3 Kumele Sithandaze Njani?

ABANTU abanengi bayazihlupha ngemikhuba eminenginengi nxa bethandaza. Ngokwesibonelo, bayazibuza ukuthi kumele bathandaze bemile kumbe beguqile yini lokuthi kufanele bakhulumeni emithandazweni yabo. Kodwa ukuhlola okutshiwo liBhayibhili kwenza sibone ukuthi umbuzo okumele sizihluphe ngawo ngothi, “Kumele sithandaze njani?”

IBhayibhili lilezibonelo zabantu ababethandaza kuNkulunkulu besezindaweni ezitshiyeneyo. Abantu labo babethandazela enhliziyweni kumbe bephumisela kusiya ngokuthi babengaphi lokuthi kwakusenzakalani ngalesosikhathi. Abanye babethandaza bekhangele phezulu ikanti abanye babekhothamisa amakhanda. Babengasebenzisi izithombe, amangqongqo kumbe imithandazo ebhalwe phansi kodwa ababekutsho emithandazweni yabo kwakusuka ezinhliziyweni zabo. Kuyini okwenza imithandazo yabo yaphendulwa?

Babethandaza kuNkulunkulu weqiniso uJehova, njengoba sibonile esihlokweni esidlulileyo. Kodwa kulokunye okuqakathekileyo ababekwenza esikuthola ku-1 Johane 5:14 othi: “Nanku esimthemba ngakho [uNkulunkulu]: ukuthi nxa sicela loba yini evumelana lentando yakhe, uyasizwa.” Kutshoni ukuthi imithandazo yethu kumele ivumelane lentando kaNkulunkulu?

Ukuze imithandazo yethu ivumelane lentando kaNkulunkulu kumele siyazi intando yakhe. Nxa singabala iBhayibhili sizayazi intando kaNkulunkulu. Lokhu sokusitsho ukuthi uNkulunkulu kasoze ayiphendule yini imithandazo yethu nxa singasozingcitshi zeBhayibhili? Hatshi. UNkulunkulu ufuna siyazi intando yakhe, siyizwisise besesisenza lokho asitshela khona. (UMathewu 7:21-23) Kumele imithandazo yethu ihambelane lalokho esikufundayo.

Ukuqhubeka sifunda ngoJehova langentando yakhe kuzasenza sibe lokholo oluqinileyo. Ukholo lalo luqakathekile endabeni yomthandazo. UJesu wathi: “Nxa lilokholo lizaziphiwa zonke izinto elizithandazelayo.” (UMathewu 21:22) Kodwa ukuba lokholo akutsho ukuphonguthatheka nje. Kutsho ukuba leqiniso lokuthi into ethile izakwenzakala sibili ngoba uyabe ulobufakazi obukwenza ungathandabuzi. (KumaHebheru 11:1) IBhayibhili lilobufakazi obutshengisa ukuthi uJehova ukhona sibili lanxa singamboni lokuthi uthembekile njalo uzimisele ukuphendula imithandazo yalabo abakholwa kuye. UJehova uzimisele ukuncedisa bonke abathandaza kuye bemcela ukuthi abanike ukholo oluqinileyo.—ULukha 17:5; UJakhobe 1:17.

Nanku okunye okuqakathekileyo okumele sikwenze nxa sithandaza. UJesu wathi: “Kakho ongeza kuBaba ngaphandle kokuthi eze ngami.” (UJohane 14:6) UJesu nguye owenza senelise ukuthandaza kuBaba wethu uJehova. Yikho watshela abalandeli bakhe ukuthi bathandaze ngebizo lakhe. (UJohane 14:13; 15:16) Lokhu akutsho ukuthi kumele sithandaze kuJesu kodwa sithandaza ngebizo likaJesu ngoba nguye osenza senelise ukukhuluma loBaba wethu ongcwele.

Abalandeli bakaJesu bake bathi kuye: “Nkosi, sifundise ukuthandaza.” (ULukha 11:1) Babengaceli ukuthi uJesu abafundise ukuthi bathandaze kubani kodwa babefuna ukwazi ukuthi kuyini okwakumele bakuthandazele.