalokho kwenza uJona wabona ukuthi wayesesaba umnyama ongelampisi ngoba uJehova wayezamvikela ebantwini baseNiniva. (Bala uJona 2:​6-9.) UJehova waphinda wamthuma uJona futhi kazange abe esazilazila, wahle waqonda eNiniva wayabaxwayisa. Abantu labo baphenduka yikho uJehova kasababhubhisanga.—Jona. 3:5.

16. Kungani kungamelanga sesabe? (IZaga 29:25) (Khangela lemifanekiso.)

¹⁶ Sifundani? Akumelanga sivumele ukwesaba abantu kumbe ezinye nje izinto kusenze sesabe ukukhonza uJehova. (Bala iZaga 29:25.) UJona wacina elesibindi sokuyatshumayeza abantu beNiniva ngoba wayesezibonele ukuthi uJehova wayezamncedisa. Lathi akumelanga sesabe kodwa kumele sicabange ngendlela ezitshiyeneyo uJehova asincedisa ngazo lasivikela ngazo. Okunye okungasinceda yikucabangisisa ngendlela uJehova avikele ngayo abafowethu labodadewethu ngesikhathi bephakathi kobunzima.a (Heb. 13:6) Kwangathi singahlala simthemba uJehova njalo sincedise labanye ukuthi bamthembe.

ZAMA UKUCABANGA NJENGOJEHOVA

17. Singenzani ukuze sibe ngabantu abazwisisayo?

¹⁷ Esihlokweni lesi sibonile ukuthi singenzani ukuze sibe ngabantu abazwisisayo. UJehova usincedisa njani ukuthi sibe ngabantu abazwisisayo? Usinike iLizwi lakhe iBhayibhili njalo uhlala esincedisa ngomoya wakhe ongcwele. (Neh. 9:20; Hubo. 32:8) Amacebo asinika wona ayasinceda ukuthi senze izinqumo ezinhle njalo singavuki ngolaka nxa kulomuntu osicaphulileyo. (Hubo. 119:​97-101) Yikho kuqakathekile ukuthi silibale iLizwi likaNkulunkulu besesithandaza kuye. Lokhu kuzasinceda sizame ukucabanga ngendlela uJehova acabanga ngayo besesisenza okumthokozisayo.—Zaga. 21:11.

18. Uzimisele ukwenzani?

¹⁸ Kwangathi sonke singazimisela ukulingisela uJehova uNkulunkulu wethu ozwisisayo. (Hubo. 14:2) Nxa singenza njalo asisoze siphambuke endleleni eyiyo kodwa sizenza okuqondileyo sithokozise uJehova.—Zaga. 21:16.