Vuma Ukukhokhelwa NguJehova

1. Kuyini okungenza abantu bathokoze? (UMathewu 5:3)

AKUCABANGE ukuthi impilo ibizakuba njani ungelakudla, izigqoko kanye lendawo yokuhlala. Asithandabuzi ukuthi ibizakubanzima kakhulu ngoba vele kasidalelwanga ukuthi siziswele izinto lezi. Kunjalo langokukhonza, asidalelwanga ukuthi siphonguphila nje singamazi uMdali wethu. (Bala uMathewu 5:3.) Nxa sifuna ukuthi impilo yethu ibemnandi kumele sivume ukuqondiswa nguye.

2. Ngonjani umuntu okukhulunywa ngaye kuMathewu 5:3?

² Ngonjani umuntu ‘onanzelelayo ukuthi uyamdinga uNkulunkulu?’ Amabala angaphansi kuMathewu 5:3 athi: “abangabayanga emoyeni.” Lokhu kwenza sicabange ngomuntu ongumyanga wokucina, oziphilela ngokucela nje kuphela. Umuntu lo kalandawo yokuhlala, ugqoka amanikiniki njalo utshona etshiswa lilanga kumbe ehwahwathwa ngumqando. Usengokuyisinothongwana nje, abantu sebemninela khatshana. Nxa umuntu lo efuna ukuba lempilo engcono kumele avume ukuncediswa. Lokhu yikho kanye okwenziwa ngumuntu okunanzelelayo ukuthi uyamdinga uNkulunkulu. Uyavuma ukuqondiswa nguJehova njalo uyakwenza lokho amtshela khona.

3. Sizaxoxa ngani esihlokweni lesi?

³ Esihlokweni lesi sizabona ukuthi sifundani kowesifazana weFenikhiya owancedwa nguJesu. Sizaxoxa langokuthi sifundani kumphostoli uPhetro, umphostoli uPhawuli loDavida.

WAYETHOBEKILE, EPHIKELELA NJALO ELOKHOLO

4. Owesifazana weFenikhiya wayelandeni kuJesu?

⁴ Ngelinye ilanga uJesu walandwa ngomunye owesifazana weFenikhiya ekhala ngokuthi ‘indodakazi yakhe ihlutshwa lidimoni.’ (Mat. 15:​21-28) Owesifazana lo wafika waguqa phambi kukaJesu wamncenga esamncenga ukuthi asilise indodakazi yakhe. Singamlingisela njani owesifazana lo? Ake sixoxe ngezindlela ezintathu.

5. Kuyini okwenza uJesu wanceda owesifazana weFenikhiya? (Khangela lomfanekiso.)

⁵ Owesifazana weFenikhiya watshengisa ukuthi uthobekile ngoba kazange akhubeke ngendlela uJesu amphendula ngayo. Phela uJesu wamfanisa lomdlwane, isifuyo esasigcinwa ngabantu bezizweni kuphela. Kunguwe wawuzakwenzani? Wawuzacaphuka yini uhle ukhalale uhambe? Owesifazana lo kazange akhalale kodwa waphikelela. Waqhubeka emncenga uJesu ngoba wayekholwa ukuthi uzacina emncedile. Lanxa uJesu waqala wathi uthunywe kwabako-Israyeli wacina eyisilisile indodakazi yowesifazana lo ngoba wayebona ukuthi ulokholo.

6. Singamlingisela njani owesifazana weFenikhiya?

⁶ Kunengi esingakufunda kowesifazana weFenikhiya. Lathi kumele sithobeke, siphikelele njalo sibe lokholo oluqinileyo nxa sifuna ukuba ngabangane bakaJehova. Nxa sithobekile sizancenga uJehova ukuthi asincedise. Kanti njalo kumele sibe lokholo kuJesu Khristu futhi sibathembe labo abakhethileyo ukuthi basikhokhele. (Mat. 24:​45-47) Kumele siphikelele ukwenza izinto lezi ukuze sithokozise uJehova loJesu. (Khangela uJakhobe 1:​5-7.) Khathesi asixoxeni ngokuthi uJehova usikhokhela njani, usinakekela njani lokuthi usivikela njani. Sizabona ukuthi sifundani kuPhetro, uPhawuli kanye lakuDavida.

