7 Unkulunkulu Uyayizwa Yini Imithandazo Yethu?

AKUTHANDABUZWA ukuthi uyafisa ukuzwa impendulo yombuzo lo. IBhayibhili likwenza kucace ukuthi uNkulunkulu uyayilalela imithandazo yabantu bakhe. Kodwa ukuthi uzawulalela yini umthandazo wakho kuya ngawe.

UJesu wasola abakhokheli abangamaJuda ngenxa yokuthi babesenza imithandazo yokufuna ukubukwa ngabantu. Wathi “sebewamukele wonke umvuzo wabo” ngoba bona ababekufuna yikubukwa ngabantu. Kodwa uNkulunkulu wayengasoze ayizwe imithandazo yabo. (UMathewu 6:5) Lalamuhla abantu abanengi abakhuleki ngendlela efunwa nguNkulunkulu futhi lokhu kwenza uNkulunkulu angayiphenduli imithandazo yabo.

UNkulunkulu uzayiphendula yini imithandazo yakho? Ye uzayiphendula kungelani lokuthi ungumhlobo bani lokuthi ukhuluma luphi ulimi kumbe ukuthi ulani empilweni. IBhayibhili lithi: “UNkulunkulu kakhethi, kodwa kuzo zonke izizwe uyamemukela umuntu omesabayo njalo owenza okulungileyo.” (ImiSebenzi 10:34, 35) Wena uyamesaba yini uNkulunkulu? Kutshoni ukwesaba uNkulunkulu? Kutsho ukumhlonipha lokwesaba ukwenza izinto ezingamthokozisiyo. Ukwenza okulungileyo kutsho ukuzimisela ukwenza intando kaNkulunkulu kulokwenza okufunwa nguwe kumbe ngabanye abantu. Uyafuna yini ukuthi uNkulunkulu ayilalele imithandazo yakho? IBhayibhili lingakunceda ukuthi uthandaze ngendlela ayifunayo.a

UNkulunkulu wayeyiphendula njani imithandazo ngezikhathi zakudala? Kukalutshwana lapho ayeyiphendula khona ngendlela eyisimangaliso. IBhayibhili litshengisa ukuthi izimangaliso zaphela ngemva kokufa kwabaphostoli bakaJesu. (1 KwabaseKhorinte 13:8-10) Kodwa lokhu sekusitsho ukuthi uNkulunkulu kayiphenduli yini imithandazo lamuhla? Ngitsho! Ake sixoxe ngokuthi uphendula imithandazo enjani.

Imithandazo yokucela ukuhlakanipha. UJehova ulenhlakanipho enkulu kakhulu. Nxa singacela ukuhlakanipha okuvela kuye, uzasinika khona ngesihle futhi lokho kuzasinceda ukuthi senze izinqumo ezinhle.—UJakhobe 1:5.

Imithandazo yokucela umoya ongcwele. Umoya ongcwele ngamandla kaNkulunkulu amakhulu kakhulu. Umoya lo uyasinceda ukuthi sibekezele njalo sihlaliseke nxa siphakathi kobunzima. Uphinda usincede ukuthi sibe lezithelo ezinhle. (KwabaseGalathiya 5:22, 23) UJesu wathi uNkulunkulu uzimisele ukusinika umoya ongcwele.—ULukha 11:13.

Imithandazo yokucela ukuba ngumngane kaNkulunkulu. (ImiSebenzi 17:26, 27) Abantu abanengi lamuhla bayalidinga iqiniso. Bafuna ukwazi ukuthi uNkulunkulu ungubani, ukuthi uhloseni ngomhlaba langabantu lokuthi bangasondela njani kuye. (UJakhobe 4:8) OFakazi bakaJehova bayakuthanda ukuxoxa labantu ngemibuzo le besebenzisa iBhayibhili.

Kuyini okukwenza ubale imagazini le? Ufisa ukwazi uNkulunkulu yini? Mhlawumbe le yiyo indlela aphendula ngayo umthandazo wakho.