QHUBEKA UFUNDA NGOJEHOVA

7. Yiwuphi umsebenzi uJesu awunika uPhetro futhi uPhetro kwakumele aqhubeke esenzani? Chasisa. (UHebheru 5:14–6:1)

⁷ UPhetro waba ngomunye wabafundi bakaJesu bakuqala futhi wakunanzelela ukuthi uJesu wayenguMesiya lokuthi wayesetshenziswa nguJehova ukuze afundise abanye iqiniso. (Joh. 6:​66-68) UJesu engakabuyeli ezulwini watshela uPhetro wathi: “Nika amazinyane ezimvu zami ukudla.” (Joh. 21:17) Lakanye uPhetro wawenza umsebenzi lo. Phela wayekhuthele ekutshumayeleni futhi encedisa abazalwane ukuthi babe lokholo oluqinileyo. UJehova waphinda wamnika umsebenzi wokuthi abhale amabhuku amabili aseBhayibhilini. Lanxa kunjalo, laye kwakumele aqhubeke efunda okunengi ngoJehova. UPhetro wayezibala izincwadi ezabhalwa ngumphostoli uPhawuli lanxa okunye kwalokho ayekubala ‘kwakunzima ukukuzwisisa.’ (2 Phet. 3:​15, 16) Kakhalalanga ukufunda izinto lezi ngoba wayelokholo lokuthi uJehova wayezamnceda ukuthi akuzwisise lokho ayekubala.—Bala uHebheru 5:14–6:1.

8. UPhetro watshengisa njani ukuthi uyavuma ukuqondiswa nguJehova?

⁸ Umphostoli uPhetro watshengisa ukuthi ulokholo kuJehova ngokulalela lokho ayemtshela khona. Ngokwesibonelo, ngesikhathi eseJopha wabona ingilosi kaNkulunkulu embonweni yamtshela yathi kahlabe adle. Umthetho kaMosi wawusithi izinyamazana lezi okwakuthiwa azihlabe zingcolile. Kufanele ukuthi kwamethusa lokho akutshelwayo njengoba wayengumJuda. Yikho waphendula wathi: “Hatshi Nkosi, mina angikaze ngidle loba yini engcolileyo lengahlambulukanga.” Kodwa ingilosi yathi kuye: “Yekela ukubiza izinto esezihlanjululwe nguNkulunkulu ngokuthi zingcolile.” (Imiseb. 10:​9-15) UPhetro wayezatshintsha yini indlela acabanga ngayo? Kusenjalo, kwafika amadoda amathathu ayethunywe nguKhoneliya ukuthi azombiza. Kudala kwakhe wayengeke avume ukuyanyathela emzini womuntu wezizweni ngoba amaJuda ayesithi abantu bezizweni bangcolile. (Imiseb. 10:​28, 29) Kodwa wathi esezwisisa ukuthi uJehova ufuna ukuthi wonke umuntu azwe izindaba ezinhle kungelani lokuthi ungumhlobo bani, wahle watshintsha wenza lokho okufunwa nguJehova. (Zaga. 4:18) UPhetro watshumayeza uKhoneliya labemuli yakhe. Kumele ukuthi wathokoza kakhulu njengoba abantu laba balamukela iqiniso, bathululelwa lomoya ongcwele njalo babhabhathizwa.—Imiseb. 10:​44-48.

9. Ukugebha sijule eLizwini likaNkulunkulu kuzasinceda njani?

⁹ Kumele silingisele uPhetro ngokuhlala sibala iLizwi likaNkulunkulu. Kodwa akumelanga sibale izinto ezilula kuphela. Kumele sizimisele lokugebha sijule eLizwini likaNkulunkulu ukuze sizwisise lezinto ezingakhanya zinzima. Kungani kuqakathekile ukuthi sikwenze lokho? Siyabe sizafunda izinto ezintsha ngoJehova ezizasinceda ukuthi simthande njalo simhloniphe. Kanti njalo sizaphinda sibe lesifiso sokuxoxela labanye lokho esiyabe sikufundile ngoNkulunkulu. (Rom. 11:33; Isam. 4:11) Okunye esikufunda kuPhetro yikuthi nxa indlela ebesizwisisa ngayo indaba ethile ingatshintsha kumele silwamukele lolo tshintsho. Lokhu kutsho ukuthi indlela esicabanga ngayo lesenza ngayo kumele ihle itshintshe. Singenza njalo, uJehova uzaqhubeka esiqondisa njalo lathi sizenelisa ukuqhubeka simkhonza sithembekile.

GQOKA UBUNTU OBUTSHA

10. Singenzani ukuze sithokozise uJehova? (UKholose 3:​8-10)

¹⁰ Ukuze sithokozise uJehova kumele ‘sihlubule ubuntu obudala besesigqoka ubuntu obutsha.’ (Bala uKholose 3:​8-10.) Umuntu kumele asebenze nzima ukuze abe lobuntu obuthokozisa uJehova. UPhawuli wayelesifiso sokuthokozisa uNkulunkulu kusukela esasemncane kodwa wayengakwazi ukuthi amkhonze njani ngoba wayengelalo ulwazi oluqondileyo. (Gal. 1:14; Flp. 3:​4, 5) Okwenza uPhawuli wehluleka ukuthokozisa uNkulunkulu yikuthi wayezigqaja futhi engakazwisisi lokho okwakufundiswa nguJesu.—1 Thim. 1:13.

11. Kuyini okwakumthwalise nzima uPhawuli?

¹¹ UPhawuli engakabi ngumKhristu wayengaphuzi ukucaphuka. Ibhuku lemiSebenzi lisitshela ukuthi wayebazonda abafundi bakaJesu futhi efuna ukubabulala. (Imiseb. 9:1) UPhawuli wathi esengumKhristu wasebenza nzima ukuze ahlubule ubuntu obudala. Waqalisa ukubathanda lokubazwela abantu. (Efe. 4:​22, 31) Lanxa wayesetshintshile wayelokhu ewenza amaphutha. Ngokwesibonelo, ngelinye ilanga waphikisana loBhanabha kwaba luthuli. (Imiseb. 15:​37-39) Kumele ukuthi lokhu kwamdanisa kakhulu uPhawuli kodwa kazange akhalale. Waqhubeka esenza okusemandleni akhe ukuze athokozise uJehova.—1 Khor. 9:27.

12. Kuyini okwanceda uPhawuli ukuthi enelise ukuhlubula ubuntu obudala?

¹² Okwanceda uPhawuli ukuthi enelise ukuhlubula ubuntu obudala abesegqoka ubuntu obutsha yikuthi wayencediswa nguJehova. (Flp. 4:13) NjengoPhetro, uPhawuli laye ‘wayethembele emandleni avela kuNkulunkulu.’ (1 Phet. 4:11) Lanxa kunjalo, uPhawuli wayeke adane ngenxa yamaphutha ayewenza. Manje kuyini okwakumnceda ngezikhathi ezinjalo? Yikucabangisisa ngakho konke okuhle uJehova ayemenzele khona futhi lokhu kwamenza wazimisela ukuqhubeka emthokozisa.—Rom. 7:​21-25.

13. Singamlingisela njani uPhawuli?

¹³ Thina singamlingisela njani uPhawuli? Kungelani lokuthi silesikhathi esingakanani sikhonza uJehova, kumele siqhubeke sihlubula ubuntu obudala besesigqoka ubuntu obutsha. Njengoba singabantu abalesono sizahlala siwenza amaphutha. Ngokwesibonelo, singavuka ngolaka kumbe sitshele omunye umuntu amazwi azamzwisa ubuhlungu kodwa lokhu akutsho ukuthi asisoze safa samthokozisa uJehova. Thina kuyabe kumele silwise ukutshintsha indlela esicabanga ngayo lesenza ngayo. (Rom. 12:​1, 2; Efe. 4:24) Nxa sifuna ukuthokozisa uJehova kumele sikhumbule ukuthi yithi okumele sitshintshe.

VUMELA UJEHOVA AKUVIKELE

14-15. UJehova ubavikela njani abantu bakhe? (IHubo 27:5) (Khangela lomfanekiso (Khangela indima 5)

¹⁴ Okunye okuzasenza sithokoze kakhulu yikwazi ukuthi uJehova uyasivikela. Kanti uJehova usivikela njani?

¹⁵ UDavida wayeqiniseka ukuthi uJehova wayezamvikela ngezikhathi ezinzima. (Bala iHubo 27:5.) UJehova kasoze avumele ukuthi loba yini iphambanise ubungane bethu laye. Uze asithembise ukuthi akulasikhali esilungiselelwe ukusihlasela esizaphumelela. (Hubo. 34:7; Isaya. 54:17) Kumele sikhumbule ukuthi uJehova ulamandla ukwedlula uSathane lamadimoni akhe kanye lalabo abamsekelayo. Siyakwazi ukuthi lanxa bengasibulala, uJehova uzasivusa. (1 Khor. 15:​55-57; Isam. 21:​3, 4) UJehova uyenelisa ukusincedisa nxa sidanile kumbe sikhathazekile (Zaga. 12:25; Mat. 6:​27-29) UJehova uphinda asincedise esebenzisa abafowethu labodadewethu kanye labelusi abasebandleni. (Isaya. 32:​1, 2) Kuqakathekile lokuthi singene yonke imihlangano yebandla ngoba le ngeyinye indlela uJehova ayisebenzisayo ukuze asivikele.—Heb. 10:​24, 25.

16. Ukulalela uJehova kwakumnceda njani uDavida?

¹⁶ UDavida wayethokoza futhi izinto zazimhambela kuhle kakhulu nxa angalalela uJehova. (Khangela loZaga 5:​1, 2.) Kodwa kwakusenzakalani nxa angephula imithetho kaJehova? Impilo yakhe yayisiba nzima kakhulu (2 Sam. 12:​9, 10) Kodwa kwezinye izikhathi wayeke azithole esephakathi kobunzima lanxa engenzanga lutho olubi. Wayesenzani ngezikhathi ezinjalo? Wayethandaza kuJehova emtshela konke okumkhathazayo, uJehova abesemduduza amkhumbuze ukuthi uyamthanda kakhulu.—Hubo. 23:​1-6.

17. Singamlingisela njani uDavida?

¹⁷ Lathi kumele silingisele uDavida ngokuthandaza kuJehova simncenga ukuthi asincedise senze izinqumo ezizamthokozisa. Nxa singekela ukulalela uJehova sizenzele umathanda akumelanga simsole nxa izinto sezisiphendukela kusasa. (Gal. 6:​7, 8) Kodwa kungenzakala ukuthi ngesinye isikhathi sithwale nzima lanxa kungelalutho olubi esilwenzileyo. Ngezikhathi ezinjalo kumele sithandaze kuJehova simtshela indlela esizizwa ngayo njalo yena uzasiduduza.—Flp. 4:​6, 7.

QHUBEKA UVUMA UKUKHOKHELWA NGUJEHOVA

18. Kungani kumele sivume ukuqondiswa nguJehova? (Khangela lemifanekiso.)

¹⁸ Umbhalo womnyaka ka-2026 uthi: “Bayathokoza abakunanzelelayo ukuthi bayamdinga uNkulunkulu.” Kungani kuqakathekile ukuthi amazwi la angene athophele ezinhliziyweni zethu? Kungenxa yokuthi abantu abanengi lamuhla basemnyameni. Bazitshela ukuthi bangayikholisa impilo nxa bangazenzela abakufunayo kumbe balandele lokho abakutshelwa ngabanye kulokuthi bathokozise uMdali wabo. Manje singenzani ukuze singafanani labantu laba? Kumele siqhubeke sifunda ngoJehova, sigqoke ubuntu obutsha njalo sivumele ukuthi uJehova asivikele.